1. Whakarongo, e koutou, nga kaumatua o taku Hahi, kua mine mai i runga i toku ingoa, koia nei a Ihu Karaiti, te Tama a te Atua ora, te Kai-whakaora o te ao: ki te mea ka whakapono ratou ki taku ingoa, me te mau ano ki aku whakahaunga,

2. Ka mea nei ano ahau ki a koutou, whakarongo kia rongo hoki, kia ngohengohe ano ki te ture e hoatu ai e ahau ki a koutou;

3. No te mea, he pono, ko taku e mea nei, i runga i te mea kua mine tahi koutou kia rite ki taku i whakahau ai ki a koutou, a e tapatahi ana hoki a koutou whakaaro mo tenei mea kotahi, kua inoi ake ano hoki ki te Matua i runga i toku ingoa, he pono, ka whiwhi koutou.

4. Nana, he pono, taku e mea nei ki a koutou, ka hoatu e ahau tenei whakahaunga tuatahi, kia haere atu koutou i runga i toku ingoa, ia tangata, ia tangata o koutou, ko aku pononga ia a Hohepa Mete, tamaiti, raua ko Hirini Rikitana, aua e haere.

5. A ka hoatu e ahau he whakahaunga ki a raua kia haere atu raua mo tetahi wa poto, a ka whakaaturia e te mana o toku Wairua te wa e hoki mai ai raua;

6. Na, me haere atu koutou takirua, takirua, i runga i te kaha o toku Wairua me te kauwhau ano i taku Rongo-pai, me te whakaara ake ano i o koutou reo ano me te reo o te tetere, me te whakapuaki ano i taku kupu kia rite ki te reo o nga anahera a te Atua;

7. A me haere atu koutou me te rumaki ano ki te wai, me te mea ano—Ripeneta koutou, ripeneta koutou, kua tata hoki te kingitanga o te rangi.

8. A me haere atu koutou i tenei wahi ki nga wahi whaka-te-hauauru; me te hanga ake e koutou taku Hahi ki nga wahi katoa e rokohanga atu ai e koutou nga tangata e manako ana ki a koutou,

9. A taea noatia te wa e whakakitea iho ai ki a koutou no runga, te wa e whakaritea ai te pa o Hiruharama Hou, kia kohikohi ai koutou he kotahi, kia ai koutou he iwi maku, a ko ahau to koutou Atua.

10. Na e mea ana ano ahau ki a koutou, me tu taku pononga, a Eruera Patariti i roto i te karangatanga kua karangatia nei ia e au. A tenei ake te wa, ki te hara ia ka whakaritea tetahi atu hei whakakapi mona. Ae ra. Amine.

11. Me tenei ano taku kupu ki a koutou, e kore e hoatu ki tetahi kia haere atu ki te kauwhau i taku Rongo-pai, ki te hanga ake ranei i taku Hahi, ki te kaore ia e whakapangia e tetahi tangata whai-mana, me te mohio hoki te Hahi kei te whai-mana ia, a kua oti hoki ia te whakapa tika e nga kai-whakahaere o te Hahi.

12. Me tenei hoki, me whakaako e nga kaumatua, e nga piriti, me nga kai-whakaako ano hoki o tenei Hahi nga tikanga o taku Rongo-pai e mau nei i roto i te Paipera, me te Pukapuka a Moromona, kei reira te raneatanga o te Rongo-pai;

13. Me mahara hoki ratou ki nga kawenata me nga tikanga o te Hahi, kia meatia e ratou, a ko enei nga whakaakoranga ma ratou, i roto i nga tohutohu o te Wairua;

14. A ma te inoi i runga i te whakapono ka hoatu ai te Wairua ki a koutou, a ki te kahore koutou e whiwhi ki te Wairua, kaua koutou e whakaako.

15. Na, kia whakaritea katoatia enei mea e koutou kia rite ki taku i whakahau ai mo a koutou whakaakoranga, taea noatia te hoatutanga o te raneatanga o aku karaipiture.

16. Na, i a koutou ka whakaara ake i o koutou reo i runga i te akiakinga o te Kai-whakamarie, ka korero, ka poropiti koutou kia rite ki taku e pai ai;

17. Ina kei te mohio te Kai-whakamarie ki nga mea katoa, a ko ia he Kai-whakaatu mo te Matua raua ko te Tama.

18. A, nana ka korero atu ahau ki te Hahi. Kaua koe e patu tangata; na ko te tangata e patu ana, e kore e murua ana hara i tenei ao, i te ao meake nei puta ranei.

19. A ko tenei ano taku kupu, kaua e patu tangata; engari ka whakamatea te tangata e patu ana.

20. Kaua e tahae; a ko te tangata e tahae ana, a e kore e ripeneta, ka maka atu ki waho.

21. Kaua e korero teka; ko te tangata e korero teka ana, a e kore e ripeneta, ka maka atu ki waho.

22. Kia whakapaua tou ngakau ki te aroha ki tau wahine, kia piri hoki ki a ia, kaua ki tetahi atu;

23. Ko te tangata e titiro atu ana ki te wahine he hiahia tona ki a ia, ka whakakore ia i te whakapono, e kore hoki te Wairua e noho i a ia, a ki te kahore ia e ripeneta, ka maka atu ia ki waho.

24. Kaua koe e puremu, a ko te tangata e puremu ana, ki te kahore ia e ripeneta, ka maka atu ki waho;

25. Otiia ko te tangata kua puremu, a ka ripeneta i runga i te whakapaunga o tona ngakau, me te whakarere atu, a kahore e pera ano tana mahi, me muru e koe ana hara:

26. Otiia ki te puremu ano ia, kaua e murua tona hara, engari kia maka atu.

27. Kaua e korero kino mo tou hoa tata, kaua hoki e mea i tetahi mahi he ki a ia.

28. Kei te mohio koe, kei roto i aku karaipiture aku ture mo enei mea, ko te tangata e hara ana, ki te kahore ia e ripeneta, ka maka atu ki waho.

29. Ki te aroha koe ki a au, me mahi koe ki a au, me pupuri hoki aku whakahaunga katoa.

30. Nana kia mahara koe ki te hunga rawa-kore, me tapae atu ano i etahi wahi o o taonga hei oranga mo ratou, ara nga mea e ahei ana i a koutou te hoatu ki a ratou, me hoatu ano hoki he kawenata me tetahi tiiti e kore nei e taea te whakakahore;

31. Na i runga i te mea ka hoatu e koe etahi wahi o o taonga ki te hunga rawa-kore; ka mea ano hoki koe i taua mea ki a au, a kia whakatakotoria aua mea ki te aroaro o te pihopa o taku Hahi, ratou ko ana kaunihera, ki te aroaro ranei o etahi kaumatua tokorua, Tohunga Nui ranei, era e whakaritea, kua whakaritea ranei, kua whakaturia hoki e te pihopa mo taua mahi.

32. Na hei muri i te whakatakotoranga o aua mea ki te aroaro o te pihopa o taku Hahi, a i te mea kua riro i a ia enei whakaaturanga mo te tapaenga atu o nga taonga o taku Hahi, tera e kore e taea te tango atu aua mea i runga i te ritenga o aku whakahaunga; ka meinga ia tangata, ia tangata kia whakaatu mai ki a au mo ana mahi, hei tuari hoki ia i runga i ona ake taonga, i runga i nga taonga kua tapaea atu ranei mona, ara i runga i te taonga e ranea ana mona me tana whanau,

33. A me tenei ano, ki te mea he taonga i roto i nga ringaringa o te Hahi, kei tetahi mema ranei o te Hahi, e nui atu ana i te mea e tika ana e ora ai ratou, i muri i tenei tapaenga tuatahi, koia ano tetahi toenga hei tapaenga atu ki te pihopa, me tiaki hei hoatutanga i tenei wa, i tenei wa, ki te hunga e hapa ana, kia tino whakawhiwhia ai ia tangata, ia tangata, e hapa ana, kia whiwhi hoki ia kia rite ki tana e hapa ai.

34. No konei, me tiaki te toenga o nga taonga ki roto ki toku toa, hei tuhanga ma te hunga rawa-kore me te hunga e hapa ana, kia rite ki ta nga tohutohu a te Runanga Nui o te Hahi, a te pihopa hoki ratou ko ana kaunihera.

35. Hei moni hoki mo te hokohoko whenua, hei painga mo nga mema katoa o te Hahi, hei hanga i nga whare karakia, hei hanga ake ano hoki i te Hiruharama Hou e whakakitea ai a muri ake nei.

36. Kia kohikohia ai taku iwi kawenata ki te wahi kotahi, a te ra e haere mai ai ahau ki taku temepara. E meinga ana tenei e ahau hei whakaora i taku iwi.

37. Na ko te tangata e hara ana, a e kore e ripeneta, ka maka atu ki waho o te Hahi, a e kore ia e whiwhi ano ki nga taonga kua tapaea nei e ia mo te hunga rawa-kore, me te hunga hoki e hapa ana o taku Hahi; ara e rite ana tenei me te mea kua homai ki a au.

38. No te mea, ki te mea koutou i tenei ki tetahi mea iti rawa o enei, he meatanga tenei ki a au;

39. Na te mea, tenei ake te wa ka tino tutuki aku kupu i whakapuakina ai e nga mangai o aku poropiti; no te mea ka tapaea atu e ahau etahi o nga taonga o te hunga e uru ana ki taku Rongo-pai i waenganui i nga Tauiwi, ma te hunga rawa-kore o taku iwi, no te whare o Iharaira nei.

40. Me tenei ano, kaua koe e whakapehapeha i roto i tou ngakau: na ko te kakahu mou he kakahu whakahihi-kore, a ko te ataahua o aua kakahu hei te ahua e mahia nei e ou ringaringa ake;

41. A kia meatia matia nga mea katoa i toku aroaro.

42. Kaua e mangere; e kore te tangata e mangere ana e tukua kia kai i te taro, e mau ranei nga kakahu o te tangata mahi.

43. A ko te hunga e turorotia ana i roto i a koutou, a kaore o ratou whakapono e taea ai ratou te whakaora, engari he whakapono iti to ratou, me whangai ratou i runga i te tino atawhai, ki nga mahuri me te kai mama, kaua hoki tera e meatia e te ringaringa o tetahi hoa riri.

44. Me karanga nga kaumatua o te Hahi, kia rua, nuku atu ranei, a ma ratou e inoi me te whakapa o ratou ringaringa ki runga ki a ratou i runga i toku ingoa; na ki te mate ratou ka mate ratou ki a au, a ki te ora ratou, ka ora ratou ki a au.

45. Me noho tahi koutou i runga i te aroha. Me tangi hoki koutou mo te rironga atu a nga mea e mate nei, a tera noa ake te tika kia tangihia nga mea kaore o ratou tumanakotanga atu ki tetahi aranga kororia.

46. Na, ko nga mea e mate ana i roto i a au e kore ratou e rongo ki te mate; no te mea ka reka te mate ki a ratou;

47. Ko nga tangata ia kaore e mate ana i roto i a au, aue te mate mo ratou, he kawa hoki to ratou matenga.

48. Me tenei ano, ko te tangata he whakapono tona ki a au e ora ai ia, a ki te kahore ia i rite mo te mate, ka whakaorangia ia;

49. Ko te tangata he whakapono tona kia kite, ka kite.

50. Ko te tangata he whakapono tona kia rongo, ka rongo.

51. Ko te tangata kopa he whakapono tona era ia e tupeke, ka tupeke;

52. A ko nga tangata kahore o ratou whakapono e taea ai enei mea, engari e whakapono ana ki a au, kei a ratou te mana e riro ai ratou he tama maku; na ki te kahore ratou e takahi i aku ture, me whakamanawanui koutou ki o ratou ngoikoretanga.

53. E tu koe i runga i tou karangatanga he tuari;

54. Kaua e tango noa i nga kakahu o to teina; me utu nga mea a tou teina e riro ai i a koe;

55. Na, ki te riro i a koe nga utunga e nui atu ana i te mea e tika ana mo to oranga, me hoatu aua mea ki taku toa, kia whakaritea ai nga mea katoa, kia rite ki taku i korero ai.

56. Me inoi koe a ka hoatu aku karaipiture, ka pera me taku i whakarite ai, a ka tiakina paitia aua mea.

57. A e tika ana kia noho puku koe mo aua karaipiture, a kaua era e whakaakona kia riro ra ano i a koe te raneatanga o aua mea.

58. A ka hoatu e ahau he whakahaunga ki a koe, ko reira whakaako ai i aua karaipiture ki nga tangata katoa; no te mea ka whakaakona ki nga iwi katoa, ki nga hapu, ki nga reo, ki nga huihuinga tangata.

59. Me mau koe ki nga mea kua whiwhi na koe, kua hoatu nei ki a koe i roto i aku karaipiture hei ture, hei ture aku mo te whakahaeretanga o taku Hahi:

60. Ko te tangata e mahi ana kia rite ki enei ture ka whakaorangia, a ko te tangata kaore nei e whakarite ana i enei ture, ki te pera tonu ia, ka tau te he ki a ia.

61. Ki te inoia e koe, ka whiwhi koe ki nga whakakitenga ki runga ki nga whakakitenga, ki nga matauranga ki runga ki nga matauranga, kia mohio ai koutou ki nga mea ngaro, me nga mea o te rangimarie, ko nga mea e puta mai ai he koa, ki nga mea e whakawhiwhia ai ki te oranga-tonutanga.

62. Me inoi koe, a taihoa, kia rite toku wa, ka whakakitea ki a koe te wahi e hangaa ai te Hiruharama Hou.

63. A nana, tenei ake te wa, ka tonoa atu aku pononga ki te rawhiti, ki te hauauru, ki te nota, ki te tonga;

64. Na i te wa nei ano, kia whakaakona e te tangata e haere ana ki te rawhiti, kia rere atu ki te hauauru, nga mea i whakatahuritia ki te whakapono, he mea tenei na nga mea meake nei ka puta ki te ao, he mea hoki na nga huihuinga ngaro.

65. Nana, kia u ki enei mea katoa, a he nui rawa te utu mou, no te mea kua hoatu ki a koe kia matau ki nga mea o te kingitanga, ko te ao ia kaore i hoatu kia mohio ki enei mea.

66. Kia ngohengohe koe ki nga ture kua riro na i a koe, a kia u ki te whakapono.

67. Tenei ake to wa ka whiwhi koutou ki nga kawenata mo te Hahi e ranea ana he whakau i a koutou i konei, i te Hiruharama Hou ano hoki.

68. No reira ko te tangata e hapa ana i te matauranga me inoi ia ki a au, a ka hoatu nui e au ki a ia, a kaore au e tawai atu ki a ia.

69. Whakaarahia ake o koutou ngakau kia koa, no te mea kua hoatu ki a koutou te kingitanga, ara nga kii o te Hahi, ae ra hoki. Amine.

70. Me tuwhaina atu ki nga piriti me nga kai-whakaako hei taonga tiakanga, e pera ana me ta nga mema,

71. A ko nga kaumatau, Tohunga Nui ranei tera e whakaritea hei awhina i te pihopa, hei kaunihera mona i roto i nga mea katoa, ka whiwhi ki te oranga mo a ratou whanau i roto i nga taonga kua tapaea ki te pihopa hei painga mo te hunga rawa-kore, mo era atu mahi hoki kua oti ake nei te korero;

72. Me utu ratou mo a ratou mahi katoa, ki tetahi tuaritanga, ki etahi atu mea ranei, kia rite ki to te whakaaro pai me te matauranga o te pihopa me ana kaunihera.

73. Me whiwhi hoki te pihopa ki tona oranga, ki te utu tika ranei mo ana mahi katoa i roto i te Hahi.

74. Nana, he pono taku e mea nei ki a koutou, ki te mea ki roto i a koutou etahi kua wehe atu i o ratou hoa, he moe puku te take, ara ki te whakaatu ratou ki a koutou i runga i te ngakau iro, koia nei te take, kaua ratou e maka atu i waenganui i a koutou;

75. Heoi ki te kitea e koutou tetahi hunga kua mahue nei i o ratou hoa mo te puremu te take, a ko ratou ano nga mea i hara, a ki te mea e ora ana o ratou hoa, me maka atu nga mea pera ki waho i a koutou.

76. Ka mea ano ahau ki a koutou, kia mataara, kia tupato, kia kaha te uiui, kaua e manako ki nga pera i waenganui i a koutou, ki te mea e marena ana ratou.

77. A ki te kahore ratou e marena ana, me ripeneta ratou ki o ratou hara katoa, ki te kaore kaua koutou e manako ki a ratou.

78. Tenei ano, me mahara ia mema, ia mema, o tenei Hahi a te Karaiti kia pupuri i nga whakahaunga me nora kawenata katoa o te Hahi.

79. A nawai a, ki te patu tangata tetahi tangata i waenganui i a koutou, me tuku atu ia kia whakawakia, kia rite ki ta te ture o te whenua; no te mea, kia mahara koutou kaore he murunga hara mona, a ka whakatau te whakawakanga kia rite ki ta te whenua ture.

80. Ki te puremu tetahi tane, wahine ranei, me tu te whakawakanga mona ki te aroaro o nga kaumatua tokorua, nuku atu ranei o te Hahi, na kia whakapumautia ia kupu, ia kupu whakahe mona e nga kaiwhakaatu tokorua o te Hahi, kaua hei te hoa riri hei whai-whakaatu mona, otira me he mea he tokomaha atu nga kai-whakaatu i te tokorua, ka pai ake.

81. Otira, ka whakatau te he ki a ia e te mangai o nga kai-whakaatu tokorua, a ma nga kaumatua e whakatakoto te keihi ki te aroaro o te Hahi, a ma te Hahi e whakaara ake o ratou ringaringa hei whakahe i a ia, kia whakawakia ai ia kia rite ki te ture a te Atua.

82. A ki te mea e taea ana, me noho te pihopa hoki i roto i te whakawa.

83. Na kia whakahaeretia peneitia nga keihi katoa e tu ai ki o koutou aroaro.

84. A ki te pahua tetahi tangata, wahine ranei me tuku atu ia ki te ture o te whenua.

85. Ki te whanako ranei ia me tuku atu ia ki te ture o te whenua.

86. Ki te korero teka ranei ia me tuku atu ia ki te ture o te whenua.

87. A ki te mahi he ia ki a koe ahakoa he aha taua he, me tuku atu ia ki te ture; ae ra, ki te ture a te Atua.

88. A ki te he tou teina, tuahine ranei ki a koe, me korero puku ki a ia anake, a ki te whaki mai ia, me houhou te rongo ki a ia.

89. A ki te kahore ia e whaki, tukuna atu ia e koe ki te Hahi, kaua ki nga mema, engari ki nga kaumatua, a ka mahia tenei i roto i te karakia, e hara i te mea i te aroaro o te ao.

90. Na ki te he tou teina, to tuahine ranei ki te tokomaha, me whiu ia i te aroaro o te tokomaha.

91. A ki te hara matanui tetahi, kia whakahengia matanuitia ia, kia whakama ai ia. A ki te kahore ia e whaki me tuku atu ia ki te ture a te Atua.

92. A ki te hara puku tetahi, ka whakahengia pukutia ia, kia ai he wa mana hei whaki puku atu ki te tangata i he ai i a ia, ki te Atua ano hoki, kia kore ai te hunga o te Hahi e korero whakahe mona.

93. A me penei to koutou whakahaeretanga i roto i nga mea katoa.