1 He pono tā te Ariki ki a koe, e taku pononga e Hōhepa Mete, Tama., ki a koe hoki e taku pononga e Hirini Rikitana, ki a koe hoki e taku pononga e Hairama Mete, ki ō koutou kaikaunihera ināianei me ngā mea e whakataua ai a muri ake nei;

2 Ā, ki a koe hoki e taku pononga e Eruera Pātiri, me ōna kaikaunihera;

3 Ā, ki aku pononga ū hoki nō te kaunihera teitei o taku hāhi i Hīona, nā te mea ka huaina pēneihia, ā, ki ngā erata me ngā tāngata katoa o taku Hāhi o Ihu Karaiti o te Hunga Tapu i ngā Rā o Muri Nei, kua whakamararatia atu i te ao katoa;

4 Nā te mea ka karangahia pēneihia ake taku hāhi i ngā rā o muri nei, arā, ko Te Hāhi o Ihu Karaiti o te Hunga Tapu i ngā Rā o Muri Nei.

5 He pono tāku e mea atu nei ki a koutou katoa: E tū, ā, e kānapa atu, kia meinga ai tō mārama hei kara ki ngā iwi;

6 Ā, kia meinga ai te whakahuihui tahitanga ki runga i te whenua o Hīona, ki runga hoki i ōna pou, hei mea tiaki, ā, hei haumarutanga i te marangai, ā, mai i te riri ina riringihia iho, he mea nanu kore ki runga i te whenua katoa.

7 Tukua te pā, te Uru Mamao, hei whenua tapu, hei mea kua whakatapua mōku; kātahi ka karangahia ake te mea tapu rawa, nā te mea he tapu te whenua e tū nei koe.

8 Nō reira, e whakahau ana ahau ki a koe kia hangaia ake tētahi whare mōku, mō te whakahuihui tahitanga o aku hunga tapu, kia koropiko mai rātou ki ahau.

9 Ā, tukua kia ai he tīmatanga ki tēnei mahi, me tētahi tūāpapa, ā, me tētahi mahi whakatakatū, hei tēnei raumati e kainamu mai ana;

10 Ā, tukua kia meatia te tīmatanga i runga i te rā tuawhā o tērā atu Hūrae; ā, atu i taua wā tukua taku iwi kia kaha mahi ki te hanga i tētahi whare ki tōku ingoa;

11 Ā, hei te kotahi tau tukua rātou kia tīmata anō tā rātou whakatakoto i te tūāpapa o tōku whare.

12 Pēnei tukua rātou i taua wā kia mahi kaha tae noa ki tana otinga, mai i te kohatu kokonga i reira ki te tuanui i reira, tae noa ki te wā kāore i reira tētahi mea kāore anō kia oti.

13 He pono tāku e mea atu nei ki a koe, kaua e tukuna taku pononga a Hōhepa, taku pononga rānei a Hirini, taku pononga rānei a Hairama, kia uru ai ki roto i te nama mō te hanganga ake o tētahi whare ki tōku ingoa;

14 Engari tukua kia hangaia ake tētahi whare mōku e rite ana ki te tauira e whakaatu nei au ki a rātou.

15 Ā, ki te kore taku iwi e hanga ai e rite ana ki te tauira e whakaatu atu ai au ki tō rātou tumuakitanga, e kore rawa ahau e whakawhiwhi i tērā i ō rātou ringaringa.

16 Engari ki te hanga taku iwi kia rite ki te tauira e whakaatu ai au ki tō rātou tumuakitanga, ki taku pononga pū anō a Hōhepa Mete me ōna kaikaunihera, kātahi au ka whakawhiwhi i tērā i ngā ringaringa o tōku iwi.

17 Hei āpiti anō, he pono tāku e mea atu nei ki a koutou, ko tāku e pai ai kia hangaia wawetia ake te pā o te Uru Mamao e te whakahuinga o aku hunga tapu;

18 Ā, kia whakataua hoki ērā atu wāhi hei pou i ngā rohe huri noa, i ngā wā e whakakitea ai ki taku pononga a Hōhepa, i tēnei wā, i tēnā wā.

19 Nana rā, ka piri au ki a ia, ā, māku ia e whakatapu i mua i te iwi; nā te mea kua hoatu ki a ia ngā kī o tēnei kīngitanga me te minitatanga. Koia anō. Āmine.