Wāhanga 58
He whakakitenga mā roto i a Hōhepa Mete te Poropiti, i Hīona, Takiwā o Tiakimana, Mītori, Akuhata 1, 1831. I mua, i te hāpati tuatahi whai muri iho i te taenga mai o te Poropiti mā ki roto i te Takiwā o Tiakimana, Mītori, i whakatūria tētahi huinga whakapono, ā, i rumakina ngā mema e rua. I waenganui i taua wiki, i tae atu ētahi o te Hunga Tapu o Kourawira, nō te Peka o Tamihana me ētahi atu ki reira (tirohia wāhanga 54). I te hīkaka ngā mea tokomaha ki te ako i te hiahia a te Ariki e pā ana ki a rātou i te wāhi huihuinga hou.
1–5, Ka karaunatia te hunga e ū pai ana i roto i ngā taumahatanga ki te korōria; 6–12, Me whakarite ngā Hunga Tapu mō te mārenatanga o te Reme me te hākari a te Ariki; 13–18, He kaiwhakawā ngā pīhopa i Iharaira; 19–23, Me ngohengohe te Hunga Tapu ki ngā ture o te whenua; 24–29, Me whakamahi e te tangata ō rātou mana kōwhiringa ki te mahi pai; 30–33, Ka whakahaua, ka whakakorea e te Ariki; 34–43, Me whāki, me whakarere e te tangata ō rātou hara kia rīpenetā ai; 44–58, Me hoko e ngā Hunga Tapu ō rātou mea tuku iho, ā, me huihui ki Mītori; 59–65, Me kauhau atu te rongopai ki ngā mea katoa.
1 Whakarongo, E koutou e ngā erata o taku hāhi, ā, kia whai taringa mai ki aku kupu, ākona mai i ahau he aha tāku e pā ana ki a koutou, e pā ana anō hoki ki tēnei whenua kua tonoa nei koutou.
2 Nā, he pono tāku e mea atu nei ki a koutou, kua manaakitia te tangata e pupuri nei i aku whakahaunga, ahakoa i te ora, i te mate rānei; ā, ko te tangata e ū tonu ana i te taumahatanga, ka nui ake taua utu mōna i te kīngitanga o te rangi.
3 Kāore e taea ana e koutou te kite atu ki ō karu ā-tīnana, i tēnei wā tonu, i te rautaki a tō koutou Atua e pā ana ki aua mea e puta mai ai ā muri ake nei, me te korōria e whai mai ai i ngā taumahatanga nui.
4 Nā, ka puta ngā manaakitanga whai muri iho i ngā taumahatanga nui. Nā reira e haere mai ana te rā e karaunatia ai koutou ki te korōria nui; kāore anō kia tae mai te hāora, engari kua tata mai.
5 Kia mahara ki tēnei, kua kōrerotia ki a koutou i mua, kia whakatakotoria i tou ngākau, me te whiwhi i tērā e whai mai ana.
6 Nana, he pono tāku e mea atu nei ki a koutou, kua tonoa koutou e au mō tēnei take—kia ngohenghohe ai koutou, ā, kia takatū ai ō koutou ngākau ki te whakaatu atu i ngā mea e puta mai ai;
7 Kia whiwhi ai anō hoki koutou ki te hōnore o te whakatakoto tūāpapa, me te whakaaturanga atu mō te whenua e tū ai te Hīona o te Atua;
8 Kia whakaritea anō hoki tētahi hākari o ngā mea mōmona mō te hunga rawakore; āe rā, he hākari o ngā mea mōmona, o te wāina i āta whakapaingia, kia mōhio ai te ao, nā, kāore e kore ka tutuki i ngā māngai poropiti;
9 Āe rā, he hākari o te whare o te Ariki, i tino taka paitia, ka pōwhiritia ngā iwi katoa ki reira.
10 Tuatahi, ko te hunga whairawa me te hunga mātau, te hunga whaimātauranga me te hunga rangatira;
11 Ā, whai muri iho i tērā haere mai ai te rā o tōku mana; kātahi te rawakore, te kopa, me te matapō, me te taringa turī, e haere mai ai ki te mārenatanga o te Reme, me te kai i te hākari a te Ariki, i whakaritea ai mō te haerenga mai o te rā nui.
12 Nana, nāku, nā te Ariki, tēnei i kōrero.
13 Ā, kia puta atu ai te whakaaturanga i Hīona, āe rā, mai i te māngai o te pā o tō te Atua wāhi—
14 Āe rā, kua tonoa atu koutou e au ki reira mō tēnei take, ā, kua kōwhiria hoki taku pononga a Eruera Pātiri, ā, kua whakataua ki a ia tana mīhana i tēnei whenua.
15 Engari ki te kore ia e rīpenetā i ōna hara, koia nei ko te whakaponokore me te matapōtanga o te ngākau, tukua ia kia tūpato kei taka.
16 Nana kua hoatu tana mīhana ki a ia, ā, e kore nei e hoatu anō.
17 Ā, kua whakataua te tangata e tū ai i tēnei mīhana hei kaiwhakawā i Iharaira, pērā me ngā wā onamata, ki te whakawehewehe i ngā whenua o tō te Atua wāhi ki ana tamariki;
18 Kia whakawākia ai tana iwi e te whakaaturanga o te hunga tika, e te āwhina hoki o ana kaunihera, e rite ana ki ngā ture o te kīngitanga kua hoatu nei ki ngā poropiti a te Atua.
19 Nā, he pono tāku e mea atu nei ki a koutou, ka mau tonu taku ture ki runga i tēnei whenua.
20 Kaua e tukua tētahi hei kaiwhakahaere; engari tukua mā te Atua hei kaiwhakahaere mō te mea whakawā, e rite ana ki te kupu rūnanga o tāna e pai ai, hei kupu kē rānei, ko te tangata e rūnanga ana, e noho ana rānei ki runga i te nohoanga whakawā.
21 Kaua e tukua tētahi kia whatia ngā ture o te whenua, nā te mea kāore he take ō te tangata e pupuri nei i ngā ture a te Atua kia whatia ngā ture o te whenua.
22 Nā reira, me noho i raro i ngā mana o runga, kia whakahaere te mea nōna te tikanga hei whakahaere, ā, e whakahekea iho ngā hoariri katoa ki raro i ōna waewae.
23 Nana, ko ngā ture katoa kua whiwhi nei koutou i tōku ringa koia ngā ture o te hāhi, ā, kia pēnei tā koutou pupuri atu i aua mea. Nana, he mātauranga tēnei.
24 Ināianei ā, he rite ki tāku i kōrero ai e pā ana ki taku pononga a Eruera Pātiri, ko tēnei whenua te whenua hei kāinga mōna, mō te hunga kua whakataua e ia hei kaunihera mōna; ko te whenua hoki hei kāinga mō te tangata kua whakataua nei e au hei kaitiaki mō taku pātaka;
25 Nā reira, tukua rātou kia mauria mai ō rātou whānau ki tēnei whenua, kia rite ki tā rātou e rūnanga ai i waenganui i a rātou anō.
26 Nana rā, ehara i te mea tika kia tuku whakahau au i ngā mea katoa; nā te mea ehara te tangata e whakahaua nei i roto i ngā mea katoa i te pononga mātau, engari he mea māngere; nā reira e kore ia e whiwhi utu.
27 He pono tāku e mea atu nei, me mahi hīkaka te tangata i tētahi kaupapa pai, me te mahi i ngā mea maha i runga i ā rātou ake hiahia, ā, kia whakaputaina nuitia mai ngā mea tika;
28 Nā te mea kei roto i a rātou te mana, nā konā he kaiwhakarite rātou ki a rātou anō. Ā, ki te mea ka mahi pai te tangata e kore rawa e ngaro i a rātou tō rātou utu.
29 Engari ka pāpunitia te tangata kāore nei e mahi i tētahi mea kia whakahaua rā anō ia, me te whiwhi whakahaunga i runga i te ngākau ruarua, me te pupuri māngeretia e ia taua whakahaunga.
30 Ko wai ahau nāna nei te tangata i hanga, e ai tā te Ariki, e mea ai he kohakore te tangata e kore nei e ngohengohe ki aku whakahaunga?
31 Ko wai ahau, e ai tā te Ariki, kua whakaaria engari kīhai i whakatutukia?
32 Ka tuku whakahau au engari kāore te tangata e whakarongo; Ka whakakorea e au kātahi ka kore rātou e whiwhi manaakitanga.
33 Kātahi ka kī ake rātou i ō rātou ngākau: Ehara tēnei i te mahi a te Ariki, nā te mea kāore i whakatutukia ana whakaari. Engari auē te mate mō ngā mea pērā, nā te mea kei te whanga tō rātou utu i raro, ehara i runga.
34 Ināianei ā kei te tuku tohutohu atu au ki a koutou e pā ana ki tēnei whenua.
35 He mātauranga i roto i ahau kia tū ai a Mātini Hārihi hei tauira mō te hāhi, i tana huapae iho i ana moni i mua i te pīhopa o te hāhi.
36 Waihoki, he ture tēnei ki ngā tāngata katoa e haere mai ai ki tēnei whenua ki te whiwhi i tētahi mea tuku iho; ā, meatia anōtia ana moni e ia kia rite ki tā ngā ture e tohutohua ai.
37 Ā, he mātauranga anō kia ai he whenua ki Inipenetana hei hokohoko, hei wāhi mō te pātaka, mō te whare anō hoki o te tānga.
38 Ā, ka hoatu anō ētahi atu tohutohu ki a ia e pā ana ki taku pononga a Mātini Hārihi he mea nā te Wairua, nā, ka whiwhi ia ki tana taonga tuku iho kia rite ki tāna e pai ai;
39 Ā, tukua ia kia rīpenetā i ana hara, nā te mea kei te whai atu ia i te whakahōnore o te ao.
40 Me tuku anō hoki taku pononga a Wiremu W. Wherapa kia tū i te tūranga kua whakataua atu e au ki a ia, me te whiwhi ki tana taonga tuku iho i te whenua;
41 Waihoki, kua whai take ia kia rīpenetā, nā te mea au, te Ariki, kāore e āhuareka ana ki a ia, nā te mea kei te whai ia kia kake ake, ā, ehara ia i te mea māhaki i tōku aroaro.
42 Nana, ka murua te tangata e rīpenetā ai i ana hara, ā, kāore au, te Ariki, e maumahara tonu i muri atu.
43 Mā konei mōhio ai koutou mehemea kua rīpenetā tētahi tangata i ana hara—nana, māna aua mea e whāki, ā, ka whakarērea.
44 Ināianei ā, he pono tāku e mea atu nei e pā ana ki te toenga atu o ngā erata o taku hāhi, kāore anō kia tae mai te wā, mō ngā tau maha, kia whiwhi ai rātou i tō rātou taonga tuku iho i tēnei whenua, ki te kore rātou e hiahiatia ana mā roto i te inoi o te whakapono, kia rite anake ki te mea e whakataua iho ai ki a rātou e te Ariki.
45 Nana rā, ka āia ngātahitia atu e rātou te iwi mai i ngā tōpito o te ao.
46 Nā reira, whakahuihuia ngātahitia mai koutou; ā, ko te hunga kāore i whakataua kia noho mai i tēnei whenua, tukua rātou kia kauhau i te rongopai i ngā rohe huri noa, huri noa; ā, hei muri atu i tērā tukua rātou kia hoki atu ki ō rātou kāinga.
47 Tukua rātou kia kauhau i runga i te huarahi, me te whakaatu i te pono i ngā wāhi katoa, me te karanga ake ki te hunga whairawa, te hunga teitei me te hunga iti, me te hunga rawakore kia rīpenetā.
48 Ā, tukua rātou kia waihanga hāhi, ki te mea ka rīpenetā ngā tāngata o te ao.
49 Ā, tukua kia whakataua ai tētahi kaiwhakarite i runga i te reo o te hāhi, mō te hāhi i Ohaio, kia whiwhi moni hei hoko whenua i Hīona.
50 Ā, kei te tuku whakahau atu au ki taku pononga a Hirini Rikitana, kia tuhia e ia tētahi whakaaturanga mō te whenua o Hīona, ā, he tuhinga mō te hiahia o te Atua, kia rite ki tā te Wairua e whakamōhio atu ai ki a ia;
51 Ā, me tuku pukapuka me tētahi reta tono ki ngā hāhi katoa ki te kohi moni, kia purua iho ki ngā ringaringa o te pīhopa, o te kaiwhakarite rānei, e rite ana ki tāna e pai ai, e rite ana rānei ki tāna e tohu ai, hei hoko whenua hei whenua tuku iho mō ngā tamariki a te Atua.
52 Nana rā, he pono tāku e mea atu nei ki a koutou, e hiahia ana te Ariki kia whakatūwhera ake ngā apataki me ngā tamariki a te tangata i ō rātou ngākau, kia hokona pū anō te rohe katoa o te whenua, ina rite te wā.
53 Nana, anei he mātauranga. Tukua rātou kia pērā ai kei kore e whiwhi taonga tuku iho, hāunga i runga i te whakaheke toto.
54 Hei āpiti anō, ki te mea kua hopu whenua, tukua he kaimahi o ia āhua, o ia āhua kia tonoa atu ai ki tēnei whenua, ki te mahi mō te hunga tapu o te Atua.
55 Tukua ēnei mea katoa kia meatia i runga i te tika; ā, tukua kia whakamōhiotia atu ngā tikanga o ngā whenua i ētahi wā e te pīhopa, e te kaiwhakarite rānei o te hāhi.
56 Ā, me kaua e tuku kia meatia te huihuinga i runga i te kaikā, kaua rānei i te whāwhai; engari tukua kia meatia e rite ana ki tā ngā erata o te hāhi kōrero i ngā huihuinga whānui, e rite ana ki te mātauranga e whiwhi ai rātou i ētahi wā.
57 Ā, tukua taku pononga a Hirini Rikitana kia whakatapu ai i tēnei whenua, me te wāhi mō te temepara, ki te Ariki.
58 Ā, tukua kia karangatia ake tētahi huihuinga whānui; ā, whai muri iho i tēnei tukua aku pononga a Hirini Rikitana rāua ko Hōhepa Mete, Tama., kia hoki, me Oriwa Kautere anō hoki, ki te whakatutuki i te toenga atu o te mahi kua whakataua atu ki a rātou i tō rātou ake whenua, me te toenga atu anō e whakataua ai e ngā huihuinga whānui.
59 Ā, kaua e tuku i tētahi kia hoki atu ai i tēnei whenua ki te kore ia e whakaatu atu i runga i te huarahi, mō ngā mea e mōhio nei ia, ā, e tino whakaponotia ana hoki e ia.
60 Tukua kia tangohia atu ērā mea kua riro ki a Hipa Pitihana; ā, tukua ia kia tū ai hei mema i roto i te hāhi, me te mahi ki ōna ake ringaringa, me ngā teina, kia kohetetia rawatia ia mō ōna hara katoa; nā te mea kāore e whākina mai ana e ia, ā, e hiahia ana ia kia hunaia ērā.
61 Tukua te toenga o ngā erata o tēnei hāhi, e haere mai ana ki tēnei whenua, ko ētahi o rātou kua manaakitia rawatia, hira noa ake i te mehua, kia whakatūria ai tētahi huihuinga whānui ki runga ki tēnei whenua.
62 Ā, tukua taku pononga a Eruera Pātiri hei whakahaere i te huihuinga e whakatūria ai e rātou.
63 Ā, tukua rātou anō kia hoki, e kauhau atu ana i runga i te huarahi, e whakaatu atu ana mō ngā mea kua huraina ki a rātou.
64 Nā, he pono, me pāhō atu te tangi i tēnei wāhi ki roto ki te ao katoa, ki ngā pito pāmamao rawa hoki o te ao—me kauhau atu te rongopai ki ngā mea katoa, e puta mai ana ngā tohu ki te hunga e whakapono ana.
65 Ā nana, kei te haere mai te Tama a te Tangata. Āmine.