Wāhanga 30
He whakakitenga mā roto i a Hōhepa Mete te Poropiti ki a Rāwiri Witima, rātou ko Pita Witima Tama., ko Hōani Witima, ki Wheiete, Niu Ioka, Hepetema 1830, whai muri iho i te huihuinga whānui ki Wheiete, engari i mua i te wehenga atu o ngā erata o te Hāhi. I tāngia tuatahitia tēnei kōrero kia toru ngā whakakitenga; i whakakotahingia ki tētahi wāhanga kotahi e te Poropiti mō te whakaputanga 1835 o te Whakaakoranga me ngā Kawenata.
1–4, Ka kohetehia a Rāwiri Witima mōna kīhai i tākare i roto i tana mahi; 5–8, Me haere tahi atu a Pita Witima me Oriwa Kautere ki tētahi mīhana ki ngā Rāmana; 9–11, Ka karangatia a Hōani Witima ki te kauhau i te rongopai.
1 Nana, ko taku kupu tēnei ki a koe, e Rāwiri, kua wehi koe i te tangata, ā, kīhai koe i whakawhirinaki mai ki ahau mō te kaha kia rite ki te mea e tika ana.
2 Engari kua aro kē atu tō hinengaro ki ngā mea o te ao kāore ki aku mea, tō Kaihanga, me te minitatanga kua karangatia nei koe; ā, kīhai koe i aro mai ki tōku Wairua, ki te hunga anō kua whakataua ki runga ki a koe, engari kua whakapakepakehia koe e te hunga kāore i whakahaua e au.
3 Nā reira, kua waiho ake māu e uiui, i tōku ake ringaringa, me te whakaaroaro ki ngā mea kua whiwhi nei koe.
4 Ā, kei te whare o tō matua tō kāinga, tae noa atu ana ki taku tuku whakahaunga atu anō ki a koe. Ā, māu e whakarite te mahi minita i roto i te hāhi, i mua anō i te ao, i roto anō i ngā rohe huri noa. Āmine.
5 Nana, ko taku kupu tēnei ki a koe, e Pita, nā, ka haere atu koe i te taha o tō tuakana a Oriwa; nā te mea e tika ana i roto i ahau kua tae mai te wā e tūwhera ake koe i tō māngai ki te whakapuaki atu i tōku rongopai; nō reira, kaua e wehi, engari me aro mai ki ngā kupu me ngā kupu āwhina a tō tuakana, e hoatu ai e ia ki a koe.
6 Ā, kia mamae koe i roto i ōna ake mamaetanga katoa, e hikina ake ana i tō ngākau ki ahau i runga i te inoi me te whakapono, mō tōna whakaputanga me tō whakaputanga; nā te mea kua hoatu e au he kaha kia hangaia ake ai taku hāhi ki waenganui i ngā Rāmana;
7 Ā, kāore au i whakatau i tētahi hei kaitohutohu mōna i roto i te hāhi, e pā ana ki ngā take o te hāhi, hāunga ko tōna tuakana, Hōhepa Mete, Tama.
8 Nā reira, kia aro mai ki ēnei mea, kia ū ki te pupuri i aku whakahaunga, kātahi ka manaakitia koe ki te oranga tonutanga. Āmine.
9 Nana, ko taku kupu tēnei ki a koe, e taku pononga e Hōani, nā, ka tīmata atu koe i tēnei wā haere ake nei ki te whakapuaki i taku rongopai, me te mea nei ki te reo o tētahi tētere.
10 Ā, kei tō Piripi Purou kāinga tāu mahi, me te rohe huri noa, āe rā, ki ngā wāhi e rangona ai koe, tae noa ki te wā e whakahau atu au ki a koe kia haere atu.
11 Ā, kei Hīona tāu mahi katoa, i runga i tōu wairua katoa, haere ake nei; āe rā, ka tūwhera ake koe i tō māngai mō tāku kaupapa, e kore nei e wehi i tā te tangata e taea ai, nā te mea kei tō taha ahau. Āmine.