1. Nana, ko te kupu tenei a te Ariki ki nga kaumatua o tana Hahi, ka tata nei te hoki ki te whenua i haere mai ai ratou. Nana e hari ana ahau mo to koutou haerenga mai ki konei;

2. Otiia, kahore ahau i te pai rawa ki etahi, no te mea kaore o ratou mangai i te kuihi, engari e huna ana te taranata i hoatu e ahau ki a ratou he mea na te wehi ki te tangata. Aue te mate mo nga mea pera, e mura ana hoki toku riri ki a ratou.

3. A tenei ake te wa, ki te kahore tonu ratou e u ki a au, ka tangohia atu taua mea i a ratou, ara te mea i whakawhiwhia ki a ratou;

4. No te mea ko ahau ko te Ariki, e kingi ana i roto i nga rangi e tu iho nei, i roto ano i nga taua o te whenua; a i te ra e mahi ai ahau i aku mea utu nui (jewels) te matau ai nga tangata ko te aha e whakapuaki nei i te kaha o te Atua.

5. Na, he pono ka korero atu ahau, mo te ahua o to koutou hokinga ki te whenua i haere mai ai koutou. Me mahi tetahi waka, me hoko mai ranei, kia rite ki ta koutou e pai ai, kaore he tikanga ki a au, katahi ka hohoro ta koutou haere ki te wahi e karangatia nei ko Tene Ruihi (St. Louis).

6. Kia tae ki reira, ka tuku ai i aku pononga i a Hirini Rikitana raua ko Hohepa Mete, tamaiti, me Oriwa Kautere, kia haere ratou ki Hinihinati (Cincinnati).

7. A i tenei kainga me ara ake o ratou reo, kia kaha ano nga reo ki te whakapuaki i taku kupu, kaua e kinakitia ki te riri, kaua ano e ngakau-rua, kia tapu ano nga ringaringa e ara ake ki runga i a ratou. E whai wahi ana hoki ahau ki te whakatapu i a koutou, e murua noatia ana hoki o koutou hara.

8. A ko te toenga me hoki atu i Tene Ruihi (St. Louis) tokorua, tokorua, me te kauwhau ano i te kupu ki nga huihuinga o te hunga hara, kaua i runga i te kaha, a tae noa atu ratou ki nga peka i haere mai ai ratou.

9. A i meinga ai enei mea hei painga mo nga peka; mo konei hoki ratou i tonoa ai.

10. A me hoatu e taku pononga e Eruera Patariti te moni i hoatu e ahau ki a ia, ara tetahi wahi ki aku kaumatua kua whakahaua nei kia hoki;

11. Ko te tangata e ahei ana me whakahoki mai e ia taua moni, me hoatu ki te kai-whakahaere (agent), a ko te tangata e kore e ahei te whakahoki i te moni, aua atu, e kore e rapua i a ia.

12. Inainei ka whai kupu ahau mo te toenga tera e haere mai ki tenei whenua.

13. Nana, e tonoa ana ratou hei kauwhau i taku Rongo-pai ki nga huihuinga o te hunga hara; no reira ka hoatu e ahau tenei ture ki a ratou: Kaua to taima e moumou noatia iho, kaua ano to taranata e kopehutia iho kia kore ai e mohiotia.

14. A i muri i to taenga atu ki te whenua o Hiona, ina mutu to kauwhau i taku kupu, kia hohoro to hoki me te kauwhau haere ano i taku kupu i roto i nga huihuinga o te hunga hara, ahakoa ra, kaua e kaikatia, kaua ano e kinakitia ki te riri, ki te tautohetohe ranei.

15. A ki te hunga e kore e manako mai ki a koe rukea atu te puehu i ou waewae; kaua i a ratou aroaro, kei whakapataritaritia ratou e koe; engari ki te wahi ngaro, me te horoi ano i ou waewae, hei mea whakahe i a ratou i te ra o te whakawakanga.

16. Nana, kati nei nga mea mo koutou, ko ta te kai-tono hoki tenei i a koutou e pai ana.

17. A ma te mangai o taku pononga o Hohepa Mete, tamaiti, e whakaatu taku e pai ai mo Hirini Rikitana raua ko Oriwa Kautere. Ko te toenga tenei ake te wa. Koia ano tenei. Amine.