Wāhanga 70
He whakakitenga mā roto i a Hōhepa Mete te Poropiti, ki Hairama, Ohaio, Noema 12, 1831. E ai tā te hītori o te Poropiti, nā, i whakatūria ake ngā huinga motuhake e whā mai i te 1 ki te 12 o Noema. I te mea whakamutunga o ēnei huinga, i aro atu ngā whakaaro ki te whakahirahira o ngā whakakitenga e whakaputaina ake i muri iho hei Book of Commandments (Pukapuka o ngā Whakahaunga) kātahi ko te Whakaakoranga me ngā Kawenata. I hoatu tēnei whakakitenga whai muri iho i te pōtitanga a te huinga e mea ana “e rite ana te utu o ngā whakakitenga ki ngā taonga o te Ao katoa.” E hāngai atu ana tā Hōhepa Mete hītori ki ngā whakakitenga hei “tūāpapa mō te Hāhi i ēnei rā o muri nei, ā, hei painga mō te ao, e whakaatu mai anō kua tukuna mai anō ngā kī o ngā mea ngaro o te kīngitanga o tō tātou Kaiwhakaora ki te tangata.”
1–5, Ka whakaritea ētahi kaitiaki hei whakaputa whakakitenga; 6–13, E tika ana ngā tāngata e mahi nei i ngā mea o te wairua kia mahi; 14–18, Me taurite te Hunga Tapu i roto i ngā mea katoa o te tīnana.
1 Nana, ā, kia whakarongo, E koutou ngā tāngata noho o Hīona, me koutou te iwi o taku hāhi e noho tawhiti ana, ā, me rongo i te kupu a te Ariki i hoatu nei e au ki taku pononga a Hōhepa Mete, Tama., me taku pononga hoki a Mātini Hārihi, me taku pononga hoki a Oriwa Kautere, me taku pononga hoki a Hoani Witima, me taku pononga hoki a Hirini Rikitana, me taku pononga hoki a Wiremu W. Wherapa, mā runga i te whakahau ki a rātou.
2 Nā te mea kei te hoatu au i tētahi whakahaunga ki a rātou; nā reira whakarongo mai kia rongo, nā te mea pēnei tā te Ariki ki a rātou—
3 Nāku, nā te Ariki rātou i whakatau, ā, kua whakamanaia rātou hei kaitiaki i runga i ngā whakakitenga me ngā whakahaunga i hoatu nei e au ki a rātou, me ērā atu mea e hoatu ai e au ki a rātou a muri ake nei;
4 Ā, ko tāku e hiahia nei i a rātou hei te rā o te whakawākanga, arā, he whakaaturanga mō tēnei tiakanga.
5 Nā reira, kua whakataua atu nei e au ki a rātou, ā, koinei tā rātou mahi i roto i te hāhi o te Atua, kia whakahaerehia aua mea me ngā tikanga katoa o aua mea, āe rā, ngā painga o reira.
6 Nā reira, kei te hoatu e au tētahi whakahaunga ki a rātou, kia kaua rātou e hoatu i ēnei mea ki te hāhi, ki te ao rānei;
7 Hei aha koa, ki te mea ka whiwhi rātou i tua atu i te mea e tika ana mō rātou me ā rātou hiahia, me hoatu ki taku pātaka;
8 Ā, ka whakatapua ngā painga ki ngā tāngata o Hīona, ki ō rātou whakatipuranga anō hoki, ki te mea ka meinga rātou hei kaiwhiwhi e rite ana ki ngā ture o te kīngitanga.
9 Nana, koinei tā te Ariki e tono atu ai ki ia tangata i tana tiakanga, pēnei i ahau, i te Ariki, i whakatau atu, ka whakatau atu rānei a muri ake nei i tētahi tangata.
10 Ā nana, kāore e wātea ana tētahi i tēnei ture mehemea nō te hāhi o te Atua ora;
11 Āe rā, kāore rānei te pīhopa, kāore rānei te kaiwhakarite e tiaki nei i te pātaka o te Ariki, kāore rānei te tangata i whakataua ki roto ki tētahi tūranga kaitiaki i runga i ngā mea o te tīnana.
12 Ko te tangata e whakataua ai hei minita atu ki ngā mea o te wairua, e tika ana taua tangata mō te mahi, kia rite ki te hunga i whakataua ai ki tētahi tūranga kaitiaki i roto i ngā mea o te tīnana;
13 Āe rā, ka nui kē ake, ā, kua whakarea taua nui ki a rātou mā roto i ngā whakakitenga o te Wairua.
14 Hei aha koa, ka taurite koutou i roto i ō mea o te tīnana, ā, kaua anō i runga i te pūhaehae, ki te pēnei ka puritia te nui o ngā whakakitenga o te Wairua.
15 Nā, kei te hoatu e au tēnei whakahaunga ki aku pononga hei painga mō rātou i a rātou e noho tonu ana, hei whakakitenga mō taku manaakitanga ki runga ki ō rātou māhunga, ā, hei utu mō tā rātou tākare me tō rātou āhurutanga;
16 Mō te kai me te kākahu; mō tētahi mea tuku iho; mō ngā whare me ngā whenua, i roto i ngā tū āhuatanga katoa e whakanoho ai au, te Ariki i a rātou ki roto, ā, ahakoa ki hea rānei ahau, te Ariki, e tono ai i a rātou.
17 Nā te mea kua pono rātou i runga i ngā mea maha, ā, kua pai tā rātou i te mea kīhai rātou i hara.
18 Nana, he mea whakaaroha ahau, te Ariki, ā, māku rātou e manaaki, ā, ka kuhu atu rātou ki roto i te hari o ēnei mea. Koia anō. Āmine.