1. E rua nga ahua tangata kei te rangi—ara, tuatahi ko nga anahera he hunga ratou kua whakaarahia ake i te mate, kua whiwhi hoki ki nga tinana whai kikokiko, whai wheua.

2. Ara, pera me ta te Karaiti i mea ra, “Whawhakia ahau kia kite ai koutou, kahore hoki o te wairua kikokiko, wheua ranei, penei me oku e kitea nei e koutou.”

3. Tuarua, ko nga wairua o te hunga tika kua oti te mea kia tino tika—ara ko te hunga ratou kahore ano kia whakaarahia ake, otiia e whiwhi ana ki taua kororia ano.

4. Ki te haere mai he karere, me te korero mai he kupu ta te Atua kei a ia, hoatu to ringaringa ki a ia, me te tono atu ano kia ru korua.

5. Me he mea ia he anahera, ka ru ia ki a koe, a ka rongo koe ki tona ringa.

6. Otiia me he mea ia he wairua no tetahi tangata tika kua meinga kia tino tika, ka haere mai ia i roto i tona kororia; no te mea koia ra anake te ahua e ahei ai ia te haere mai.

7. Tono atu ia kia ru ia ki a koe, heoi e kore ia e totoro mai i tona ringa, no te mea ka takahi i te ture o te rangi ki te maminga te tangata tika; heoi ka korero mai ia i te kupu i tonoa mai ai ia.

8. Me he mea ko te rewera e haere mai ana ano he anahera no te maramatanga, ki te tono atu koe kia ru ia ki a koe, ko te totoro mai tona ringa, heoi e kore koe e rongo i tona ringa: ma konei ka mohiotia ai ia e koe.

9. Ko nga kii enei e toru e mohiotia ai e koe na te Atua ranei te mahi, e hara ranei.