Wāhanga 69
He whakakitenga mā roto i a Hōhepa Mete te Poropiti, ki Hairama, Ohaio, Noema 11, 1831. I whakaaetia te kohinga whakakitenga i hiahia ai kia whakaputaina ake i te huinga motuhake o Noema 1–2. I te 3 o Noema, i tāpirihia iho te whakakitenga e kitea ana hei wāhanga 133, i karangatia ake i muri iho ko te Apitihanga. I whakataua a Oriwa Kautere i mua kia waiho māna anō te tuhinga mō ngā kohinga whakakitenga me ngā whakahaunga ki Inipenehana, Mītori, mō te tānga. Ko tāna anō he kawe atu i ngā moni kua tukuna atu mō te hanganga ake o te Hāhi ki Mītori. Kei te tohutohu tēnei whakakitenga i a Hoani Witima kia haere tahi ia me Oriwa Kautere, ā, e tohutohua ana a Witima kia haere atu me te kohi i ngā mea hītori i tana karangatanga hei kaihītoria Hāhi, ā, hei kaihopu reo.
1–2, Me haere tahi a Hoani Witima rāua ko Oriwa Kautere ki Mītori; 3–8, Me kauhau ia, ā, me kohikohi, me hopu reo, me te tuhituhi i ngā mea hītori.
1 Whakarongo mai ki ahau, e ai tā te Ariki tō koutou Atua, hei painga mō taku pononga a Oriwa Kautere. Ehara i te mea he whai mātauranga i roto i ahau kia riro atu māna anō ngā whakahaunga me ngā moni hei kawe atu ki te whenua o Hīona, ki te kore tētahi e piri tahi ki a ia, tētahi mea e hē kore ana, e pono ana.
2 Nā reira, e hiahia ana au, te Ariki, kia haere tahi atu taku pononga a Hoani Witima me Oriwa Kautere;
3 Waihoki, me hono tonu tana tuhituhi me tana mahi i tētahi hītori mō ngā mea nui e aro atu ai ia, ā, e mōhio ai e pā ana ki taku hāhi;
4 Waihoki, kia whiwhi kaunihera me te āwhina i taku pononga a Oriwa Kautere me ētahi atu.
5 Waihoki, me tuku atu e aku pononga kei runga i te mata o te whenua i ā rātou kōrero mō ā rātou mahi tiaki ki te whenua o Hīona;
6 Nā te mea ka ai te whenua o Hīona hei nohonga, ā, hei wāhi whiwhi, ā, hei wāhi e mahi ai i ēnei mea.
7 Hei aha koa, tukua taku pononga a Hoani Witima kia maha ana haereere mai i tētahi wāhi ki tētahi wāhi, ā, mai i tētahi hāhi ki tētahi hāhi, kia ngāwari ake tana hopu mātauranga—
8 E kauhau ana, ā, e whakamārama ana, e tuhituhi ana, e kape ana, e whiriwhiri ana, ā, e hopu ana i ngā mea katoa hei painga ake mō te hāhi, ā, mō ngā whakatipuranga e tupu ake ana e tupu ake ai i runga i te whenua o Hīona, kia noho ai ki reira mai i tētahi whakatipuranga ki tētahi whakatipuranga, mō āke tonu atu. Āmine.