Wāhanga 49
He whakakitenga mā roto i a Hōhepa Mete te Poropiti ki a Hirini Rikitana, Pāri P. Parata rātou ko Remana Kopere, ki Katarana, Ohaio, Mei 7, 1831. I tahuri mai a Remana Kopere ki te rongopai engari i mau tonu ia ki ētahi o ngā akoranga o ngā Kaiharuru (Te Huinga Whakakotahi o te Hunga Whakapono i Tā te Karaiti Putanga Tuaruatanga Mai), te huinga i piri tuatahi ia i mua. Ko ētahi o ngā mea i whakapono nei ngā Kaiharuru ko tēnei, arā, kua heipū kē ake tā te Karaiti Haerenga Tuaruatanga Mai, ā, kua puta mai Ia i roto i te āhua o tētahi wahine, ko Ana Rī tōna ingoa. Kāore rātou i whakapono he mea tika te rumaki ki te wai. I whakaparahako rātou i te marenatanga, ā, i whakapono rātou ki tētahi oranga mārena kore, ai kore. Kāore ētahi o ngā Kaiharuru i kai mīti ai. Hei whakataki i tēnei whakakitenga, ko tā te hītori o Hōhepa Mete, “I inoi ake au ki te Ariki kia pai ake taku māramatanga ki te kaupapa, kātahi au ka whiwhi i tēnei e whai ake nei.” Ka whakakorea atu e tēnei whakakitenga ētahi o ngā tikanga tūāpapa o te rōpū Kaiharuru. I kawea atu e ngā tangata i whakahuatia ake i runga ake nei tētahi kape o te whakakitenga ki te hapori Kaiharuru (e tata ana ki Kerewhirana, Ohaio) ā, i pānuitia katoatia atu tēnā ki a rātou engari i whakaparahakongia.
1–7, Kāore e mōhiotia tonutia te rā me te hāora e haere mai ai te Karaiti kia tae mai Ia; 8–14, Me rīpenetā te tangata, me whakapono ki te rongopai, me ngohengohe ki ngā tikanga tapu kia whiwhi ki te whakaoranga; 15–16, Kua whakamanaia te marenatanga e te Atua; 17–21, E pai ana kia kai mīti; 22–28, Ka kake a Hīona, ā, ka puāwai ake ngā Rāmana anō nei he rōhi i mua i te Haerenga Tuaruatanga Mai.
1 Whakarongo ki taku kupu, e aku pononga e Hirini koutou ko Pāri, ko Remana; nana rā, he pono tāku e mea atu nei ki a koutou, nā, e hoatu nei e au tētahi whakahaunga ki a koutou kia haere atu koutou ki te kauhau atu i taku rongopai kua whiwhi nei koutou, pērā pū anō i tā koutou i whiwhi ai, ki ngā Kaiharuru.
2 Nana, ko taku kupu tēnei ki a koutou, nā, e hiahia ana rātou kia mōhio ki tētahi wāhi o te pono, engari kaua te katoa, nā te mea ehara ēnā i te tika i tōku aroaro, ā, me rīpenetā.
3 Nā reira, kei te tuku atu au i a koutou, e aku pononga e Hirini kōrua ko Pāri, kia kauhautia atu te rongopai ki a rātou.
4 Ā, ka whakamanaia taku pononga a Remana ki tēnei mahi, kia āta whakawhitiwhiti kōrero ia ki a rātou, ehara i te mea e hāngai ana ki tāna i whiwhi ai i a rātou, engari e rite ana ki tāna e whakaakona ai ki a ia e kōrua e aku pononga; ā, mā te mahi pēnei ka manaaki au i a ia, ki te kore e kore ia e kake.
5 Pēnei tā te Ariki; nā te mea ko au te Atua, ā, kua tonoa iho taku Tama Kotahi Anake ki roto ki te ao hei hokonga mō te ao, ā, kua whakapuakina ake, nā, ka whakaorangia te tangata e whakawhiwhi i a ia, ā, e kore e pāpunitia te tangata e whakawhiwhi nei i a ia—
6 Ā, kua meatia e rātou ki te Tama a te Tangata tā rātou i pai ai; ā, kua tīkina e ia tōna mana ki te ringa matau o tana korōria, ā, e whakahaere ana ināianei i ngā rangi, ā, ka whakahaere ia ki runga i te whenua kia whakapurua iho ngā hoariri katoa ki raro i ōna waewae, kua tata hoki taua wā—
7 Kua kōrerohia tēnā e te Ariki te Atua; engari kāore tētahi e mōhio ana ki te hāora me te rā, kāore rānei ngā anahera i te rangi, kāore hoki rātou e mōhio kia tae rawa mai ia.
8 Nā reira, e hiahia ana au ki rīpenetā ngā tangata katoa, nā te mea kei raro i te hara te katoa, hāunga te hunga kua rāhuitia nei mōku ake, he tangata tapu kāore e mōhiotia ana e koutou.
9 Nā reira, ko taku kupu tēnei ki a koutou, nā, kua tonoa atu e au ki a koutou taku kawenata mau tonu, ko taua mea anō nō te tīmatanga.
10 Ā, kua whakatutukia tērā i whakaaria mai nei e au, ā, ka tuohu iho ngā iwi o te ao ki a ia; ā, ki te kore ko rātou ake, ka heke mai rātou, nā te mea ka meinga taua mea e whakateiteingia ana ia e ia anō kia whakaitia iho tōna mana.
11 Nā reira, kei te hoatu e au tētahi whakahaunga kia haere atu ai ki waenganui i tēnei iwi, me te kī atu ki a rātou, kia rite ki taku āpōtoro onamata, ko Pita tōna ingoa:
12 Me whakapono ki te ingoa o te Ariki a Ihu, i runga ia i te whenua, ā, ka haere mai ia, te tīmatanga me te whakamutunga;
13 Rīpenetā, ā, rumakina i runga i te ingoa o Ihu Karaiti, e rite ana ki te whakahaunga tapu, hei murunga hara;
14 Ā, ko te tangata e pēnei ana koia ka whiwhi i te takoha o te Wairua Tapu, mā te whakapākanga i ngā ringaringa o ngā erata o te hāhi.
15 Hei āpiti anō, he pono tāku e mea atu nei ki a koutou, nā, kāore te tangata e whakakāhore ana i te mārenatanga i te mea whakamanaia e te Atua, nā te mea kua whakamanaia te mārenatanga e te Atua ki te tangata.
16 Nā reira, e tika ana ki tā te ture kia kotahi tana hoawahine, ā, ka kotahi ō rāua kikokiko, ā, tēnei katoa kia rite te whenua ki te take i hangaia ai ia;
17 Ā, kia kī anō ia i te mehua tangata kia rite ki tōna hanganga i mua i te hanganga o te ao.
18 Ā, ko te tangata e mea ana kia kaua e kai mīti, kia kaua te tangata e kai i taua mea, ehara i te mea whakamanaia e te Atua;
19 Nā te mea, nana, kua whakamanaia ngā kararehe o te whīra me ngā manu o te rangi, me ērā mea e ahu mai ana i te whenua hei kai, hei kākahu mō te tangata, ā, kia ranea ai mōna.
20 Engari kāore e hoatu ana kia nui ake ngā rawa o tētahi i tētahi atu, nā reira e takoto ana te ao i te hara.
21 Ā, auē te mate mō te tangata e whakaheke toto ana, e moumou kikokiko ana i te mea kāore he tikanga o tana patu.
22 Hei āpiti anō, he pono tāku e mea atu nei ki a koutou, nā, kāore e haere mai ai te Tama a te Tangata i te āhua o tētahi wahine, kāore rānei i te āhua o tētahi tangata e haere ana i runga i te whenua.
23 Nā reira, kaua e tinihangatia, engari me ū tonu, e mataara ana kia whakangāueuetia ngā rangi, ā, kia tūoioitia te whenua e hūrorirori ana kia rite ki tētahi e haurangi ana, ā, kia whakateiteingia ngā raorao, ā, kia whakaitia iho ngā maunga, ā, kia māheniheni haere ngā wāhi taratara—ā, ka pēnei katoa ina whakatangihia e te anahera tana tētere.
24 Engari i mua i te rā nui o te Ariki e puta mai ai, ka tupu kaha a Hākopa i te koraha, ā, ka pūāwai ake ngā Rāmana anō nei he rōhi.
25 Ka tupu kaha a Hīona i runga i ngā pukepuke, ā, ka hari i runga i ngā maunga, ā, ka whakahuihuitia ngātahitia ki te wāhi kua whakataua nei e ahau.
26 Nana, ko taku kupu tēnei ki a koutou, haere atu pērā i tāku i whakahau ai i a koutou; rīpenetā i ō koutou hara katoa; inoia kātahi ka whiwhi; pātōtōngia kātahi ka huakina ki a koutou.
27 Nana, ka haere atu au i mua i a koutou, ā, māku hei hiku mō koutou; ā, ko waenganui au i a koutou, ā, e kore koutou e whakapōauautia.
28 Nana, ko Ihu Karaiti ahau, ā, e haere wawe mai ana ahau. Koia anō. Āmine.