Wāhanga 19
He whakakitenga mā roto i a Hōhepa Mete, ki Maniheta, Niu Ioka, kāore e kore i te raumati o te tau 1829. I tana hītori, ka whakapuakina ake e te Poropiti hei “whakahaunga nā te Atua, ehara i te tangata, ki a Mātini Harihi, i hoatu ai e te mea Ora Tonu.”
1–3, He mana katoa tō te Karaiti; 4–5, Me rīpenetā ngā tāngata katoa, ka whakamamaetia rānei; 6–12, Nō te Atua te whakawhiunga tonutanga; 13–20, I whakamamaetia te Karaiti mō te katoa, kia kore ai rātou e whakamamaetia ki te rīpenetā rātou; 21–28, Kauhautia te rongopai o te rīpenetātanga; 29–41, Whakapuakina ngā rongo whakahari.
1 Ko au te Arepa me te Omeka, ko te Karaiti te Ariki; āe rā, ko au anō tēnā, te tīmatanga me te whakamutunga, te Kaihoko o te ao.
2 I te mea kua tutuki i ahau, kua oti i ahau te hiahia o te mea nāna nei au, ko tā Matua pū anō, e pā ana ki ahau—kua meatia nei tēnei kia whakapēhi iho au i ngā mea katoa ki raro i ahau—
3 E mau tonu ana ngā mana katoa, tae atu ana ki te whakangaromanga i a Hātana me āna mahinga i te mutunga o te ao, me te rā nui whakamutunga o te whakawākanga, māku e whakatau iho ki runga i ngā tāngata o reira, e whakawākia ana ngā tāngata katoa e rite ana ki āna mahinga me āna meatanga kua mea nei ia.
4 Ā, e tika ana kia rīpenetā ngā tāngata katoa, ka whakamamaetia rānei, nā te mea ko au, te Atua, kāore ōku mutunga.
5 Nā reira, kāore au e whakakore i ngā whakawākanga e whakataua ai, engari ka puta ngā auē, he tangihanga, he uhunga me te tētētanga o ngā niho, āe rā, ki te hunga e kitea nei i tōku taha mauī.
6 Hei aha koa, kāore i tuhituhia iho nei, nā, kāore he mutunga o tēnei whakamamaetanga, engari kua tuhia iho nei he whakamamaetanga mutunga kore.
7 Anō, kua tuhia iho nei ko te pāpunitanga tonutanga; nā reira he mārama ake nei tēnei i ō ērā atu karaipiture, kia mahi ai ki runga i ngā ngākau o ngā tamariki a te tangata, hei whakakorōria ngātahitia tōku ingoa.
8 Nā reira, māku tēnei mea ngaro e whakamārama atu ki a koe, nā te mea e tika ana kia mōhio koe pērā pū anō i ōku ake āpōtoro.
9 E kōrero ana au ki a koe ngā mea kua kōwhiria nei i roto i tēnei mea, anō he kotahi, kia tomo mai koutou ki roto ki taku okiokinga.
10 Nā, nana, ko te mea ngaro o te atuatanga, anō tōna nui! Nā, nana, kāore ōku mutunga, ā, ko te whakawhiunga e meatia ai e tōku ringa he whakawhiunga mutunga kore, nā te mea ko Mutunga Kore tōku ingoa. Nā reira—-
11 Ko te whakawhiunga tonutanga tā te Atua whakawhiunga.
12 Ko te whakawhiunga mutunga kore tā te Atua whakawhiunga.
13 Nā reira, kei te whakahau au ki a koe kia rīpenetā, me te pupuri i ngā whakahaunga kua whiwhi nei koe nā te ringa o taku pononga a Hōhepa Mete, Tama., i runga i tōku ingoa;
14 Ā, he mea nā tōku mana nui rawa i whiwhi nei koe i ērā mea;
15 Nō reira kei te whakahau au ki a koe kia rīpenetā—rīpenetā, kei pākia koe e au ki te tokotoko o tōku māngai, me tōku āritarita, me tōku riri, ā, ka nanakia ōu mamaetanga—kāore koe e mōhio me pēhea te nui o te mamae, kāore koe e mōhio ana ki tōna koi, āe rā, kāore koe e mōhio ana ki te uaua o tōna mamae.
16 Nana rā, ko ahau, te Atua, kua mamae au i ēnei mamaetanga mō te katoa, kia kore ai rātou e whakamamaetia ki te rīpenetā rātou;
17 Engari, ki te kore rātou e rīpenetā ka mamae rātou pērā i ahau;
18 Ko taua mamaetanga nei i mea i ahau, i te Atua, te mea nui o ngā mea katoa, kia tūoioi nā te mamae, ā, kia heke ai te toto i ngā putaputa katoa o tōku tīnana, ā, kia mamae ko te tīnana rāua ko te wairua—ā, kia hiahia au kia kore ai au e inu i te kapa kawa, kia pāmamao atu—-
19 Hei aha koa, kia whakakorōriatia te Matua, ā, ka tīkina atu e au, ā, ka whakaotia aku whakaritenga mō ngā tamariki a te tangata.
20 Nā reira, kei te whakahau au i a koe anō kia rīpenetā, kei whakaiti au i a koe anō ki tōku mana nui; ā, kia whāki mai koe i ō hara, kei pākia koe ki ēnei whakawhiunga kua kōrerotia nei e ahau, i pākia ai koe e ēnei mamae i runga i te mehua iti rawa, āe rā, i te wā i tango atu au i tōku Wairua.
21 Ā, e whakahau ana au ki a koe kia kaua e kauhau atu i tētahi mea kē atu i te rīpenetātanga, ā, kia kaua e whakakite atu i ēnei mea ki te ao kia tae rā anō te wā e pai ai i roto i tōku mātauranga.
22 Nā te mea tē taea e rātou te kai mīti ināianei, engari me whiwhi miraka rātou; nā reira, me kaua rawa rātou e mōhio ki ēnei mea, kei ngaro rātou.
23 Māku koe e ako, ā, me whakarongo mai ki aku kupu; hīkoi i runga i te māhaki o tōku Wairua, ā, ka whai rangimārie koe i roto nei i ahau.
24 Ko Ihu Karaiti ahau; i haere mai au i runga i te hiahia a te Matua, ā, kei te mahi au i tāna e pai ai.
25 Hei āpiti atu, e whakahau ana au ki a koe kia kaua koe e hiahia ki te hoawahine a tō kiritata; kaua rānei e whai atu i te oranga o tō kiritata.
26 Hei āpiti anō, e whakahau ana au ki a koe kia kaua e kaiponu i ō ake rawa, engari me tuku noa mō te tānga o te Pukapuka a Moromona, e mau nei te pono me te kupu a te Atua—
27 Koia taku kupu ki te Tauiwi, kia haere akuanei ki te Hūrai, he morehu hoki ngā Rāmana nā rātou, kia whakapono ai rātou i te rongopai, ā, kia kaua e titiro tonu atu ki te haerenga mai o tētahi Mīhaia, kua haere kē mai ia.
28 Hei āpiti anō, e whakahau ana ahau ki a koe kia inoi ā-māngai, ā, kia pērā anō i roto i tō ngākau; āe rā, i mua i te ao, i roto anō i te wāhi huna, i te wāhi tūmatawhānui, i te wāhi tūmatawhāiti anō hoki.
29 Ā, māu e whakapuaki ngā rongo whakahari, āe rā, whakapuakina ake i runga i ngā maunga, i runga hoki i ngā wāhi tiketike katoa, ki waenganui i ngā iwi katoa e whakaaehia ai koe kia kite.
30 Ā, māu e mahi i runga i te ngākau pāpaku, e whakawhirinaki ana ki ahau, e kore nei e taunu i te hunga kaitaunu.
31 Ā, kaua koe e kōrero mō ngā tikanga hōhonu, engari māu e whakapuaki i te rīpenetātanga me te whakapono ki runga i te Kaiwhakaora, me te murunga hara mā te rumakitanga, ki te ahi hoki, āe rā, ko te Wairua Tapu pū anō.
32 Nana, koia te whakahaunga whakamutunga nui e hoatu ai au ki a koe e pā ana ki tēnei kaupapa; nā te mea kāti ake tēnei mō tō hīkoinga awatea, tae atu pū anō ki te mutunga o tō oranga.
33 Ā, ka tau te pōuritanga ki runga ki a koe ki te kōtiti atu koe i ēnei tohutohu, āe rā, ko tō ake whakangaromanga me te whakangaromanga o ō rawa.
34 Wāwahia atu tētahi wāhi o ō rawa, āe rā, ko tētahi wāhi pū anō o ōu whenua, me ngā mea katoa hāunga ko te tautoko o tō whānau.
35 Utua te nama i whakritea nei e koe ki te kaitā. Wetekina koe e koe anō i te hereheretanga.
36 Whakarērea tō whare me tō kāinga, hāunga te wā e hiahia ana koe kia kite i tō whānau;
37 Ā, me kōrero noa atu koe ki ngā tāngata katoa; āe rā, kauhautia atu, ākina atu, whakapuakina te pono, i runga pū anō i te reo kaha, i runga i te reo whakawhetai, e karanga ana—Ohana, ohana, kia whakapaingia te ingoa o te Ariki te Atua!
38 Inoi i ngā wā katoa, kātahi au ka maringi iho i tōku Wairua ki runga ki a koe, ā, ka nui ōu manaakitanga—āe rā, he nui ake i ngā mea mēnā kua whiwhi koe i ngā taonga katoa o te whenua me ngā mea poke e rite ana ki tō reira nui.
39 Nana, e āhei ana rānei koe ki te pānui ake i tēnei me te kore e koa, me te whakaoho ake i tō ngākau i runga i te hari?
40 E āhei ana rānei koe ki te oma noa anō nei he kaiārahi matapō?
41 E āhei ana rānei koe kia ngākau pāpaku, ā, kia māhaki, me te whakahaere i a koe anō i runga i te whaiwhakaaro i tōku aroaro? Āe rā, haere mai ki ahau tō Kaiwhakaora. Āmine.