1 Whakarongo, E koutou ngā rangi, ā, kia whai taringa mai, E te whenua, kia hari koutou o reira, nā te mea ko te Ariki te Atua, ā, kāore he Kaiwhakaora atu anō i a ia.

2 He nui tōna mātauranga, he mīharo ōna huarahi, ā, kāore e taea te mōhio e tētahi ki te whānui o ana mahinga.

3 Kāore ōna take e taka, kāore hoki tētahi i reira e taea ana te ārai i tana ringa.

4 He rite tonu ia mai i te mau tonu ki te mau tonu, ā, kua kore ōna tau e memeha.

5 Nā te mea pēnei tā te Ariki—He whakaaroha, he atawhai ahau, te Ariki, ki te hunga e wehi mai nei ki ahau, ā, e āhuareka ana anō tā rātou whakahōnore i te hunga e mahi ki ahau i runga i te tika me te pono tae atu ki te mutunga.

6 Ka nui tō rātou utu, ā, ka mau tonu tō rātou korōria.

7 Ā, māku ngā mea ngaro katoa e hura ki a rātou, āe rā, ko ngā mea ngaro katoa kua hunaia ake nei o taku kīngitanga mai i ngā rā onamata, ā, mō ngā whakatupuranga maha e heke mai nei, māku e whakamōhio atu ki a rātou te āhuareka pai o tāku e pai ai e pā ana ki ngā mea katoa o tōku kīngitanga.

8 Āe rā, ka mōhio pū anō rātou ki ngā mea whakamīharo o te mau tonu, ā, māku e whakakite atu ki a rātou ngā mea e puta mai ai, ko ngā mea maha pū anō o ngā whakatipuranga maha.

9 Ā, ka nui tō rātou mātauranga, ā, ka tae ake tō rātou māramatanga ki te rangi; ā, ka ngaro noa atu te mātauranga o te hunga matatau i mua i tō rātou aroaro, ā, ka meinga hei mea kore te māramatanga o te hunga whakaaro tika.

10 Nā te mea mā tōku Wairua rātou e whakamārama, ā, mā tōku mana e whakamōhio atu ki a rātou ngā mea muna o tāku e pai ai—āe rā, ko aua mea pū anō kāore anō kia kitea e te karu, kia rangona rānei e te taringa, kia uru atu rānei ki roto ki te ngākau o te tangata.

11 Ko māua, a Hōhepa Mete, Tama., māua ko Hirini Rikitana, i roto i te Wairua i te rā ngahuru mā ono o Pepuere, i te tau o tō tātou Ariki kotahi mano e waru rau e toru tekau mā rua—

12 Nā te mana o te Wairua ō māua karu i puare, ā, ō māua māramatanga i whakamāramahia ai, kia kitea, ā, kia māramahia ngā mea o te Atua—

13 Ko aua mea pū anō i mua i te orokotīmatanga rā anō o te ao, i whakamanaia ai e te Matua, mā roto i tana Tama Kotahi Anake, kei roto nei i te uma o te Matua, mai i te tīmatanga pū anō;

14 Ko ia e whakaatu mai nei māua; ā, ko te tuhinga e whakaaturia mai nei e māua te raneatanga o te rongopai a Ihu Karaiti, koia te Tama, te mea i kitea ai e māua, ā, koia hoki te mea i kōrero tahi ai māua i tētahi whakakitenga ā-rangi.

15 Nā, i a māua e mahi ana i te mahi whakapākehā, i whakataua mai nei māua e te Ariki, i tae atu māua ki te whiti rua tekau mā iwa o te upoko tuarima o Hoani, i homai ai ki a māua e pēnei ana—

16 E kōrero ana mō te aranga ake o te hunga mate, e pā ana ki te hunga e rongo ai i te reo o te Tama a te Tangata:

17 Ā, ka ara mai; te hunga kua mahi pai, i te aranga ake o te hunga tika; me te hunga kua mahi kino, i te aranga ake o te hunga tika kore.

18 Nā ka mīharo māua i tēnei, nā te mea i homai ki a māua e te Wairua.

19 Ā, i a māua e whakaaroaro ana ki ēnei mea, i whakapā mai te Ariki ki ngā karu o tō māua māramatanga kātahi ka whakatūwheratia, ā, ka whiti mai te korōria o te Ariki huri noa.

20 Ā, i kite māua i te korōria o te Tama, i te ringa katau o te Matua, ā, i whakawhiwhia ki tana raneatanga;

21 Ā, i kite anō i ngā anahera tapu, me te hunga kua whakatapua i mua i tōna torona, e koropiko ana ki te Atua, me te Reme, e koropiko ana ki a ia mō āke tonu atu.

22 Ināianei ā, whai muri iho i ngā whakaaturanga maha i homai nei e ia, koinei te whakaaturanga, te mea whakamutunga o te katoa, kua hoatu nei e māua mōna: E ora ana ia!

23 Nā te mea i kite māua i a ia, i runga pū anō i te ringa katau o te Atua; ā, i rongo anō i te reo e whakaatu ana koia te Tama Kotahi Anake a te Matua—

24 Nā, māna hoki, ā, mā roto i a ia, ā, nāna hoki, i tū ai ngā ao, ā, i hangaia ai, ā, ko aua tāngata noho o reira ngā tama ā-wairua me ngā tamāhine ā-wairua ki te Atua.

25 Ā, i kite anō māua i tēnei, me te whakaatu atu, nā, i tētahi anahera a te Atua, tētahi mea whaimana i te aroaro o te Atua, i haututū ki te Tama Kotahi Anake i arohaina nei e te Matua, ā, i roto hoki i te uma o te Matua, i peia iho i te aroaro o te Atua rāua ko te Tama,

26 Ā, i karangatia ko Whakangaro Wairua, nā te mea i tangi ngā rangi mōna—ko Rutiwha ia, tētahi tama o te ata.

27 Ā, i kite māua, ā titiro, kua taka ia! kua taka, ko tētahi tama pū anō o te ata!

28 Ā, i a māua tonu i te Wairua, ka whakahaua māua e te Ariki kia tuhia te whakakitenga; nā te mea i kite māua i a Hātana, taua nākahi onamata, te rēwera pū anō, i haututū ki te Atua, ā, i whai atu kia rapua te kīngitanga o tō tātou Atua me tana Karaiti—

29 Nā reira, kei te pakanga ia ki ngā hunga tapu o te Atua, ā, ka karapotia rātou e ia huri noa.

30 Ā, i kite māua i tētahi whakakitenga mō ngā whakamamaetanga o te hunga i pakangahia e ia, ā, i taea e ia, nā te mea pēnei te putanga mai o te reo o te Ariki ki a māua:

31 Pēnei tā te Ariki e pā ana ki te hunga katoa e mōhio ana ki tōku mana, ā, kua meinga hei kaitango o reira, ā, kua tukuna rātou e rātou anō mā roto i te mana o te rēwera kia taea ai, ā, ki te whakakāhore i te pono me te whakakore atu i tōku mana—

32 Ko rātou te hunga e kīa ana ko ngā tama whakangaro wairua, te hunga e kīa nei e au kua pai ake me i kore rātou i whānau mai;

33 Nā te mea he tahā riri rātou, kua oti nei te whakatau mō rātou kia patua e te riri o te Atua, me te rēwera rātou ko ana anahera i te ao mau tonu;

34 Kāore he murunga hara mō te hunga kua kōrerotia ake nei i tēnei ao, i te ao rānei e kainamu mai nei—

35 I te mea kua whakakorehia te Wairua Tapu whai muri iho i te whakawhiwhinga ki a ia, ā, kua whakakorea te Tama Kotahi Anake a te Matua, ā, kua rīpekahia ia e rātou anō, ka meinga kia tāwaitia nuitia ia.

36 Koinei te hunga e haere atu ai ki roto ki te roto ahi whānāriki, ki te taha o te rēwera me ana anahera—

37 Ā, te hunga anake e taea ai e te matenga tuarua;

38 Āe rā, he pono, ko te hunga anake e kore nei e hokona i te wā o te Ariki, whai muri iho i te whakamamaetanga o tana riri.

39 Nā te mea ka kumea te toenga atu mā runga i te aranga o te hunga mate, mā roto i te wikitōria me te korōria o te Reme, i patua ai, i roto nei i te uma o te Matua i mua noa atu i te orokohanganga rā anō o ngā ao.

40 Ā, koinei te rongopai, ngā rongo whakahari, i whakaaturia mai nei e te reo i puta mai ai i ngā rangi ki a māua—

41 I haere mai ia ki roto ki te ao, ko Ihu pū anō, kia rīpekahia e te ao, ā, kia pīkauria ake ngā hara o te ao, ā, kia whakatapua te ao, ā, kia horoia e ia i ngā kino katoa;

42 Nā, mā roto i a ia e whakaorangia ai ngā tāngata katoa kua whakanohoia iho e te Matua ki roto ki tōna mana, ā, nāna hoki i hanga;

43 E whakakorōriatia te Matua, ā, e whakaorangia ai ngā mahinga katoa o ana ringaringa, atu i aua tama whakangaro wairua e whakakorea atu nei te Tama whai muri i tā te Matua whakakite i a ia.

44 Nā reira, ka whakaorangia e ia ngā mea katoa atu i a rātou—ka haere atu rātou ki roto i te whakawhiunga mutunga kore, koia ko te whakawhiunga mutunga kore, koia hoki te whakawhiunga mau tonu, kia whakahaere tahi me te rēwera me ana anahera i te ao mau tonu, ki te wāhi e kore e mate tā rātou noke, ā, kāore e tineia te ahi, koia ko te whakamamaetanga—

45 Ā, kāore e mōhiotia ana e tētahi tangata ki tō reira mutunga, ki tō reira wāhi rānei, ki tō rātou whakamamaetanga rānei;

46 Kihai rānei i whakakitea atu, kāore ināianei, kāore rānei e whakakitea atu ki te tangata, ki te hunga anake kua meinga hei kaitango o reira;

47 Hei aha koa, kei te hura atu au, te Ariki, i tēnei mā runga i te whakakitenga ki te tokomaha, engari ka katia wawetia anō nō muri tata;

48 Nā reira, kāore rātou e mārama ana ki te mutunga, te whānui, te tiketike, te hohonu, me tō reira pōuritanga, kāore tētahi tangata atu i te hunga e whakamanaia ai ki tēnei whakahēanga.

49 Ā, i rongo māua i te reo, e mea ana: Tuhia te whakakitenga, nā titiro, koinei te mutunga o te whakakitenga mō ngā whakamamaetanga o te hunga hara.

50 Hei āpiti anō kei te whakaatu atu māua—nā te mea i kite, ā, i rongo māua, ā koinei te whakaaturanga o te rongopai a te Karaiti e pā ana ki a rātou te hunga e ara ake ai i te aranga o te hunga tika—

51 Ko rātou te hunga i whiwhi i te whakaaturanga mō Ihu, ā, i whakapono ki tōna ingoa, ā, i rumakina i runga i te ritenga o tana tanumanga i te wai i runga i tōna ingoa, ā, tēnei e rite ana ki te whakahaunga i homai ai e ia—

52 Mā te pupuri i ngā whakahaunga e horoia ai, ā, e whakamākia ai i ō rātou hara katoa me te whakawhiwhi ki te Wairua Tapu mā runga i te whakapākanga o ngā ringaringa o te tangata kua whakamanaia, ā, kua hīria ake ki tēnei mana;

53 Ā, ko rātou kua taea e te whakapono, ā, kua hīria ake e te Wairua Tapu o te whakaari, e whakahekea iho nei e te Matua ki runga ki te hunga katoa e tika ana, e pono ana.

54 Ko rātou te hunga nō te hāhi o te Mātāmua.

55 Ko rātou te hunga i hoatu ai e te Matua ngā mea katoa ki roto i ō rātou ringaringa—

56 Ko rātou te hunga e tū nei hei pirihi, ā, hei kīngi, kua whiwhi nei i tana raneatanga me tōna korōria;

57 Ā, he pirihi nā te Runga Rawa, i runga i te ritenga o Merekihereke, koia he mea nō te ritenga o Enoka, koia nō te ritenga o te Tama Kotahi Anake.

58 Nā reira, e ai tā te tuhituhinga, he atua rātou, ko ngā tama pū anō a te Atua—

59 Nā reira, nō rātou ngā mea katoa, ahakoa i te ora, i te mate rānei, ngā mea o nāianei rānei, ngā mea e puta mai rānei, nō rātou te katoa, ā, nā te Karaiti rātou, ā, nā te Atua te Karaiti.

60 Ka taea e rātou ngā mea katoa.

61 Nā reira, kaua e tukua tētahi tangata kia whaikorōria i roto i te tangata, engari me tuku kē ia kia whaikorōria i roto i te Atua, māna nei e riro ai ngā hoariri katoa ki raro i ōna waewae.

62 Ka noho ēnei ki te aroaro o te Atua rāua ko tana Karaiti mō āke tonu atu.

63 Koinei te hunga e kawea ngātahitia mai e ia, ina haere mai ia i ngā kapua o te rangi hei kīngi i runga i te whenua, i runga i tana iwi.

64 Koinei te hunga e whaiwāhi ai i roto i te aranga tuatahi.

65 Koinei te hunga e ara ake ai i te aranga o te hunga tika.

66 Koinei te hunga kua haere mai nei ki Maunga Hīona, ā, ki te pā o te Atua ora, te wāhi atua, te mea tapu rawa o te katoa.

67 Koinei te hunga kua haere mai nei ki tētahi tira anahera tē taea te tatau, ki te huihuinga whānui me te hāhi o Enoka, o te Mātāmua hoki.

68 Koinei te hunga kua tuhia ō rātou ingoa i te rangi, i reira te Atua rāua ko te Karaiti hei kaiwhakawā mō te katoa.

69 Koinei te hunga tika kua meinga kia tika rawa atu mā roto i a Ihu te kaiwawao o te kawenata hou, nāna hoki tēnei whakamārietanga tino tika rawa mā roto i te whakahekenga o ōna ake toto.

70 Koinei te hunga he tīnana Tikitiki o Rangi ō rātou, ko tōna rite ki te korōria o te rā, o te Atua pū anō, te mea tiketike rawa o te katoa, kua oti nei te tuhituhi mō te rā o te kikorangi hei mea e rite ana ki tōna korōria.

71 Hei āpiti anō, i kite māua i te ao Rangitūhāhā, ā nana, titiro, koinei te hunga nō te Rangitūhāhā, he rerekē tōna korōria i tō taua hāhi o te Mātāmua kua whiwhi nei i te raneatanga o te Matua, e rite pū ana anō ki tō te marama rerekē i te rā i roto i te kikorangi.

72 Nana, koinei te hunga i mate ture kore atu;

73 Ā, ko rātou hoki ngā wairua o te tangata kua whakamaua ki te whareherehere, i toroa atu ai e te Tama, ā, i kauhautia atu te rongopai ki a rātou, kia whakawākia ai rātou kia rite ki te tangata i te kikokiko;

74 Te hunga kīhai i whiwhi i te whakaaturanga mō Ihu i te kikokiko, engari i whiwhi whai muri iho.

75 Koinei te hunga whai hōnore i runga i te whenua, i whakakāpōhia e te tinihanga tangata.

76 Koinei te hunga e whiwhi nei i tōna korōria, engari kaua ko tōna raneatanga.

77 Koinei te hunga e whiwhi ki te aroaro o te Tama, engari kaua ko te raneatanga o te Matua.

78 Nā reira, ko rātou ngā tīnana Rangitūhāhā, ehara i te tīnana Tikitiki o Rangi, ā, he rerekē ō rāua korōria pērā i te rerekē o te marama i te rā.

79 Koinei te hunga ehara i te tino toa i runga i te whakaaturanga mō Ihu; nā reira, kāore rātou e whiwhi i te karauna i runga i te kīngitanga o tō tātou Atua.

80 Ināianei ā, koinei te mutunga o te whakakitenga i kite ai māua mō te Rangitūhāhā, nā, i whakahaua māua e te Ariki kia tuhia i a māua tonu i te Wairua.

81 Hei āpiti anō, i kite māua i te korōria o te Ranginui, ko taua korōria tērā nō te mea iti iho, e rite pū ana anō ki te rerekē o te korōria o ngā whetū ki te korōria o te marama i te kikorangi.

82 Koinei te hunga kīhai i whiwhi i te rongopai o te Karaiti, kāore rānei ō rātou tētahi whakaaturanga mō te Karaiti.

83 Koinei te hunga kāore i whakakorea atu te Wairua Tapu.

84 Koinei te hunga e panangia iho ki te ao rēwera.

85 Koinei te hunga e kore nei e hokona mai i te rēwera kia tae rā anō mai te aranga whakamutunga, kia mutu rā anō i te Ariki, i a te Karaiti te Reme pū anō, tana mahi.

86 Koinei te hunga e kore nei e whiwhi ki te raneatanga i te ao mau tonu, engari ki tō te Wairua Tapu mā roto i te minitatanga o Rangitūhāhā;

87 Me te Rangitūhāhā mā roto i te minitatanga o Tikitiki o Rangi.

88 Ā, ka whiwhi anō hoki te Ranginui i te minitatanga o ngā anahera kua whakataua kia minita atu ki a rātou, kua whakataua hei wairua minita mō rātou; nā te mea ka meinga rātou hei kaiwhiwhi ki te whakaoranga.

89 Ā, pēnei tā māua i kite ai, i roto i te whakakitenga rangi, te korōria o Ranginui, e kore e taea te mārama;

90 Ā, kāore he tangata e mōhio ana ki tērā atu i te tangata i whakakitea atu ai e te Atua.

91 Ā, pēnei tā māua i kite ai i te korōria o Rangitūhāhā kei tua noa atu i tō te Ranginui korōria i roto i ngā mea katoa, i roto pū anō i te korōria, me te kaha, me te rangatiratanga.

92 Ā, pēnei tā māua i kite ai i te korōria o Tikitiki o Rangi, he nui ake i ngā mea katoa—te wāhi e kīngi ana te Matua pū anō ki runga ki tōna torona mō āke tonu atu;

93 E tuohu iho ai ngā mea katoa i runga i te maruwehi māhaki me te hoatu ki a ia te korōria mō āke tonu atu.

94 Ko te hāhi o te Mātāmua te hunga e noho nei i tōna aroaro; ā, ka kite rātou pērā i a rātou e kitea ana, ā, ka mōhio pērā i a rātou e mōhiotia ana, i te mea kua whiwhi i tana raneatanga me tana aroha noa;

95 Ā, e meinga ana rātou e ia kia ōrite te mana, me te kaha, me te rangatiratanga.

96 Ā, he kotahi te korōria o Tikitiki o Rangi, pērā pū anō i te korōria o te rā he kotahi.

97 Ā, he kotahi te korōria o Rangitūhāhā, pērā pū anō i te korōria o te marama he kotahi.

98 Ā, he kotahi te korōria o Ranginui, pērā pū anō i te korōria o ngā whetū he kotahi; nā te mea he rerekē nei te korōria o tētahi whetū i tētahi atu, pērā pū anō te rerekē o tō tētahi korōria i tō tētahi atu i roto i te ao Ranginui;

99 Nā te mea koinei te hunga nō Paora, nō Aporohi hoki, nō Kipa hoki.

100 Koinei te hunga e kīa ana nō tētahi rātou, ā, nō tētahi atu rātou—nō te Karaiti ētahi, ā, nō Hoani ētahi, ā, nō Mohi ētahi, ā, nō Iriha ētahi, ā, nō Itaiaha ētahi, nō Ihāia ētahi, ā, nō Enoka ētahi;

101 Engari kīhai i whiwhi i te rongopai, kīhai rānei te whakaaturanga mō Ihu, kīhai rānei ngā poropiti, kīhai rānei te kawenata mau tonu.

102 Hei whakamutu ake, koinei te hunga katoa e kore nei e whakahuihuia tahitia me ngā hunga tapu, kia kahakina atu ki te hāhi o te Mātāmua, ā, kia whakawhiwhia ki roto ki te kapua.

103 Koinei te hunga rūkahu, he hunga whaiwhaiā hoki, he hunga pūremu hoki, he hunga tūkari hoki, me ngā tāngata e aroha ana, ā, e mahi teka ana.

104 Koinei te hunga e pākia ai ki te riri o te Atua i runga i te whenua.

105 Koinei te hunga e pākia ai e te utu o te ahi mau tonu.

106 Koinei te hunga e panaia iho ki te ao rēwera, ā, ka pākia e te riri o te Atua Kaha Rawa, kia puta te raneatanga o ngā wā, ina pēhia iho e te Karaiti ngā hoariri katoa ki raro i ōna waewae, ā, kua whakatikaina rawatia tana mahi.

107 Ko reira tukua ake e ia te kīngitanga, me te hoatu ki te Matua, e kohakore ana, e mea ana: Kua taea e au, ā, kua takatakahia te takahanga waina e tōku kotahi anō, arā, ko te takahanga waina o te āritarita o te riri o te Atua Kaha Rawa.

108 Kātahi ia ka karaunatia ki te karauna o tōna korōria, kia noho i te torona o tōna mana hei kīngi mō āke tonu atu.

109 Engari nana, titiro, i kite māua i te korōria me ngā kainoho o te ao Ranginui, nā, he rite tō rātou tokomaha ki ngā whetū i te kikorangi o te rangi, he rite rānei ki te onepū i tātahi;

110 Ā, i rongo i te reo o te Ariki e mea ana: Ka piko iho ngā turi o ēnei katoa, ka whāki mai ngā arero katoa ki a ia e noho mai nei i runga i te torona mō āke tonu atu;

111 Nā te mea ka whakawākia rātou kia rite ki ā rātou mahinga, ā, ka whiwhi tēnā tangata me tēnā tangata kia rite ki āna ake mahinga, me tōna ake rangatiratanga, i roto i ngā whare nunui kua whakaritea mai nei;

112 Ā, ka noho rātou hei pononga nā te Runga Rawa; engari tē taea e rātou te tae atu ki te wāhi e noho nei te Atua rāua ko te Karaiti, he ao mutunga kore.

113 Koinei te mutunga o te whakakitenga i kite ai māua, i whakahaua nei māua kia tuhi i a māua tonu i roto i te Wairua.

114 Engari he nui, ā, he mīharo ngā mahinga a te Ariki, ā, me ngā mea ngaro o tana kīngitanga i whakakitea mai nei māua e ia, kei tua noa atu tōna korōria i te mea e taea ana te mārama, me tōna kaha, me tōna rangatiratanga;

115 I whakahaua māua e ia kia kaua e tuhi i a māua tonu i roto i te Wairua, ā, kāore e tika ana i raro i te ture kia whakahuatia ake e te tangata;

116 Kāore hoki e taea ana ērā mea e te tangata te whakamōhio atu, nā te mea me waiho hei mea kite, hei mea mārama nā te mana o te Wairua Tapu, e whakatauhia iho e te Atua ki runga ki te hunga e aroha ana ki a ia, ā, e whakamākia rātou e rātou anō i tōna aroaro;

117 Ko te hunga e tukuna ai e ia te tikanga hei kitenga, ā, hei mōhiotanga mō rātou anō;

118 Kia waiho mā roto i te mana me te whakakitenga o te Wairua, i a ia tonu i te kikokiko, e taea ai e rātou te noho ki tōna aroaro i te ao korōria.

119 Ā, kia whai korōria, kia whai hōnore, ā, kia whai rangatiratanga ki te Atua me te Reme mō āke tonu atu. Āmine.