Wāhanga 94
He whakakitenga mā roto i a Hōhepa Mete te Poropiti, ki Katarana, Ohaio, Akuhata 2, 1833. Ka whakataua a Hairama mete rātou ko Reinara Kahuna, ko Iarere Kāta hei kōmiti hanga whare mō te Hāhi.
1–9, Ka hoatu e te Ariki tētahi whakahaunga e hāngai ana ki te whakatūnga ake o tētahi whare mō te mahi a te Tumuakitanga; 10–12, Ka hangaia ake tētahi whare tā; 13–17, Ka whakataua ētahi taonga tuku iho.
1 Hei āpiti anō, he pono tāku e mea atu ki a koutou, e ōku hoa, kei te hoatu e au tētahi whakahaunga ki a koutou, kia tīmata koutou i tētahi mahi whakatakoto, whakariterite hoki i tētahi tīmatanga, me tētahi tūāpapa mō te pā o te pou ā-rohe o Hīona, ki konei i te whenua o Katarana, e tīmata ana ki tōku whare.
2 Ā nana, me rite tā koutou mahi ki te tauira kua hoatu nei e au ki a koutou.
3 Ā, tukua te wāhanga tuatahi i te taha tonga kia whakatapua ki ahau mō te hanganga o tētahi whare mō te tumuakitanga, mō te mahi a te tumuakitanga, mō te whakawhiwhi i ngā whakakitenga; mō te mahi hoki a te minitatanga a te tumuakitanga, i roto i ngā mea katoa e hāngai ana ki te hāhi me te kīngitanga.
4 He pono tāku e mea atu nei ki a koutou, nā, me hanga kia rima tekau mā rima pūtu te whānui, ā, kia ono tekau mā rima pūtu te roa, i roto i te kōti whakaroto.
5 Ā, ka hangaia hoki tētahi kōti i raro rawa me tētahi kōti i runga rawa, e rite ana ki te tauira e hoatu ai ki a koutou a muri ake nei.
6 Ā, ka whakatapua ki te Ariki mai i te tūāpapa o reira, e rite ana ki te ritenga o te tohungatanga, e rite ana ki te tauira e hoatu ai ki a koutou a muri ake nei.
7 Ā, ka whakatapua katoatia atu ki te Ariki mō te mahi a te tumuakitanga.
8 Ā, e kore e tukua tētahi mea poke kia kuhu ai ki roto rā; ā, kei reira hoki tōku korōria, ā, kei reira hoki tōku mauri.
9 Engari mēnā ka kuhu atu tētahi mea poke ki roto rā, e kore tōku korōria e tau ki reira; ā, e kore tōku mauri e kuhu atu ai ki roto rā.
10 Hei āpiti anō, he pono tāku e mea atu nei ki a koutou, ka whakatapua iho te wāhanga tuarua ki te tonga ki ahau mō te hanganga ake o tētahi whare ki ahau, mō ngā mahi tā o te whakapākehātanga o aku karaipiture, ā, me ngā mea katoa e whakahau ai au i a koutou.
11 Ā, ka rima tekau mā rima pūtu te whānui, ā, ka ono tekau mā rima pūtu te roa, ā, i roto i te kōti whakaroto; ā, i reira tētahi kōti i raro iho, me tētahi kōti i runga rawa.
12 Ā, ka whakatapua katoatia tēnei whare ki te Ariki mai i tō reira tūāpapa, mō ngā mahi tā, i roto i ngā mea katoa e whakahau ai au i a koutou, kia tapu rawa, kia kaua e whakapokea, e rite ana ki te tauira i roto i ngā mea katoa e hoatu nei ki a koutou.
13 Ā, hei te wāhanga tuatoru e whiwhi ai taku pononga a Hairama Mete i tana taonga tuku iho.
14 Ā, hei ngā wāhanga tuatahi, tuarua i te taha raki e whiwhi ai aku pononga a Reinara Kahuna rāua ko Iarere Kāta i ō rāua taonga tuku iho–
15 Kia meatia e rāua te mahi kua whakataua atu nei ki a rāua, kia tū ai hei kōmiti ki te waihanga ake i aku whare, e rite ana ki te whakahaunga, kua hoatu nei e au, e te Ariki te Atua, kia koutou.
16 Me kaua e waihanga ake i ēnei whare kia hoatu e au tētahi whakahaunga ki a koutou e pā ana ki aua whare.
17 Ināianei ā, kāore au e hoatu mea anō ki a koutou i tēnei wā. Āmine.