Wāhanga 7
He whakakitenga mā roto i a Hōhepa Mete te Poropiti rāua ko Oriwa Kautere, ki Hamoni, Penihiwheinia, Aperira 1829, i te wā i inoi rāua mā roto i te Ūrama me te Tāmama mehemea noho mai ai a Hōani, te mea arohaina, i roto i te kikokiko, i mate rānei. He mea whakapākehātia te whakakitenga nei nō tētahi tuhinga o te pukapuka i meatia nei ki runga i tētahi kiri hipi e Hōani, ā, i hunaia ake e ia anō.
1–3, Ka ora tonu a Hoani te mea arohaina tae noa atu ki te haerenga mai o te Ariki; 4–8, Kei te puritia e Pita, Hēmi me Hoani ngā kī o te rongopai.
1 Ā, ka kī mai te Ariki ki ahau: E Hoani, e tāku e arohaina nei, he aha tāu e hiahia mai nā? Nā te mea ki te inoi mai koe i tāu e hiahia mai nā, ka tukuna atu ki a koe.
2 Ā, ka kī atu au ki a ia: E te Ariki, homai ki ahau he kaha i runga i te mate, kia ora tonu ai au me te kukume mai i ngā wairua ki a koe.
3 Ā, ka kī mai te Ariki ki ahau: He pono, he pono, tāku e mea atu nei ki a koe, nā te mea kei te hiahia koe ki tēnei mea ka noho mai koe kia tae mai au i runga i tōku korōria, ā, ka poropiti koe i mua i ngā iwi, ngā hapū, ngā reo me ngā huihuinga tāngata.
4 Ā, mō tēnei take i kī atu ai te Ariki ki a Pita: Ki te tuku au kia noho tonu mai ia tae noa ki taku haerenga mai, he aha tēnā ki a koe? Nā te mea e hiahia mai ana i ahau kia kukume mai ia i ngā wairua ki ahau, engari kei te hiahia koe kia haere wawe mai koe ki ahau ki roto ki taku kīngitanga.
5 Ko taku kupu tēnei ki a koe, e Pita, he hiahia pai tēnei; engari i te hiahia tāku e arohaina nei kia mahi atu anō, kia mahi rānei i tētahi mahi nui ake i tāna i mea ai i mua.
6 Āe rā, kua tīmata ia i tētahi mahi nui ake; nō reira māku ia e mea kia rite ki te ahi muramura me tētahi anahera minita; māna e minita mō te hunga e whakawhiwhi nei ki te whakaoranga, arā, te hunga e noho mai ana i runga i te whenua.
7 Ā, māku koe e mea kia minita atu ki a ia, me tō teina a Hēmi; ā, ka hoatu e au ki a koutou tokotoru tēnei mana me ngā kī mō tēnei minititanga tae noa atu ki taku haerenga mai.
8 He pono tāku e mea atu nei ki a kōrua, ka whiwhi kōrua e rite ana ki ō kōrua hiahia, nā te mea e koa ana kōrua i runga i ō kōrua i hiahia mai nā.