Wahanga 119
He whakakitenga mā roto i a Hōhepa Mete te Poropiti, ki te Uru Mamao, Mītori, Hurae 8, 1838, hei whakautu i tana inoi: “E te Ariki! Huraina mai ki āu pononga he aha te utu e tika ana mō ngā rawa o tō iwi hei whakatekau.” ko te ture whakatekau, e māramahia ana i ēnei rā, kāore i homai ki te Hāhi i mua noa i tēnei whakakitenga. Ko te tikanga o te kupu whakatekau i te inoi kua whakahuatia ake nei, ā, i roto hoki i ngā whakakitenga i mua (64:23; 85:3; 97:11) kāore i hāngai ki te hau tekau, engari ki ngā tāpaenga katoa, ki ngā koha, ki ngā pūtea rānei o te Hāhi. I hoatu e te Ariki i mua ki te Hāhi te ture o te whakatapunga me te tiakanga o ngā rawa, i uru ai ngā mema (ko te nuinga he erata) mā runga i tētahi kawenata, ko te tikanga he mea mau tonu. Na te korenga o te tokomaha ki te pupuri ki tēnei kawenata, i tangohia atu tēnā mō tētahi wā, kātahi ka hoatu kē e ia te ture o te whakatekau ki te Hāhi katoa. I inoi ake te Poropiti ki te Ariki kia mōhio ai e hia te nui o ā rātou rawa e tika ana ki a Ia mō ngā mea tapu. Ko tēnei whakakitenga te whakautu.
1–5, Me utu e te Hunga Tapu ō rātou toenga rawa kātahi ka hoatu, hei whakatekau, te hau tekau o ā rātou utu ā-tau; 6–7, Mā konei e whakatapu ai te whenua o Hīona.
1 He pono, pēnei tā te Ariki, e tika ana ki ahau kia tukua mai ā rātou toenga katoa ki ngā ringaringa o te pīhopa o taku Hāhi i Hīona,
2 Mō te hanganga ake o taku whare, ā, mō te whakatakotoranga iho o te tūāpapa o Hīona, ā, mō te tohungatanga, ā, mō ngā nama o te Tumuakitanga o taku Hāhi.
3 Ā, hei tīmatanga o te whakatekau o tōku iwi.
4 Ā, whai muri iho i tērā, ko te hunga kātahi anō ka whakatekauhia, ka utua te kotahi hau tekau o ā rātou utu ā-tau; ā, ka ai tēnei hei ture mau tonu mō rātou, mō tōku tohungatanga tapu, e ai tā te Ariki.
5 He pono tāku e mea atu nei ki a koutou, ka pahawa ake, nā, ka whakatekauhia te hunga katoa e hui tahi atu ai ki te whenua o Hīona i ō rātou toenga rawa katoa, ā, ka ū ki tēnei ture, ki te kore e kore rawa e whakaaengia hei mea tika kia piri ki a koutou.
6 Ā, ko taku kupu tēnei ki a koutou, ki te kore taku iwi e pupuri i tēnei ture, hei mea tapu, ā, mā tēnei ture e whakatapu ai te whenua o Hīona ki ahau, kia puritia ai aku ture me aku whakawā i reira, kia meinga ai hei mea tapu rawa, nana, he pono tāku e mea atu nei ki a koutou e kore e meinga hei whenua o Hīona ki a koutou.
7 Ā, ka ai tēnei hei tauira ki ngā pou katoa o Hīona. Koia anō. Āmine.