1. Kua tata tetahi mahi nui whakamiharo te puta atu ki waenganui i nga tamariki a te tangata.

2. Nana, ko te Atua ahau, kia whai-whakaaro hoki ki taku kupu e tere nei, e kaha nei, koi atu i te hoari matarua, a wehea noatia nga ponapona me te hinu wheua, no reira whakarangona taku kupu.

3. Titiro, kua ma te maara, kua rite mo te kotinga, no reira ko ia e hiahia ana ki te kokoti, tukua ia kia ake iho i tana toronaihi i runga i tona kaha, kokoti ai, i te roanga o te ra, kia purangatia ai mo tona wairua he oranga mutunga-kore i roto i te kingitanga o te Atua;

4. Ae ra, ko ia e aki iho ai i tana toronaihi kokoti ai, kua karangatia nga pera e te Atua;

5. No reira, e, ka inoi mai koe ki a au, ka whiwhi koe; e, ka patuki koe ka uakina ki a koe.

6. Me whai ki te whakaputa me te whakapumau hoki i toku Hiona. Puritia aku whakahaunga i roto i nga mea katoa.

7. A ki te pupuri koe i aku whakahaunga, a ka u tonu tae noa ki te mutunga, ka whiwhi koe ki te oranga-tonutanga, koia nei te homaitanga nui rawa o nga homaitanga katoa a te Atua.

8. A tenei ake, ki te mea ka tono ake koe ki te Matua i runga i toku ingoa, i runga hoki i te whakapono, e whakapono ana, tera koe e whiwhi ki te Wairua Tapu, e whakapuaki nei, kia tu ai koe hei kai-whakaatu mo nga mea e rongo ai, e kite ai koe, kia whakapuaki ai ano hoki koe i te ripenetatanga ki tenei whakatupuranga.

9. Nana, ko Ihu Karaiti ahau, ko te Tama a te Atua ora, nana i hanga te rangi me te whenua; he maramatanga e kore e taea te huna i roto i te pouritanga;

10. Mo konei, me whakaputa atu e ahau te raneatanga o taku Rongo-pai i nga tauiwi ki te whare o Iharaira.

11. Nana, ko Rawiri koe, kua karangatia hoki koe hei awhina, ko taua mea (te awhina) ina meatia e koe a ka u tonu, ka manaakitia koe ki nga mea Wairua me nga mea maori, a e rahi ano tou utu. Amine.