Wāhanga 74
He whakakitenga i hoatu ai ki a Hōhepa Mete te Poropiti, ki te Takiwā o Weina, Niu Ioka, i 1830. I mua pū anō i te whakapūmautanga o te Hāhi, i ara ake ngā pātai mō ngā tikanga whakahaere tika o te rumaki, nā konā huri atu te Poropiti ki te rapu whakautu mō taua kaupapa. E ai ki te Hītori o Hōhepa Mete, he whakamāramatanga tēnei whakakitenga mō 1 Korinihi 7:14, he karaipiture i kaha whakahuatia ake hei kī e tika ana kia rumaki i ngā tamariki nohinohi.
1–5, Ka kōrero tahi a Paora me te Hāhi i te wā i a ia kia kaua e pupuri ki te ture o Mohi; 6–7, He tapu ngā tamariki nohinohi, ā, kua whakatapua rātou mā roto i te Whakamārietanga.
1 Nā, kua whakatapua te hoatāne whakapono kore e te hoawahine, ā, kua whakatapua te hoawahine whakapono kore e te hoatāne; ki te kore he poka āu tamariki, engari he tapu rātou ināianei.
2 Nā, i ngā rā o ngā āpōtoro i reira te ture o te kotinga i waenganui i ngā Hūrai katoa, arā, te hunga kīhai i whakapono ki te rongopai a Ihu Karaiti.
3 Ā, i pahawa ake, nā, i ara ake tētahi tautohetohenga nui i roto i te iwi e pā ana ki te ture o te kotinga, nā te mea i te hiahia te hoatāne whakapono kore kia kotia ana tamariki, ā, kia noho ai i raro i te mana o te ture a Mohi, ko taua ture i whakatutukihia ai.
4 Ā, i pahawa ake, nā te mea i whakatupuria ake ngā tamariki i raro i te mana o te ture a Mohi, i aro nui atu ki ngā whakarerenga iho a ō rātou tūpuna, ā, kīhai i whakapono ki te rongopai a Ihu Karaiti, mā konā meinga tapu rātou.
5 Nā reira, mō tēnei take tuhia atu ai e te āpōtoro ki te hāhi, e hoatu ana ki a rātou tētahi whakahaunga, ehara i te mea nā te Atua, engari i a ia ake anō, kia kaua tētahi tangata whakapono e hono tahi atu ki tētahi tangata whakapono kore; ki te pērā me whakakore atu te ture a Mohi i waenganui i a rāua,
6 Kia noho kotinga kore ai ā rāua tamariki; ā, kia whakakorengia atu taua whakarerenga iho, e mea ana he tapu kore ngā tamariki; nā te mea i pērā i waenganui i ngā Hūrai;
7 Engari he tapu ngā tamariki nohinohi, kua whakatapua mā roto i te whakamārietanga a Ihu Karaiti; ā, koinei te tikanga o ngā karaipiture.