1. Kia hiiritia te whakahinengaro o tenei pukapuka me te Pukapuka a Moromona, ka panuitia e matou te kohurutanga o Hohepa Mete, te Poropiti, me Hairama Mete, te Peteriaka. He mea pupuhi raua i roto i te whare herehere o Katara, i te 27 o Hune, 1844; e tata ana ki te rima o nga haora i te ahiahi, e nga kai hapai pu, he mea pani ki te mea mangu—150, 200 ranei nga tangata. I puhia a Hairama i te tuatahi, a hinga ana me te karanga, “He tangata mate ahau!” Ka rere iho a Hohepa i te wini a puhia ana me te karanga, “E te Ariki, e toku Atua!” I puhia kinotia raua i muri i to raua matenga, e wha nga mata i te mea kotahi o raua.

2. Ko Hoani Teira me Wirata Rihara, o te Tekau-marua, ko raua anake nga tangata i roto i, te ruma i taua wa, ko te mea tuatahi i tu, e wha nga, mata i pa ki a ia, engari i ora i muri iho; ko to muri ma roto i te mahi tohu a te Atua, i puta ai “kore rawa he puare i tona kakahu.”

3. Ko Hohepa Mete, te Poropiti, me te Matakite o te Ariki, nui atu tana i mea (engari ko Ihu anake) mo te whakaoranga o nga tangata i tenei ao i ta era atu tangata katoa i runga i te whenua. I roto i te takiwa poto, e rua tekau nga tau, kua whakaputaina mai e ia te Pukapuka a Moromona, i whakamaoritia ra e ia he mea na nga homaitanga me te kaha o te Atua, a nana ano i mea kia panuitia i runga i nga tuawhenua e rua; kua tukua atu te raneatanga o te Rongo-pai mau tonu ki nga pito e wha o te ao; me te whakaputanga mai i nga whakakitenga me nga whakahaunga kei roto nei i tenei pukapuka o nga Akoranga me nga Kawenata, me etahi atu whakaakoranga whai whakaaro hei painga mo nga tamariki a nga tangata; me te huihui i nga mano o nga Hunga Tapu o nga Ra o Muri nei, me te hanga i tetahi pa nui; me te waihotanga ake i tetahi ingoa whai honore e kore e taea te patu. He nui ia i tona oranga he nui ano i nga kanohi o tona Atua i tona matenga, ki tona iwi hoki, a pera me te tokomaha a te Ariki i whakahi ai i nga wa onamata, i hiiritia tona mihana me ona mahi ki ona ake toto—a pera ano hoki tona tuakana, a Hairama. I roto i te ora kihai raua i wehea, a i roto i te mate kihai ano hoki raua i wehea.

4. I te wa i haere a Hohepa ki Katara ki te tuku i a ia ano ki nga hiahiatanga a te ture, e rua e toru ranei nga ra i mua o tona whakamatenga i mea ia, “E haere ana ahau ano he reme kia whakamatea; heoi e kore ahau e aha, ano he ata raumati; e watea ana toku hinengaro i nga hara ki te Atua me nga tangata katoa ano hoki. Ka mate hara kore ahau, a tera e kiia—i kohurutia ia i roto i te riri.” I taua ata ano, i te mea kua rite a Hairama mo te haere—me ki ranei kia whakamatea ? Ae, no te mea i pera—ka korerotia e ia te rarangi e whai ake nei e tata ana ki te mutunga o te tekau ma rua o nga upoko o Etere, i roto i te Pukapuka a Moromona, me te huri iho i to reira wharangi ki raro:—

5. “Nawai a, ka inoi ake ahau ki te Ariki kia homai e ia te atawhai ki nga Tauiwi, kia whai aroha noa ai ratou. A ka mea mai te Ariki ki a au, ki te mea kahore o ratou aroha noa, he aha mau, kua u tonu koe; no reira ka meinga ou kakahu kia ma. A mou i kite i tou ngoikoretanga, ka whakakahangia Koe, mo te noho iho ki roto ki te wahi ka oti nei i a au te whakarite i roto i nga whare o toku Matua. Heoi tenei ahau te poroporoake nei ki nga Tauiwi, ki oku teina ano hoki e aroha nei ahau, hei kona ra koutou tae noa ki te wa e tutaki ai tatou ki mua i te nohoanga whakawa a te Karaiti. Hei reira matau ai nga tangata katoa ki oku kakahu e koha-kore ana i o koutou toto.” Na kua mate nga kai whakaatu, a e mau tonu ana ta raua whakaaturanga.

6. Ko Hairama Mete, e 44 nga tau te pakeke i a Pepuere, 1844, a ko Hohepa Mete e 38 nga tau i a Tihema, 1843; na atu inaianei ka whakaurua o raua ingoa ki o nga tangata i kohurutia mo te whakapono; a ka whakamaharatia nga kai korero pukapuka i roto i nga iwi katoa, ko te Pukapuka a Moromona, me tenei pukapuka o nga Akoranga me nga Kawenata o te Hahi i utua ki nga tino toto o te tekau ma iwa rau tau hei whakaputa mai ki te whakaora i te ao kino: a me he mea e ahei ana i te ahi te whakakino i nga rakau tupu mo te kororia o te Atua, he hanga takoto noa te tahu i nga rakau maroke, hei whakahou i te maara-waina kua kino. I ora ai raua mo te kororia; i mate raua mo te kororia; a ko te kororia to raua utu mau tonu. I tetahi wa, ki tetahi wa ko o raua ingoa ka tukua iho ki nga uri hei taonga nui mo te Hunga Tapu.

7. He hara-kore raua i nga ahua hara katoa, kua whakamohiotia to raua tika i mua, a i mau raua ki te whare herehere he mea na te tinihanga o nga tangata tutu; a ko o raua toto hara-kore i runga i te kaupapa o te whare herehere o Katara hei hiiri nui mo nga “Tikanga Moromona,” e kore nei e taea te whakakahore e nga whakawa i runga i te whenua; a ko o raua toto hara-kore i runga i te tohu o te Takiwa o Irinoi, me te takahanga i te pono o te Takiwa, i whakaaria e te Kawana, ko ia hei kai whakaatu mo te pono o te Rongo-pai mau tonu ki te ao, a e kore e taea te whakahe; me o raua toto hara-kore i runga i te kara o te here-koretanga, i runga ano hoki i nga ture o Amerika (United States), koia ano he kai kauwhau mo te whakapono a Ihu Karaiti, a ka pa tera ki nga ngakau o te hunga tika i waenganui i nga iwi katoa; a ko o raua toto hara-kore, me nga toto hara-kore o te hunga katoa i kohurutia e noho ana i raro i te ata i kitea e Hoani, tera e karanga ake ki te Ariki o nga Mano, kia utua ra ano e ia nga toto i runga i te whenua. Amine.