Wāhanga 61
He whakakitenga mā roto i a Hōhepa Mete te Poropiti, i runga i te tahatika o te awa Mītori, Piko Makiraweri, Akuhata 12, 1831. I a rātou e hoki atu ana ki Katarana, kua mānu atu te Poropiti rātou ko ngā erata tekau i runga i te awa o Mītori mā runga waka. I te rā tuatoru o te haerenga, i pā ngā mōreareatanga maha. I kite a Erata Wiremu W. Wherapa, i roto i tētahi whakakitenga awatea, i te kaiwhakangaro e eke kaha ana i runga i te karetai o ngā wai.
1–12, Kua whakapuakina e te Ariki ngā whakangaromanga maha i runga i ngā wai; 13–22, I kangaia ngā wai e Hoani, ā, e eke ana te kaiwhakangaro i tōna mata; 23–29, Kei ētahi te mana ki te whakahau i ngā wai; 30–35, Me haere takirua ngā erata ki te kauhau i te rongopai; 36–39, Me whakarite rātou mō te haerenga mai a te Tama a te Tangata.
1 Nana, kia whakarongo ki te reo o te mea kei a ia te mana katoa, te mea nō te mau tonu ki te mau tonu, ko te Arepa me te Omeka pū anō, te tīmatanga me te whakamutunga.
2 Nana, he pono pēnei tā te Ariki ki a koutou, E koutou e ngā erata o taku hāhi, kua whakahuihuia ki runga ki tēnei pito, te hunga kua murua ō koutou hara ināianei, nā te mea au, te Ariki, e muru ai i ngā hara, ā, e whakaaroha atu ana ki te hunga e whāki mai ai i ō rātou hara i runga i te ngākau whakaiti;
3 Engari he pono tāku e mea atu nei ki a koutou, nā, ehara i te mea me haere wawe tēnei tira katoa o aku erata ki runga i ngā wai, i ngā tāngata o tērā taha me tērā atu taha e hemo haere ana i runga i te whakaponokore.
4 Hei aha koa, i whakaae au kia pērā kia taea ai e koutou te whakaatu; nana, he maha ngā mōreareatanga i runga i ngā wai, waihoki pū anō hei muri ake nei;
5 Nā te mea au, te Ariki, kua whakapuakina atu i runga i tōku riri ngā whakangaromanga maha i runga i ngā wai; āe rā, i runga pū anō i ēnei wai.
6 Hei aha koa, kei tōku ringa ngā kikokiko katoa, ā, kāore te tangata e ū ana i waenganui i a koutou e mate ai i runga i ēnei wai.
7 Nā reira, e tika pū ana kia hohoro taku pononga a Hirini Kiripeti rāua tahi ko Wiremu W. Wherapa i runga i tā rāua mahi me tā rāua mīhana.
8 Hei aha koa, kua kore au e tuku kia wehe atu koutou kia oti rā anō te kohetetanga i a kōrua mō ō kōrua hara, kia kotahi ai kōrua, kia kore ai kōrua e mate i roto i te whakarihariha;
9 Engari ināianei, he pono tāku e mea atu nei, e tika rawa ana māku kia wehe atu kōrua. Nā reira tukua aku pononga a Hirini Kiripeti rāua ko Wiremu W. Wherapa kia haria tō rāua tira o mua, ā, tukua rātou kia haere wawe atu kia tutuki ai tō rāua mīhana, ā, mā roto i te whakapono e taea ai e rātou;
10 Ā, ki te mea ka ū tonu rātou ka tiakina, ā māku, mā te Ariki, e piri ki a rātou.
11 Ā, tukua te toenga kia haria atu ērā mea e tika ana hei kākahu.
12 Tukua taku pononga a Hirini Kiripeti kia haria atu ērā mea kāore e tika ana, e rite ana ki tā koutou e pai ai.
13 Ināianei ā, nana, i hoatu e au tētahi whakahaunga e pā ana ki ēnei mea hei painga mō koutou; ā māku, mā te Ariki, e kōrerorero tahi me koutou kia pērā ki ngā tangata i ngā rā onamata.
14 Nana, nāku, nā te Ariki, i manaaki ngā wai i te tīmatanga; engari hei ngā rā o muri, mā roto i te māngai o taku pononga a Hoani, nāku ngā wai i kanga.
15 Nā reira, ka puta mai ngā rā, nā, kāore e haumaru tētahi kikokiko i runga i ngā wai.
16 Ā, ka kōrerohia ake i ngā rā e puta mai ai, nā, kāore e taea e tētahi te haere ake ki te whenua o Hīona i runga i ngā wai, engari ko te tangata anake e ngākau tōtika ana.
17 Ā, i te mea nāku, nā te Ariki, te whenua i kanga i te tīmatanga, pērā anō kua manaakitia ngā wai e au i ngā rā o muri, i tōna wā, hei oranga mō aku hunga tapu, kia kainga ai e rātou tō reira mōmonatanga.
18 Ināianei ā, e hoatu ana e au tētahi whakahaunga ki a koutou, nā, ko tāku e mea atu ki tētahi, e mea atu ki te katoa, nā, me whakatūpato e koutou ā koutou teina e pā ana ki ēnei wai, kia kaua rātou e haere i runga rā, kei hemo tō rātou whakapono, ā, kei mau i ngā māhanga.
19 Nāku, nā te Ariki, i whakapuaki, ā, kei te eke te kaiwhakangaro i tō reira mata, ā, kāore au e whakakore atu i te whakapuakanga.
20 I te riri au, te Ariki, ki a koutou inānahi, engari kua tahuritia atu tōku riri i a koutou ināianei.
21 Nā reira, tukua te hunga kua kōrerotia ake nei e au, kia haere wawe atu rātou—ko tāku e mea atu nei anō ki a koutou, tukua kia haere wawe atu rātou.
22 Ā, kāore he aha ki ahau, nāwai rā, mehemea ka tutuki i a rātou tā rātou mīhana, mehemea haere ai mā runga wai, mā runga whenua rānei; waiho tēnei kia rite ki ngā mea e whakamōhiotia atu ki a rātou e rite ana ki ō rātou whakawākanga hei muri ake nei.
23 Ināianei ā, e pā ana ki aku pononga, a Hirini Rikitana rātou ko Hōhepa Mete, Tama., ko Oriwa Kautere, kaua e tukua rātou kia haere mai anō i runga i ngā wai, hāunga i runga i te awakeri, i a rātou e haere atu ana ki ō rātou kāinga; kia kī pēnei kē rānei, me kaua rātou e haere mā runga wai, hāunga ko runga i te awakeri.
24 Nana, nāku, nā te Ariki, i whakatau tētahi huarahi hei haerenga mā aku hunga tapu; ā nana, koinei te huarahi—nā, ina puta atu i te awakeri me haere rātou i runga whenua, ki te mea ka whakahaua rātou kia haere ake ki te whenua o Hīona;
25 Ā, ka rite tā rātou ki tā ngā tamariki o Iharaira, e whakatū tēneti ana i te huarahi.
26 Ā, nana, ka hoatu tēnei whakahau ki ō koutou teina katoa.
27 Hei aha koa, kua hoatu ki a wai te mana whakahau i ngā wai, kua hoatu ki te tangata mā runga i te Wairua kia mātau ai ki ōna huarahi katoa;
28 Nā reira, tukua ia kia mea ai e rite ana ki tā te Wairua o te Atua ora e whakahau ai ki a ia, ahakoa i runga whenua, i runga rānei i ngā wai, rite tonu ki tāku e pai ai hei muri ake nei.
29 Ā, kua hoatu ki a koutou te huarahi mō ngā hunga tapu, te huarahi rānei hei haerenga mō ngā hunga tapu o te hōpuni o te Ariki.
30 Hei āpiti anō, he pono tāku e mea atu nei ki a koutou, ki aku pononga, e Hirini Rikitana, koutou ko Hōhepa Mete, Tama., ko Oriwa Kautere, kaua koutou e puaki i ō koutou māngai i roto i ngā whakaminenga whakarihariha kia tae atu rā rātou ki Hinihinati.
31 Ā, hei taua wāhi ka hīkina ake ō rātou reo ki te Atua hei whakahē i taua iwi, āe rā, ki te mea kua mura tōna riri ki tō rātou whakarihariha, he iwi kua tino pakari mō te whakangaromanga.
32 Ā, mai i reira tukua rātou kia haere mō ngā whakaminenga o ō rātou teina, nā te mea he tino nui rawa ake tō rātou hiahia ki ā rātou mahinga ināianei pū anō i tō ngā whakaminenga whakarihariha.
33 Ināianei ā, e pā ana ki te toenga, tukua rātou kia haere me te whakapuaki i te kupu ki waenganui i ngā whakaminenga whakarihariha, ki te mea i hoatu ai;
34 Ā, ki te mea ka pēnei rātou, ka mā ō rātou kāmana, ā, ka kohakore rātou i tōku aroaro.
35 Ā, tukua rātou kia haere ngātahi, kia haere takirua, kia rite ki tā rātou e pai ai, tukua anake taku pononga a Renara Kahuna, me taku pononga a Hamuera H. Mete, koia e āhuareka nei au, kia kaua e weheruatia rāua kia hoki atu ai rāua ki ō rāua kāinga, ā, pēnei mō tētahi take whai mātauranga i roto i ahau.
36 Ināianei ā, he pono tāku e mea atu nei ki a koutou, ā, ko tāku e mea atu nei ki tētahi e mea atu ki te katoa, kia koa, e ngā tamariki nohinohi; nā te mea kei waenganui au i a koutou, ā, kāore au i whakarere i a koutou;
37 Ā, i te mea kua whakaitia koutou e koutou anō i tōku aroaro, nō koutou ngā manaakitanga o te kīngitanga.
38 Whītikiria ake ō koutou hope, ā, kia mataara, ā, kia whaiwhakaaro, e titiro atu ana ki te haerenga mai a te Tama a te Tangata, nā te mea ka haere mai ia i te hāora e kore nei koutou e whakaaro.
39 Me inoi tonu kei kuhu koutou ki roto i te whakawainga, kia noho mai ai koutou i te rā o tana haerenga mai, ahakoa i te ora, i te mate rānei. Koia anō. Āmine.