Wahanga 119
He whakakitenga i homai ma roto i a Hohepa, te Poropiti i Wha Weta, Mihuri, i te 8 o Hurae, 1838, he whakautu i te patai; “E te Ariki, whakaatutia mai ki o, pononga e hia e hiahiatia ana e koe o a ratou taonga hei whakatekau?”
1. He pono, ko te kupu tenei a te Ariki, e hiahia ana ahau ki te toenga o a ratou taonga katoa kia hoatu ki roto i nga ringaringa o te pihopa o taku Hahi i Hiona.
2. Hei hanga i toku whare, hei whakatakoto hoki i te kaupapa mo Hiona, mo te Tohungatanga, hei whakaea ano hoki i nga nama o te Tumuakitanga o taku Hahi.
3. Hei timatanga tenei mo te whakatekau o toku iwi.
4. I muri o tena, ko te hunga katoa kua oti te whakatekau me utu ia tau, ia tau i te wahi whakatekau o nga moni e puta ana mai ki a ratou i te tau; a ka waiho tenei hei ture ma taku Tohungatanga ki te iwi mo ake tonu atu, e ai ta te Ariki.
5. He pono taku e mea atu nei ki a koutou ko te hunga katoa e haere ana ki Hiona noho ai, me hoatu katoa i te toenga o a ratou taonga hei whakatekau, me pupuri tonu hoki e ratou tenei ture, ki te kahore e kore ratou e tau kia noho i waenganui o toku iwi.
6. Ko taku kupu tenei ki a koutou, ki te kahore toku iwi e pupuri i tenei ture, e whakatapu rawa ranei i taua ture, ma konei hoki ka meinga ai tenei whenua, hei Hiona ki a au, hei taunga iho mo aku ture me aku whakawakanga, he mea e tino tapu rawa ai, nana, he pono taku e mea nei ki a koutou, e kore ia e meinga hei Hiona ki a au;
7. A ko tenei hei tauira ki nga Takiwa katoa o Hiona. Koia ano. Amine.