1 Kei roto rā, i te hāhi, ngā tohungatanga e rua, arā, te Merekihereke me te Ārona, tae atu ana ki te Tohungatanga o Rewaiti.

2 E kīa ana te tuatahi ko te Tohungatanga o Merekihereke nā te mea ko Merekihereke tētahi pirihi teitei tino nui.

3 I mua i ōna rā i karangatia ake ko te Tohungatanga Tapu, he mea nā te Ritenga o te Tama o te Atua.

4 Engari nā te hopohopo ki te ingoa o te Mea Nui Rawa, kia kaua e auau te whakahuahua i tōna ingoa, i huaina e rātou, te hāhi, i ngā rā onamata, te tohungatanga mō Merekihereke, ko te Tohungatanga o Merekihereke rānei.

5 He āpitihanga katoa ngā mana, ngā tūranga rānei i te hāhi nō tēnei tohungatanga.

6 Engari e rua ngā wehenga, ngā upoko nui rānei—ko tētahi ko te Tohungatanga o Merekihereke, ā, ko tētahi atu ko te Tohungatanga o Ārona, o Riwaiti rānei.

7 Kei raro te tūranga o te erata i te tohungatanga o Merekihereke.

8 E mau nei i te Tohungatanga o Merekihereke te tikanga o te tumuakitanga, ā, kei a ia te mana i runga i ngā tūranga katoa i te hāhi i ngā reanga katoa o te ao, hei whakahaere i ngā mea o te wairua.

9 Ko te Tumuakitanga o te Tohungatanga Teitei, nō te ritenga o Merekihereke, nōna te tikanga kia whakahaere i roto i ngā tūranga katoa i te hāhi.

10 Nō ngā pirihi teitei o te Tohungatanga o Merekihereke te tikanga ki te whakahaere i ō rātou ake tūranga, i raro i te tirohanga o te tumuakitanga, i roto i te whakahaere i ngā mea o te wairua, ā, i roto hoki i te tūranga o te erata, te pirihi (o te ritenga o Riwaiti), te kaiako, te rīkona, me te mema.

11 Nō te erata te tikanga ki te whakahaere mōna mehemea kāore i reira te pirihi teitei.

12 Me whakahaere e te pirihi teitei rāua ko te erata i ngā mea o te wairua, kia rite pū ki ngā kawenata me ngā whakahaunga o te hāhi; ā, nō rātou hoki te tikanga ki te whakahaere i roto i ēnei tūranga katoa o te hāhi ina kāore i reira ētahi atu mea whaimana teitei ake.

13 E karangatia ana te tohungatanga tuarua ko te Tohungatanga o Ārona, nā te mea i whakataua iho ki runga i ngā uri o Ārona, i roto i ō rātou whakatipuranga katoa.

14 E huaina ana ia ko te pirihi iti iho nā te mea he āpitihanga ki te mea nui ake, ki te Tohungatanga o Merekihereke rānei, nōna hoki te mana ki te whakahaere i ngā tikanga tapu o waho.

15 Ko te pīhopatanga te tumuakitanga o tēnei tohungatanga, ā, e mau ana ngā kī, te mana rānei o taua mea anō.

16 Kāore he tangata e whai mana ana ki tēnei tūranga i raro i te ture, ki te pupuri i ngā kī o tēnei tohungatanga, hāunga he uri tūturu o Ārona ia.

17 Engari i te mea he pirihi teitei nō te Tohungatanga o Merekihereke kei a ia te mana ki te whakahaere i roto i ngā tūranga iti iho, māna e whakahaere te tūranga pīhopa mehemea kāore i reira tētahi uri tūturu o Ārona, mehemea ka karangatia ia, ā, ka whakataua ia, ā, ka whakamanaia ia ki tēnei mana e ngā ringaringa o te Tumuakitanga o te Tohungatanga o Merekihereke.

18 Mā te mana o te mea teitei ake, te Tohungatanga o Merekihereke rānei, e pupuri ngā kī mō ngā manaakitanga ā-wairua katoa o te hāhi—

19 Me te rironga mai hoki o te mātauranga ki ngā mea ngaro o te kīngitanga o te rangi, kia whakatūwheratia ake ngā rangi ki a rātou, kia nohotahi me te whakaminenga whānui me te hāhi o te Mātāmua, me te nohoanga tahitanga ki te aroaro o te Atua te Matua, rāua ko Ihu te kaiwawao o te kawenata hou.

20 Mā te mana o te mea iti iho, te Tohungatanga o Ārona rānei, e pupuri ngā kī o te minitatanga o ngā anahera, me te whakahaere i ngā tikanga tapu o waho, te reta o te rongopai, te rumakitanga o te rīpenetātanga mō te murunga hara, e rite ana ki ngā kawenata me ngā whakahaunga.

21 Nā te mea e tika ana kia tū ai he tumuaki, he kaiwhakahaere rānei e ahu mai ana, e whakataua ana rānei nō waenganui i aua mea kua whakamanaia ki ngā tūranga maha i roto i ēnei tohungatanga e rua.

22 Nō te Tohungatanga o Merekihereke, kia toru ngā Pirihi Teitei, e kōwhiria ai e te katoa, e whakataua ai, ā, e whakamanaia ai ki taua tūranga, ā, e tautokona i runga i te ngākau titikaha, te whakapono, me te inoi o te hāhi, mā rātou e mea hei Tumuakitanga o te Hāhi.

23 Ka karangatia te hunga haereere tekau mā rua hei Āpōtoro Tekau Mā Rua, hei kaiwhakaatu motuhake rānei mō te ingoa o te Karaiti i te ao katoa—pēnei e rerekē ana i ērā atu o ngā tūranga i te hāhi i runga i ngā haepapa o tō rātou karangatanga.

24 Ā, he kōrama rātou, e taurite ana i runga i te mana me te kaha ki ngā tumuaki tokotoru kua kōrerotia ake nei.

25 Ka karangatia anōtia te Whitu Tekau ki te kauhau i te rongopai, ā, kia tū ai hei kaiwhakaatu motuhake ki ngā Tauiwi, ā, i te ao katoa—pēnei e rerekē ana i ērā atu tūranga i roto i te hāhi i runga i ngā haepapa o tō rātou karangatanga.

26 Ā, he kōrama rātou, e taurite ana te mana ki tērā mana nō ngā kaiwhakaatu motuhake Tekau Mā Rua, ngā Āpōtoro rānei kātahi anō ka whakahuatia ake nei.

27 Ā, e tika ana kia whakatauhia ngā whakatau katoa e ēnei kōrama i runga i te reo whakaae kotahi o taua kōrama; koia, me whakaae tēnā mema, tēnā mema ki ngā whakataunga, kia tino whai mana ai aua whakataunga tētahi ki tētahi—

28 Mā te wāhi nui e whakatū ai hei kōrama i ngā wā kāore he huarahi kē atu—

29 Ki te kore e pēnei, kāore e tau iho ngā manaakitanga ki ā rātou whakataunga pērā i ngā whakataunga o tētahi kōrama e tokotoru ana ngā tumuaki i ngā wā onamata, i whakamanaia nei mō te ritenga o Merekihereke, ā, he tangata tika, ā, he tangata tapu rātou.

30 Ko ngā whakataunga o ēnei kōrama, ā te mea kotahi rānei o rātou, ka meatia i runga i te tika katoa, i te tapu, me te ngākau pāpaku, te māhaki me te manawanui, me te whakapono, ā, te ngākaupai me te whai mātauranga, te whaiwhakaaro, te manawaroa, te atuatanga, te aroha teina me te aroha noa;

31 Nā te mea ko te whakaari ia, mehemea ka noho ēnei āhuatanga i roto i a rātou e kore rātou e huakore i te mātauranga o te Ariki.

32 Ā, mehemea ka meatia tētahi whakataunga o ēnei kōrama i runga i te tika kore, e taea ana te kawe mai ki mua i te whakaminenga whānui o ngā kōrama maha, ko rātou ngā mana ā-wairua o te hāhi; ki te kore kāore e taea tētahi tono i tā rātou whakatau.

33 He Kaunihera Tumuakitanga Teitei Hāereere te Tekau Mā Rua, kia whakahaere ai i runga i te ingoa o te Ariki, i raro i te tirohanga o te Tumuakitanga o te Hāhi, e rite ana ki tā ngā whakaritenga o te rangi, me te whakahaere i ngā āhuatanga katoa o taua rite i ngā iwi katoa, ki ngā Tauiwi i te tuatahi, ā, ki ngā Hūrai i te tuarua.

34 Me mahi te Whitu Tekau i runga i te ingoa o te Ariki, i raro i te whakahaeretanga a te Tekau Mā Rua, o taua kaunihera hāereere teitei rānei, e whakatupuria ake ana te hāhi me te whakahaere i ngā āhuatanga katoa o taua rite i ngā iwi katoa, ki ngā Tauiwi i te tuatahi, ā, ki ngā Hūrai i te tuarua—

35 Kua tonoa atu te Tekau Mā Rua, e pupuri ana i ngā kī, ki te whakatūwhera ake i te kūaha mā runga i te whakapuakitanga i te rongopai a Ihu Karaiti, ā, ki ngā Tauiwi i te tuatahi kātahi ki ngā Hūrai.

36 Ko ngā kaunihera teitei e tū ana, ki ngā pou ā-rohe o Hīona, ko rātou tētahi kōrama e taurite ana te mana i roto i ngā āhuatanga o te hāhi, i roto i ā rātou whakataunga katoa, ki te kōrama o te tumuakitanga, ki te kaunihera hāereere teitei rānei.

37 Ko te kaunihera teitei i Hīona tētahi kōrama e taurite ana te mana i ngā āhuatanga o te hāhi, i roto i ā rātou whakataunga katoa, ki ngā kaunihera o te Tekau Mā Rua ki ngā pou o Hīona.

38 Nō te kaunihera teitei te haepapa ki te karanga atu ki te Whitu Tekau, ina e hia āwhina ana, kia whakakīa ake ngā karanga maha mō te kauhautanga me te minitatanga i te rongopai, mahue kē ana ētahi atu.

39 Nō te Tekau Mā Rua te haepapa, i roto i ngā peka nui katoa o te hāhi, ki te whakamana i ngā minita kauhau, kia rite ki ngā whakataunga ki a rātou he mea nā te whakakitenga—

40 I whakaūngia te ritenga o tēnei tohungatanga kia tukua iho mai i te matua ki te tama, ā, e tika ana nō ngā uri whakaheke tūturu kua kōwhiria nei, te hunga kua meatia ngā whakaari ki a rātou.

41 I whakaritea tēnei ritenga i ngā rā o Arama, ā, i heke iho mai nei mā te whakapapa i runga i te āhua e whai ake nei:

42 Mai i a Arama ki a Heta, i whakamanaia ai e Arama i a ia e ono tekau mā iwa te pakeke, ā, i manaakitia e ia i ngā tau e toru i mua i tana (tō Arama) matenga, ā, i whakawhiwhia ki taua whakaari o te Atua e tana matua, kia kōwhiria ai ōna uri e te Ariki, ā, kia tiakina ai rātou tae noa atu ki te mutunga o te ao;

43 Nā te mea he tangata tika rawa atu ia (Heta), ā, he tino ōrite tōna āhua ki te āhua pū anō o tōna matua, nā konā ko te āhua nei mei kore rāua ko tōna matua i roto i ngā mea katoa, ā, nā te pakeketanga anake e mōhio ai ko wai a wai.

44 I whakamanaia a Inohi i te kotahi rau e toru tekau mā whā tau e whā marama te pakeke, he mea nā te ringa o Arama.

45 I karangatia e te Atua a Kainana i roto i te koraha i a ia e whā tekau tōna pakeke; ā, i tūtaki ia ki a Arama i a ia e haere ana ki te wāhi Hetaromaka. Kua waru tekau mā whitu tōna pakeke i te wā i whiwhi ia ki tēnei whakamanatanga.

46 E whā rau e iwa tekau mā ono tau e whitu ngā rā te pakeke o Mahararere i te wā i whakamanaia e te ringa o Arama, nāna hoki ia i manaaki.

47 E rua rau te pakeke o Iarere i te wā i whakamanaia ai ia e te ringa o Arama, nāna hoki ia i manaaki.

48 E rua tekau tau te pakeke o Enoka i te wā i whakamanaia ai ia e te ringa o Arama; ā, ka ono tekau mā rima ia kātahi ka manaakitia ia e Arama.

49 Ā, ka kite ia i te Ariki, ka hīkoi tahi rāua, ā, i mua i te aroaro o tōna mata i ngā wā katoa; ā, e toru rau e ono tekau mā rima tau i hīkoi tahi ai ia me te Atua, ka whā rau e toru tau te pakeke i te wā i whakaatuahia ia.

50 I kotahi rau tau te pakeke o Matutaera i te wā i whakamanaia ai ia e te ringa o Arama.

51 E toru tekau mā rua tau te pakeke o Rameka i te wā i whakamanaia ai ia e te ringa o Heta.

52 Tekau tau te pakeke o Noa i te wā i whakamanaia ai ia e te ringa o Matutaera.

53 E toru tau i mua i te matenga o Arama, i karangatia e ia a Heta, a Kainana, a Mahararere, a Iarere, a Enoka rātou ko Matutaera, he pirihi teitei katoa rātou, me te hunga tika anō o ōna uri, ki roto i te raorao o Arama-onotai-Amana, i reira whakatauhia e ia tana manaakitanga whakamutunga.

54 Ā, ka puta mai te Ariki ki a rātou, ā, ka tū ake rātou me te manaaki i a Arama, ā, ka karangahia ia ko Mikaere, te wheao, te Tino Anahera.

55 Ā, ka minita te Ariki ki a Arama, he mea e mārie ai tōna ngākau, kātahi ka kī atu ki a ia: Nāku koe i whakanoho hei upoko; ka haere mai ngā iwi tini ki a koe, ā, he wheao koe ki runga i a rātou mō āke tonu atu.

56 Kātahi ka tū ake a Arama i waenganui i te whakaminenga; ā, hei aha koa kua piko ia i te nui o ōna tau, e kikīa nei ki te Wairua Tapu, ka matakitea e ia ngā mea katoa e tau iho ai ki runga i ōna uri tae noa atu ki te whakatipuranga whakamutunga.

57 Kua tuhia ēnei mea katoa i roto i te pukapuka a Enoka, ā, ka whakaaturia aua mea i tōna ake wā.

58 Nō te Tekau Mā Rua te haepapa, anō hoki, ki te whakamana me te whakarite i ngā kaiwhakarite katoa o te hāhi, e rite ana ki te whakakitenga e mea ana:

59 Ko te hāhi o te Karaiti i te whenua o Hīona, e āpiti atu ana ki ngā ture hāhi e hāngai ana ki ngā mahinga hāhi—

60 He pono tāku e mea atu nei ki a koutou, e ai tā te Ariki o ngā Mano, e tika pū ana kia whakaritea he erata whakahaere hei whakahaere i te hunga kei te tūranga erata;

61 Me ngā pirihi anō hoki hei whakahaere i te hunga kei te tūranga o te pirihi;

62 Me ngā kaiako anō hoki hei whakahaere i runga i te hunga kei te tūranga o te kaiako, e pērā ana te āhua, me ngā rīkona anō hoki—

63 Nā reira, mai i te rīkona ki te kaiako, ā, mai i te kaiako ki te pirihi, ā, mai i te pirihi ki te erata, e whakatauhia takitahitia ana rātou, e rite ana ki ngā kawenata me ngā whakahaunga o te hāhi.

64 Kātahi ka puta mai te Tohungatanga Teitei, koia nei te mea nui o te katoa.

65 Nā reira, e tika pū ana kia whakataungia tētahi o te Tohungatanga Teitei hei whakahaere i runga i te tohungatanga, ā, ka karangatia ia ko te Tumuaki o te Tohungatanga Teitei o te Hāhi;

66 Kia pēnei rānei te kupu, ko te Pirihi Teitei Whakahaere i runga i te Tohungatanga Teitei o te Hāhi.

67 Mai i taua mea anō e ahu mai ana te whakahaeretanga i ngā tikanga tapu me ngā manaakitanga ki runga i te hāhi, mā runga i te whakapākanaga o ngā ringaringa.

68 Nā reira, kāore e taurite ana te tūranga pīhopa ki taua tūranga; nā te mea ko tā te tūranga pīhopa he whakahaere i ngā mea e pā ana ki te oranga o te tīnana;

69 Hei aha koa me kōwhiri te pīhopa mai i ngā mea o te Tohungatanga Teitei, hāunga he uri tūturu ia nō Ārona;

70 Nā te mea ki te kore ia i te uri tūturu nō Ārona tē taea e ia te pupuri i ngā kī o taua tohungatanga.

71 Hei aha koa, he pirihi teitei, koia, nō te ritenga o Merekihereke, e taea te whakarite ki te whakahaere i ngā mea hei oranga mō te tīnana, i a ia hoki te mātauranga mō aua mea nā te Wairua o te pono;

72 Hei kaiwhakawā hoki i Iharaira, ki te mahi i ngā mahinga a te hāhi, kia whakawākia te hunga hara he mea nā te whakaaturanga e whakatakotohia iho i mua i tōna aroaro e rite ana ki ngā ture, mā te āwhina o ana kaikaunihera, nāna nei i kōwhiri i roto i ngā erata o te hāhi.

73 Koinei te haepapa o te pīhopa ehara nei i te uri tūturu nō Ārona, engari kua whakamanaia ki te Tohungatanga Teitei i runga i te ritenga o Merekihereke.

74 Pēnei ka tū ia hei kaiwhakawā, āe rā, he kaiwhakawā noa i waenganui i te iwi o Hīona, i roto i tētahi pou ā-rohe rānei o Hīona, i roto rānei i tētahi o ngā peka o te hāhi i reira whakaritea ia ki tana minitatanga, tae noa ki te wā e whakanuia ake ngā rohe o Hīona, ā, ka whai tikanga anō kia whai pīhopa, ā, kia whai kaiwhakawā rānei i Hīona, i ētahi atu wāhi rānei.

75 Ā, ki te mea he pīhopa atu anō e whakataua nei ka mahi rātou i taua tūranga anō.

76 Engari nō te uri tūturu o Ārona te tino tikanga i raro i te mana o te ture ki te tumuakitanga o tēnei tohungatanga, ki ngā kī o tēnei minitatanga, ki te mahi i taua tūranga o te pīhopa ko ia anake, kāore ōna kaikaunihera, hāunga anake mehemea i reira tētahi Tumuaki o te Tohungatanga Teitei, nō te ritenga o Merekihereke, e whakamātauria ai, kia noho ai hei kaiwhakawā i Iharaira.

77 Ā, ko te whakatau a ngā kaunihera nei, e rite ana ki te whakahaunga e mea ana:

78 Hei āpiti anō, he pono tāku e mea atu nei ki a koutou, ko te mahi tino nui o te hāhi, me ngā mahi uaua rawa o te hāhi, ki te mea kāore e oti tika te whakatau a te pīhopa, a ngā kaiwhakawā rānei, ka tukua atu, ā, ka whakahaerehia ake ki te kaunihera o te hāhi, ki mua i te Tumuakitanga o te Tohungatanga Teitei.

79 Ā, ka whai mana te Tumuakitanga o te kaunihera o te Tohungatanga Teitei ki te karanga atu ki ētahi atu pirhi teitei, te tekau mā rua pū anō, hei āwhina, ā, hei kaikaunihera; pēnei ka whai mana te Tumuakitanga o te Tohungatanga Teitei me ōna kaikaunihera ki te whakatau i runga i te whakaaturanga e rite ana ki ngā ture o te hāhi.

80 Ā, whai muri iho i tēnei whakataunga kua kore e kawea anōtia ki te aroaro o te Ariki; nā te mea koinei te kaunihera teitei ake o te hāhi o te Atua, ā, he whakatau whakamutunga i runga i ngā tohetohe e pā ana ki ngā mea o te wairua.

81 Kāore i reira tētahi tangata nō te hāhi e wātea ana i tēnei kaunihera o te hāhi.

82 Ā, ki te hē tētahi Tumuaki o te Tohungatanga Teitei, ka kawea ia ki te aroaro o te kaunihera whānui o te hāhi, e āwhinatia ai e ngā kaunihera tekau mā rua o te Piritanga Teitei;

83 Ā, ko tā rātou whakatau ki runga i tōna māhunga hei whakataunga whakamutunga mō ngā tohetohe e pā ana ki a ia.

84 Pēnei, kua kore tētahi e wātea i te tika me ngā ture o te Atua, kia taea ai ngā mea katoa i runga i te tika me te pono i tōna aroaro, e rite ana ki te pono me te tika.

85 Hei āpiti anō, he pono tāku e mea atu nei ki a koutou, ko te haepapa o te tumuaki i runga i te tūranga o te rīkona, arā, he whakahaere i runga i ngā rīkona tekau mā rua, kia noho tahi ki te rūnanga tahi me rātou, me te whakaako ki a rātou tō rātou haepapa, e whakamāramahia ake ana tētahi e tētahi, e pērā ana ki ngā mea e hoatu ai e rite ana ki ngā whakahaunga.

86 Waihoki, ko te haepapa o te tumuaki i runga i te tūranga o ngā kaiako, arā, he whakahaere i runga i ngā kaiako e rua tekau mā whā, me te noho tahi ki te rūnanga tahi me rātou, e whakaako ana ki a rātou ngā haepapa o tō rātou tūranga, e pērā ana ki ngā mea i homai ai i roto i ngā kawenata.

87 Ko te haepapa anō o te tumuaki i runga i te Tumuakitanga o Ārona, arā, he whakahaere i runga i ngā pirihi e whā tekau mā waru, me te nohotahi me rātou, ki te whakaako ki a rātou ngā haepapa o tō rātou tūranga, e pērā ana ki ngā mea i homai ai i roto i ngā kawenata—

88 Me tū tēnei tumuaki hei pīhopa; nā te mea koinei tētahi o ngā haepapa o tēnei tohungatanga.

89 Anō, ko te haepapa o te tumuaki i runga i ngā erata koia ko te whakahaere i runga i ngā erata e iwa tekau mā ono, me te nohotahi ki te rūnanga tahi me rātou, me te whakaako ki a rātou e rite ana ki ngā kawenata.

90 He mea motuhake anō tēnei tumuakiatnga i tērā mea nō te whitu tekau, ā, kua whakaritea nei mō te hunga e kore nei e haere ki te ao katoa.

91 Hei āpiti anō, ko te haepapa o te Tumuaki o te tūranga o te Tohungatanga Teitei he whakahaere i runga i te hāhi katoa, ā, kia rite ki a Mohi—

92 Nana, anei he mātauranga; āe rā, kia matakite, kia whakakite, kia whakamāori, kia mahi poropiti, e mau katoa ana ngā takoha o te Atua e whakataua iho nei e ia ki runga i te upoko o te hāhi.

93 Ā, e rite ana ki te whakakitenga i whakaatu mai ai te ritenga i te Whitu Tekau, kia whai tumuaki tokowhitu rātou hei whakahaere i runga i a rātou, he mea kōwhiri mai i te whitu tekau;

94 Ā, me whakahaere te tumuaki tuawhitu i ērā atu tumuaki e ono;

95 Ā, me kōwhiri e ēnei tumuaki tokowhitu ētahi atu whitu tekau i tua atu i te whitu tekau tuatahi, ā, me whakahaere e rātou i runga i a rātou;

96 Me ētahi atu whitu tekau anō hoki, kia whitu whakarea whitu tekau, mehemea e tika ana kia pērātia ngā mahi i roto i te māra wāina.

97 Ā, me tū aua whitu tekau hei minita hāereere, ki ngā Tauiwi i te tuatahi, ā, ki ngā Hūrai anō hoki.

98 I te mea ko ērā atu kaiwhakarite o te hāhi, ehara noa nei nō te Tekau Mā Rua, nō te Whitu Tekau rānei, ehara nō rātou te haepapa kia haere atu ki waenganui i ngā iwi katoa, engari me haere kia rite ki ngā mea e taea ana e rātou, hei aha koa e taea ana e rātou te mau ki ngā tūranga teitei, ki ngā tūranga haepapa nui i roto i te hāhi.

99 Nā reira, tukua ngā tāne katoa ināianei ki te ako i tōna haepapa, ā, kia mahi i te tūranga kua whakatauhia atu nei ki a ia, i runga i te ū katoa.

100 E kore te tāne e māngere ana e tatauria hei mea tika ki te tū, ā, e kore te tāne e kore nei e ako i tōna haepapa, ā, e whakaatu rānei ehara ia i te tāne e whakaaengia ai e tatauria hei mea tika kia tū. Koia anō. Āmine.