Wāhanga 42
He whakakitenga kua hoatu i roto i ngā wāhanga e rua mā roto i a Hōhepa Mete te Poropiti, ki Katarana, Ohaio, Pēpuere 9 me te 23, 1831. Ko te wāhanga tuatahi e tīmata ana i te 1 ki te 72, i whiwhi nei i te aroaro o ngā erata tekau mā rua, ā, i te whakatutukiranga i tā te Ariki whakaari kātahi anō ka mea kia hoatu te “ture” i Ohaio (tirohia wāhanga 38:32). Ko te wāhanga tuarua ngā whiti 73 ki 93. Ka tā te poropiti whakamārama mō tēnei whakakitenga, arā, ko te “manakotanga i t eture o te Hāhi.”
1–10, kua karangahia ngā erata ki te kauhau atu i te rongopai, ki te rumaki i ngā kaiuru, me te hanga ake i te Hāhi; 11–12, Me karanga rātou, ā, me whakamana rātou, ā, me whakaako i ngā tikanga o te rongopai e kitea ana i roto i ngā karaipiture; 13–17, Me whakaako, me poropiti i runga i te mana o te Wairua; 18–29, Kua whakahaua te Hunga Tapu kia kaua e whakamate tangata, e tāhae, e rūkahu, e pūremu, e kōrero kino rānei mō ētahi atu; 30–39, Ka whakatakotoria iho ngā ture whakahaere i te whakatapunga o ngā rawa; 40–42, Ka whakahēngia te whakapehapeha me te māngere; 43–52, Ka mahu te hunga turoro mā roto i ngā meatanga o te whakapono; 53–60, Kei te whakaherehia te Hāhi e ngā karaipiture, ā, me whakapuaki atu ērā ki te ao; 61–69, Ka huraina atu te wāhi e tū ai te Hiruharama Hou me ngā mea ngaro o te kīngitanga; 70–73, Me whakamahi ngā rawa kua whakatapua hei oranga mō ngā āpiha o te Hāhi; 74–93, Ka whakatakotoria iho ngā ture whakahaere mō te moe tāhae, te pūremu, te whakamate tangata, me te whākinga o ngā hara.
1 Whakarongo mai, E koutou e ngā erata o taku hāhi, kua whakahuihui i a koutou anō i runga i tōku ingoa, ko Ihu Karaiti pū anō te Tama a te Atua ora, te Kaiwhakaora o te ao; ki te mea ka whakapono koutou ki tōku ingoa me te pupuri i aku whakahaunga.
2 Ko taku kupu anō tēnei ki a koutou, whakarongo kia rongo, ā, kia ngohengohe ki te ture e hoatu ai e au ki a koutou.
3 Nā te mea he pono tāku e kī atu nei, i te mea kua whakahuihui i a koutou anō e rite ana ki te whakahau i whakahaua nei koutou e au, e tapatahi ana ō koutou whakaaro ki tēnei mea kotahi, ā, kua inoia atu te Matua i runga i tōku ingoa, koia rā e whiwhi ai koutou.
4 Nana, he pono tāku e mea atu nei ki a koutou, kei te hoatu e au tēnei whakahaunga tuatahi, kia haere atu koutou i runga i tōku ingoa, tēnā me tēnā o koutou, hāunga aku pononga a Hōhepa Mete, Tama., rāua ko Hirini Rikitana.
5 Ā, ka hoatu e au tētahi whakahaunga ki a rātou kia haere atu rātou mō tētahi wā poto, ā, ka hoatu e te mana o te Wairua hei āhea rātou hoki mai ai.
6 Ā, me haere atu koutou i runga i te mana o te Wairua, e kauhau atu ana i te rongopai, e haere takirua ana, i runga i tōku ingoa, e hikina ake ana i ō koutou reo kia rite ki te reo o te tētere, e whakapuaki atu ana i tōku kupu kia rite ki te reo o ngā anahera o te Atua.
7 Ā, me haere atu koutou e rumaki ana ki te wai, e mea ana: Kia rīpenetā koutou, kia rīpenetā koutou, nā te mea kua tata mai te kīngitanga o te rangi.
8 Ā, atu i tēnei wāhi ka haere atu koutou ki roto ki ngā rohe whakateuru; me te hanga ake e koutou taku hāhi ki ngā wāhi katoa e rokohanga atu ai e koutou ngā tangata e manako ana ki a koutou.
9 Tae noa ki te wā ina huraina tērā ki a koutou nō runga, ina whakaritea te pā o Hiruharama, kia whakahuihuitia kotahitia koutou, kia meinga koutou hei iwi māku, kia meinga koutou hei iwi māku, ā, ko ahau tō koutou Atua.
10 Hei āpiti anō, ko taku kupu tēnei ki a koutou, nā, me tū taku pononga a Eruera Patiri i roto i te tūranga kua whakataua atu nei ia. Ā, ka pahawa ake, nā, ki te hara ia ka whakaritea tētahi atu hei whakakapi mōna. Koia anō. Āmine.
11 Hei āpiti, ko taku kupu tēnei ki a koutou, nā, e kore e tukua atu kia haere atu tētahi ki te kauhau atu i taku rongopai, ki te waihanga ake rānei i taku hāhi, ki te kore e whakamanangia ia e tētahi e whaimana ana, ā, e mōhiotia ana huri noa i te hāhi kua whaimana taua tangata, ā, whakamanangia tikahia e ngā upoko o te hāhi.
12 Hei āpiti, ka whakaako ngā erata, ngā pirihi me ngā kaiako o tēnei hāhi i ngā tikanga o taku rongopai, kei roto nei i te Paipera me te Pukapuka a Moromona, kei konā hoki te raneatanga o te rongopai.
13 Ā, ka mau rātou ki ngā kawenata me ngā tikanga hāhi, kia meatia e rātou, ā, ka pēnei hei akoranga mā rātou, e rite ana ki tā te Wairua e tohutohu ai.
14 Ā, ka hoatu te Wairua ki a koutou i runga i te inoi o te whakapono; ā, ki te kore koutou e whiwhi i te Wairua, kaua koutou e whakaako.
15 Ā, me pēnei katoa e koutou kia rite ki tāku i whakahau ai e pā ana ki tā koutou whakaakoranga, tae noa ki te hoatutanga o te raneatanga o aku karaipiture.
16 Ā, i a koutou e hiki ake ana i ō koutou reo mā roto i te Kaiwhakaāio, ka kōrero koutou, ā, ka poropiti koutou kia rite ki tāku e pai ai;
17 Nana rā, e mōhio ana te Kaiwhakaāio ki ngā mea katoa, ā, e whakaatu ana mō te Matua rāua ko te Tama.
18 Ināianei ā, nana, kei te kōrero atu au ki te hāhi. Kaua koe e whakamate tangata; ā, e kore e murua te tangata e whakamate tangata ana, i tēnei ao, kāore rānei hei te ao meake puta mai.
19 Hei āpiti anō, ko tāku, kaua koe e whakamate tangata; engari ka mate te tangata e whakamate tangata ana.
20 Kaua koe tāhae; ā, ko te tangata e tāhae ana, ā, kāore hoki e rīpenetā ana, ka peia atu ki waho.
21 Kaua koe e rūkahu; ko te tangata e rūkahu ana, ā, kāore hoki e rīpenetā ana, ka peia atu ki waho.
22 Me aroha e koe tāu hoawahine ki tōu ngākau katoa, me piri ki a ia anake, kaua ki tētahi atu.
23 Ā, ko te tangata e titiro ana ki tētahi wahine i runga i te mate kanehe, ka whakakorea e ia te whakapono, e kore hoki te Wairua e noho ki a ia; ā, ki te rīpenetā ia ka peia atu ia ki waho.
24 Kaua koe e pūremu; ko te tangata e pūremu ana, ā, kāore hoki e rīpenetā, ka peia atu ki waho.
25 Engari ko te tangata kua pūremu, ā, kua rīpenetā hokii runga i tōna ngākau katoa, ā, kua whakarērea e ia, ā, kua kore hoki e pēnā anō, māu e muru;
26 Engari ki te pēnā anō ia, e kore ia e murua, engari ka peia atu ki waho.
27 Kaua koe e kōrero kino mō tō kiritata, kaua rānei e tūkinotia ia.
28 E mōhio ana koe kua hoatu aku ture e pā ana ki ēnei mea i roto i aku karaipiture; ko te tangata e hara ana, kāore hoki e rīpenetā ana, ka peia atu ki waho.
29 Ki te aroha koe ki ahau, māu e mahi ki ahau, me te pupuri i aku whakahaunga.
30 Ā nana, me matua mahara koe ki te hunga rawakore, ā, ka whakatapua e koe ō rawa kia tukuna atu ērā mea ki a rātou, ki tētahi kawenata me tētahi pukapuka tuku e kore e taea te whati.
31 Ā, ki te mea ka tukuna atu āu rawa ki te hunga rawakore, ka pērāhia ki ahau; ā, ka whakatakotohia iho ki mua i te aroaro o te pīhopa o taku hāhi me ana kaikaunihera, ngā erata tokorua, ngā pirihi teitei rānei, pērā i tāna e whakamana ai, i whakamana ai rānei, i whakatūria hoki mō taua mahi.
32 Ā, ka pahawa ake, nā, ina oti te whakatakoto iho ki mua i te pīhopa o taku hāhi, ā, hei muri iho hoki i tana whiwhi i ēnei whakaaturanga e pā ana ki te tāpaenga o aua rawa o taku hāhi, kia kore e taea te tango i aua mea i te hāhi, e hāngai ana ki aku whakahaunga, ka meinga ia tangata, ia tangata kia whakaatu mai ki ahau mō aua mea, hei kaitiaki ia i runga i ana ake rawa, i runga rānei i aua mea kua whiwhi nei i runga i te tāpaenga, i runga i aua mea e ranea ana mōna me tana whānau.
33 Hei āpiti anō, mehemea he rawa kei ngā ringaringa o te hāhi, o ngā tangata rānei nō te hāhi, e nui ake ana i tāna e ranea nei mōna whai muri iho i tēnei tāpaenga tuatahi, koia anō tētahi toenga tāpaenga ki te pīhopa, ka puritia hei tuku atu ki te hunga e hapa ana, i tēnei wā, i tēnei wā, kia tautokona nuitia ia tangata, ia tangata me te whiwhi kia rite ki tāna e hapa ai.
34 Nō reira, ka whakapātakahia ngā toenga ki roto ki taku pātaka, hei mea tuku ki te hunga rawakore me te hunga hapa, e rite ana ki tā te kaunihera teitei o taku hāhi e whakatau ai, me te pīhopa me tana kāhui kaunihera;
35 Ā, hei moni hoki mō te hokohoko whenua, hei painga mō ngā mema katoa o te hāhi, me te hanganga ake i ngā whare karakia, me te hanganga ake o te Hiruharama Hou e huraina mai ai a muri ake nei—
36 Kia kohikohia ai taku iwi kawenata ki te wāhi kotahi hei taua rā e haere mai ai au ki taku temepara. Ā, ka pēnei ahau mō te whakaoranga o tōku iwi.
37 Ā, ka pahawa ake, nā, ko te tangata e hara ana, ā, kāore hoki e rīpenetā ana, ka peia atu ki waho i te hāhi, ā, e kore hoki ia e whiwhi anō i aua mea kua tāpaengia e ia ki te hunga rawakore me te hunga hapa o taku hāhi, kia kī pēnei, ki ahau—
38 Nā te mea ki te mea koutou i tēnei ki tētahi mea iti rawa o ēnei, he meatanga tēnei ki ahau.
39 Nā te mea, ka pahawa ake, ka whakatutukihia tērā mea kua kōrerohia ake nei e ngā māngai o aku poropiti; nā te mea māku e tāpae atu ngā taonga o te hunga e manako mai ki taku rongopai ki waenganui i ngā Tauiwi ki te hunga rawakore o taku iwi ko rātou nei nō te whare o Iharaira.
40 Hei āpiti anō, kaua koe e whakahīhī i roto i tōu ngākau; waiho kia whakahīhī kore ōu kākahu, ā, ko tōna ātaahua, arā, ko te ātaahuatanga o ngā mahinga o ōu ake ringaringa;
41 Ā, tukua kia meatia ngā mea katoa i rungai te mā i tōku aroaro.
42 Kaua koe e māngere; nā te mea e kore te tangata māngere e kai i te paraoa, e mau rānei ngā kākahu o te kaimahi.
43 Ā, ka whāngaia koutou te hunga kei waenganui i a koutou e tūroro ana, ā, kāore hoki ō koutou whakapono kia mahutia, engari kei te whakapono, ka whāngaia ki te atawhai, ki te māhuri me te kai māmā, ā, kia kaua e te ringa o tētahi hoariri.
44 Ka karangatia ngā erata o te hāhi, kia nuku ake i te tokorua, ā, ka inoi ake, ā, ka whakapāngia ō rātou ringaringa ki runga ki a rātou i tōku ingoa; ā, ki te mate rātou ka mate rātou ki ahau, ā, ki te ora rātou ka ora rātou ki ahau.
45 Me noho tahi koe i runga i te aroha, nā konā tangi ai koe i te rironga atu o te hunga e mate ai, ka tino tangi mō te hunga kāore ō rātou manakohanga ki tētahi aranga whaikorōria.
46 Ā, ka pahawa ake, nā, kua kore te hunga e mate ai i roto i ahau e rongo i te mate, nā te mea ka reka ki a rātou;
47 Ā, auē te mate mō te hunga e kore nei e mate i roto i ahau, nā te mea ka kawa tō rātou matenga.
48 Hei āpiti anō, ka pahawa ake, nā, ko te tangata e whakapono ana ki ahau ka mahutia, ā, kāore anō kia kīa ka mate ia, ā, ka mahutia.
49 Ko te tangata he whakapono tōna kia kite, ka kite.
50 Ko te tangata he whakapono tōna kia rongo, ka rongo.
51 Ko te tangata kopa he whakapono tōna kia peke, ka peke.
52 Ā, ko te tangata kāore he whakapono tōna kia meatia ēnei mea, engari e whakapono ana ki ahau, he mana tō rātou kia meinga hei tama māku; ā, ki te kore rātou e whati i aku ture, ka pīkauria e koutou ō rātou māuiuitanga.
53 Me tū koe i te wāhi o tō kaitiakitanga.
54 Kaua koe e tangho i te kahu o tō teina; me utu ngā mea e whiwhi nei koe i tō teina.
55 Ā, ki te riro i a koe ngā utu e nui atu ana i te mea e tika ana hei oranga mōu, me hoatu aua mea ki taku pātaka, kia meatia ngā mea katoa e rite ana ki tāku i kī ai.
56 Me inoi koe, kātahi ka hoatu taku karaipiture pērā i tāku i whakatau ai, ā, ka tiakina paitia aua mea;
57 Ā, e tika ana kia nohongū koe e pā ana ki aua mea, ā, kia kaua e whakaakona aua mea kia whiwhi koe i te raneatanga o aua mea.
58 Ā, ka hoatu e au ki a koutou tētahi whakahaunga, ko reira whakaako ai koe i aua mea ki ngā tāngata katoa; nā te mea ka whakaakona ēnā mea ki ngā iwi katoa, ki ngā hapū, ki ngā reo me ngā huihuinga tāngata.
59 Me kawe atu e koe aua mea kua whiwhi nei koe, kua hoatu nei ki a koe i roto i aku karaipiture hei ture, hei ture āku mō te whakahaeretanga o taku hāhi;
60 Ā, ka whakaorangia te tangata e mahi ana kia rite ki ēnei mea, ā, ka pāpunitia te tangata e kore nei e mahi i ēnei mea ki te pēnā tonu.
61 Ki te inoi koe, ka whiwhi ki ngā whakakitenga i runga i ngā whakakitenga, mātauranga i runga i te mātauranga, kia mōhio ai koe ki ngā mea ngaro me ngā mea rangimārie—ērā mea e puta mai ai he koa, ērā mea e puta mai ai he oranga tonutanga.
62 Me inoi koe, kātahi ka huraina ki a koe a tōina ake anō wā e pai ai ki ahau ko hea hangaia ai te Hiruharama Hou.
63 Ā nana, ka pahawa ake, nā, ka tonoa atu aku pononga ki te rāwhiti me te uru, ki te raki me te tonga.
64 Ā, i tēnei wā pū anō, tukua te tangata e haere ai ki te rāwhiti kia whakaakona rātou te hunga whakatahuritia kia haere ai ki te uru, ā, ka pēnei hei putanga ake mō te mea e haere mai ana ki te whenua me ngā whakakotahitanga huna.
65 Nana, me ū koe ki ēnei mea katoa, ā, ka nui tō taonga; nā te mea kua hoatu ki a koe kia mōhio ki ngā mea ngaro o te kīngitanga, engari kāore e hoatu ai ki te ao kia mōhio ki aua mea.
66 Me ngohengohe koe ki ngā ture kua whiwhi nei, ā, kia ū ki te whakapono.
67 Ā, ka whiwhi koe a muri ake nei i ngā kawenata hāhi, ngā mea e tika ana kia whakapūmauhia koe, i konei, i te Hiruharama Hou anō hoki.
68 Nō reira, ko te tangata kāore ōna mātauranga, tukua ia kia inoia ahau, kātahi au ka hoatu noatia e au ki a ia, ā, kāore au e tāwai atu ki a ia.
69 Hāpaingia ake ō koutou ngākau, ā, kia hari, nā te mea kua hoatu ki a koutou te kīngitanga, kia kī pēnei te kupu, kua hoatu nei ngā kī o te hāhi. Koia anō. Āmine.
70 Ka whiwhi ngā pirihi me ngā kaiako i ā rātou tiakanga, pērā i ngā mema.
71 Ā, me ora ngā whānau o ngā erata me ngā pirihi teitei kua whakatauhia hei āwhina i te pīhopa me ana kaikaunihera i roto i ngā mea katoa, i ngā rawa kua tāpaengia atu ki te pīhopa, hei painga mō te hunga rawakore, me ērā atu take kua kōrerotia ake nei i mua;
72 Me utu tika rānei mō ā rātou mahi katoa, mō tētahi tiakanga, he aha atu rānei, kia rite ki tō te whakaaro pai me te mātauranga o te pīhopa, o ngā kaikaunihera rānei rātou ko te pīhopa.
73 Ā, ko te pīhopa anō hoki, ka whiwhi oranga anō ia, he utu tika rānei mō āna mahi katoa i te hāhi.
74 Nana, he pono tāku e mea atu nei ki a koutou, nā, ko ngā tāngata kei waenganui i a koutou, kua wehe atu i ā rātou hoa he mea nā tōna pūremu, kia kī pēnei te kupu, ki te whakaatu rātou i mua i a koutou katoa i runga i te ngākau pāpaku koinei te āhua, kaua koutou e pei atu i a rātou ki waho i a koutou;
75 Engari mēnā ka kitea e koutou ētahi tāngata kua mahue ā rātou hoanā te pūremu, ā, ko rātou anō ngā kaipūremu, ā, kei te ora tonu ā rātou hoa, ka peia atu rātou ki waho i a koutou.
76 Hei āpiti anō, ko taku kupu tēnei ki a koutou, nā, kia mataara, ā, kia tūpato koutou, i runga i te kaha uiui, kia kaua koutou e whiwhi i tētahi mea pērā i waenganui i a koutou mehemea e marena tonu ana rātou.
77 Ā, ki te kore e marena ana rātou, me rīpenetā i ō rātou hara katoa, ki te kore kaua koutou e whiwhi ki a rātou.
78 Hei āpiti anō, me ngohengohe ia tangata, ia tangata nō tēnei hāhi a te Karaiti ki ngā whakahaunga me ngā kawenata o te hāhi.
79 Ā, ka pahawa ake, nā, ki te whakamate tangata tētahi i waenganui i a koutou, nā, ka tukuna atu rātou kia meatia kia rite ki ngā ture o te whenua; nā te mea me maumahara kāore ō koutou murunga hara; ā, ka whakatau te whakawākanga kia rite ki ngā ture o te whenua.
80 Ki te pūremu tētahi tāne, wahine rānei, me tū te whakawākanga ki te aroaro o ngā erata tokorua, nuku atu rānei o te hāhi, ā, ka whakapūmauhia ia kupu whakahē mōna e ngā kaiwhakaatu o te hāhi, ā, kaua hei tā te hoariri; engari ka pai ake mehemea ka nui ake i te kaiwhakaatu tokorua.
81 Engari ka whakahēngia ia e te māngai o ngā kaiwhakaatu tokorua; ā, ka whakatakotoria te kēhi e ngā erata ki mua i te hāhi, ā, ka hikina ake e te hāhi ō rātou ringaringa ki a ia, kia meatia ia kia rite ki te ture a te Atua.
82 Ā, mehemea e taea ana, e tika ana kia noho mai anō te pīhopa anō hoki.
83 Ā, pēnei kia whakahaerehia e koutou i ngā kēhi katoa e tau mai ai ki mua i a koutou.
84 Ā, ki te tāhae tētahi tāne, wahine rānei, ka tukuna ake ia ki te ture o te whenua.
85 Ā, ki te whānako ia, ka tukuna atu ia ki te ture o te whenua.
86 Ā, ki te rūkahu ia, ka tukuna ake ia ki te ure o te whenua.
87 Ā, ki te mea ia i tētahi mahi hē ahakoa he aha taua hē, ka tukuna ake ia ki te ture, arā, ko te ture pū anō o te Atua.
88 Ā, ki te hē tō teina, tuahine rānei ki a koe, me kōrero puku ki a ia anake; ā, ki te whāki hara ia me hohou te rongo ki a ia.
89 Ā, ki te kore ia e whāki hara, me tuku ake ia ki te hāhi, kaua ki ngā mema, engari ki ngā erata. Ā, ka meatia i roto i tētahi huinga, ā, kaua i mua i te ao.
90 Ā, ki te hē tō teina, tuahine rānei ki te tokomaha, me kohete ia i te aroaro o te tokomaha.
91 Ā, ki te hē matanui tētahi, ka kohetehia matanuitia ia, kia whakamā ai ia. Ā, ki te kore e whāki hara ia, ka tukuna ake ia ki te ture a te Atua.
92 Ki te hē muna tētahi, ka kohetehia munahia ia, kia whai wā ia ki te whāki muna i ōna hara ki te tangata nāna nei i hē, ki te Atua anō, kia kaua te hāhi e kōrero kōhete mōna.
93 Ā, pēnei tā koutou whakahaeretanga i roto i ngā mea katoa.