Wāhanga 88
He whakakitenga mā roto i a Hōhepa Mete te Poropiti ki Katarana, Ohaio, Tīhema 27 me te 28, 1832 me te 3 o Hanuere, 1833. I whakataua iho e te Poropiti hei “‘rau oriwa’ … i hutia ake nei i te Rākau Pararaiha, ko tā te Ariki karere maungārongo ki a tātou.” I homai tēnei whakakitenga whai muri iho i tētahi huihuinga, i tā ngā pirihi teitei inoi “takitahi i runga hoki i te reo kaha ki te Ariki kia whakakitea mai tāna e pai ai mō tātou e pā ana ki te hanganga ake o Hīona”.
1–5, Ka whiwhi te Hunga Tapu ū tonu ki te Kaiwhakaaio, koia te whakaari o te oranga tonutanga; 6–13, Ka whakahaerehia katoatia ngā mea katoa e te Māramatanga o te Karaiti; 14–16, Ka puta te Aranga mā roto i te Hokonga; 17–31, Mā te ngohengohe ki ngā ture Tikitiki o Rangi, Rangitūhāhā, Ranginui rānei e takatū ai ngā tāngata mō aua kīngitanga me aua korōria; 32–35, He paru tonu te hunga e noho tonu ai i roto i te hara; 36–41, Ka whakahaerehia ngā kīngitanga katoa e te ture; 42–45, Kua homai e te Atua tētahi ture ki ngā mea katoa; 46–50, Ka mārama te tangata ki te Atua pū anō; 51–61, Ko te paki huatau mō te tangata tuku i ana pononga ki roto i te whīra, ā, e torona atu ki reira anō hoki; 62–73, Kia whakatata atu ki te Ariki, ā, ka kite koutou i Tōna Mata; 74–80, Whakatapua koutou e koutou anō, ā, me whakaako tētahi i tētahi ngā tikanga o te kīngitanga; 81–85, Me whakatūpato tēnā me tēnā i tōna kiritata; 86–94, Ka whakawātea te huarahi e ngā tohu, ngā aituā o te taiao, me ngā anahera mō te haerenga mai a te Ariki; 95–102, Ka tangi ngā tētere anahera i te hunga mate i runga i ō rātou ritenga tika; 103–116, Ka whakapuakina e ngā tētere anahera te whakahokinga mai o te rongopai, te hinganga o Papurona, me te whawhai o te Atua Nui; 117–126, Whaia te mātauranga, whakapūmauhia tētahi whare o te Atua (he temepara), ā, whakakākahuria koutou anō ki te here o te aroha noa; 127–141, Kua whakatakotoria iho te ritenga o te Kura Poropiti, tae atu ana ki te tikanga tapu o te horoinga waewae.
1 He pono, pēnei tā te Ariki ki a koutou kua whakahuihui ngātahi mai nei i a koutou anō kia whiwhi i tāna e pai ai e pā ana ki a koutou:
2 Nana, he āhuareka tēnei ki tō koutou Ariki, e hari ana ngā anahera i a koutou; kua tae ake ō koutou inoi ki ngā tāringa o te Ariki o Hapaoti, ā, kua tuhia ki roto i te pukapuka ingoa o te hunga kua whakatapua, ko te hunga pū anō o te ao Tikitiki o Rangi.
3 Nā reira, kei te tuku iho au i tētahi atu Kaiwhakaaio ki a koutou, ki runga pū anō i ō koutou hoa, kia noho mai ai i roto i ō koutou ngākau, arā, ko te Wairua Tapu whakaari pū anō; he rite tonu tērā atu Kaiwhakaaio ki te mea nāku i whakaaria atu ki aku apataki, he rite ki ngā tuhinga mō te whakaaturanga o Hōani.
4 Ko tēnei Kaiwhakaaio e hoatu nei e au ki a koutou koia ko te oranga tonutanga, ko te korōria pū anō o te kīngitanga Tikitiki o Rangi;
5 Ko taua korōria te korōria o te hāhi o te Mātāmua, arā, ko te Atua, te mea tapu rawa ake o te katoa, mā roto i tana Tama a Ihu Karaiti–
6 Ko ia e kake ake ana ki runga rawa, pērā anō i heke iho ki raro i ngā mea katoa, i te mea kei te mārama ia ki ngā mea katoa, kia noho ai ia ki roto, mā roto hoki i ngā mea katoa, te māramatanga o te pono;
7 Ko taua pono e tiaho mai ana. Koinei te māramatanga o te Karaiti. Koia hoki te rā, me te māramatanga o te rā, ā, ko ia hoki te mana i hanga ai te rā.
8 Ko ia hoki te marama, ā, ko ia te māramatanga o te marama, ā, ko ia hoki te mana i hanga ai te marama;
9 Ko ia hoki te māramatanga o ngā whetū, ā, ko ia hoki te mana i hanga ai i ngā whetū.
10 Ko ia hoki te whenua, ko ia hoki te mana o reira, āe rā, ko te whenua e tū nei koutou ki runga.
11 Ā, ko ia hoki te māramatanga e tiahoaho mai ana, e tuku māramatanga ki a koutou, he mea tuku mai mā roto i a ia kia whakamāramahia atu ō koutou karu, koia hoki taua māramatanga anō e whakakaha nei i ō koutou māramatanga;
12 Ko taua māramatanga e puta ake ana i te aroaro o te Atua kia whakakīngia ake te whānuitanga o te ao ātea–
13 Ko te māramatanga i roto i ngā mea katoa, e tuku oranga ki ngā mea katoa, koia hoki te ture e whakahaerehia ana ngā mea katoa, arā, ko te mana o te Atua pū anō e noho mai nā i runga i tōna torona, kei roto ia i te uma o te ao mau tonu, kei roto ia i ngā mea katoa.
14 Nā, he pono tāku e mea atu nei ki a koutou, nā, kua puta mai te aranga o te hunga mate mā roto i te hokonga kua meatia nei mō koutou.
15 Ā, ko te wairua rāua ko te tīnana te wairua o te tangata.
16 Ā, ko te aranga ake o te hunga mate te hokonga o te wairua.
17 Ā, ka ai te hokonga mā roto i te mea nāna te mauriora o ngā mea katoa, i roto i tōna uma whakapuakina ai te whakatau ka whiwhi te hunga rawakore me te hunga māhaki i te whenua.
18 Nō reira, me tika pū anō kia whakatapua i ngā hara katoa, kia whakatakatū ai mō te korōria o Tikitiki o Rangi;
19 Nā te mea whai muri iho i tana whakatutuki i te mehua o tōna hanganga, ka karaunatia ki te korōria, ki te aroaro pū anō ko te Atua te Matua;
20 Kia riro ai i ngā tīnana o te kīngitanga Tikitiki o Rangi mō āke tonu atu; nā te mea mō tēnei take i hangaia ai, ā, mō tēnei take i whakatapua ai.
21 Ā, e tika ana kia riro i te hunga kīhai i whakatapua mā roto i te ture kua hoatu nei e au ki a koutou, ko te ture o te Karaiti pū anō, ka riro i a rātou tētahi atu kīngitanga, arā, ko te kīngitanga Rangitūhāhā, ko te kīngitanga Ranginui rānei.
22 Nā te mea ko te tangata e kore nei e taea te pupuri i te ture o tētahi kīngitanga Tikitiki o Rangi kāore hoki e taea e ia te noho i tētahi korōria Tikitiki o Rangi.
23 Ā, ko te tangata e kore nei e taea te pupuri i tētahi ture o te kīngitanga Rangitūhāhā kāore hoki e taea e ia te noho i tētahi korōria Rangitūhāhā.
24 Ā, ko te tangata e kore nei e taea te pupuri i tētahi ture o te kīngitanga Ranginui kāore hoki e taea e ia te noho i tētahi korōria Ranginui; Nō reira me noho ia ki tētahi kīngitanga ehara noa i te kīngitanga whai korōria.
25 Hei āpiti anō, he pono tāku e mea atu nei ki a koutou, kei te pupuri te whenua i tētahi ture o te kīngitanga Tikitiki o Rangi, nā te mea e whakatutukihia e ia te mehua oi tōna hanganga, ā, kāore e takahia ana e ia te ture–
26 Nā reira, ka whakatapua ia; āe rā, hei aha koa ka mate ia, ā, ka whakaueue anō i tōna hā, ā, ka noho ai i te mana nāna nei tōna hā i whakaueue ai, ā, ka riro i te hunga tika.
27 Nā te mea ahakoa ka mate rātou, ka ara ake anō rātou, he tīnana wairua.
28 Ka whiwhi te hunga kei a rātou tētahi wairua o Tikitiki o Rangi i taua tīnana anō, arā, he tīnana māori; āe rā, ka whiwhi koutou i ō koutou tīnana, ā, ka hāngai tō koutou korōria ki te korōria i nāna nei ō koutou tīnana i whakaora.
29 Ko te hunga o koutou e whakaorangia ki tētahi wāhi o te korōria Tikitiki o Rangi e whiwhi ai i tētahi mea e hāngai ana, āe rā, ki tōna raneatanga.
30 Ā, kātahi ka whiwhi te hunga kua whakaorangia e tētahi wāhi o te korōria Rangitūhāhā i taua mea anō, āe rā ki tōna raneatanga.
31 Kātahi ka whiwhi anō te hunga i whakaorangia ai e tētahi wāhi o te korōria Ranginui i taua mea anō, āe rā ki tōna raneatanga.
32 Ā, ka whakaorangia anōtia te hunga e toe ana; hei aha koa, ka hoki anō rātou ki tō rātou ake wāhi, kia koa ai rātou i ngā mea e pai ana hei whiwhinga mā rātou, nā te mea kāore rātou i te hiahia kia hari ai i ngā mea tērā pea kua whiwhi rātou.
33 Nā te mea he aha te painga ki tētahi tangata mehemea ka whakataua iho tētahi koha ki runga ki a ia, kātahi ka kore ia e whiwhi? Nana, kāore ia e hari ana i ngā mea e hoatu atu ai ki a ia, kāore rānei e hari i roto i te kaihoatu o te koha.
34 Hei āpiti anō, he pono tāku e mea atu nei ki a koutou, ko ngā mea e whakahaerehia ana e te ture, e tiakina ana anō hoki e te ture, ā, kua whakatikaina rawatia kia hē kore, ā, kua whakatapua e taua mea anō.
35 Ko taua mea e whati ai i tētahi ture, ā, kāore e noho ana ki te ritenga o te ture, engari e whai ana kia meinga hei ture ki a ia anō, ā, e hiahia ana kia noho i roto i te hara me te noho ngātahi i roto i te hara, tē taea taua mea kia whakatapua e te ture, e te whakaaroha rānei, e te tika, e te whakawākanga rānei. Nō reira, me noho paru tonu rātou.
36 Kua hoatu tētahi ture mō ngā kīngitanga katoa;
37 Ā, he maha ngā kīngitanga; nā te mea kāore he ao ātea kāore he kīngitanga i reira; ā, kāore he kīngitanga kāore he ao ātea i reira, he kīngitanga nui ake, iti iho rānei.
38 Ā, kua hoatu tētahi ture mō ngā kīngitanga katoa; ā, kei ia ture, ia ture ōna rohenga me ōna tikanga.
39 Kāore nei e whakatikaia ana te hunga katoa e kore nei e noho i roto i aua tikanga.
40 Nā te mea ka piri te mōhiotanga ki te mōhiotanga; ka whiwhi te mātauranga i te mātauranga; ka awhi te pono i te pono; e aroha ana te te ngākaupai ki te ngākaupai; ka piri te māramatanga ki te māramatanga; ka aroha atu te whakaaroha ki te whakaaroha, ā, e kereme ana ki ōna ake; kau ū tonu te tika i tōna huarahi, ā, ka kereme ia i ōna ake; ka haere te whakawākanga i mua i te mata o te mea e noho nei i runga i te torona , ā, e kāwana ana, ā, e whakahaere ana i ngā mea katoa.
41 E mārama ana ia ki ngā mea katoa, ā, kei mua ngā mea katoa i tōna aroaro, ā, kei te karapotia ia e ngā mea katoa; ā, kei runga ia i ngā mea katoa, ā, kei roto i ngā mea katoa, kei waenganui i ngā mea katoa, ā, e karapotia ana e ia ngā mea katoa; ā, nāna nei ngā mea katoa, nōna hoki, nā te Atua pū anō, āke, ake tonu atu.
42 Hei āpiti anō, he pono tāku e mea atu nei ki a koutou, nāna tētahi ture i hoatu ki ngā mea katoa, mā konā haere ai ēnā i ōna ake wā, ā, i ōna ake kaupeka;
43 Ā, kua takoto ōna huarahi, arā, ko ngā huarahi pū anō o ngā rangi me te whenua, arā, ko tēnei ao tae noa atu ki ngā aorangi katoa.
44 Ā, ka tuku māramatanga rāua ki a rāua i ōna wā, ā, i ōna kaupeka, i ōna miniti, i ōna hāora, i ōna rā, i ōna wiki, i ōna marama, i ōna tau–he tau kotahi ēnei katoa mō te Atua, engari ehara mō te tangata.
45 E huri haere ana tēnei ao i ōna parirau, ā, e tuku māramatanga te rā i te awatea, ā, e tuku māramatanga ana te marama i te pō, ā, e tuku ana ngā whetū i ōna māramatanga anō hoki, i a rātou e huri haere ana i runga i ō rātou parirau i runga i tō rātou korōria, i waenganui i te mana o te Atua.
46 Ka whakataurite au i ēnei kīngitanga ki te aha, e mārama ai koutou?
47 Nana, he kīngitanga katoa ēnei, ā, ko te tangata kua kite nei i tētahi o ēnei mea, i te mea iti iho rānei o ēnei mea, koia te tangata kua kite nei i te Atua e haere ana i tōna kīngitanga me tōna mana.
48 Ko tāku e mea atu nei ki a koutou, kua kite ia i a ia; hei aha koa, kāore i māramahia te mea i haere mai ki ōna ake.
49 E tiaho ana te māramatanga i te pōuritanga, ā, kāore e māramahia ana e te pōuritanga; hei aha koa, ka puta mai te rā ina mārama koutou ki te Atua pū anō, kua whakaorangia e ia i roto i a ia.
50 Kātahi koutou ka mōhio kua kite koutou i ahau, ko au anō, ā, ko au anō te māramatanga pono kei roto nei i a koutou, ā, kei roto koutou i ahau; me i kore kua kore koutou e whai hua.
51 Nana, e whakataurite ana au i ēnei kīngitanga ki tētahi tangata me tōna whīra, ā, ka tonoa atu e ia āna pononga kia keria ai i roto i te whīra.
52 Ā, ka kī atu ia ki te mea tuatahi: Haere koe ki te mahi i te whīra, ā, ka haere atu au ki a koe i te hāora tuatahi, ā, ka kite koe i te koa o tōku āhua.
53 Ā, ka kī atu ia ki te mea tuarua: Haere atu anō koe ki roto i te whīra, ā, ka haere atu ki a koe i te hāora tuarua, ā, ka kite koe i te koa o tōku āhua.
54 Ā, ki te mea tuatoru anō hoki, e mea ana: ka haere atu au ki a koe;
55 Ā, ki te mea tuawhā, ā, tae noa atu ki te mea tuangahuru mā rua.
56 Ā, ka haere atu te ariki o te whīra ki te mea tuatahi i te hāora tuatahi, ā, ka noho tahi me ia mō taua hāora katoa, ā, i hari ia i te māramatanga o te āhua o tōna ariki.
57 Kātahi ka wehe atu i te mea tuatahi kia haere atu ai ki te mea tuarua anō hoki, me te mea tuatoru, me te mea tuawhā, tae noa atu ki te mea tuangahuru mā rua.
58 Ā, pēnei whiwhi ai rātou i te māramatanga o te āhua o tō rātou ariki, tēnā tangata me tēnā tangata i tōna hāora, me tōna wā, me tōna kaupeka–
59 E tīmata ana ki te mea tuatahi, ā, ka pērā haere tae atu ana ki te mea whakamutunga, ā, mai i te mea whakamutunga ki te mea tuatahi, ā, mai i te mea tuatahi ki te mea whakamutunga;
60 Tēnā tangata me tēnā tangata i tōna raupapatanga, kia mutu rā anō tōna hāora, e rite pū ana anō ki tā tōna ariki i whakahaua ai ia, kia whakakorōriatia tōna ariki i roto i a ia, ko ia hoki i roto i tōna ariki, kia whakakorōriatia rātou katoa.
61 Nō reira, ka whakataurite au i tēnei paki huatau ki ēnei kīngitanga katoa, me ngā tāngata e noho ana ki reira–ia kīngitanga i tōna hāora, i tōna wā, i tōna kaupeka, e rite pū ana anō ki te whakapuaki i mea ai te Atua.
62 Hei āpiti anō, he pono tāku e mea atu nei ki a koutou, e ōku hoa, ka mahue i ahau ēnei kīanga hei whakaaroaro i roto i ō koutou ngākau, me tēnei whakahaunga e hoatu nei e au ki a koutou, kia karanga mai koutou ki ahau i a au e tata ana–
63 Whakatata mai ki ahau kātahi ka whakatata atu au ki a koutou; rapua māriretia au, ā, ka kite koutou i ahau; uia, kātahi koutou ka whiwhi; pātōtōhia, kātahi ka whakatūwherahia ake ki a koutou.
64 Ka hoatu ngā mea katoa e inoia ake e koutou ki te Matua i runga i tōku ingoa, ki te mea e pai ana mō koutou;
65 Ā, ki te inoia e koutou tētahi mea kāore e pai ana mō koutou, ka tahuri atu tēnā mea hei whakahēanga mō koutou.
66 Nana, ko te mea e rangona ana e koutou anō nei he reo nō tētahi e karanga ake ana i te koraha–i roto i te koraha, nā te mnea tē taea e koutou te kite atu i a ia–tōku reo, nā te mea ko tōku reo he Wairua; ko tōku Wairua he pono; e noho mai ana te pono, ā, kāore ōna mutunga; ā, mehemea kei roto i a koutou ka whai hua.
67 Ā, mehemea ka hāngai atu tō karu ki tōku korōria, ka whakakīa ō koutou tīnana katoa ki te māramatanga, ā, kua kore he pōuritanga i roto i a koutou; ā, e mārama ana taua tīnana e whakakīa ake nei ki te māramatanga ki ngā mea katoa.
68 Nō reira, whakatapua koutou e koutou anō kia meinga ō koutou hinengaro hei mea hāngai ki te Atua, ā, ka tae mai ngā rā e kite ai koutou i a ia; nā te mea māna tōna mata e hura ki a koutou, ā, ka pērātia i tōna ake wā, ā, i tōna ake āhuatanga, ā, e rite ana ki tāna e pai ai.
69 Kia mahara ki te whakaari nui me te mea whakamutunga kua meatia e au ki a koutou; rukea atu hoki ki tawhiti ō koutou whakaaro horihori me ā koutou puku katakata i a koutou.
70 Me noho mai, me noho mai koutou i tēnei wāhi, ā, karangatia hoki he huihuinga karakia, tērā noa ake mō te hunga ko rātou nei ngā kaimahi tuatahi i te kīngitanga whakamutunga.
71 Ā, tukua ērā hunga kua whakatūpatoria e rātou i runga i ā rātou hāereere kia karanga ake ki te Ariki, ā, kia whakaaroarohia e rātou te whakatūpato i whiwhi nei rātou i roto i ō rātou ngākau, mō tētahi wā iti.
72 Nana, titiro, māku ā koutou kāhui e tiaki, ā, ka mairangatia ake ētahi erata, ā, ka tonoa atu ki a rātou.
73 Nana, māku taku mahi e whakahohoro i tōna ake wā.
74 Ā, kei te hoatu e au ki a koutou, ko koutou hoki ngā kaimahi tuatahi i tēnei kīngitanga whakamutunga, tētahi whakahaunga kia whakahuihui tahi i a koutou anō, ā, kia whakarite i a koutou anō, ā, kia whakatakatū i a koutou anō, ā, kia whakatapu i a koutou anō; āe rā, meinga ō koutou ngākau kia mā, ā, horoia ō koutou ringaringa me ō koutuo waewae i mua i ahau, kia meatia koutou e au kia mā;
75 Kai whakaatu atu au ki tō koutou Matua, ā, ki tō koutou Atua, ā, ki tōku Atua, nā, kua mā koutou i te toto o tēnei whakatipuranga kino; kia whakatutuki au i tēnei whakaari, tēnei whakaari nui whakamutunga, kua meatia atu e au ki a koutou, ina pai ahau.
76 Waihoki, kei te hoatu e au tētahi whakahaunga ki a koutou kia hono tonu koutou i roto i te inoi me te nohopuku atu i tēnei wā haere ake nei.
77 Ā, kei te hoatu e au tētahi whakahaunga ki a koutou kia whakaako koutou tētahi i tētahi ki te whakaakoranga o te kīngitanga.
78 Me whakaako koutou i runga i te whaiwhakaaro kātahi ka tau tōku aroha ki runga ki a koutou, kia pai ake te whakaakoranga i a koutou i runga i te ariā, i te tikanga, i te whakaakoranga, i te ture o te rongopai, i ngā mea katoa e hāngai atu ana ki te kīngitanga o te Atua, e tika pū ana anō kia mārama ai koutou;
79 Mō ngā mea kei te rangi me te whenua, ā, kei raro hoki i te whenua; ngā mea o mua, ngā mea o nāianei, ngā mea meake pahawa ake; ngā mea kei te kāinga, ngā mea kei tāwāhi; ngā pakanga me ngā tūāhuatanga o ngā iwi, me ngā whakawākanga kei runga nei i te whenua; me tētahi mātauranga hoki mō ngā whenua me ngā kīngitanga–
80 Kia whakatakatūhia ai koutou i roto i ngā mea katoa ina tonoa atu anō koutou kia whakanuia te karangatanga kua karangatia ake nei koutou e au, me te mīhana kua karangatia koutou e au hei mahi.
81 Nana, nāku koutou i tono atu ki te whakaatu atu me te whakatūpato i te iwi, ā, e tika ana mā tēnā tangata, mā tēnā tangata kua whakatūpatoria kētia kia whakatūpato atu i tana kiritata.
82 Nō reira, kua mahue rātou hei mea takunga kore, ā, kei runga ō rātou hara i ō rātou ake māhunga.
83 Ko te tangata e kaha rapu i ahau, e kite ai i ahau, ā, e kore anō e kapea.
84 Nō reira, me noho mai koutou, ā, kia kaha ki te mahi, kia whakatikaina rawatia ake i roto i tō koutou minitatanga kia haere atu ai ki waenganui i ngā Tauiwi mō te wā whakamutunga, ki te hunga katoia e whakaingoatia ake e te māngai o te Ariki, kia herea ake te ture, ā, kia hīria ake te whakaaturanga, ā, kia whakatakatū i te hunga tapu mō te hāora whakawā e tata mai ana;
85 Kia mawhiti atu ō rātou wairua i te riri o te Atua, te whakangaromanga mōrikarika e tāria mai nā te hunga whakarihariha, kei tēnei ao me te ao meake puta mai. He pono, tāku e mea atu nei ki a koutou, tukua tau te hunga ehara nei rātou i te erata tuatahi kia hono tonu tā rātou i te māra waina kia karangatia ai rātou e te māngai o te Ariki, nā te mea kāore anō kia tae mai tō rātou wā; kāore e mā ana ō rātou kākahu i te toto o tēnei whakatipuranga.
86 Me noho mai koutou ki roto i te herekoretanga nāna nei koutou i herekore ai; kaua e whakawhīwhiwhi i a koutou anō i roto i te hara, engari kia waiho ō koutou ringaringa kia mā, kia tae mai te Ariki.
87 Nā te mea kāore e maha ngā rā ka tae mai te wā e tūoioi ai te whenua, ā, e hūrorirori ai anō nei he tangata haurangi; ā, ka huna te rā i tōna mata, ā, kua kore e pai kia whiti mai; ā, ka kauria te marama ki te toto; ā, ka meinga ngā whetū kia riri rawa, ā, ka ruke iho i a rātou anō ki raro anō nei he piki e ngahoro iho ana i te rākau piki.
88 Ā, hei muri iho i tō whakaaturanga puta mai ai te riri me te āritarita ki te iwi.
89 Nā te mea whai muri i ho i tō whakaaturanga puta mai ai te whakaaturanga o ngā rū whenua, mā konā puta ai ngā auē i tōna aroaro, ā, ka hinga iho ngā tāngata, ā, kua kore e taea te tū.
90 Ka puta mai anō hoki te whakaaturanga o te reo whatitiri, me te reo uira, me te reo tūpuhi, me te reo o ngā ngaru o te moana e whawhati atu ana ki tua noa atu i ōna rohenga.
91 Ā, ka pōraruraru ngā mea katoa; ā he pono, ka hē ngā ngākau o ngā tangata; nā te mea ka tau iho te wehi ki runga ki a rātou; nā te mea ka tau iho te wehi ki runga ki ngā iwi katoa.
92 Ā, ka rere ngā anahera ki waenganui pū i te rangi, e karanga ana i runga i te reo kaha, e whakatangi ana te tētere a te Atua, e mea ana: Kia takatū, kia takatū koutou, E koutou ngā tāngata o te whenua; nā te mea kua tae mai te whakawākanga a tō tātou Atua. Nana, titiro, e haere mai ana te Tāne Pākuha; me haere atu koutou ki te whakatau i a ia.
93 Kātahi ka puta wawe i taua wā he tohu nui ki te rangi, ā, ka kite ngātahi ngā tāngata katoa.
94 Ā, ka whakatangi tētahi atu anahera i tōna tētere, e mea ana: Ko taua hāhi nui, te whaea o ngā mōrikarika, nāna nei ngā iwi katoa i mea kia inu i te waina o te riri o tōna pūremutanga, e whakatoi ana i ngā hunga tapu a te Atua, e whakahekea ō rātou toto–ko ia e noho nei i runga i ngā wai maha, ā, i runga i ngā moutere o te moana–nana, ko ia ngā taru kino o te whenua; kua paiheretia ia ki roto ki ngā pūranga; kua mea ana here hei mea kaha, tē taea e te tangata te wewete iho; nō reira, kua rite ia kia tahuna ki te ahi. Ā, māna tana tētere e whakatangi kia roa, kia kaha, ā, ka rangona e ngā iwi katoa.
95 Ā, ka ngū rawa te rangi mō te takiwā o tētahi hāwhe hāora; kātahi ka huraina ake te ārai o te rangi, e rite ana ki tētahi pukapuka pōkai e tūwheratia ana, ā, e pōkaitia ana hoki, ā, ka huraina ake te mata o te Ariki;
96 Ā, ko te hunga tapu kei runga i te whenua, ngā mea e ora ana, ka whakaueuetia ō rātou hā, ā, ka kahakina ake ki te whakatau i a ia.
97 Ā, ka puta mai te hunga kua moe i roto i ō rātou rua tūpāpaku, nā te mea ka whakatūwheratia ake ō rātou rua tūpāpaku; ā, ka kahakina ake anō rātou ki te whakatau i a iai waenganui i te pou o te rangi–
98 Nā te Karaiti rātou, ngā hua tōmua, te hunga e heke tuatahi me ia, me te hunga kei rungai te whenua, ā, i roto i ō rātou rua tūpāpaku, kua kahakina ake ki te whakatau i a ia; ā, koinei katoa mā runga i te reo o te whakatangihanga o te tētere a te anahera o te Atua.
99 Ā, whai muri iho i tēnei ka whakatangi tētahi atu anahera, koia te tētere tuarua; kātahi ka puta mai te hokonga o te hungana te Karaiti i tōna haerenga mai; kua riro i a rātou tō rātou wāhi i taua whareherehere kua whakaritea nei mō rātou, kia whiwhi ai rātou ki te rongopai, ā, kia whakawākia e rite tonu ana ki tā te tangata i te kikokiko.
100 Hei āpiti anō, ka whakatangihia tētahi atu tētere, koia te tētere tuatoru; katahi ka puta mai ngā wairua o te tangata kia whakawākia ai, ā, kua kitea kei raro tonu rātou i te whakahēanga;
101 Ā, koinei te toenga o te hunga mate; ā, kāore rātou e ora anō kia mutu rā anō ngā tau kotahi mano, kāore anō, kia mutu rā anō tēnei ao.
102 Ā, ka whakatangihia ake tētahi atu tētere, koia te tētere tuawhā, e mea ana: Ka kitea i reira i waenganui i te hunga e noho ai tae noa atu ki te rā nui whakamutunga, ki te mutunga pū anō, e noho paruparu tonu.
103 Kātahi ka whakatangihia atu tētahi atu tētere, koia te tētere tuarima, koia hoki te anahera tuarima e whakahokia atu ana te rongopai mau tonu–e rere haere ana ki waenganui i te rangi, ki ngā iwi katoa, ki ngā hapū, ki ngā reo, me ngā huihuinga tāngata;
104 Ā, ko tēnei te tangi o tana tētere, e mea atu ana ki ngā iwi katoa, kei te rangi me te whenua, kei raro hoki i te whenua–nā te mea ka rongo ngā taringa katoa, ā, ka piko ngā turi katoa, ā, ka whāki mai ngā arero katoa, i a rātou e rangona ana te tangi a te tētere, e mea ana: Kia wehi ki te Atua, ā, whakakorōriatia ia e noho mai nā i runga i te torona, mō āke tonu atu; nā te mea kua tae mai te hāora o tana whakawākanga.
105 Hei āpiti atu anō, ka whakatangi tētahi atu anahera i tana tētere, koia te anahera tuaono, e mea ana: Kua hinga ia te mea nāna nei ngā iwi katoa i mea kia inu i te wāina o tana pūremutanga; kua hinga ia, kua hinga!
106 Hei āpiti anō, ka whakatangi tētahi atu anahera i tana tētere, koia te anahera tuawhitu, e mea ana: Kua mutu, kua mutu! Kua taea e te Reme a te Atua, ā, kua takahia e ia te takahanga wāina me tōna kotahi, arā, te takahanga wāina o te āritarita o te riri o te Atua Kaha Rawa.
107 Kātahi ka karaunatia ngā anahera ki te korōria o tana kaha, ā, ka whakakīa te hunga tapu ki tana korōria, ā, ka whiwhi i tō rātou taonga tuku iho, ā, ka meatia kia taurite ki a ia.
108 Kātahi ka whakatangi anō te anahera tuatahi i tana tētere ki roto ki ngā tāringa o te hunga ora, ā, ka huraina ake ngā mahinga muna a te tangata, me ngā mahinga nui a te Atua i te mano tau tuatahi.
109 Kātahi ka whakatangi te anahera tuarua i tana tētere, ā, ka huraina ake ngā mahinga muna a te tangata, me ngā whakaaro me ngā hiahia o ō rātou ngākau, me ngā mahinga nunui a te Atua i te mano tau tuarua–
110 Ā,ka pērā anō, tae atu ana ki te whakatangihanga o te anahera tuawhitu i tana tētere; ā, ka tū ake ia ki runga i te whenua me te moana, ā, ka oati i runga i te ingoa o te mea e noho mai nā i runga i te torona, kia kore tonu anō he wā; ā, ka herea a Hātana, ko taua nākahi onamata, e kīa nei ko te rēwera, ā, e kore e wetekina mō te takiwā o te kotahi mano tau.
111 Kātahi ka wetekina ia mō tētahi wā iti, kia whakaminea e ia ana tauā.
112 Ā, ka whakaminea e Mikaera, te anahera tuawhitu, āe rā, ko te tino anahera anō, i ana tauā, āe rā, ko ngā mano tini o te rangi.
113 Ā, ka whakaminea e te rēwera ana tauā; āe rā, ko ngā mano tini o te ao rēwera, ā, ka whakaeke ake ki te whahwhai ki a Mikaera rātou ko ana tauā.
114 Kātahi ka puta mai te pakanga o te Atua nui; ā, ka makaia atu te rēwera me ana tauā ki roto ki tō rātou wāhi, kia kore tonu atu ō rātou mana i runga i te hunga tapu.
115 Nā te mea ka whawhai a Mikaera i ō rātou whawhai, ā, ka taea e ia te mea e whai ana i te torona o te mea e nohoia nei te torona, arā, ko te Reme pū anō.
116 Koinei te korōria o te Atua, me te hunga kua whakatapua; ā, e kore tonu rātou e kite atu i te mate.
117 Nō reira, he pono tāku e mea atu nei ki a koutou, e ōku hoa, karangatia tō koutou huihuinga karakia, pērā i tāku i whakahau nei ki a koutou.
118 Ā, i te mea kāore he whakapono ō te katoa, kia kaha tō koutou rapu, ā, whakaakona tētahi i tētahi ngā kupu whai mātauranga; āe rā, rapua e koutou ngā pukapuka whai mātauranga pai rawa atu; rapua te mātauranga, mā runga i te rangahau me te whakapono anō hoki.
119 Whakariterite koutou i a koutou anō; whakaritea ngā mea katoa e tika ana; ā, whakapūmautia tētahi whare, he whare karakia pū anō, he whare nohopuku, he whare whakapono, he whare ako, he whare korōria, he whare tautika, he whare nō te Atua;
120 Kia meinga ai ā koutou kuhutanga i runga i te ingoa o te Ariki; kia meinga ai ā koutou putanga i runga i te ingoa o te Ariki; kia meinga ai ā koutou ohaoha katoa i runga i te ingoa o te Ariki, e tū ake ana ngā ringaringa ki te Runga Rawa.
121 Nō reira, whakamutua atu ā koutou kōrero hanga noa, ngā katakata, i ō koutou hiahia tūkari, i ō koutou whakapehapeha me ngā whakaaro horihori, i ā koutou mahinga kino katoa hoki.
122 Whakatūria he kaiako i waenganui i a koutou, ā, kaua e tukua te katoa hei kaikōrero i te wā kotahi; engari, tukua kia kōrero takitahi, ā, tukua te katoa kia whakarongo ai ki ngā kōrero, nā, ina kōrero te katoa, ka whakamāramatia te katoa, ā, kia taurite ai te whai wāhi o ngā tāngata katoa.
123 Tirohia kia aroha tētahi i tētahi; whakamutua te apo; akona kia wāwahi atu ngā taonga tētahi i tētahi e rite ana ki tā te rongopai.
124 Whakamutua atu te hakirara; whakamutua atu te paru; whakamutu atu te whakapae kino tētahi i tētahi; whakamutua te moe kia roa atu i te moe e tika ana mō te tīnana; haere moata ki tō moenga, kia kore ai e ngenge; maranga mōata, kia kaha ai ō koutou tīnana me ō koutou hinengaro.
125 Ā, tērā noa ake i ngā mea katoa, whakakākahuria koutou anō ki te here o te aroha noa, anō nei he ngeri, koia te here o te tika rāua ko te rangimārie.
126 Inoi i ngā wā katoa, kia kore ai koutou e hemo, kia tae atu ai au. Nana, titiro, ka haere wawe atu au, ā, ka whakawhiwhia koutou ki ahau ake. Āmine.
127 Hei āpiti anō, ko te ritenga o te whare i whakaritea ai mō te tumuakitanga o te kura mō ngā poropiti, kua whakapūmauhia ake hei whakaakoranga mō rātou i roto i ngā mea katoa e tika pū ana anō mō rātou, mō ngā kaiwhakariterite katoa pū anō o te hāhi, kia kī pēnei kē te kupu, te hunga kua karangatia nei ki te minita i roto i te hāhi, e tīmata ana ki ngā pirihi teitei, heke iho ana anō ki ngā rīkona–
128 Ā, ka pēnei te ritenga o te whare o te tumuakitanga o te kura: Ka kitea te tangata e whakatūria ai hei tumuaki, hei kaiako rānei, e tū ana i tōna wāhi, i roto i te whare e whakaritea ai mōna.
129 Nō reira, ka tuatahi ia i roto i te whare o te Atua, i tētahi wāhi e āta rangona māriretia ai ana kupu e te whakaminenga, ehara i te reo kaha.
130 Ā, ina kuhu mai ia ki roto i te whare o te Atua, nā te mea māna te tuatahi ki roto i te whare–nana, he ātaahua tēnei, kia tū ai ia hei tauira–
131 Tukua ia kia inoi i runga i ōna turi ki te aroaro o te Atua, hei tohu, hei whakamaharatanga ki te kawenata mau tonu.
132 Ā, ina kuhu atu ētahi atu i muri i a ia, tukua te kaiako kia tū ake, ā, e tū ake ana ōna ringaringa ki te rangi, āe rā, kia ara tōtika ake ōna ringa, ka oha atu i tana teina, i ana teina rānei i runga i ēnei kupu:
133 He teina rānei koe, koutou rānei? Kei te oho atu au ki a koe i runga i te ingoa o te Ariki a Ihu Karaiti, jei tohu, hei whakamaharatanga ki te kawenata mau tonu, i roto i taua kawenata whakawhiwhia koe e ahau hei mema, i tētahi whakataunga e mau ana, tētaea te nuku, tē taea hoki te tīni, kia meinga ai hei hoa mōu, hei teina mōu mā roto i te aroha o te Atua i roto i ngā here o te aroha, kia hīkoi hē kore i ngā whakahaunga katoa a te Atua, i rungai te whakawhetai, mō āke tonu atu. Āmine.
134 Ā, ko te tangata e kitea ana kīhai i tau mō tēnei oha, kua kore ia e whai wāhi ki waenganui i a koutou; nā te mea e kore koutou e tuku kia whakapokea tōku whare e ia.
135 Ā, ko te tangata e kuhu mai ai, ā, e whai whakapono ana i tōku aroaro, ā, he teina hoki , mehemea rānei he teina rātou, ka oha atu rātou ki te tumuaki, ki te kaiako rānei e tū ake ana ō rātou ringaringa ki te rangi, i runga i tēnei inoi anō me tēnei kawenata, e kōrero ana rānei Āmine, hei tohu mō taua mea.
136 Nana, he pono tāku e mea atu nei kia koutou, he tauira tēnei mō koutou hei oha tētahi i tētahi i roto i te whare o te Atua, i roto i te kura o ngā poropiti.
137 Ā, kua karangatia koutou kia meatia tēnei i runga i te inoi me te whakawhetai, he pērā i tā te Wairua whakapuaki i roto i ā koutou mahinga katoa i roto i te whare o te Atua, i roto i te kura o ngā poropiti, kia meinga ai hei āhurutanga, hei tapenakara mō te Wairua Tapu hei whakamāramatanga mō koutou.
138 Ā, kaua koutou e whakaae kia uru mai tētahi tangata ki a koutou ki tēnei kura, ki te kore ia e mā ana i ngā toto o tēnei whakatipuranga;
139 Ā, ka whakawhiwhia ia i runga i te tikanga o te horoinga waewae, mō tēnei take whakaritea ai tēnei tikanga tapu o te horoinga waewae.
140 Hei āpiti anō, mā te tumuaki te tikanga tapu o te horoinga waewae e whakahaere, mā te erata whakahaere rānei o te hāhi.
141 Me tīmata i runga i te inoi; ā, whai muri iho i te kainga i te taro, i te wāina, me whītiki ia i a ia anō pērā i te tauira i hoatu nei i te upoko tekau mā toru o te whakaaturanga o Hōani e pā ana ki ahau. Āmine.