1 He whakakitenga mō Ihu Karaiti ki tana pononga a Hōhepa Mete, Tama., me ngā erata tokoono, i a rātou e whakakotahi ana i ō rātou ngākau, ā, e hiki ake ana i ō rātou reo ki runga rawa.

2 Āe rā, ko te kupu a te Ariki e pā ana ki tana Hāhi, e whakapūmautia ana i ngā rā o muri hei whakahokinga i tōna iwi, pērā i tāna i kōrerotia ai e ngā māngai o ana poropiti, ā, mō te whakahuihuinga o ana hunga tapu kia tū ai ki runga o Maunga Hīona, e ai ko te pā o Hiruharama Hou.

3 Ka hangaia tēhea pā, e tīmata ana i te whenua o te temepara, kua tohua mai nei e te matikara o te Ariki, i ngā rohe whakateuru o te Whenua Tōpū o Mītori, ā, he mea whakatapu nā te ringa o Hōhepa Mete, Tama., me ētahi atu tāngata i āhuarekahia ai e te Ariki.

4 He pono koinei te kupu a te Ariki, nā, ka hangaia ake te pā o Hiruharama Hou e te whakahuihuinga o ngā hunga tapu, e tīmata ake ana i tēnei wāhi, ko te wāhi pū anō o te temepara, e hangaia ake ai taua temepara i roto i tēnei whakatipuranga.

5 Nā, he pono e kore tēnei whakatipuranga e pahemo atu kia hangaia ake tētahi whare mō te Ariki, ā, ka tau iho tētahi kapua ki runga rā, ko taua kapua te korōria pū anō o te Ariki, e whakakīngia ai te whare.

6 Me ngā tama a Mohi, e rite ana ki te Tohungatanga Tapu i whiwhi ai ia i raro i te ringa o tōna hungawai, a Ietoro;

7 Ā, i whiwhi a Ietoro i raro i te ringa o Kerepe;

8 Ā, ka whiwhi a Kerepe i raro i te ringa o Erehu;

9 Ā, ka whiwhi a Erehu i raro i te ringa o Heremi:

10 Ā, ka whiwhi a Heremi i raro i te ringa o Kara;

11 Ā, ka whiwhi a Kara i raro i te ringa o Erāiha;

12 Ā, ka whiwhi a Erāiha i raro i te ringa o te Atua.

13 I ora hoki a Erāiha i ngā rā o Aperahama, ā, nāna hoki ia i manaaki—

14 Ko taua Aperahama i whiwhi i te tohungatanga i a Merekihereke, i whiwhi i tēnā mā roto i te whakapapa o ōna tūpuna, tae noa pū anō ki a Noa;

15 Ā, mai i a Noa ki Enoka, mā roto i te whakapapa o ō rātou tūpuna;

16 Ā, mai i a Enoka ki a Apera, te mea i patua ai e te tinihanga o tana tuakana, i whiwhi i te tohungatanga nā ngā whakahaunga a te Atua, e te ringa o tōna matua a Arama, ko ia te tangata tuatahi—

17 Kei roto tonu taua tohungatanga i te hāhi o te Atua i ngā whakatipuranga katoa, ā, kāore ōna tīmata rā, ōna tau mutunga rānei.

18 Ā, i whakaūngia e te Ariki tētahi tohungatanga anō hoki ki runga i a Arona rātou ko ōna uri, i roto i ō rātou whakatipuranga katoa, ko taua tohungatanga anō te mea e hono tonu atu, ā, e noho mai ana mō āke tonu atu me te tohungatanga, arā, te ritenga tapu rawa a te Atua.

19 Ā, e minita atu ana tēnei tohungatanga nui ake i te rongopai, ā, e puritia ana te kī mō ngā mea ngaro o te kīngitanga, ko te kī pū anō o te mātauranga a te Atua.

20 Nō reira, i ngā tikanga tapu o reira, e kitea ai te mana o te atuatanga.

21 Ā, ki te kore ngā tikanga tapu o reira me te mana o te tohungatanga, kāore e kitea te mana o te atuatanga ki te tangata i roto i te kikokiko;

22 Nā te mea, ki te kore tēnei tē taea e te tangata te kite atu i te mata o te Atua, arā, te Matua, me te ora tonu.

23 Nā, i whakaako mārama tēnei Mohi i ngā tamariki a Iharaira i roto i te koraha, ā, i kaha whai hoki kia whakatapua tana iwi kia kitea ai te mata o te Atua;

24 Engari i whakapakekehia e rātou ō rātou ngākau, ā, tē taea te noho ki tōna aroaro me te ora tonu; nō reira, i oati te Ariki i runga i tōna riri, i te mea i mura tōna riri ki a rātou, e kore rawa rātou e kuhu ki tōna okiokinga i a rātou i te koraha, ko taua okiokinga te raneatanga o tōna korōria.

25 Nō reira, i tango atu ia i a Mohi i tō rātou aroaro, me te Tohungatanga Tapu anō hoki;

26 Ā, ka hono tonu te tohungatanga iti iho, ko taua tohungatanga e mau nei te kī o te minitatanga o ngā anahera me te rongopai whakarite;

27 Ko taua rongopai te rongopai o te rīpenetātanga me te rumaki, me te murunga hara, me te ture o ngā whakahaunga o te kikokiko, i meatia ai e te Ariki i runga i tōna riri kia hono tonu i te whare o Arona i waenganui i ngā tamariki a Iharaira tae noa ki a Hōani, nā te Atua i whakatupu, e kikī ana i te Wairua Tapu i te kōpū o tana whaea.

28 Nā te mea i rumakina ia i a ia tonu i tana taitamarikitanga, ā, i whakamanaia e tētahi anahera a te Atua i te wā kua waru tōna pakeke ki tēnei mana, kia turakina te kīngitanga o ngā Hūrai, me te whakatōtika i te huarahi o te Ariki i te aroaro o te mata o tōna iwi, kia whakaritea ai rātou mō te haerenga mai a te Ariki, kua oti nei te homaingā mana katoa ki tōna ringa.

29 Hei āpiti anō, he whatīanga whai tikanga ngā tūranga o te erata me te pīhopa nō te tohungatanga teitei.

30 Hei āpiti anō, he whatīanga whai tikanga ngā tūranga o te kaiako me te rīkona nō te tohungatanga iti iho, i whakaūngia taua tohungatanga ki runga i a Arona rātou ko āna tama.

31 Nō reira, ka pērā me tāku i mea atu nei e pā ana ki ngā tama a Mohi—nā te mea ka tāpaea e ngā tama a Mohi me ngā tama a Arona hoki tētahi tāpaenga me tētahi whakahere e pai ai i te whare o te Ariki, ka hangaia taua whare mō te Ariki o tēnei whakatipuranga, i runga i te wāhi tapu kua oti nei i a au te kōwhiri—

32 Ā, ka whakakīngia ngā tama a Mohi rāua ko Arona ki te korōria o te Ariki, i runga maunga Hīona i te whare o te Ariki, ko koutou ana tama; me te hunga tokomaha hoki i tonoa atu nei e au ki te hanga ake i taku hāhi.

33 Nā te mea ko ngā tāngata e ū pono ana ki te whiwhi i ēnei tohungatanga e rua kua kōrerotia ake nei e au, me te whakanui i tōna karangatanga, te hunga e whakatapua ai e te Wairua ki te whakahoutanga o ō rātou tīnana.

34 E meinga ana rātou hei tama nā Mohi rāua ko Arona, hei uri o Aperahama, o te hāhi hoki, o te kīngitanga hoki, ā, hei mea kōwhiria e te Atua.

35 Waihoki, ka whiwhi te hunga katoa e whiwhi ai i tēnei tohungatanga i ahau, e ai tā te Ariki;

36 Nā te mea ko te tangata e whiwhi ai i aku pononga e whiwhi hoki i ahau;

37 Ā, ko te tangata e whiwhi ai i ahau e whiwhi hoki i tōku Matua;

38 Ā, ko te tangata e whiwhi ai i tōku Matua e whiwhi hoki i te kīngitanga o tōku Matua; nō reira ka hoatu ngā mea katoa kei tōku Matua ki a ia.

39 E rite ana tēnei ki te oati me te kawenata o te tohungatanga.

40 Nō reira, ko te hunga katoa e whiwhi ai i te tohungatanga, e whiwhi hoki i te oati me te kawenata o tōku Matua, he mea tē taea te whati, tē taea rānei te whakaneke.

41 Engari ko te tangata e whati ai i tēnei kawenata whai muri iho i tana whiwhinga, ā, ka tino tahuri kē atu i tērā, e kore ia e whiwhi i tētahi murunga hara i tēnei ao, i te ao meake puta mai rānei.

42 Ā, auē te mate mō te hunga kāore e haere mai ai ki tēnei tohungatanga kua whiwhi nei koutou, te mea e whakaūngia nei e au ki runga ki a koutou i konei i tēnei rā, he mea nā tōku ake reo i puta ai i ngā rangi; ā, kua tukuna mā ngā mano tini o te rangi me aku anahera hei tiaki i a koutou.

43 Ināianei ā, kei te hoatu e au tētahi whakahaunga ki a koutou kia tūpato ki a koutou anō, kia āta aro ki ngā kupu o te oranga tonutanga.

44 Mā ngā kupu katoa e puaki ana i te māngai o te Atua e ora ai koutou.

45 Nā te mea he pono te kupu a te Ariki, ā, he māramatanga ngā mea pono katoa, ā, he Wairua ngā māramatanga katoa, ko te Wairua pū anō o Ihu Karaiti.

46 Ā, e whakamāramahia ana e te Wairua ngā tāngata katoa e puta mai ana ki te ao; ā, e whakamāramahia atu ana e te Wairua ngā tāngata katoa i roto i te ao, e whakarongo ai ki te reo o te Wairua.

47 Ā, e haere mai ana ngā tāngata katoa e whakarongo ai ki reo o te Wairua, ki te Atua, ko te Matua pū anō.

48 Ā, e whakaakona ana ia e te Matua ki te kawenata nāna nei i whakahou, nāna hoki i whakaū ki runga ki a koutou, kua whakaūngia ki runga ki a koutou hei painga mō koutou, ā, ehara i te mea hei painga mō koutou anake, engari hei painga mō te ao katoa.

49 Ā, e takoto ana te ao katoa i roto i te hara, ā, e auē ana i raro i te pōuritanga, ā, i raro i te hereheretanga o te hara.

50 Ā, mā konei mōhio ai koutou kei raro rātou i te hereheretanga o te hara, nā te mea kāore rātou e haerre mai ai ki ahau.

51 Nā te mea kei raro te hunga e haere mai ai ki ahau i te hereheretanga o te hara.

52 Ā, ko te tangata e kore nei e whiwhi i tōku reo, ā, e kore hoki e mōhio ki tōku reo, ā, ehara ia i a au.

53 Ā, mā konei mōhio ai koutou ki te hunga tika i te hunga kino, ki te ao katoa hoki e auē ana i raro i te hara me te pōuritanga ināianei anō.

54 Ā, kua whakapōuritia ō koutou hinengaro i ngā wā kua hipa nā te whakapono kore, ā, nā tā koutou whakaaro iti ki ngā mea kua whiwhi nei koutou—

55 Nā taua horihori me taua whakapono kore kukume ai i te hāhi katoa ki raro i te whakahēnga.

56 Ā, e tau iho ana tēnei whakahēnga ki runga ki ngā tamariki a Hīona, arā, te katoa pū anō.

57 Ā, ka noho tonu rātou i raro i tēnei whakahēnga kia tae te wā e rīpenetā ai rātou, ā, e maumahara ai hoki ki te kawenata hou, arā, ki te Pukapuka a Moromona me ngā whakahaunga o mua kua hoatu nei e au ki a rātou, ehara i te kōrero noa iho, engari kia meatia e rite ana ki ērā mea kua oti nei i ahau te tuhituhi—

58 Kia whakaputaina ake e rātou he hua rākau e pai ana mō te kīngitanga o tō rātou Matua; ki te kore ka tau tonu tētahi whakawhiunga me tētahi whakawākanga e maringihia iho ai ki runga i ngā tamariki a Hīona.

59 Nā, ka waiho rānei mā ngā tamariki o te kīngitanga hei whakapoke i tōku whenua tapu? He pono tāku e mea atu nei ki a koutou, Kāo.

60 He pono, he pono tāku e mea atu nei ki a koutou e rongo nei i aku kupu, koia tōku reo, kua manaakitia koutou i te mea ka whiwhi koutou i ēnei mea;

61 Nā te mea māku ō koutou hara e muru ki tēnei whakahaunga—kia toka tū moana tonu koutou i roto i ō koutou hinengaro i runga i te whakaaro tika me te wairua inoi, e whakaatu ana ki te ao katoa mō aua mea kua kōrerohia atu nei ki a koutou.

62 Nō reira, haere atu koutou ki te ao katoa; ā, ka tonoa atu e koutou ki ngā wāhi e kore e taea e koutou, kia rere atua i tō koutou whakaaturanga ki te ao katoa, ā, ki ngā mea katoa.

63 Ā, pērā i tāku i mea atu ai ki aku āpōtoro, pērā anō tāku e mea atu nei ki a koutou, nā te mea ko koutou aku āpōtoro, ko ngā pirihi pū anō a te Atua; ko koutou te hunga kua homai nei e tōku Matua ki ahau; ko koutou ōku hoa;

64 Nō reira, pērā i tāku i mea atu nei ki aku āpōtoro ka mea atu anō ki a koutou, nā, ka whiwhi ngā wairua katoa e whakapono ai ki ā koutou kupu, ā, e rumakina ai ki te wai hei murunga hara, ki te Wairua Tapu.

65 Ā, ka whai atu ēnei tonu i te hunga whakapono—

66 Ka meatia e rātou ngā mahi whakamīharo maha i runga i tōku ingoa;

67 Ka peia atu ngā rēwera i runga i tōku ingoa;

68 ka whakaora i ngā tūroro i runga i tōku ingoa;

69 Ka huakina e rātou ngā karu o te hunga kāpō, ā, ka puare ngā tāringa o te hunga turi i runga i tōku ingoa;

70 Ā, ka kōrero ake te arero o te hunga reokore;

71 Ā, e kore rātou e tūkinotia mehemea ka hoatu paitini e tētahi tangata ki a rātou;

72 Ā, e kore rātou e taea e te paitini o te nākahi.

73 Engari kei te hoatu e au tētahi whakahaunga ki a rātou, kia kore ai rātou e whakamanamana i a rātou anō mō ēnei mea, kei kōrerotia rānei ki te ao; nā te mea kua hoatu ēnei mea ki a koutou hei painga, hei whakaoranga mō koutou.

74 He pono, he pono tāku e mea atu nei ki a koutou, ko te hunga e kore nei e whakapono ki ā koutou kupu, ā, e kore hoki e rumakina i runga i tōku ingoa, hei murunga i ō rātou hara, kia whiwhi ai rātou ki te Wairua Tapu, ko rātou te hunga e pāpunihia, ā, kua kore e kuhu mai ki te kīngitanga o tōku Matua kei reira māua ko tōku Matua.

75 Ā, kua kōkirihia atu tēnei whakakitenga ki a koutou, me te whakahaunga, i tēnei haora pū anō ki runga i te ao, ā, mō te hunga katoa te rongopai kāore anō kia whiwhi.

76 Engari, he pono tāku e mea atu nei ki te hunga katoa kua hoatu nei te kīngitanga—mā koutou e kauhau atu ki a rātou, kia rīpenetā ai rātou i ā rātou mahinga kino o mua; nā te mea ka koheteria rawatia rātou mō ō rātou ngākau kino whakapono kore, me ō koutou teina i Hīona mō tā rātou haututū i te wā i tono au i a koe.

77 Hei āpiti anō tāku e mea atu nei ki a koutou, e ōku hoa, nā te mea nō nāianei haere ake nei māku e kī ake ko aku hoa koutou, e tika pū ana kia hoatu e au tēnei whakahaunga ki a koutou, kia meinga koutou kia rite ki aku hoa i ngā rā i whai hoa au, e haere atu ana ki te kauhau i te rongopai i runga i tōku mana;

78 Nā te mea i kīhai au i tuku i a rātou kia whaiwhakaaro ki te kākahu, ki te putea rānei, kaua rānei ki ngā koti e rua.

79 Nana, kei te tono atu au i a koutou kia whakamātauria te ao, me te kaimahi mehemea he mea tika kia utua.

80 Ā, e kore te tangata e haere atu ai ki te kauhau i tēnei rongopai o te kīngitanga, e kore hoki e hemo tana ū i roto i ngā mea katoa, e ngenge te hinengaro, e whakapōuritia rānei, e kore hoki te tīnana, pepeke, pona rānei; e kore hoki tētahi makawe o tōna māhunga e taka noa iho ki te papa hei mea kāore e kitea. Ā, e kore rātou e matekai, e mateinu rānei.

81 Nō reira, kaua e whakaaro nui atu mō te āpōpō, mō tā koutou e kai ai rānei, mō tā koutou rānei e inu ai, mō ngā mea rānei e kākahuria ai koutou.

82 Nā, me whakaaro ki ngā ririhi o te whīra, me pēhea e tipu, e kore nei e mahi, e kore rānei e miro; ā, kāore ngā kīngitanga o te ao, i runga i tō reira korōria, e whakakākahuria kia rite ki tētahi o ēnei.

83 Nā te mea kei te mōhio tō koutou Matua, kei roto nei i te rangi, e hapa ana koutou i ēnei mea katoa.

84 Nō reira, tukua mā te āpōpō hei whakaaro nui mō ōna ake mea.

85 Kaua rānei koutou e whakaaro nui i mua me aha tā koutou e kōrero ai; engari purangahia ake i ō koutou hinengaro ngā kupu o te ora i ngā wā katoa, ā, ka hoatu ki a koutou i tēnā haora, i tēnā hāora taua wāhi e tika ana mō ia tangata, ia tangata.

86 Nō reira, kaua e tukua tētahi tangata i waenganui i a koutou, nā te mea ki hunga pono katoa tēnei whakahaunga kua karangatia ake nei e te Ariki i roto i te hāhi ki te minitatanga, nō tēnei hāora haria he pūtea, he kākahu rānei, te mea e haere atu ai ki te kauhau i tēnei rongopai o te kīngitanga.

87 Nana, kei te tono atu au i a koutou ki te kohete i te ao mō ā rātou mahi kino, me te whakaako i a rātou mō tētahi whakawākanga e puta mai ai.

88 Ā, ko te tangata e whiwhi ai i a koutou, kei reira hoki au, nā te mea ka haere atu au i mua i tō koutou mata. Kei tō ringa katau me tō ringa mauī, ā, kei roto tōku Wairua i ō koutou ngākau, ā, e karapotia ana e aku anahera, hei hāpai ake i a koutou.

89 Ko te tangata e whiwhi i a koutou, e whiwhi hoki i ahau; ā, mā ngā mea pērā koutou e whāngai, e whakakākahu, ā, e tuku pūtea.

90 Ā, ko te tangata e whāngai i a koutou, e whakakākahu rānei i a koutou, e tuku pūtea rānei ki a koutou, e kore rawa e ngaro tana utu.

91 Ā, ehara te tangata e kore nei e mahi i ēnei mea i te apataki nōku; mā konei koutou mōhio ai ki aku apataki.

92 Ko te tangata e kore nei e whiwhi i a koutou, me haere atu koutou i a ia, ā, me horoi ō koutou waewae ki te wai, te wai māori, ahakoa i te wera, i te makariri rānei, ā, me tuku whakaaturanga mō taua mea ki te Matua kei roto nei i te rangi, ā, me kaua e hoki atu anō ki taua tangata.

93 Ā, me pēnā anō i ngā papakāinga, pā rānei e kuhu ai koutou.

94 Hei aha koa, kimihia kahatia, ā, kaua e ruarua; ā, auē te mate mō taua whare, mō taua papakāinga rānei, mō taua pā rānei e whakaparahako nei i a koutou, i ā koutou kupu rānei, i tā koutou whakaaturanga rānei e pā ana ki ahau.

95 Ko tāku anō, auē te mate mō taua whare, mō taua papakāinga rānei, pā rānei e whakaparahako nei i a koutou, i ā koutou kupu rānei, i tō koutou whakaaturanga mōku rānei;

96 Nāku, nā te Mea Kaha Rawa, ōku ringaringa i pā iho ai ki runga ki ngā iwi katoa, hei whakawhiu i a rātou mō ō rātou whakarihariha.

97 Ā, ka horapa atu ngā mate urutā, ā, e kore ērā e tangohia atu i te whenua kia mutu rā anō i ahau aku mahi, e poroa potohia i runga i te tika—

98 Kia mōhio rā anō te katoa ki ahau, te hunga e toe ana, arā, mai i te hunga manakore ki te hunga mananui, ā, ka whakakīngia ki te mātauranga a te Ariki, ā, ka kitea kanohi ki te kanohi, ā, ka hīkina ake tō rātou reo, ā, ka waiata ngātahi i runga i te reo kotahi i tēnei waiata hou, e mea ana:

99 Kua whakahokia mai anō a Hīona e te Ariki;Kua hokona e te Ariki tana iwi, a Iharaira,E rite ana ki te kōwhiringa o tōna aroha,I pahawa ake ai i te whakaponoMe te kawenata o ō rātou tūpuna.

100 Kua hokona e te Ariki tana iwi;Kua mauheretia a Hātana, ā, kua memehā hoki te taima.Kua whakakaoa e te Ariki ngā mea katoa kia kotahi.Kua kumea iho a Hīona e te Ariki mai i runga.Kua kumea ake a Hīona e te Ariki mai i raro.

101 Kua haere te ao, ā, kua kumea mai tōna kaha;Ā, kua whakapūmauhia te pono ki ōna whēkau;Ā, kua menemene ihongā rangi ki runga ki a ia;Ā, kua kākahuria ia ki te korōria o te Atua;Nā, kei te tū ia ki waenganui i tana iwi.

102 Ko te korōria, me te hōnore, me te mana, me te kaha,E whakahāngaitia ki tō tātou Atua; nā te mea kua kī ia i te whakaaroha,te tika, te aroha kau me te pono, me te rangimnārie,Mō āke tonu atu, Āmine.

103 Hei āpiti anō, he pono, he pono tāku e mea atu nei ki a koutou, e tika pū ana kia kauhau atu ngā tāngata katoa e haere atu ai i taku rongopai, ki te mea he whānau ō rātou, me ka takoha pūtea mai, kia tukua atu e rātou ki a rātou, kia meatia rānei hei painga mō rātou, e pērā ana i tā te Ariki tohutohu i a rātou, he pai hoki tēnei ki ahau.

104 Ā, tukua ērā hunga katoa kāore ō rātou whānau, e whiwhi moni ana, kia tukuna atu ki te pīhopa i Hīona, ki te pīhopa rānei i Ohaio, kia whakatapua mō te whakaputanga mai o ngā whakakitenga me tōna tānga, mō te whakapūmautanga hoki o Hīona.

105 Ā, ki te hoatu e tētahi tangata he koti ki a koutou, he hutu rānei, tikina te mea tawhito kātahi ka makaia atu ki te hunga rawakore, ā, me haere i tō haere i runga i te koa.

106 Ā, mehemea he tangata i waenganui i a koutou e kaha ana i runga i te Wairua, tukua ia kia haria me ia ērā mea e ngoikore ana, kia whakamāramahia katoatia ia i runga i te māhaki, kia meinga ia hei mea kaha anō hoki.

107 Nō reira, haria atu e koutou te hunga kua whakamanaia ki te tohungatanga iti iho, ā, tonoa atu rātou ki mua i a koutou hei whakarite hui, hei whakapai hoki i te huarahi, me te whakakī i ngā hui kāore e taea e koutou te whakakī.

108 Nana, koinei te huarahi i hangaia ake ai taku hāhi ki ahau, i ngā rā onamata, e aku āpōtoro.

109 Nō reira, tukua ia tangata, ia tangata kia tū ai i tōna ake tūranga, ā, kia mahi i tōna ake karangatanga; ā, kaua e tukua te māhunga kia kī ake ai ki ngā waewae; nā te mea me i kore ngā waewae kua pēhea te tīnana e tū ake ai?

110 E whai tikanga ana anō hoki te tīnana ki ngā kōpeke katoa, kia whakamāramahia ngātahitia te katoa, kia pupuri tonu tēnei āhuatanga hei mea tika rawa atu.

111 Ā nana, me haere ngā pirihi teitei, me ngā erata anō hoki, me ngā pirihi iti iho anō hoki; engari, me whakataua ngā rīkona me ngā kaiako hei tiaki i te hāhi, hei kaiminita mō te hāhi.

112 Ā, me haere anō hoki te pīhopa, a Nuera K. Witini, huri noa ki waenganui i ngā hāhi katoa, e kimi ana i te hunga rawakore kia minita atu ki ō rātou hiahia mā runga i te whakaiti i te hunga whairawa me te hunga whakapehapeha.

113 Me rapu anō tētahi kaiwhakarite hei whakahaere, ā, hei mahi i āna ake mahi kia rite ki tāna e tohutohu ai.

114 Hei aha koa, tukua te pīhopa kia haere atu ki te pā o Niu Ioka, ki te pā hoki o Arapani, ki te pā hoki o Pahitana, ki te whakatūpato i te iwi kei aua wāhi ki te tangi o te rongopai, i runga i te reo kaha, mō te whakangaromanga me te whakakāhoretanga katoatanga e tatari ana mō te hunga e whakaparahako i ēnei mea.

115 Nā te mea ki te whakaparahako rātou i ēnei mea kua tata mai te hāora o te whakawākanga, ā, ka mahue iho tō rātou whare kia takoto kau mō rātou.

116 Tukua ia kia whakawhirinaki mai nei ki ahau, ā, kua kore ia e whakapōauautia; ā, kua kore tētahi makawe o tōna māhunga e taka iho hei mea kite kore.

117 Ā, he pono tāku e mea atu nei ki a koutou, e aku pononga e toe mai ana, haere atu kia rite ki ngā mea e taea ana, i roto i ō momo karangatanga, ki ngā pā me ngā papakāinga nui e whaimana ana, e kohetea ana te ao i runga i te tika mō ō rātou hē me ā rātou meatanga atuakore, e whakatakotoria mārama ana te whakangaromanga me te mōrikarika i ngā rā whakamutunga.

118 Nā, e ai tā te Ariki Kaha Rawa me koutou, māku ō rātou kīngitanga e whawhati; ehara i te mea ka whakangāueuetia e au te whenua, engari ka tūoioitia ngā rangi whetū.

119 Nāku, nā te Ariki, tōku ringai toro atu kia whakamahi i ngā mana o te rangi; tē taea e koutou te kite ināianei, heoi tāria te wā ka kite koutou, ā, ka mōhio ko au anō, ā, ka haere mai ahau, ā, ka kīngi tahi me tōku iwi.

120 Ko au te Arepa me te Omeka, te tīmatanga me te whakamutunga. Āmine.