1 E te Atua, kei hea rā koe? Ā, kei hea te ārai e uhi nei nā i tōu wāhi huna?

2 Ka pēhea te roa o tōu ringa e pepeke ana, me tōu karu, āe rā, tōu karu urutapu, nana i ngā rangi mau tonu ngā hē o tō iwi me āu pononga, ā, ka werohia tōu taringa e ā rātou tangi?

3 Āe rā, E te Atua, me pēhea te roa e whakamamaetia ai rātou e ēnei hē me ēnei whakapēhitanga hē, i mua i te whakangāwaritanga o tō ngākau ki a rātou, ā, i te korikoringa o te ate i te aroha ki a rātou?

4 E te Ariki te Atua kaha Rawa, te kaihanga o te rangi, te whenua, me ngā moana, me ngā mea katoa i roto rā, ā, nōna nei te kaha me te mana i runga i te rēwera, me te pōuri me te rangatiratanga pōuri o Heiora—torona atu tō ringa; tukuna tō karu kia werohia; tukuna tō whare kia hāpaingia ake; tukuna tō wāhi huna kia kore e āraitia tonutia; tukuna tō taringa kia areare; tukuna tō ngākau kia whakangāwaritia, ā, kia korikoria tō ate i te aroha ki a mātou.

5 Tukuna tō riri kia muramura ki ō mātou hoariri; ā, i runga i te riri o tōu ngākau, mā tō hoari ka whakarere noa atu i ō mātou hēanga.

6 Kia mahara ki āu Hunga Tapu e whakamamaehia ana, E tō mātou Atua; kātahi ka hari āu pononga i tō ingoa mō āke tonu atu.

7 E taku tama, kia tau te rangimārie ki tōu wairua; ka poto noa te wā o ō koutou whakapātaritari me ō koutou whakamamaetanga;

8 Kātahi, ki te manawanui koe, ka whakateiteingia koe i runga rawa; ka wikitōria koe i runga i ō hoariri katoa.

9 E tū ana ō hoa i tō taha, ā, ka whakamānawa anō rātou i a koe i runga i te ngākau mahana me te ringa aroha.

10 Kāore anō koe kia rite ki a Hopa; kāore ō hoa e totohe ana ki a koe, e kore rānei e whakapae i a koe mō te hara, pērā i tā rātou ki a Hopa.

11 Ā, ko te hunga e whakapae ana ki a koe mō te hara, ka kangaia tō rātou tūmanako, ā, ka rewa atu ō rātou hiahia anō nei te huka e rewa iho ana i mua i ngā hīhī o te rā e tākiri mai ana;

12 Ā, kia tau iho anō hoki te Atua i tōna ringa kia hīria ake ngā wā me ngā kaupeka o te tau, ki te whakakāpō hoki i ō rātou hinengaro, kia kore ai rātou e mārama i ana mahinga mīharo; kia mātauria ai anō hoki rātou e ia, ā, kia mau rātou i roto i tā rātou ake tinihanga;

13 Waihoki, nā te mea kua pokea ō rātou ngākau, me ngā mea e hiahia ana kia kumea iho ki runga i ētahi atu, ā, e aroha ana ki te whakamamae i ētahi atu, e tino tau iho ai ērā mea ki runga i a rātou anō.

14 Kia raru noa hoki rātou, ā, kia hātepea atu ō rātou tūmanako;

15 Ā, e kore e maha ngā tau mai anō i taua wā, kia tahia atu rātou me ō rātou uri i raro o te rangi, e ai tā te Atua, kia kore tētahi o rātou e mahue ai kia tū ki te taha o te taiapa.

16 Kua kangaia te hunga katoa e hīkina ake te reke ki aku hunga kua whakawahia, e ai tā te Ariki, me te karanga ake kua hara rātou ahakoa kāore rātou i hara i tōku aroaro, e ai tā te Ariki, engari kua meatia tāku e pai ai i ōku karu, me ērā mea kua whakahaua nei rātou e ahau.

17 Engari ko te hunga e karanga ana i te hara, e karanga ana i tērā nā te mea ko rātou ngā pononga a te hara, ā, ko rātou ngā tamariki anō o te whakarongo kore.

18 Ā, ko te hunga e whakaatu teka ana ki aku pononga, kia kumea iho rātou ki roto i te hereheretanga me te mate—

19 Āue te mate mō rātou; nā te mea kua tūkinotia e rātou aku mea nohinohi ka motukina atu rātou i ngā tikanga tapu o tōku whare.

20 E kore e kī tā rātou kete, ka pakaru iho ō rātou whare me ō rātou whare kararehe, ā, ka whakahāweatia rātou anō e te hunga i whakapatipati ai i a rātou.

21 Kia kore ō rātou tikanga ki te tohungatanga, e kore rānei ō rātou uri i muri i a rātou, mai i tētahi whakatipuranga ki tētahi whakatipuranga.

22 Kua pai ake mō rātou me i herea tētahi kohatu mīra i ō rātou kakī, ā, kia toromi ai rātou i te rire o te moana.

23 Auē te mate ki te hunga katoa e tūkino ai i tōku iwi, me te pei atu, me te kōhuru, me te whakaatu ki a rātou, e ai tā te Ariki o ngā Mano; e kore tētahi whakatipuranga kino e mawhiti atu i te pāpunitanga o te ao rēwera.

24 Nana, e kite ana ōku karu, ā, e mōhio ana ki ā rātou mahinga katoa, ā, kei a au e pupuri ana tētahi whakawākanga wawe i tō reira kaupeka, mō rātou katoa;

25 Nā te mea kua whakataua tētahi wā mō ngā tāngata katoa, e rite ana ki ana mahinga.

26 Ka hoatu e te Atua he mātauranga ki a koutou mā runga i tana Wairua Tapu, āe rā, mā te takoha tē taea te whakakupu o te Wairua Tapu, te mea kāore anō kia huraina mai i te hanganga o te ao tae noa mai ki tēnei wā;

27 Te mea kua āta tatari iho nei ō tātou tūpuna i runga i te ngākau hīkaka kia whakakitea mai ai i ngā wā whakamutunga, te mea tuhia atu ai ō rātou ngākau e ngā anahera, e pupuri ana, e tiaki ana mō te raneatanga o tō rātou korōria;

28 He wā e haere mai ana i reira e kore rawa tētahi mea e kaiponuhia, ahakoa mehemea kotahi te Atua, he tokomaha rānei ngā atua, ka whakakitea ērā mea.

29 Ka whakakitea ngā torona me ngā rangatiratanga, ngā kīngitanga me ngā mana katoa, ā, ka whakatakotoria iho ki runga i te hunga katoa kua manawanui kaha mō te rongopai o Ihu Karaiti.

30 Waihoki, mehemea he rohenga kua rite i ngā rangi, i ngā moana rānei, i te whenua maroke rānei, i te rā rānei, i te marama, i ngā whetū rānei—

31 Ko ngā wā katoa a ō rātou huringa, ngā rā, ngā marama me ngā tau katoa kua whakataua, ā, ngā rā katoa o ō rātou rā, ngā marama, ngā tau, me ōna korōria, ōna ture, me ōna wā kua whakaritea, ka whakakitea i ngā rā o te whakatutukitanga o te raneatanga o ngā rā—

32 E rite ana ki ērā mea kua whakamanaia i te aroaro o te Kaunihera o te Atua Mau Tonu o ērā atu atua katoa i mua i te hanganga o te ao, ērā mea e rāhuitia ai ki te whakaotinga me te mutunga i reira, ina uru atu ngā tāngata katoa ki tōna aroaro mau tonu, ā, ki roto i tōna okiokinga mate kore.

33 Ka pēhea te roa e pokea tonutia ngā wai tāruturutu? Mā tēhea mana ngā rangi e pupuri? Mehemea e taea ana e te tangata te whakamārō atu i tōna ringa pakupaku ki te aukati i te awa o Mītori i tana huarahi, ki te whakatahuri kē te rere rānei, me te mea nei ka whakawheauau i te Mea Kaha Rawa i tana riringitanga iho i te mātauranga mai i te rangi ki runga i ngā māhunga o te Hunga Tapu i ngā Rā o Muri Nei.

34 Nana, he tokomaha ngā mea e karangatia ai, engari he ruarua ngā mea e kōwhiria ai. Ā, he aha rātou e kore ai e kōwhiria?

35 Nā te mea kua tau rawa ō rātou ngākau ki runga i ngā mea o tēnei ao, ā, e whai atu ana i ngā hōnore o te tangata, nā konā kāore rātou e ako mai ai i tēnei akoranga kotahi—

36 Kia hono tonu ngā tikanga o te tohungatanga ki ngā mana o te rangi, ā, kia kore ai e taea ngā mana o te rangi te whakahaere, te pupuri rānei hāunga i runga i ngā tikanga o te tika.

37 Kia whakataua iho aua mea ki runga i a tātou, he pono; engari ina ngana tātou ki te uhi i ō tātou hara, ki te whāngai i tō tātou whakapehapeha, ō tātou hiahia horihori, ki te whakahaere mana, rāngatiratanga rānei, hiahia rānei ki runga i ngā wairua o ngā tamariki a te tangata, i runga i te kino pakupaku noa, nana, ka tawhiti atu ngā rangi; e pōuri ana te Wairua o te Ariki; ā, ina wehe atu ia, Āmine ki te tohungatanga, ki te mana rānei o taua tangata.

38 Nana, i mua i tana mōhiotanga, kua waiho ia ki a ia anō, kia whana ki ngā koikoi, kia whakatoingia ngā hunga tapu, me te whawhai ki te Atua.

39 Kua ako mātou nā ngā āhuatanga pōuri koia ko te āhua me te hiahia o te nuinga o ngā tāngata katoa, i te wā tonu e whiwhi i tētahi mana iti noa iho, e ai tā rātou, ka timata wawe tā rātou whakahaere kino.

40 Koia kua karangatia te tokomaha, engari kua kōwhiria te tokoiti.

41 Me kaua tētahi kaha, tētahi mana rānei e taea te pupuri i te mana o te tohungatanga, i runga anake i te whakapakepake, i te manawanui, i runga i te mārie me te māhaki, me te aroha mutunga kore;

42 I runga i te atawhai, me te mātauranga tūturu, e whakanui rawa ai i te wairua ki te kore he arero rua, he tinihanga rānei—

43 E whakatika haere ana i te wā tika ki te kupu koi, ina korikoria te ngākau e te Wairua Tapu; kātahi ka whakakite atu whai muri iho i te aroha nui ake ki te tangata nāu noa nei i whakatika, kei whakaarohia koe he hoariri ki a ia;

44 Kia mōhio ai ia he kaha ake tō whakapono i ngā aho o te mate.

45 Tukua tō ate anō hoki kia kī ai i te aroha noa ki ngā tāngata katoa, ā, ki te whare o te whakapono, ā, tukua kia kīnaki haeretia ō whakaaro e te tika; kātahi ka rahi tō māia i te aroaro o te Atua; me te whakaakoranga o te tohungatanga ki runga i tō wairua anō nei te tōmairangi o te rangi.

46 Ka meinga te Wairua Tapu hei hoa piripono mōu, ā, ko tō tokotoko tētahi tokotoko o te tika me te pono e kore nei e panoni; ā, ko tō rangatiratanga tētahi rangatiratanga mutunga kore, kāore hoki e meinga kia tono atu, māna noa e rere mai ki a koe mō āke tonu atu.