Wāhanga 75
He whakakitenga mā roto i a Hōhepa Mete te Poropiti, ki Amahata, Ohaio, Hanuere 25, 1832. E rua ngā whakakitenga rereke i roto i tēnei wāhanga (te tuatahi i ngā whiti 1 tae noa atu ki te 22, ā, ko te tuarua i ngā whiti 23 tae noa atu ki te 36) i hoatu i te rangi kotahi. Ko te mea kē, he huihuinga whānui o te hāhi i whakaaetia, ā, i whakamanaia ai a Hōhepa Mete hei Tumuaki o te Pirihitanga Teitei. I te hiahia ētahi erata ki te ako e pā ana ki ā rātou tino mahi. Ka puta mai ēnei whakakitenga.
1–5, Ka whai oranga tonutanga ngā erata pono e kauhau atu ai i te rongopai; 6–12, Me inoi kia whiwhi i te kaiwhakaaio, e whakaako i ngā mea katoa; 13–22, Ka noho ngā erata hei whakawā i te hunga e whakaparahako i tā rātou karere; 23–36, Me whai āwhina ngā whānau o ngā mihingare mai i te Hāhi.
1 He pono, he pono, tāku e mea atu nei ki a koutou, ko au te mea e kōrero pū anō ana i runga i te reo o tōku Wairua, ko Arepa me te Omeka pū anō, tō koutou Ariki me tō koutou Atua—
2 Whakarongo mai, E koutou kua homai i ō koutou ingoa kia haere atu ai ki te whakapuaki i taku rongopai, me te tapatapahi i taku māra waina.
3 Nana, ko taku kupu tēnei ki a koutou, nā, ko tāku e pai ai kia haere atu koutou, ā, kia kaua e pōturi atu, kia kaua rānei e hakirara engari kia kaha koutou ki te mahi—
4 E hiki ake ana i ō koutou reo anō nei ko te tangi o te tetere, e whakapuaki atu ana i te pono e rite ana ki ngā whakakitenga me ngā whakahaunga kua hoatu nei e ahau ki a koutou.
5 Ā pēnei, ki te pono koutou ka riro i a koutou ngā paihere maha, ā, ka karaunatia ki te hōnore, me te korōria, me te oranga mutunga kore, me te oranga tonutanga.
6 Nō reira, he pono tāku e mea atu nei ki taku pononga e Wiremu E. Makiririni, kei te murua e ahau te komihana i hoatu nei e au ki a ia kia haere atu ki ngā whenua whakaterāwhiti;
7 Ā, kei te hoatu e au tētahi komihana hou me tētahi whakahaunga hou, i konā au, te Ariki, e kohete i a ia mō ngā amuamu o tōna ngākau;
8 Ā, i hara ia; hei aha koa, kei te muru au i ana hara me te kī atu ki a ia anō, Haere koe ki ngā whenua ki te tonga.
9 Ā, tukua taku pononga a Ruka Teonehana kia haere tahi me ia, me te whakapuaki i ngā mea kua whakahaua atu nei rāua e au—
10 E karangatia atu ana i runga i te ingoa o te Ariki mō te Kaiwhakaaio, māna e whakaako ki a rāua ngā mea katoa e tika pū ana anō mō rāua—
11 E inoi ana i ngā wā katoa kia kaua rāua e hemo; ā, ki te mea ka pēnei rāua, ka piri au ki a rāua tae atu pū anō ki te mutunga.
12 Nana, koinei tā te Ariki tō kōrua Atua e pai ai e pā ana ki a kōrua. Koia anō. Āmine.
13 Hei āpiti anō, he pono tā te Ariki, tukua taku pononga a Orihana Haiti rāua ko taku pononga a Hamuera H. Mete kia haere atu ki ngā whenua whakaterāwhiti, me te whakapuaki i ngā mea kua whakahaua nei rāua; ā, i te mea ka ū rāua, nana, ka piri tahi atu au ki a rāua tae noa pū anō ki te mutunga.
14 Hei āpiti anō, he pono tāku e mea atu nei ki taku pononga a Raimana Teonehana rāua ko taku pononga a Orihana Parata, ka haere anō hoki rāua ki ngā whenua whakaterāwhiti; ā nana, titiro, kei te piri tahi au ki a rāua, tae noa pū anō ki te mutunga.
15 Hei āpiti anō, ko taku kupu tēnei ki taku pononga a Eha Tāte rāua ko taku pononga a Kawha Wirihana, kia haere anō hoki rāua ki ngā whenua whakaterāwhiti, me te whakapuaki atu i taku rongopai, pērā i tāku i whakahau ai ki a rāua.
16 Ā, ko te tangata e pono ana te mea e taea e ia ngā mea katoa, ā, ka mairangatia ake hei te rā whakamutunga.
17 Hei āpiti anō, ko taku kupu tēnei ki taku pononga a Meha N. Arahi rāua ko taku pononga a Pāra Rihiki, tukua rāua kia haere ki te whenua o te tonga.
18 Āe rā, tukua rātou katoa kia haere, pērā i tāku i whakahau ai ki a rātou, e haere atu ana i tētahi whare ki tētahi whare, ā, i tētahi papakāinga ki tētahi papakāinga, ā, i tētahi pā ki tētahi pā.
19 Ā, me waiho iho tō manaakitanga ki runga ki taua whare e kuhu ai koutou, e whakawhiwhia ai koutou.
20 Ā, me wehe wawe atu koutou i taua whare e kuhu ai koutou engari kāore rātou e manako mai ki a koutou, ā, ruiruia iho te puehu i ō koutou waewae hei whakaatu i te hē mō rātou.
21 Ā, ka kī koutou i te hari me te koa; ā, kia mōhio ki tēnei, nā, hei te rā whakawā ka tū koutou hei kaiwhakawā mō taua whare, ā, ka whakahēngia rātou;
22 Ā, ka pai ake mō te hunga whakapono kore i te rā whakawā, i tō taua whare; nō reira, kia whītikiria ake tōu hope, ā, kia pono, kātahi ka taea e koutou ngā mea katoa, ā, ka mairangatia ake hei te rā whakamutunga. Koia anō. Āmine.
23 Hei āpiti anō, pēnei tā te Ariki ki a koutou, E koutou e ngā erata o taku hāhi, ngā mea kua homai i ō koutou ingoa e mōhio ai koutou ki tāna e pai ai e pā ana ki a koutou—
24 Nana, ko taku kupu tēnei ki a koutou, nā, ko tā te hāhi mahi he āwhina ki te tautoko i ngā whānau o taua hunga me te tautoko i ngā whānau o te hunga kua karangatia ake nei, ā, te hunga e tika pū ana kia tonoa atu ki te ao ki te whakapuaki i te rongopai ki te ao.
25 Nā reira, kei te hoatu e au, e te Ariki, tēnei whakahaunga ki a koutou, kia rapu wāhi mō ō koutou whānau, ki te mea e pai ai ō koutou tuākana ki te whakatūwhera i ō rātou ngākau.
26 Ā, tukua ngā mea pērā kia rapu kāinga mō ō rātou whānau, me te tautoko a te hāhi mō rātou, kei hē tā rātou haere ki te ao, ahakoa ki te rāwhiti, ki te uru rānei, ki te raki rānei, ki te tonga rānei.
27 Tukua rātou kia ui mai kātahi ka whiwhi rātou, pātōtōngia kātahi ka tūwheratia ake ki a rātou, ā, ka whakamōhiotia nō runga rawa, e te Kaiwhakaaio pū anō, ki hea rātou haere ai.
28 Hei āpiti anō, he pono tāku e mea atu nei ki a koutou, nā, e tika ana mā tēnā tangata, mā tēnā tangata tōna ake whānau e whāngai, tukua ia kia whāngai, ā, kua kore rawa e ngaro i a ia tōna karauna; ā, tukua ia kia mahi i te hāhi.
29 Tukua ia tangata kia ū i roto i ngā mea katoa. Ā, kua kore e whai wāhi te tangata hakirara i roto i te hāhi, ki te kore ia e rīpenetā me te whakatika i ana mahi.
30 Nā reira, tukua taku pononga a Himiona Kāta rāua ko taku pononga a Ima Hārihi kia kotahi mai i roto i te minitatanga;
31 Me taku pononga anō hoki a Etera Teia rāua ko taku pononga a Tamati P. Māhi;
32 Me taku pononga anō hoki a Hairama Mete rāua ko taku pononga a Renara Kahuna;
33 Me taku pononga anō hoki a Raniera Tanatana rāua ko taku pononga a Heimona Paranatana;
34 Me taku pononga anō hoki a Hiriwheta Mete rāua ko taku pononga a Kiriona Kāta;
35 Me taku pononga a Rakara Eame rāua ko taku pononga a Tiwini Panati;
36 Me taku pononga a Maika P. Weratana rāua ko taku pononga a Erene Mete. Koia anō. Āmine.