Wāhanga 47
He whakakitenga mā roto i a Hōhepa Mete te Poropiti ki Katarana, Ohaio, Māehe 8, 1831. I āhua rangirua a Hoani Witima, koia kē nei kua mahi hei karaka ki te Poropiti, i te wā i tonoa ia kia mahi hei kaihītoria, hei kaihopu kōrero hoki mō te Hāhi, e whakakī ana i te tūranga o Oriwa Kautere. Nāna nei i tuhi, “Kāore au i te tino hiahia ki te mahi i tērā mahi, engari, i kite au me ū ki tā te Ariki e pai ai, ā, ki te hiahia ia kia pērā, e hiahia ana au kia whakakitea mai e ia mā roto i a Hōhepa te Matakite.” Whai muri iho i tā Hōhepa whiwhi i tēnei whakakitenga, i whakaae a Hoani Witima, ā, i mahi ia i roto i te tūranga i whakaritea ai.
1–4, Kua whakaritea a Hoani Witima kia puritia ngā hītori o te Hāhi me te tuhituhi mō te Poropiti.
1 Nana, e tika pū ana i roto i ahau kia tuhituhi taku pononga a Hoani me te pupuri i tētahi hītori i tēnā wā, i tēnā wā, me te āwhina i a koe, e taku pononga e Hōhepa, i te tuhituhinga o ngā mea katoa e hoatu ai ki a koe, kia karangahia ake ia ki ētahi atu mahi.
2 Anō, he pono tāku e mea atu nei ki a koe, e āhei ana anō ia te hiki ake i tōna reo i roto i ngā hui, i ngā wā e tika ana.
3 Hei āpiti anō, ko taku kupu tēnei ki a koe, nā, ka whakataua ki a ia kia puritia ake ngā tuhinga mō te hāhi me te hītori o te hāhi i ngā wā e haere ake nei; nā te mea kua whakataua ki a Oriwa Kautere tētahi atu tūranga.
4 Nā reira, ka hoatu ki a ia, ki te mea ka ū tonu ia, he mea nā te Kaiwhakaāio, kia tuhia ēnei mea. Koia anō. Āmine.