Wāhanga 103
He whakakitenga mā roto i a Hōhepa Mete te Poropiti, ki Katarana, Ohaio, Pēpuere 24, 1834. I whakawhiwhia tēnei whakakitenga whai muri iho i te taenga atu o Pāri P. Parata rāua ko Raimana Waiti ki Katarana, Ohaio, i haere mai ai rāua i Mītori kia rūnanga tahi me te Poropiti e pā ana ki te whakaratonga me te whakahokinga o te Hunga Tapu ki ō rātou whenua i te Takiwā o Tiakimana.
1–4, Te tikanga i tukuna e te Ariki kia whakatoingia te Hunga Tapu i te Takiwā o Tiakimana; 5–10, Ka ora te Hunga Tapu mehemea ka pupuri rātou i ngā whakahaunga; 11–20, Ka puta te whakahokinga o Hīona i runga i te mana, ā, ka haere te Ariki i mua i Tana iwi; 21–28, Me whakahuihui tahi te Hunga Tapu i Hīona, ā, ko te hunga e huapae iho ō rātou oranga te hunga e rapu anō i te oranga; 29–40, Kua karangahia ake ngā momo tangata ki te whakariterite i te Hōpuni o Hīona, ā, kia haere atu ai ki Hīona; kua whakaaria te wikitōria ki a rātou mēnā ka pono rātou.
1 He pono tāku e mea atu nei ki a koutou, e aku hoa, nana, ka hoatu e au tētahi whakakitenga ki a koutou, kia mōhio ai koutou me pēhea ā koutou mahi e pā ana ki te whakaoranga me te hokonga o ō koutou teina, te hunga kua whakamararatia i runga i te whenua o Hīona;
2 Kua āia, ā, kua patua e ngā ringaringa o ōku hoariri, hei tōku wā e pai ai e māringi iho tōku riri mehua kore ki runga ki a rātou.
3 Nā te mea kua tukuna rātou e ahau tae noa ki tēnei wā, kia kikī ai i a rātou te mehua o ō rātou hara, kia kikī ai tō rātou kapu;
4 Ā, kia kohetea te hunga e karangahia ake rātou e rātou anō ki tōku ingoa mō tētahi wā poto ki tētahi kohetetanga mamae rawa, nā te mea kīhai rātou i whakarongo tahi mai ki ngā tikanga me ngā whakahaunga kua hoatu nei e au ki a rātou.
5 Engari he pono tāku e mea atu nei ki a koutou, nā, kua whakapuakina e au tētahi whakapuakitanga e tutukia ai e taku iwi, ki te mea ka whakarongo rātou mai i tēnei hāora pū anō ki ngā tohutohu e hoatu ai e au, e te Ariki tō rātou Atua.
6 Nana, i te mea nāku i whakapuaki, ka tīmata tō rātou kake ki runga i ōku hoariri mai i tēnei hāora pū anō.
7 Ā, mā tō rātou whakarongo atu ki ngā kupu e kōrerotia ai e au, e te Ariki tō rātou Atua ki a rātou, e kore rawa e mutu tō rātou kake haere kia meinga rā anō ngā kīngitanga o te ao kia tuohu iho ki raro i ōku waewae, kātahi ka tukuna atu te whenua ki aku hunga tapu, kia nōhia ai mō āke tonu atu.
8 Engari ki te kore rātou e pupuri i aku whakahaunga me te ū ki aku kupu katoa, ka kake ake ngā kīngitanga o te ao ki runga i a rātou.
9 Nā te mea kua whakaritea rātou hei māramatanga ki te ao, ā, hei kaiwhakaora mō te tangata;
10 Ā, ki te kore rātou e tū hei kaiwhakaora mō te tangata, ka rite rātou ki te tote kua ngaro tōna hā, ā, kua kore ōna take, atu i te maka atu kia takahia i raro i ngā waewae o te tangata.
11 Engari he pono tāku e mea atu nei ki a koutou, nāku i whakapuaki, nā, ka hoki ō koutou teina kua whakamararatia atu ki ō rātou whenua tuku iho, ā, ka hangaia ake ngā wāhi ururua o Hīona.
12 Nā te mea hei muri iho i ngā taumahatanga nui, pērā i tāku i kī atu ai ki a koutou i tētahi whakahaunga o mua, ka puta mai te manaakitanga.
13 Nana, koinei te manaakitanga kua whakaaria mai nei e au hei muri iho i ō taumahatanga, me ngā taumahatanga o ō koutou teina—ko tō koutou hokonga, me te hokonga o ō koutou teina, ko tō rātou hokinga pū anō ki te whenua o Hīona, kia whakapūmauhia, e kore anō e makaia ki raro.
14 Hei aha koa, ki te whakapokea e rātou ō rātou taonga tuku iho ka makaia iho rātou ki raro; nā te mea e kore rātou e tohua e au ki te whakapokea e rātou ō rātou taonga tuku iho.
15 Nana, ko taku kupu tēnei ki a koutou, e tika pū ana kia puta mai te hokonga o Hīona i runga i te kaha;
16 Nō reira, Māku tētahi tangata e whakatupu ake ki tōku iwi, māna rātou e ārahi pērā i tā Mohi ārahi i ngā tamariki o Iharaira.
17 Nā te mea ko koutou ngā tamariki a Iharaira, ā, ko ngā uri o Aperahama, ā, e tika pū ana kia ārahina atu koutou i te hereheretanga i runga i te kaha, ā, i runga i te ringa-toro.
18 Ā, pērā i te ārahitanga i ō koutou tūpuna i te tuatahi, ka pērātia hoki te hokonga o Hīona.
19 Nō reira, kaua e tukua ō koutou ngākau kia hemo, nā te mea kāore e pērā ana aku kōrero ki a koutou i tāku i kōrero ai ki ō koutou tūpuna: Ka haere ake taku anahera ki mua i a koutou, engari kaua ko taku mauri.
20 Engari ko taku kupu tēnei ki a koutou: Ka haere ake aku anahera ki mua i a koutou, me tōku mauri hoki, ā, hei tōna wā ka nōhia e koutou te whenua pai.
21 He pono, he pono tāku e mea atu nei ki a koutou, nā, ko taku pononga a Hōhepa Mete, Tama., te tangata e whakatauritea nei e au ki te pononga i kōrerotia nei e te Ariki o te māra wāina i roto i te pakitairite kua hoatu nei e au ki a koutou.
22 Nō reira tukua taku pononga a Hōhepa Mete, Tama., kia kōrero atu ki te wāhi kaha o tōku whare, ki aku taitama me aku tāne āhua pakeke—Whakahuihui i a koutou anō ki te whenua o Hīona, ki runga i te whenua kua hokona mai ki aku moni kua whakatapua nei ki ahau.
23 Ā, tukua ngā hāhi katoa kia tukuna ake ō rātou tangata matatau me ā rātou moni, ā, ki te hoko whenua pērā pū anō i tāku i whakahau ai ki a rātou.
24 Ā, ki te mea ka whakaeke mai aku hoariri ki a koutou kia āia atu koutou i tōku whenua pai, kua whakatapua e au hei whenua mō Hīona, atu i ō koutou ake whenua i muri iho i ēnei whakaaturanga, kua kawea mai nei e koutou ki tōku aroaro hei whakahē i a rātou, ka kangaia rātou e koutou;
25 Ā, ahakoa ko wai te tangata e kangaia nei e koutou, ā, māku anō e kanga, ā, ka rapu utu koutou i ōku hoariri.
26 Ā, ka piri atu taku mauri ki a koutou tae atu ki te rapu utu i ōku hoariri, tae atu ana ki te whakatipuranga tuatoru me te tuawhā o te hunga e mauāhara nei ki ahau.
27 Kaua e tukua kia mataku te tangata kia huapae iho tana oranga mōku; nā te mea ko te tangata e huapae iho tana oranga mōku, koia te mea e rapu ai anō i te ora.
28 Ā, ko te tangata e kore nei e hiahia ana kia huapae iho tana oranga mōku, ā, ehara ia i te apataki nāku.
29 Koia tāku e pai ai kia hīkina ake e taku pononga a Hirini Rikitana tōna reo i roto i ngā whakaminenga i ngā whenua whakaterāwhiti, i te whakariterite i ngā hāhi ki te pupuri i ngā whakahaunga kua hoatu nei e au ki a rātou e pā ana ki te whakahokinga me te hokonga o Hīona.
30 Ko tāku e pai ai kia kaua taku pononga a Pāri P. Parata me taku pononga a Raimana Waiti e hoki atu ki te whenua o ō rātou teina, kia riro ai i a rātou ētahi kamupene kia haere ake ki te whenua o Hīona, kia tekau, kia rua tekau rānei, kia rima tekau rānei, kia kotahi rau rānei, kia rapua e rātou te tatauranga o te rima rau o te hunga kaha o tōku whare.
31 Nana koinei tāku e pai ai; uia kātahi ka whiwhi koe; engari kāore te tangata e mea i tāku e pai ai i ngā wā katoa.
32 Nō reira, ki te kore e taea e koe te rapu kia rima rau, rapua māriretia me kore pea e rapu i te toru rau.
33 Ā, ki te kore e taea te rapu i te toru rau, rapua māriretia me kore pea e rapu i te kotahi rau.
34 Engari he pono tāku e mea atu nei ki a koutou, kia kaua koutou e haere ake ki te whenua o Hīona tae noa ki te wā kua rapua kia kotahi rau o ngā mea kaha o tōku whare, kia haere tahi me koutou ki te whenua o Hīona.
35 Nō reira, pērā i tāku i kī atu ai ki a koutou, uia kātahi ka whiwhi; kia pono te inoi me kore pea taku pononga a Hōhepa Mete, Tama., e haere tahi me koutou, ā, kia whakahaere i te aroaro o tōku iwi, ā, kia whakaritea tōku kīngitanga ki runga i te whenua tapu, ā, kia whakapūmauhia ngā tamariki a Hīona ki runga i ngā ture me ngā whakahaunga o mua me ngā mea e hoatu nei a muri ki a koutou.
36 Ka puta ake te wikitōria me te korōria katoa ki a koutou mā roto i tā koutou ū, tō koutou whakapono, me ā koutou inoi.
37 Tukua taku pononga a Pāri P. Parata kia haere tahi me taku pononga a Hōhepa Mete, Tama.
38 Tukua taku pononga a Raimana Waiti kia haere tahi me taku pononga a Hirini Rikitana.
39 Tukua taku pononga a Hairama Mete kia haere tahi me taku pononga a Whererika T. Wiremu.
40 Tukua taku pononga a Orihana Haiti kia haere tahi me taku pononga a Orihana Parata, ki te wāhi e tohua ai e taku pononga a Hōhepa Mete, Tama., i runga i te rapu i te tutukitanga o ēnei whakahaunga kua hoatu nei e au ki a koutou, ā, waiho mai te toenga atu ki ōku ringaringa. Koia anō. Āmine.