I te mea kua tukua atu etahi panuitanga i roto i nga nu pepa, i te Pa Tote, a kua panuitia nuitia era, e mea ana kua ripoatatia i roto i te ripoata a te Iuta Komihana (Utah Commission) ki te Hekeretari o te Kawanatanga (Secretary of the Interior) kei te whakaritea tonutia nga marenatanga punarua, a mai ano i a Hune, ara, i roto i te tau kua taha ake nei e wha tekau, nuku atu ranei nga marenatanga pera i roto i te Takiwa o Iuta; a tera ra hoki kei te kauwhau matanui nga kai whakahaere o te Hahi, kei te whakaako, kei te akiaki hoki kia whakaritea tonutia te tikanga o te punarua,

No reira ahau, te Tumuaki o te Hahi o Ihu Karaiti o te Hunga Tapu o nga Ra o Muri Nei, ka mea, i runga ano i te pono, kei te he enei panuitanga. Kahore rawa matou e whakaako ana i te tikanga o te punarua; kahore rawa hoki e whakaaetia ana e matou kia uru tetahi tangata ki taua tikanga, a tenei ano ahau te whakahe i te meatanga, e wha tekau nga marenatanga punarua kua whakaritea i roto i o matou Temepara, i tetahi atu wahi ranei o te Takiwa, i roto i te wa kua kiia ake ra.

Kotahi anake to ripoata kua tae mai ki a au e mea ana i whakaritea tetahi marenatanga i roto i te Whare Hiiri, i te Pa Tote, i te Waru (Spring) o te tau 1889, engari kahore ano ahau kia mohio noa na wai tena i whakarite; kore rawa hoki ahau i whakamohiotia ki taua mea. Engari, na taua whakaritenga ka tere tonu taku whakahau kia whakahoroa te Whare Hiiri ki raro.

Na, i te mea kua hanga ture e te Kawanatanga (Congress) hei whakakahore i nga marenatanga punarua, a i te mea kua tuturu aua ture he mea na te whakatau o te kooti, no kona ka mea ahau, e pai ana ahau ki te tautoko i aua ture, a tera ra ano ka akiaki ahau i nga mema o te Hahi, ko ahau nei tona Tumuaki, kia peratia hoki e ratou.

Kahore kau he mea i roto i aku akoranga ki te Hahi, i o aku hoa mahi ranei, i roto i te wa kua kiia ake ra e taea ana te whakaaro kei roto he whakahaunga, he akiakinga ranei kia whakaritea te tikanga o te punarua, a ina kua korero tetahi Kaumatua o te Hahi mo runga i taua tikanga kua tere tonu te whakawa i a ia. A, nana, ka kiia matanuitia e ahau ko aku tohutohu ki te Hunga Tapu o nga Ra o Muri Nei kia kaua ratou e uru ki tetahi marenatanga kahore e whakaaetia ana e te ture o te whenua.

Na te Tumuaki, na Roreno No tenei e whai ake nei:

“I te mea e tautokotia ana a Wiriwha Wuruwha hei Tumuaki mo te Hahi o Ihu Karaiti o te Hunga Tapu o nga Ra o Muri nei, a ko ia anake te tangata i runga i te whenua i tenei wa kei a ia nga kii mo te tikanga o te Hiiri, e tono ana ahau kia ma tatou e tauto toko i a ia e whai mana ana ki te panui i te whakaaturanga kua korerotia ki a tatou, he mea tuhi i te 24 o nga ra o Hepetema, 1890, a i roto i tenei Hui Tau kia whakaae tatou, ara te Hahi ki tona whakaaturanga mo te taha o nga marenatanga punarua he mea tuturu.”

Na, ka whakaae te katoa, he mea na te pooti, ki te tautoko i te tono kua korerotia ake nei.