1. He pono, ko te kupu tenei a te Ariki ki a koe, ki taku pononga ki a Hohepa Mete, kei te tino pai ahau ki au tapaenga ake kua meatia na e koe, koia pu na, nou hoki te take i whakaarangia ake ai koe e ahau, hei whakakitenga atu maku i toku matauranga ma roto i nga mea ngoikore o te whenua.

2. E pai ana ahau ki o inoi, a ko te whakautu mo era ko taku kupu tenei ki a koe, e whakahaua ana koe i tenei wa ano ki te kauwhau i taku Rongo-pai, ki te panui hoki mo tenei Takiwa kua meinga nei e ahau hei kamaka mo te kokonga ki Hiona, meinga hoki hei mea ataahua kia kanapa hoki, ano ko nga nohoanga kingi te rite.

3. Ko tenei panuitanga me tuku ki nga kingi katoa o te ao—ki nga pito e wha o te ao—ki te honore Tumuaki whiriwhiri, ki nga Kawana whakaaro hikaka hoki o te iwi e noho na koe, ki nga iwi katoa hoki e noho marara ana i te ao.

4. Me tuhituhi ki a ratou i runga i te wairua mahaki, i runga ano hoki i te kaha o te Wairua Tapu, e riro i a koe i te wa e tuhituhia ai taua mea;

5. A, e whakakitea ki a koe e toku Wairua Tapu taku whakaaro mo aua kingi me nga kai whakahaere tikanga, ara nga mea e pa ki a ratou i nga ra e takoto mai nei.

6. No te mea nana ! ka tata ahau te karanga ki a ratou kia titiro ki to maramatanga me te kororia o Hiona, kua tae mai hoki te wa tika kia titiro ki reira.

7. No reira, mea atu ki a ratou kia kaha ano te ka ranga, me te hoatu ano i ta koutou whakaaturanga ki a ratou, kaua hoki e wehi, ano hoki to ratou rite ko nga tarutaru, to ratou kororia ano he puawai, e tata ano te ngahoro; kei whai wahi ratou hei amuamu.

8. Mo te tae atu ahau ki a ratou i te ra o toku haerenga atu, ko reira parea atu ai te arai i te kanohi, whakaritea ai he wahi mo te kai tukino ki roto i te hunga tinihanga, ko te wahi tera o te teteatanga o nga niho, me he mea ana ratou ki te pei atu i aku pononga me taku whakaaturanga kua oti nei te whakakite ki a ratou.

9. Me tenei ano ka haere atu ahau ka whakangawari i o ratou ngakau, ara i te nuinga o ratou kia pai ai ratou ki a koutou, ka whai painga hoki koutou i roto i o ratou kanohi, ma reira ka whiwhi ai ratou ki te maramatanga o te pono, me nga Tauiwi ka whiwhi ki te whakateiteitanga, ki te hikinga ake o Hiona.

10. Ka hohoro hoki te putanga mai o te ra o toku haerenga atu, i te haora hoki e kore ai koutou e mohio a kei hea he putanga mo toku iwi, he pa whakaora ranei mo nga mea e toe o ratou.

11. Maranga ! e nga kingi o te whenua ! haere mai, me a koutou koura me a koutou hiriwa, ki te tautoko i toku iwi, ki te whare hoki o nga tamahine o Hiona.

12. Me tenei ano, he pono taku e mea atu nei ki a koe ma taku pononga ma Ropata B. Tamihana koe e awhina ki te tuhituhi i tenei panui, e ahuareka ana hoki ahau ki a ia, a me noho ia hei hoa mou;

13. No reira, me whakarongo ia ki o tohutohu, a ka manaakitia ia e ahau ki nga manaakitanga nui atu; na, kia pumau ia kia pono i roto i nga mea katoa atu i tenei wa, a, e nui ia i roto i oku kanohi;

14. Me mahara ano ia, ka whakahoki kupu ia ki a au mo tona tuaritanga.

15. Me tenei ano, he pono taku e mea atu nei ki a koe, ka hari taku pononga a Hairama Mete, e aroha ana hoki ahau ki a ia, i te pono o tona ngakau, i te aroha hoki ona ki te mea tika, e ai ta te Ariki.

16. Ma taku pononga, ma Hoani C. Peneti koe e tautoko i te mahi tukutuku panui ki nga kingi o nga iwi o te ao, a me u tonu ki a koe i te haora o te whakapawera, a e kore ia e kore te whiwhi ki ona utu, ina ia whakarongo ki te kupu tohutohu;

17. A, mo tona aroha ka whakanuia ia, e meinga hoki ia maku ina mahi ia i tenei mea, e ai ta te Ariki. Kua kite hoki ahau i te mahi kua meatia e ia, a e pai ana ahau ki tana mahi, me he mea ia ki te u tonu, a ka karangatia ia e ahau ki nga manaakitanga, ki te kororia nui.

18. Me tenei ano ko taku kupu tenei ki a koe, ko taku e hiahia ana kia noho tonu taku pononga a Raimana Waiti ki te kauwhau mo Hiona, i roto ano i te wairua mahaki, me te whakaatu ano i a au ki te ao katoa, a e whakateiteitia ake ia e ahau, ano kei runga ia i nga pakau o te kahu, ka whai kororia, ka whai honore ia mona ake, mo toku ingoa hoki.

19. A, ina mutu tana mahi, ka mauria ia e ahau ki a au tonu pera me taku ki taku pononga ki a Rawiri Patini, kei a au nei hoki ia i tenei wa pu ano, me taku pononga ano hoki me Eruera Patariti, me taku pononga tauheke a Hohepa Mete, matua, kei te ringa matau hoki ia o Aperahama a e hari ana, e tapu ana hoki ia, naku hoki ia.

20. Me tenei ano, he pono taku e mea atu nei ki a koe, ko taku pononga ko Hori Miira, kahore ona he; kaua e ruarua mona he pono hoki tona ngakau, a mona i aroha ki te whakaaturanga moku, e arohama anaia e ahau;

21. No reira, ka mea atu ahau ki a koe, ka hiiritia e ahau te turanga pihopa ki runga ki tona matenga, pera i taku pononga i a Eruera Patariti, kia riro ai mana e tango mai nga homaitanga mo toku whare, kia hoatu manaakitanga ai ano hoki ia ki runga i nga matenga o te hunga rawa-kore o toku iwi, e ai ta te Ariki. Kaua tetahi tangata e whakahawea ki taku pononga ki a Hori, ka whakahonore hoki ia i a au.

22. Ma taku pononga ma Hori, ma taku pononga ma Raimana, ma taku pononga ma Hoani Naiti, me etahi atu e hanga he whare ki toku ingoa, kia rite ano ia ki te tauira ka whakaaturia e taku pononga e Hohepa ki a ratou; me hanga ano ki te wahi e whakaaturia ai e ia ki a ratou.

23. A, ko taua whare hei whare manuhiri, e haere mai ai nga tira haere mai o tawhiti ki reira noho ai no reira kia pai rawa taua whare, kia rite hei whare e paingia rawatia ana, kia kitea ai e te tangata haere te ora me te rangimarie i reira me te whakaaroaro ano i a ia ki te kupu a te Ariki; me te kohatu hoki mo te kokonga kua whakaritea e ahau mo Hiona.

24. Ko tenei whare ka riro hei nohoanga mo te ora me he mea ki te hanga ki toku ingoa, me he mea ano hoki te kawana tera e whakaritea hei tiaki ka arai atu i te poke kei tae mai ki reira. Kia tapu taua whare, ki te kore, e kore te Ariki tou Atua e noho i reira.

25. Me tenei ano, he pono taku e mea atu nei ki a koe, tukua mai aku Hunga Tapu o tawhiti kia haere mai.

26. Tonoa e koutou etahi karere kakama, ae ra, hei nga karere whiriwhiri, hei mea atu ki a ratou; haere mai koutou, me a koutou koura, me a koutou hiriwa, me a koutou kohatu utu nui, me a koutou taonga onamata; a ko te hunga katoa kei a ratou te matauranga ki nga taonga onamata, e hiahia ana ki te haere mai, me haere mai, me te mau mai ano i te rakau paaka, i te rakau matai, i te kahikatea, me nga rakau utu nui katoa o te whenua;

27. I te rino, i te kapa, i te parahi, i te mataa, me nga mea utu nui katoa o te whenua, ka hanga ai te whare ki toku ingoa hei nohoanga mo te Nui Rawa;

28. Kahore hoki tetahi wahi e kitea i te whenua, hei hokinga mai mona, hei whakahokinga mai i te mea i ngaro i a koutou, ara i tana i kahaki atu ai, koia ano te raneatanga o te Tohungatanga;

29. Kahore hoki he wahi rumakanga i runga i te whenua, e rumakina ai ratou, taku Hunga Tapu mo te hunga kua mate;

30. Ko tenei tikanga no toku whare, a e kore e whakaaetia e ahau, hei te wa anake ia o to koutou rawakoretanga, e kore ai koutou e ahei te hanga whare ki a au.

31. Na, ka whakahaua koutou e ahau, koutou katoa taku Hunga Tapu, kia hanga tetahi whare ki a au; a ka hoatu e ahau he wa nui hei hanganga ma koutou i te whare ki a au, a i taua wa ka whakaae ki a koutou rumakanga.

32. Engari, nana, i te paunga o taua wa, ko a koutou rumakanga me o koutou tupapaku e kore e paingia e ahau; a ki te kore koutou e mahi i enei mea i muri o te paunga o te wa, ka hatepea atu koutou, te hahi me a koutou tupapaku e ai ta te Ariki, ta to koutou Atua.

33. He pono taku e mea atu nei ki a koutou, me he mea ki te pau te wa i whakaritea hei hanganga ma koutou i te whare ki a au, nana, e kore a koutou tupapaku e manakohia e ahau, no te mea ko te rumakanga i te hunga mate no roto ke i taua whare, a he mea whakarite taua tikanga no mua mai ano i te hanganga o te ao,

34. Kei reira hoki nga kii o te Tohungatanga Tapu, a whakaritea hei whiwhinga mou ki te honore, ki te kororia.

35. I muri o tenei wa, ko a koutou rumakanga mo o koutou tupapaku, a te hunga e noho marara ana e kore e manakohia e ahau, e ai ta te Ariki;

36. No te mea kua oti te whakarite ki Hiona, ki ona Takiwa, ki roto hoki o Hiruharama, ki nga wahi kua oti i a au te whakarite hei pa whakaora, ki reira nga wahi mo nga rumakanga o a koutou tupapaku.

37. Me tenei ano, he pono taku e mea atu nei ki a koutou, me pehea e manakotia ai e ahau a koutou horoinga, me he mea ki te kahore e meatia e koutou ki roto i te whare kua hanga e koutou ki toku ingoa ?

38. No te mea, mo tenei take i whakahaua ai e ahau a Mohi kia hanga he tapenakara, kia mauria haeretia hoki e ratou i te koraha, kia hanga hoki he whare ki te whenua a te kupu whakaari, he mea e whakakitea atu ai nga tikanga i huna i mua atu i te hanganga o te ao;

39. No reira, he pono taku e mea atu nei ki a koutou, ko a koutou whakawahinga, ko a koutou horoinga, ko a koutou rumakanga mo te hunga mate, ko a koutou huihuinga tapu, me a koutou whakamaharatanga mo a koutou patunga tapu, he mea na nga tama a Riwai, he mea hoki mo a koutou kupu i roto i o koutou tino wahi tapu, ko nga wahi hoki ia e hoatu ai nga korero ki a koutou, e hoatu ai ano hoki nga ture me nga whakaritenga whakawa, hei timatanga mo nga whakakitenga me te hanganga o Hiona, hei kororia, hei honore, hei manaakitanga ki ona wahi, na ko enei katoa e whakaritea ana e te ture o toku whare tapu, koia na hoki te mea e whakahaua tonutia ana toku iwi kia hanga ki toku ingoa.

40. Na, he pono taku e mea atu nei ki a koutou, hanga tenei whare ki toku ingoa kia whakakitea atu ai aku ture ki reira ki toku iwi;

41. E whakaaro ana hoki kia whakakitea atu ki taku Hahi nga mea i huna i mua atu o te orokohanganga o te ao,—ara nga mea o te raneatanga o nga wa;

42. Ka whakakitea hoki e ahau ki taku pononga ki a Hohepa, nga mea katoa o tenei whare, me to reira tohungatanga hoki; me te wahi hoki e whakaturia ai ki reira;

43. A me hanga e koutou ki runga i te wahi e whakaarotia na e koutou, koia na pu hoki te wahi kua whiriwhiria e ahau hei hanganga ma koutou;

44. Ki te whakapau koutou i to koutou kaha, ka whakatapua e ahau taua wahi, kia tapu ai hoki;

45. Na ki te whakarongo toku iwi ki toku reo, ki te reo hoki o aku pononga kua whakaritea na e ahau hei arahi i toku iwi, nana, he pono taku e mea atu nei ki a koutou, e kore koutou e taea te pei atu i o ratou wahi.

46. Otira, ki te kore ratou e rongo ki toku reo, ki te reo hoki o enei tangata kua whakaritea nei e ahau, e kore ratou e manaakitia, no te mea e whakapokea ana e ratou toku whenua tapu, me aku ture tapu, me nga pukapuka whakamana, me aku kupu tapu e hoatu nei ki a ratou.

47. Na, tenei ake te wa, ki te hangaia e koutou he whare ki toku ingoa, a kahore koutou e mahi i nga mea e whakahaua nei e ahau, nana e ai ta te Ariki, e kore rawa ahau e whakatutuki i aku i oati ai ki a koutou, e kore hoki e whakatutuki i nga kupu whakaari e tumanakotia e koutou, i oku ringa;

48. No te mea, e kore he manaakitanga mo koutou, engari na a koutou ake mahi na reira i taka iho ki runga ki o koutou matenga nga kanga, te riri te aritarita, me nga whakawakanga, he mea na a koutou mahi kuare, na o koutou whakarihariha e mahi tonu na koutou i mua i toku aroaro, e ai ta te Ariki.

49. He pono, he pono taku e mea atu nei ki a koutou, ki te hoatu e ahau he whakahau ki etahi o nga tama a te tangata kia mahia e ratou tetahi mahi ki toku ingoa, a ka whakapau aua tangata i to ratou kaha, ka hoatu hoki i a ratou rawa hei tautoko i taua tikanga, a kahore e mutu, na me he mea ka haere mai nga hoa riri, ka whakararuraru kia kore ai e tutuki taua mahi; nana, e kore ahau e tono utu i aua tama a te tangata, engari ko ta ratou i mahi ai, ano he patunga tapu ki a au;

50. Na, ko te hara, me te takahanga o aku ture tapu, o aku whakahaunga ka tukua iho e ahau ki runga i nga matenga o te hunga nana i whakararuraru taku mahi, a te toru te wha ra ano o nga whakatupuranga, ki te kahore ratou e ripeneta, ki te whakamauahara ki a au, e ai ta te Ariki, ta te Atua.

51. Koia na te ahua i pai ai ki a au nga whakahere a te hunga i whakahaua kia mahia he pa, he whare ki toku ingoa, i te Takiwa o Tiakihana, Mihuri, i whakararurarua ra e o ratou hoa riri, e ai ta te Ariki, ta to koutou Atua:

52. Na, e ai ta te Ariki, ta te Atua, ki te kahore ratou e ripeneta, ki te whakamauahara tonu ki a au, ka tukuna iho e ahau ki runga i o ratou matenga nga whakawakanga, te riri, te aritarita, te tangi, te aue, me te teteatanga o nga niho, pau noa te toru te wha ra ano o o ratou whakatupuranga.

53. A, ka meinga tenei e ahau hei tauira ki a koutou, kia hari ai o koutou ngakau, te hunga katoa kua whakahaua e ahau kia mahia tetahi mahi, a whakararuraru ana e nga ringaringa o o ratou hoa riri, e te tukinotanga hoki, e ai ta te Ariki.

54. Ko ahau hoki te Ariki, to koutou Atua, a ka whakaorangia e ahau o koutou teina katoa i ma te ngakau, i whakarnatea hoki i te whenua o Mihuri, e ai ta te Ariki.

55. Nana, he pono taku e mea atu nei ki a koutou, ka whakahaua ano koutou e ahau kia hangaia he whare ki toku ingoa, ki tenei wahi hoki, hei whakaatu ma koutou ki a au, e whakarongo ana koutou ki a au i nga wa katoa, kia manaaki ai ahau i a koutou, kia karaunatia ki te honore, ki te mate kore, ki te orangatonutanga.

56. Na, ka mea atu ahau ki a koutou inaianei, ko taku whare manuhiri i whakahaua ra koutou kia hangaia hei nohoanga manuhiri, me mahi ki toku ingoa a me hua toku ingoa ki runga i taua whare, a me tuku hoki taku pononga a Hohepa, me tona whare katoa, kia noho i reira, i tenei whakatupuranga, i tenei whakatupuranga;

57. Ko tenei whakawahinga hoki naku i hoatu ki runga i tona matenga, kia tau iho ai hoki tona manaakitanga ki runga i te matenga o ona uri i muri i a ia.

58. Na, pera me taku kupu ki a Aperahama mo nga uri o te whenua, waihoki ka pera ano taku kupu ki taku pononga ki a Hohepa, ma roto i a koe i ou uri hoki ka ora ai nga uri o te whenua.

59. No reira, me tuku taku pononga a Hohepa, me ona uri i muri i a ia kia whai wahi i roto i taua whare, i tenei whakatupuranga, i tenei whakatupuranga, ake, ake, ake, e ai ta te Ariki.

60. A me karanga te ingoa o taua whare ko te “Whare Nawu,” meinga hoki hei nohoanga ahuareka mo te tangata hei okiokinga mo te tangata haere, kia whakaaroaro ai ia i reira ki te kororia o Hiona, ki te kororia hoki o tenei te tino kamaka o te kokonga o Hiona;

61. Kia rongo ai hoki ia ki nga kupu tohutohu a te hunga i waiho e ahau ki reira, te rite ano ko nga putiputi rongo nui, ko nga kai tiaki hoki i runga i ona parepare.

62. Nana, he pono taku e mea atu nei ki a koutou, me whakarite taku pononga a Hori Miira, ratou ko taku pononga ko Raimana Waiti, ko toku pononga ko Hoani Naiti, me taku pononga hoki me Pita Haa, hei komiti, me whakatu hoki tetahi o ratou hei tumuaki mo to ratou komiti, hei hanga i taua whare.

63. A ko ratou hei komiti kohikohi moni hei hanga i taua whare.

64. Kaua ratou e mau i te moni iti iho i te rima tekau taara (tekau Pauna) mo te hea kotahi i roto i taua whare, a me whakaae hoki ratou kia tango mai i nga moni tekau ma rima mano taara (toru mano pauna) i te tangata kotahi hei hea mona ki roto i taua whare:

65. Otira, kaua ratou e whakaaetia kia tango i nga moni nuku atu i te tekau ma rima mano taara (toru mano pauna) i te tangata kotahi;

66. A, e kore ano hoki ratou e tukua kia tango mai i nga moni i raro iho i te rima tekau taara (tekau pauna) i te tangata kotahi hei hea i roto i taua whare;

67. A, kaua hoki ratou e whakaae ki tetahi tangata kia whai hea ki roto i taua whare, ki te kahore ia e hoatu i te moni ki roto i o ratou ringa i te wa tonu e tango hea ai ia mona ;

68. A, kia rite tonu ki te nui o nga moni e hoatu ana e ia ki roto i o ratou ringaringa, te nui o te hea mona ki roto i taua whare; otira ki te kore e hoatu e ia he moni ki roto i o ratou ringaringa, kaua e hoatu he hea mona ki roto i taua whare.

69. Ki te utu tetahi i te moni ki roto i o ratou ringaringa ka meinga tera hei hea mona ki roto i taua whare, mona ake, mo ona uri hoki i muri i a ia, i tenei whakatupuranga, i tenei whakatupuranga ara ki te kahore ia, ona uri ranei, e hoko, e tuku atu ranei i to ratou hea i runga i ta ratou ake whakaaro, ki te meinga e koutou taku e pai ana, e ai ta te Ariki, ta to koutou Atua.

70. Na, he pono taku e mea atu nei ki a koutou, me he mea taku pononga a Hori Miira, ratou ko taku pononga ko Raimana Waiti, ko taku pononga hoki ko Hoani Naita, taku pononga me Pita Haa, ki te whiwhi moni ki roto i o ratou ringa, ahakoa moni, ahakoa taonga ranei, e rite ana tona wariu ki te moni i tika, kaua rawa tetahi o ratou e whakapau i taua moni mo tetahi take, i waho atu o te hanganga o taua whare;

71. A ki te mea ka whakapaua e ratou tetahi wahi o te moni ki runga i tetahi atu tikanga, i wahi ke o te whare, a kahore hoki i te whakaae te tangata nona taua hea, a ki te kahore ano hoki e tataki-wha ta ratou whakautu i te moni i whakapaua ra e ratou ki wahi ke ake o te whare, e tika ki te whare, ra anake he whakapaunga mo taua moni na, e ai ta te Ariki, ta te Atua ka tau te kanga ki runga i a ratou, ka whakakorea hoki ratou i o ratou turanga, no te mea, ko ahau, ko te Ariki, te Atua e kore ahau e waiho hei tinhangatanga i roto i enei mea.

72. He pono taku e mea atu nei ki a koutou, me hoatu moni e taku pononga a Hohepa kia rite ki tana e pai ai, ki roto i o ratou ringaringa hei hanga i taua whare; otira e kore taku pononga a Hohepa e ahei te hoatu kia nuku atu i te tekau ma rima mano mo taua whare, kia iti iho ranei i te rima tekau taara (tekau pauna); e kore ano hoki e whakaaetia tetahi atu tangata, e ai ta te Ariki.

73. Tenei ano etahi kei te noho hiahia kia mohio ki taku whakaaro mo ratou, kua tono ake hoki ratou ki a au.

74. No reira, ko taku kupu tenei ki a koutou mo taku pononga mo Winihana Naiti, ki te whakarongo ia ki au, me hoatu moni ia mo taua whare mona ake, mo ona uri i muri i a ia, i tenei whakatupuranga, i tenei whakatupuranga,

75. Me whakaara e ia tona reo, kia kaha ano te hamama i waenganui i tenei iwi, me whakahaere hoki e ia te taha ki te hunga rawa kore, kaua ia e kore, kaua ano ia e ngakau kore, ka pai hoki ahau ki ana whakahere, e kore ana whakahere e pera me a Kaina, maku hoki ia, e ai ta te Ariki.

76. Kia hari, kia koa tona whanau, kia anga ke hoki o ratou ngakau i te pouri, kua oti hoki ia e au te whiriwhiri, te whakawahi, a ka whakahonore tona whare i a ia, no te mea ka whakarerea noatia iho e au ona hara, e ai ta te Ariki. Amine.

77. He pono taku e mea atu nei ki a koutou, me hoatu moni hoki taku pononga a Hairama kia rite ki tana e pai ai i roto i taua whare, mona ake me ona uri i muri i a ia, i tenei whakatupuranga, i tenei whakatupuranga.

78. Me tuku ano taku pononga a Ihaka Karana kia hoatu moni mo taua whare, no te mea ko ahau, ko te Ariki e aroha ana ki a ia mo te mahi kua oti i a ia, a ka murua e ahau ona hara katoa; no reira, kia whai hea ia ki roto i taua whare i tenei whakatupuranga, i tenei whakatupuranga.

79. Me whakarite e koutou taku pononga a Ihaka Karana, a ma taku pononga ma Wiremu Maaka ia e whakapa, e manaaki hoki hei hoa haere mo taku pononga mo Hairama, ki te whakaoti i te mahi e hoatu e taku pononga e Hohepa ki a raua, a e tino nui te manaakitanga ki a raua.

80. Me taku pononga ano me Wiremu Maaka me hoatu moni mo taua whare, kia rite ki tana e pai ai mona ake mo ona uri hoki, i tenei whakatupuranga, i tenei whakatupuranga.

81. Me tuku ano taku pononga a Henare G. Herewaru kia hoatu moni mo taua whare, kia rite ki tana e pai ai mona ake mo ana uri hoki i muri i a ia, i tenei whakatupuranga, i tenei whakatupuranga.

82. Me hoatu moni ano toku pononga a Wiremu Raa mo taua whare mona ake, mo ona uri hoki i muri i a ia, i tenei whakatupuranga, i tenei whakatupuranga.

83. Ki te whakarongo ia ki a au, kaua ia e mau i tona whanau ki nga whenua o te tai rawhiti, ara ki Katarana; ahakoa ra, maku ano ma te Ariki e hanga ake ano a Katarana, otira ko ahau, ko te Ariki tera ka whiu i nga tangata o reira.

84. Na, mo taku pononga mo Amona Papiti, he maha nga mea i kore nei ahau i ahuareka ki a ia; nana, kei te whai ia kia tu ko tana tikanga, kia hinga ko taku i whakarite ai, ara kia hinga te Tumuakitanga o taku Hahi, a he kuao kau koura tana e whakaara nei hei koropikotanga mo toku iwi.

85. Kaua tetahi tangata e puta atu i tenei wahi, ko tona hiahia nei kia puritia e ia aku ture.

86. Ki te noho ratou i konei, me noho ratou ki a au; a ki te mate ratou, me mate ratou ki a au; e whiwhi hoki ratou ki te okioki i konei me te mahi ano i a ratou mahi.

87. No reira me whakawhirinaki mai taku pononga a Wiremu ki a au, me whakamutu hoki te wehi o tona ngakau, mo tona whanau kei pangia e te mate e horapa nei i te whenua. Ki te aroha koutou ki a au, kia mau ki aku ture, a ka huri mai te mate e horapa nei i te whenua hei homai i te kororia ki a koutou.

88. Me tono taku pononga a Wiremu kia haere ki te kauwhau i taku Rongo-pai mau tonu ki te hunga o Wahoa, kia rite ki ta te Wairua e tohutohu ai, kia rahi te reo, kia hari ano tona ngakau; me haere ano hoki ia ki te hunga o Katate, ki te hunga o Peringitana, tae atu hoki ki te hunga o Matihana, a hei reira me tatari ia ki te wa o te hui, hei reira hoatu ai ano he kupu ki a ia, e ai ta te Ariki.

89. Ki te ngohengohe ia ki a au, me timata tona whakarongo ki nga tohutohu a taku pononga a Hohepa, a ko te moni hua e puta mai ana ki a ia hei tautoko mana i te hunga rawa-kore, i te perehitanga ano hoki i te whakamaoritanga hou o taku kupu, hei hoatutanga ki nga tangata o te ao.

90. Ki te penei ia, ka tataki-maha nga manaakitanga e whakawhiwhia ki a ia, e kore ano ia e warewaretia, ona uri hoki e kore e kitea e tono taro ana.

91. Na, he pono taku e mea nei ki a koutou, me whakarite, me whakapa, me whakawahi taku pononga a Wiremu hei kaunihera ki taku pononga ki a Hohepa, ki te turanga o taku pononga o Hairama, kia watea ai taku pononga a Hairama ki te Tohungatanga hei Peteriaka, i whakaritea hoki ia hei pera e tona matua, he mea manaaki nana, tuarua e tika ana mona taua turanga,

92. He mea e timata ai i tenei wa tona whiwhi ki nga kii o nga manaakitanga Peteriaka ki runga i nga matenga o toku iwi katoa,

93. Ko tana e manaaki ai, ka manaakitia; ko tana e kanga ai ka kangaia; ko tana hoki e here ai i runga i te whenua, e herea i te rangi; ko tana e wewete ai i runga i te whenua, e wetekia i te rangi;

94. A, i tenei wa ka whakaritea ia e ahau hei Poropiti, hei matakite, hei kai whakakite ki taku Hahi, raua tahi ano ko taku pononga ko Hohepa,

95. I nga mea katoa, kia rite tana ki taku pononga ki ta Hohepa, me whakarongo hoki ia ki taku pononga ki a Hohepa, mana e whakaatu ki a ia nga kii, e inoi ai ia, a ka hoatu ki a ia, ko reira hoki ia karaunatia ai ki taua manaakitanga ki te kororia, ki te honore, ki te Tohungatanga, ki nga homaitanga o te Tohungatanga i hoatu ra i mua ki a Oriwa Kautere, i te wa he pononga ia naku.

96. Kia whakaatu ai taku pononga a Hairama he pono nga mea katoa meake whakakitea e ahau ki a ia, ma reira hoki tona ingoa ka whakahonoretia ai i tenei whakatupuranga, i tenei whakatupuranga, ake, ake, ake tonu atu.

97. Me hoatu ano hoki ki taku pononga ki a Wiremu Raa nga kii e inoi ai e ia tetahi manaakitanga, a ka hoatu ki a ia; me whakaiti rawa hoki i a ia i mua i toku aroaro, kaua ano he koha, a e whiwhi ia ki toku Wairua, koia ano te kai-whakamarie, mana hoki e whakaatu ki a ia te pono o nga mea katoa, e hoatu hoki i taua haora ano, nga kupu hei whakapuakanga mana.

98. A, e whai tahi enei tohu i a ia; ka whakaora ia i nga turoro, ka pei rewera, a ko ia e whakaputaina ki waho i nga ringaringa o te hunga e hiahia ana ki te paitini i a ia;

99. Ka arahina ano ia ma nga huarahi e kore ai nga nakahi whakamate e pa mai ki tona rekereke, a ko ona whakaaro e kake ki runga, ano kei runga i nga parirau o nga kahu;

100. A me he mea ki te pai ahau, kia whakaarahia ake e ia te hunga mate, kei puritia mai e ia tona reo.

101. Mo reira, hamama e taku pononga e Wiremu, kia kaha, kaua ano e puritia mai tou reo, engari i runga i te hari, i te koa, hoatu te Hohana ki a ia e noho nei i runga i te torona ake, ake, ake, e ai ta te Ariki, ta to koutou Atua.

102. Nana, he pono taku e mea atu nei ki a koutou, he mihana kei a au, ma taku pononga ma Wiremu, ma taku pononga ano hoki ma Hohepa, ma raua anake; a ko taku pononga ko Hohepa me noho i te kainga, no te mea, he mahi mana kei reira; ko te roanga atu maku ano e whakaatu ki a koutou taihoa. Koia ano. Amine.

103. Me tenei ano, he pono taku e mea atu nei ki a koutou, ki te mahi taku pononga a Hirini ki a au, me te tu ano hei kaunihera ki taku pononga ki a Hohepa, me whakatika ake i a ia me haere mai ka tu i roto i tona karangatanga, me te whakaiti ano i mua i toku aroaro;

104. A, me he mea ki te homai ia ki a au i nga mea e tika ana, me te whakaae ano te ngakau, me te noho tahi ano ki taku iwi, nana, ko ahau, ko te Ariki, ko to koutou Atua, ka whakaora i a ia kia tino ora ai ia; ka whakaara ano ia i tona reo i runga i nga maunga, ka meinga ano hoki hei mangai moku.

105. Me tuku ratou ko tona whare kia noho, kia tata mai ki te wahi e noho ana taku pononga a Hohepa,

106. I roto i ona haereerenga katoa kia ara ake tona reo ano he tetere e whakatupato ana i te hunga e noho ana i te whenua kia rere i te riri meake puta;

107. Me awhina ia i taku pononga i a Hohepa; me awhina ano hoki taku pononga a Wiremu Raa i taku pononga, i a Hohepa, ki te hanga panui ki nga kingi o te whenua, pera ano me taku i mea ai ki a koutou i mua.

108. Me he mea taku pononga a Hirini ki te mea i taku e pai ai, kaua ia e kawe i tona hapu ki nga whenua o te tai rawhiti; engari me nuku mai to ratou nohoanga, kia rite ki taku i mea ai.

109. Nana, e kore ahau e pai kia rapu ia i te ora mona kia puta i nga ringaringa o ona hoa riri i waho atu o te pa kua whakaritea nei e ahau mo koutou, ara i te pa o Nawu.

110. He pono taku e mea atu nei ki a koutou, inaianei ano, ki te whakarongo ia ki toku reo ka whai painga i a ia. Koia ano. Amine.

111. Nana, he pono taku e mea atu nei ki a koutou, me hoatu e taku pononga e Amoho Reweti he moni ki roto i nga ringaringa o te hunga i whakaritea e ahau hei hanga whare nohoanga, ara i te Whare Nawu:

112. Me pera ia me he mea he hiahia tona kia whai wahi i roto i taua whare, me te ngohengohe tonu ano ki nga tohutohu a taku pononga a Hohepa, me te mahi hoki ko ona ringaringa ake ano, kia whakarongona ai ia e nga tangata;

113. A, me he mea ki te pono tana whakahaere i nga mea katoa e hoatu ai ki a ia, ae ra, ki nga mea ruarua, ka meinga ia hei kai whakahaere mo nga mea maha;

114. Mo reira me whakaiti i a ia kia whakanuia ai ia. Koia ano. Amine.

115. Nana, he pono taku e mea atu nei ki a koutou, ki te whakarongo taku pononga a Ropata D. Whohita ki toku reo, me hanga e ia tetahi whare mo taku pononga mo Hohepa, kia rite ki te whakaritenga i whakariterite ai raua, ara ki te mea ka tuwhera tonu te tatau ki a ia i tenei wa, i tenei wa;

116. Me ripeneta ia mo ana mahi kuare katoa, kakahuria iho ano te kakahu tohu tangata, whakamutua te mahi i te kino, me te whakarere atu ano i te reo kino,

117. Me utu ano hoki ia i tetahi moni ki roto i nga ringaringa o te komiti o te Whare Nawu, mona ake, mo ona uri i muri i a ia, i tenei whakatupuranga, i tenei whakatupuranga,

118. Me te whakarongo hoki ki nga tohutohu a aku pononga a Hohepa, a Hairama, a Wiremu Raa, ki te hunga ano hoki kua whakaritea e ahau hei timata i Hiona, a ka whiwhi painga ia ake, ake, ake. Koia ano. Amine.

119. Na, he pono taku e mea atu nei ki a koutou, kaua tetahi tangata e tukua kia hoatu moni ki te komiti o te Whare Nawu, ki te kahore ia e whakapono ki te Pukapuka a Moromona, ki nga whakakitenga ano hoki kua hoatu e ahau ki a koutou e ai ta te Ariki, ta to koutou Atua;

120. Ki te nuku atu, ki te heke iho ranei i tenei, no te kino, a ka tau iho nga whakawakanga kahore hoki he manaakitanga, e ai ta te Ariki, ta to koutou Atua. Koia ano. Amine.

121. Me tenei ano, he pono taku e mea atu nei ki a koutou, kia tika rawa te utu a te komiti o te Whare Nawu mo nga mahi katoa a te hunga e hanga ana i te Whare Nawu, a ko te utu kia rite ano ki ta ratou i whakariterite ai;

122. Na, e ai ta te Ariki, ma te hunga katoa kua hoatu moni e utu nga kai hanga, kia rite ki te nui o te mahi i hoatu e tena e tena, me he mea ra e hiahia ana hei oranga mo ratou; ki te kore, ka meinga a ratou mahi hei hea mo ratou ki roto i taua whare. Koia ano. Amine.

123. He pono taku e mea atu nei ki a koutou, ka hoatu e ahau inaianei nga apiha o toku Tonungatanga, he mea e noho tonu ai i a koutou nga kii o taua mea, koia ano te Tohungatanga nei e rite ana ki to Merekihereke, koia ano hoki e rite ana ki taku Tama Kotahi.

124. Tuatahi, ka hoatu e ahau ki a koutou a Hairama Mete, hei Peteriaka mo koutou, ki a ia te mana hiiri o taku Hahi, ara te Wairua Ora o te whakaari ma reira nei koutou e hiiri ake ki te ra o te hokonga, kia kahore ai koutou e taka, ahakoa tae mai ki a koutou te haora o te whakamatautauranga.

125. Ka hoatu e ahau ki a koutou taku pononga a Hohepa, hei kaumatua kai whakahaere mo runga katoa i taku Hahi, hei kai whakamaori, hei kai whakakite hei matakite, hei poropiti.

126. Ka hoatu e ahau ki a ia, hei kaunihera mona, taku pononga a Hirini Rikitana, me taku pononga a Wiremu Raa, kia noho ai ratou hei ropu, hei Tumuakitanga Tuatahi, hei whiwhinga i nga ture mo te Hahi katoa.

127. Ka hoatu e ahau ki a koutou taku pononga a Pirikama Ianga hei Tumuaki mo runga i te Kaunihera haereere o te Tekau-ma-rua,

128. Kei a ratou nei, kei te Tekau-ma-rua nga kii me te mana hei huakanga i toku kingitanga ki nga topito e wha o te ao, i muri o tena hei tononga i taku kupu ki nga tangata katoa;

129. Ko ratou tenei e whai ake nei—Ko Hipa C. Kimara, ko Pare P. Parata, ko Orihana Parata, ko Orihana Haiti, ko Wiremu Mete, ko Hoani Teira, ko Hoani E. Peiti, ko Wirawha Wuruwha, ko Wirata Rihara, me Hori A. Mete.

130. Ko Rawiri Patini naku ia i tango ki a au; nana, e kore tona Tohungatanga e tangohia e te tangata; engari he pono taku e mea atu nei ki a koutou, me whakarite tetahi atu tangata mo taua karangatanga.

131. Me tenei ano, ko taku kupu tenei ki a koutou, ka hoatu e ahau ki a koutou he Hai Kaunihera, hei kamaka kokonga mo Hiona;

132. Ara, ko Hamuera Peneta, ko H. G. Herewuru, ko Hori W. Harihi, ko Taari C. Riti, ko Tamati Korowa, ko Nuera Naiti, ko Rawiri Tota, ko Tanapa Wirihana; (Himona Paranihana naku ia i tango ake ki a au, e kore tetahi e ahei ki te tango i tona Tohungatanga, engari me whiriwhiri tetahi tangata ki taua Tohungatanga mo tona turanga, a, he pono taku e mea atu nei ki a koutou, whakaritea taku pononga a Arona Teonehana mo tona turanga); ko Rawiri Whuruma, ko Arapiu Katara me Wiremu Haningitana.

133. A, ka hoatu e ahau ki a koutou ko Tona C. Mete, hei tumuaki mo te ropu o nga Tohunga Nui.

134. Ko taua tikanga i whakatungia hei whakarite i te hunga e meinga ai hei tumuaki, hei pononga ranei mo nga Takiwa i runga i te mata o te whenua,

135. E ahei ano ratou ki te haereere me he mea ki te hiahia ratou, otira ko te tino mahi ma ratou ko te tu he Tumuaki noho, kahore e haereere, koia tenei te ahua o to ratou karangatanga e ai ta te Ariki, ta to koutou Atua.

136. Ka hoatu e ahau ki a ia a Amaha Raimana, raua ko Noa Pakata, hei kaunihera mona, ko ratou ki runga i te komiti o nga Tohunga Nui o taku Hahi, e ai ta te Ariki.

137. Na, ka mea atu ahau ki a koutou, ka hoatu e ahau ki a koutou a Hoani A. Hiki, a Hamuera Wiremu me Hehe Peka, hei Tohungatanga ki runga ake i te ropu o nga kaumatua, ko taua ropu nei e whakatungia ana mo nga minita noho-a-kainga, he ahakoa ra e ahei ana ano ratou kia haereere, engari ko te tikanga e whakaritea ketia ana ratou hei minita noho-a-kainga mo taku Hahi, e ai ta te Ariki.

138. Na, tenei ano ka hoatu e ahau ki a koutou a Hohepa Ianga, a Hohaia Patawhira, a Raniera Maera, a Henare Heremana, a Tera Puriwha, a Riwai Hanakaka, me Hemi Whohita, hei tumuaki ratou mo runga i te ropu o nga whitu tekau.

139. Ko taua ropu i whakatungia mo nga kaumatua haereere hei kawe i toku ingoa ki te ao katoa, ara ki nga wahi e tonoa ai ratou e te Hai Kaunihera haereere, koia ano nga apotoro, hei whakapai i te huarahi i mua i a au.

140. Ko te rereketanga i waenganui i tenei komiti me te ropu o nga kaumatua koia tenei, ko tetahi e haereere tonu ana i nga wa katoa, ko tetahi e noho ana hei whakahaere i runga i nga peka i tenei wa, i tenei wa, kei tetahi te mana whakahaere i tenei wa, i tenei wa, kei tetahi kahore taua mana, koia tenei te kupu a te Ariki a to koutou Atua.

141. Na, ko taku kupu tenei ki a koutou, ka hoatu e ahau ki a koutou a Winihana Naiti, a Hamuera H. Mete, me Hataraka Rauni, ki te mea ka pai ia, hei tumuaki pihopa ratou; hei mohiotanga mo koutou ki nga mahi ma te pihopatanga kua oti te hoatu ki a koutou i roto i te Pukapuka o nga Akoranga me nga Kawenata.

142. Ka mea atu ano hoki ahau ki a koutou, ka hoatu e ahau a Hamuera Rowhe me ona kaunihera hei Tohunga, me te tumuaki o nga kai whakaako me ona kaunihera me te tumuaki o nga rikona ratou ko ona kaunihera, me te tumuaki hoki o te Takiwa ratou ko ona kaunihera.

143. Kua hoatu e ahau ki a koutou enei karangatanga, me o reira kii, hei hoa mahi, hei kai whakahaere tikanga, he mea mo te mahi minita, kia tino rite ai te Hunga Tapu;

144. Na, he whakahaunga tenei ka hoatu e ahau ki a koutou, kia whakapai e koutou enei turanga, kia tautokona hoki nga ingoa kua whakahuahua nei e ahau kia turakina ranei i taku hui nui meake tu,

145. Na, kia mahara koutou ina hanga koutou i te whare ki toku ingoa, me hanga rawa nga ruma mo enei karangatanga katoa, ae ra hoki ko te kupu tenei a te Ariki, a to koutou Atua. Koia ano. Amine.