Wāhanga 17
He whakakitenga mā roto i a Hōhepa Mete te Poropiti ki a Oriwa Kautere rātou ko Rāwiri Witima, ko Mātini Harihi ki Wheiete, Niu Ioka, Hune 1829, i mua i tā rātou kite atu i ngā papa whaowhaoa i mau nei ngā tuhinga o te Pukapuka a Moromona. I ako a Hōhepa rāua ko tana kaituhi i roto i tā rāua mahi whakapākehā i ngā papa Pukapuka a Moromona, nā, ka kōwhiria ngā kaiwhakaatu tokotoru motuhake (tirohia a Ētere 5:2–4; 2 Nīwhai 11:3; 27:12). I taea a Oriwa Kautere rātou ko Rāwiri Witima, ko Mātini Harihi e tētahi hiahia nō te wairua kia tū ai hei kaiwhakaatu tokotoru motuhake. Ka inoia te Ariki te Poropiti, kātahi ka tukua mai tēnei whakakitenga hei whakautu mā roto i te Urama me te Tāmama.
1–4, Mā te whakapono ngā Kaiwhakaatu Tokotoru e kite i ngā papa me ērā atu mea tapu; 5–9, Ka whakaatu te Karaiti mō te atuatanga o te Pukapuka a Moromona.
1 Nana, ko taku kupu tēnei ki a koutou, nā, me whakawhirinaki koutou ki runga ki taku kupu, nā, me ka pērā koutou i runga te kaha katoa o te ngākau, ka tirohia e koutou ngā papa, me te ārai uma anō hoki, te hoari a Rāpana, te Urama me te Tāmama, i hoatu ai ki te teina o Iarere i runga i te maunga, i te wā i kōrero ia ki te Ariki kanohi ki te kanohi, me ngā kaitohutohu whakamīharo i hoatu ai ki a Rīhai i te koraha, i ngā rohe o te Moana Whero.
2 Ā, mā tō koutou whakapono e tirohia iho ai ēnā mea, mā taua whakapono pū anō i mau ai i ngā poropiti onamata.
3 Ā, whai muri iho i tā koutou rironga i te whakapono, me te kite anō i aua mea ki ō koutou ake karu, ka whakaatu atu koutou mō aua mea, mā runga i te mana o te Atua;
4 Ā, ka pēnei koutou kia kore ai e whakangaromia atu taku pononga a Hōhepa Mete, Tama., kia whakaputa mai au i aku take tika ki ngā tamariki a te tangata i roto i tēnei mahi.
5 Ā, ka whakaatu atu koutou mō tā koutou kitenga atu i aua mea, e rite pū ana ki tā taku pononga a Hōhepa Mete, Tama., i kite ai i aua mea; nā te mea nā taku kaha ia kite ai i aua mea, ā, he mea nā tōna whakapono.
6 Ā, nāna te pukapuka i whakapākehā, ko taua wāhi anō nāku ia i whakahau, ā, i te mea e ora ana tō koutou Ariki me tō koutou Atua he pono tēnei.
7 Nā reira, kua whiwhi koutou i taua mana anō hoki, me taua whakapono anō, me taua takohatanga pērā i a ia;
8 Ā, ki te mea koutou i ēnei whakahaunga whakamutunga āku, kua hoatu nei e au ki a koutou, e kore koutou e taea e ngā kūaha o te ao rēwera; nā te mea he ranea tōku aroha mō koutou, ā, ka mairangatia koutou hei te rā whakamutunga.
9 Ā, nāku, nā Ihu Karaiti, nā tō koutou Ariki me tō koutou Atua tēnei i kōrero ki a koutou, kia whakaputa mai au i aku take tika ki ngā tamariki a te tangata. Āmine.