1 Whakarongo mai, nana, he reo anō nei he mea kua tonoa iho i runga rawa, he mea nui, ā, he mea kaha, ko tōna putanga atu he mea ki ngā tōpito katoa o te ao, āe rā, ko tōna reo he mea ki te tangata—Whakaritea nei e koutou te huarahi a te Ariki, meatia kia tōtika ōna ara.

2 Kua tukuna iho ngā kī o te kīngitanga o te Atua ki ngā tāngata i te whenua, ā, i reira tīmata atu te huri haeretanga o te rongopai ki ngā tōpito o te ao, i te kohatu kua tapahia mai i te maunga e huri haere atu ana, tae atu ki tana whakakīnga ake i te ao katoa.

3 Āe rā, he reo e tangi ana—Whakaritea e koutou te huarahi o te Ariki, whakaritea e koutou te hapa a te Reme, whakaritea mō te Kaipākuhā.

4 Inoia ki te Ariki, karangatia tōna ingoa tapu, whakamōhiotia atu āna mahinga whakamīharo ki waenganui i te iwi.

5 Karangatia ake te Ariki, kia rere atu ai tōna kīngitanga ki runga ki te whenua, kia whiwhi ai ngā tāngata noho i reira ki taua mea, ā, kia rite mō ngā rā e haere mai ana, i konā heke iho ai te Tama a te Tangata i te rangi, e kākahuria ana ki te kānapatanga o tana kororia, kia tūtaki ki te kīngitanga o te Atua kua whakaritea nei i runga i te whenua.

6 Nā reira, kia horapa haere te kīngitanga o te Atua, kia puta mai ai te kīngitanga o te rangi, kia taea koe, E te Atua, te whakakororia i te rangi me te whenua, kia pēhia iho ō hoariri; i te mea nōu te hōnore, te mana me te kororia, mō āke tonu atu. Āmine.