Wāhanga 6
He whakakitenga mā roto i a Hōhepa Mete te Poropiti rāua ko Oriwa Kauteri, ki Hamoni, Penihiwheinia, Aperira 1829. I tīmata tā Oriwa Kautere mahi hei kaituhi i roto i ngā mahi whakapākehā o te Pukapuka a Moromona, Aperira 7, 1829. I whiwhi kē ia i tētahi whakakitenga ā-wairua e pā ana ki te pono o tā te Poropiti whakaaturanga e pā ana ki ngā papa i whaowhaoa ai i runga rā te Pukapuka a Moromona. I inoia ake e te Poropiti te Ariki mā roto i te Ūrama me te Tāmama kātahi ka whiwhi i tana whakautu.
1–6, Ka whai whakaoranga ngā kaimahi i roto i tō te Ariki whira; 7–13, Kāore he takohatanga e nui atu ana i te takohatanga o te whakaoranga; 14–27, Ka puta mai te whakaaturanga o te pono i runga i te mana o te Wairua; 28–37, Titiro atu ki te Karaiti, ā, me mahi pai i ngā wā katoa.
1 Meake puta ake tētahi mahi nui whakamīharo ki ngā tamariki a te tangata.
2 Nana, ko au te Atua; whakarongo mai ki taku kupu, he mea hohoro ia, ā, he kaha ia, he koi ake i tētahi hoari matarua, ā, wehea noatia ngā ponapona me te hinu wheua; nō reira whakarongo mai ki aku kupu.
3 Nana, kua mā te whira e rite kē ana kia hauhakengia; nō reira, ko te tangata e hiahia ana ki te kokoti, tukua ia kia āki atu e ia tana toronaihi i runga i tōna kaha katoa, ā, kia kotia i te roanga ake o te rā, kia whakapātakahia ake mō tōna whakaoranga mutunga kore i roto i te kīngitanga o te Atua.
4 Āe rā, ko te tangata e āki iho ana i tana toronaihi kokoti ai, kua karangatia taua mea e te Atua.
5 Nō reira, ki te inoi mai koe i ahau ka whiwhi koe; ki te pātōtō koe ka huakina atu ki a koe.
6 Nā, i te mea kua inoi mai kōrua, nana, ko taku kupu tēnei ki a kōrua, puritia aku whakahaunga, ā, whāia kia whakaputa mai me te whakapūmau i te kaupapa o Hīona;
7 Kaua e whai atu i ngā taonga engari i te mātauranga, ā nana, ka whakatūwheratia ake ngā mea ngaro o te Atua ki a kōrua, kātahi kōrua ka whakawhairawatia. Nana, he whairawa te tangata kei a ia te oranga tonutanga.
8 He pono, he pono, tāku e mea atu nei ki a kōrua, ka rite pū anō ki tā kōrua e hiahia nei i ahau; ā, ki te hiahia kōrua, ka meinga kōrua hei mea e puta ai ngā painga maha ki tēnei whakatipuranga.
9 Kaua e kōrero kē atu i te rīpenetātanga; puritia aku whakahaunga, me te āwhina kia whakaputaina mai taku mahi, e rite ana ki aku whakahaunga, ā, ka manaakitia kōrua.
10 Nana kei a koe tētahi takohatanga, ā, kua manaakitia koe nā tō takohatanga. Kia mahara he mea tapu ia, ā, i ahu mai i runga rawa—
11 Ā, ki te inoi mai koe, ka mōhio koe ki ngā mea ngaro koia he mea nui whakamīharo; nō reira māu tō takohatanga e whakapakari, kia kite ai koe i aua mea ngaro, kia taea e koe te kukume mai i ngā mea tokomaha ki te mātauranga o te pono, āe rā, whakapakepakehia rātou mō te hē o ā rātou mahinga.
12 Kaua e whakamōhiotia atu ki ētahi e pā ana ki tō takohatanga hāunga ko ngā mea o tō whakapono. Kaua e tākaro i ngā mea tapu.
13 Ki te mahi pai koe, āe rā, me te ū pono tae atu ki te mutunga, ka whakaorangia koe i roto i te kīngitanga o te Atua, koia te takohatanga nui ake i ngā takohatanga katoa a te Atua; nā te mea kāore he takohatanga i nui ake i te takohatanga o te whakaoranga.
14 He pono, he pono, tāku e mea atu nei ki a koutou, kua manaakitia koe mō ngā mea kua meatia nei e koe; nā te mea kua inoi mai koe ki ahau, ā nana, i rite te nui o ngā tohutohu i runga i tōku Wairua ki te nui o tō inoitanga mai ki ahau. Me i kore i pēnā, kua kore koe i haere mai ai ki te wāhi e tū mai ana koe i tēnei wā.
15 Nana, e mōhio ana koe kua inoi mai koe ki ahau, ā, nāku tō hinengaro i whakamārama; ināianei ā, e kōrero atu ana au i ēnei mea ki a koe kia mōhio ai koe kua whakamāramahia ake koe e te Wairua o te pono;
16 Āe rā, kei te kōrero au ki a koe, kia mōhio ai koe, nā, kāore he mea atu anō hāunga ko te Atua e mōhio ana ki ōu whakaaro me ngā hiahia o tōu ngākau.
17 Kei te kōrero atu au i ēnei mea ki a koe hei whakaaturanga ki a koe—nā, he pono ngā kupu, te mahi rānei e tuhia mai nei e koe.
18 Nō reira, kia tākare tonu; e tū i te taha o taku pononga a Hōhepa, kia piripono, i roto i ngā āhuatanga uaua katoa e tau mai ai ki a ia mō te kupu te take.
19 Whakatūpatoria ia i runga i ana hē, waihoki me whakarongo koe ki ana whakatūpato. Kia manawanui; kia whaiwhakaaro, kia taikaha kore; kia whaimanawanui kia whaiwhakapono, kia whaitūmanako, ā, kia whaiaroha noa.
20 Nana, ko Oriwa koe, kua kōrero atu nei au ki a koe he mea nā ō hiahia; nō reira whakapātakahia ake ēnei kupu i roto i tō ngākau. Kia pono, ā, kia tākare i runga i te pupuri i ngā whakahaunga a te Atua, ā, māku koe e karapoti ki ngā ringa o tōku aroha.
21 Nana, ko Ihu Karaiti ahau, te Tama a te Atua. Ko ahau tērā i haere mai ai ki ōku ake, ā, kīhai ōku ake i whakawhiwhi mai i ahau. Ko au te māramatanga e tiaho atu nei i te pōuritanga, ā, kāore te pōuritanga e mārama atu ana.
22 He pono, he pono, tāku e mea atu nei ki a koe, ki te hiahia atu koe i tētahi atu whakaaturanga, karawhiua atu tō hinengaro ki runga i te pō i karanga mai nei koe ki ahau i roto i tō ngākau, e mōhio ai koe e pā ana ki te pono o ēnei mea.
23 Kāore au i kōrero rangimārie atu ki tō hinengaro e pā ana ki te take? He aha kē atu te whakaaturanga nui ake i te mea nā te Atua?
24 Ināianei ā, nana, kua whiwhi koe i tētahi whakaaturanga; nā te mea mehemea kua kōrero atu au ki a koe i ngā mea kāore e mōhiotia ana e te tangata kotahi kāore anō rānei koe kia whiwhi i tētahi whakaaturanga?
25 Ā, nana, ka tuku atu au i tētahi takohatanga ki a koe, ki te hiahia mai i ahau, ki te whakapākehā, e rite pū ana anō ki taku pononga a Hōhepa.
26 He pono, he pono, tāku e mea atu nei ki a koe, i reira ngā tuhinga e mau nei te nuinga o taku rongopai, kua kaiponuhia nā te whakarihariha o te iwi;
27 Ināianei ā, ka whakahau au ki a koe, nā, mehemea he hiahia pai ōu—he hiahia kia whakapātakahia ake mōu ake i te rangi—kātahi ka āwhina koe i te kawenga mai ki te māramatanga, i runga i tō takohatanga, aua wāhi o aku karaipiture kua hunaia he mea nā te hē.
28 Ināianei ā, nana, ka hoatu au ki a koe, ki taku pononga a Hōhepa anō hoki, ngā kī o tēnei takohatanga, e kawea mai nei tēnei minitatanga ki te māramatanga; ā, ka whakapūmautia ia kupu, ia kupu e te māngai o ngā kaiwhakaatu tokorua, tokotoru rānei.
29 He pono, he pono, tāku e mea atu nei ki a kōrua, ki te whakaparahako rātou i aku kupu, me tēnei wāhanga o taku rongopai me taku minitatanga, kua manaakitia kōrua, nā te mea kāore e nui ake ana ā rātou mahi e taea ana ki a kōrua i tā rātou ki ahau.
30 Ā, ki te pērā tā rātou meatanga atu ki a kōrua i tā rātou meatanga ki ahau, kua manaakitia kōrua, i te mea ka noho tahi kōrua me au i runga i te korōria.
31 Engari ki te whakaparahako rātou i aku kupu, e whakapūmauhia nei e te whakaaturanga e whakaaturia mai nei, kua manaakitia rātou, kātahi kōrua ka hari i runga i ngā hua o ā kōrua mahi.
32 He pono, he pono, tāku e mea atu nei ki a kōrua, he pērā i tāku i kī atu ai ki aku apataki, hei ngā wāhi e mine atu ai tētahi tokorua, tokotoru rānei i runga i tōku ingoa, mō te take kotahi, nana, kei reira au i waenganui i a rātou—e rite ana ki ahau i waenganui i a kōrua.
33 Kaua e wehi ki te mahi pai, e aku tama, nā te mea ko ngā mea katoa e ruirui ai kōrua, koia hoki tāu e kokotia ai; nō reira, ki te ruirui kōrua i ngā mea pai ka kokoti anō hoki kōrua i ngā mea pai hei taonga mā kōrua.
34 Nō reira, kei wehi, e te kāhui iti; mahi pai; tukua kia whakakotahi mai nei te whenua me te ao rēwera kia tū atu nei ki a kōrua, nā te mea mēnā kua hangaia kōrua ki runga i tōku kāmaka, e kore rātou e toa.
35 Nana, kāore au e whakahē i a kōrua; haere i runga i ō kōrua huarahi, ā, kaua e hara anō; mahia ngā mahi nāku nei kōrua i whakahau i runga i te whaiwhakaaro.
36 Titiro mai ki ahau i ngā whakaaro katoa; kaua e rangirua, kaua e wehi.
37 Tirohia ngā taotū i werohia nei tōku taha, me ngā nawe hoki o ngā whao i ōku ringaringa me ōku waewae; kia pono, puritia aku whakahaunga, ā, ka whiwhi kōrua ki te kīngitanga o te rangi.