Wāhanga 87
He whakakitenga, he poropititanga mō te pakanga, mā roto i a Hōhepa Mete te Poropiti, ki Katarana, Ohaio, e pātata ana rānei ki reira, Tīhema 25, 1832. He nui ngā tautohetohenga i roto i ngā Whenua Tōpū o Amerika i tēnei wā mō te mahi taurekareka me tā Kararaina ki te Tonga whakakorekoretanga i ngā tāriwhi kāwana. E ai ki te Hītori o Hōhepa Mete e mea ana “e kaha kitea ake ana” ngā “āhuatanga o te raruraru i waenganui i ngā iwi” e ai tā te Poropiti titiro “i ō ngā wā i te tīmatanga o tā te Hāhi putanga ake i te koraha.”
1–4, Ka matakitea mai te pakanga ki waenganui i ngā Whenua Tōpū ki te Raki me ngā Whenua Tōpū ki te Tonga; 5–8, Ka taka iho ngā aituā nunui ki runga ki ngā tāngata katoa o te whenua.
1 He pono, pēnei tā te Ariki e pā ana ki ngā pakanga meake pahawa ake, e tīmata ana ki te tutūnga puehu i Kararaina ki te Tonga, nā, ko tōna mutunga, ka tini ngā wairua e whakamatea;
2 Ā, ka tae mai te wā e ringihia atu ai te pakanga ki runga ki ngā iwi katoa, e tīmata ana ki tēnei wāhi.
3 Nana rā, ka weheruatia ngā Whenua Tōpū ki te Tonga i ngā Whenua Tōpū ki te Raki, ā, ka karangahia atu e ngā Whenua Tōpū ki te Tonga ki ētahi atu iwi, arā, ki te iwi e kīa nei ko Piritana Nui, ā, ka karangatia atu anō ētahi atu iwi, kia tiaki i a rātou anō i ērā atu iwi; kātahi ka ringihia atu te pakanga ki runga ki ngā iwi katoa.
4 Ā, ka pahawa ake i muri iho i ngā rā maha, ka tū atu ngā taurekareka ki ō rātou rangatira, e whakahuihuia ai, ā, e whakaakona ai mō te pakanga.
5 Ā, ka pahawa ake anō, nā, ka whakahuihui mai anō ngā toetoenga o te whenua i a rātou anō, ā, ka tino riri rawa atu rātou, ā, ka whakararuraru rātou i ngā Tauiwi ki tētahi raruraru kino rawa.
6 Ā pēnei, ka tangi ngā tāngata o te whenua he mea nā te hoari me te whakaheke toto; ā, ki te matekai, ki te urutā, ki te rū whenua, ki te whaititiri o te rangi, ki te hikohikonga uira kaha anō hoki, ka meinga ngā tāngata o te whenua kia rongo ai i te riri, i te tūpehupehu, me te ringa whiu o te Atua Kaha Rawa, kia oti rā anō te whakangaromanga i whakapuakina ake ai mō ngā iwi katoa.
7 Kia mutu rā anō te rewanga ake o te tangi o te hunga tapu, me te toto o te hunga tapu, ki roto ki ngā tāringa o te Ariki o Hapaoti, mai i te whenua, kia rapua te utu i ō rātou hoariri.
8 Nā reira, e tū koutou i ngā wāhi tapu, ā, kaua e nukua, tae noa ki te putanga mai o te rā o te Ariki; nana rā, e hohoro mai ana ia, e ai tā te Ariki. Āmine.