1 Whakarongo, E koutou ngā tāngata o taku hāhi, te hunga kua hoatu nei te kīngitanga ki a rātou; whakarongo mai kia whai taringa mai ki te mea nāna te tūāpapa o te ao i whakatakoto, nāna hoki ngā rangi me ngā mea katoa kei roto, ā, nāna hoki ngā mea katoa e ora ana, e nuku ana, e whai tīnana ana.

2 Ā, kei te kī anō ahau, whakarongo mai ki tōku reo, kei taea koutou e te mate; i tētahi hāora e whakaaro ai koutou kāore anō kia pahemo atu te raumati, ā, ka mutu hoki te kotinga, ā, kāore e whakaorangia ō koutou wairua.

3 Whakarongo ki a ia ko ia te kaiwawao ki te Matua, e totohe ana mō koutou ki tōna aroaro—

4 E mea ana: E te Matua, tirohia ngā mamaetanga me ngā mate o te mea kāore ōna hara, ko ia te mea i āhuareka nei koe; tirohia te toto o tāu tama i whakahekea iho ai, te toto o te mea nāu nei ia i homai kia whakakorōriatia koe.

5 Nā reira, e te Matua, tohua ēnei aku teina e whakapono nei i tōku ingoa, kia haere mai ai rātou ki ahau kia whai oranga tonutanga.

6 Whakarongo mai, E koutou te iwi o taku hāhi, ā, kia whakarongo tahi koutou e ngā erata, ā, kia rongo ai i tōku reo i te rā e karangatia ana ko te rā nei, ā, kaua e whakapakeke i ō koutou ngākau;

7 Nā te mea he pono tāku e mea atu nei ki a koutou ko au te Arepa me te Omeka, te tīmatanga me te whakamutunga, te māramatanga me te oranga o te ao—he māramatanga e tīaho ana i te pōuritanga, ā, kāore e mātau ana te pōuritanga.

8 I haere mai ki ōku ake, ā, kāore ōku ake i whiwhi i ahau; engari i hoatu e au he mana ki te hunga katoa i whiwhi i ahau kia mahi merekara, ā, kia meinga he tama nā te Atua; ā, i hoatu anō e au he mana ki te hunga pū anō i whakapono ai ki tōku ingoa kia rapu i te oranga tonutanga.

9 Ā, ahakoa tērā kua tonoa atu e au taku kawenata mau tonu ki te ao, kia tū ai hei māramatanga ki te ao, ā, hei kara ki taku iwi, ā, hei whainga mā ngā Tauiwi, ā, hei karere i mua i tōku mata kia whakaritea te huarahi i mua i ahau.

10 Nā reira, haere mai koutou ki a ia, ā, ka whakarite au ki te tangata e haere mai ana kia rite ki ngā tangata onamata, ā, ka whakakite atu au ki a koutou aku whakaritenga kaha.

11 Nā reira, whakarongo tahi mai koutou, ā, tukua au kia whakakite atu ki a koe tōku mātauranga—te mātauranga o te mea e kīa ana e koutou ko te Atua o Enoka rātou ko ana teina,

12 I whakawehea atu ai i te ao, ā, i whakawhiwhia ki ahau anō—he pā i rāhuitia kia puta mai ai te rā o te tika—he rā i whāia atu ai e ngā tangata tapu katoa, ā, kāore i kitea nei e rātou nā te whakarihariha me ngā mōrikarika;

13 Ā, i whakaae mai he tauhou, ā, he manene rātou i runga i te whenua;

14 Engari i whiwhi rātou i tētahi kupu whakaari e mea ana ka rapua, ā, ka kitea e rātou i te kikokiko.

15 Nā reira, whakarongo mai kātahi ka whakarite tahi tātou, ā, ka kōrero atu au ki a koutou, ā, ka poropiti, kia rite ki ngā tangata i ngā rā onamata.

16 Ā, ka mārama rawa taku whakaatu atu i taua mea kia rite ki taku whakaatu atu ki aku apataki i a au e tū ana i mua i a rātou i te kikokiko, ā, i kōrero atu ki a rātou, e mea ana: I te mea kua uia mai au e pā ana ki ngā tohu o taku haerenga mai, hei te rā e haere mai ai au i runga i tōku korōria i roto i ngā kapua o te rangi, kia whakatutuki i ngā whakaari i meatia nei e au ki ō koutou tūpuna,

17 Nā te mea kua titiro iho koutou ki runga i te tamōtanga roa o ō koutou wairua i ō koutou tīnana hei mea hereheretanga, māku koutou e whakaatu atu me pēhea e puta mai ai te rā o te hokonga, me te whakahokinga mai anō o Iharaira e noho marara ana.

18 Ināianei ā, kei te kite atu koutou i tēnei temepara kei roto nei i Hiruharama, e karangahia ana e koutou ko te whare o te Atua, ā, e mea ana ō koutou hoariri e kore rawa tēnei whare e hinga.

19 Engari, he pono tāku e mea atu nei ki a koutou, ka tau iho mai te whakangaromanga ki runga i tēnei whakatipuranga anō nei he kaiwhānako i te pō, ā, ka whakangaromia, ā, ka whakamararatia atu tēnei iwi ki waenganui i ngā iwi katoa.

20 Ā, ka whakahoroa iho tēnei temepara e kitea nei e koutou ināianei, nā, kāore e mahue iho te kohatu kotahi ki runga i tētahi atu.

21 Ā, ka pahawa ake, nā, e kore tēnei whakatipuranga e pahemo atu kia pahawa ake ngā whakangaromanga katoa kua kōrerotia atu e au ki a koutou e pā ana ki a rātou.

22 E kī ana koutou, nā, kei te haere mai te whakamutunga o te ao; e kī ana anō hoki koutou e mōhio ana koutou ka pahemo atu ngā rangi me te whenua;

23 Ā, e pono ana tā koutou kōrero i tēnei, nā te mea e pēnei ana; engari e kore ēnei mea kua kōrerotia atu nei e au ki a koutou e pahemo atu kia tutuki ai ngā mea katoa.

24 Ā, kua kōrero atu au i tēnei ki a koutou e pā ana ki Hiruharama; ā, ina puta mai taua rā, ka whakamararatia atu he mōrehu ki waenganui i ngā iwi katoa;

25 Engari ka whakahuihuitia mai anō; engari ka noho tonu rātou tae noa atu ki te whakatutukitanga i ngā wā o ngā Tauiwi.

26 Ā, ka rangona i aua rā ngā pakanga me ngā rongo pakanga, ā, ka noho tūmatatenga hoki te ao katoa, ā, ka hē ngā ngākau o te tangata, ā, ka mea rātou kei te whakaroa atu te Karaiti i tana haerenga mai tae noa ki te whakamutunga o te ao.

27 Ā, ka mātoke haere te aroha o te tangata, ā, ka horapa haere te kino.

28 Ā, ina tae mai ngā wā o ngā Tauiwi, ka whatia iho mai tētahi māramatanga ki roto i a rātou e noho ana i te pōuritanga, ā, koia nei hoki te raneatanga o te rongopai;

29 Engari e whakawhiwhia nei e rātou; nā te mea kāore rātou e mātau ki te māramatanga, ā, ka tahuritia atu ō rātou ngākau i ahau he mea nā ngā whakaaro o te tangata.

30 Ā, ka whakatutukihia ngā wā o ngā Tauiwi i taua whakatipuranga.

31 Ā, ka ai he tangata e tū ana i taua whakatipuranga, e kore nei e pahemo atu kia kite rā anō i ngā whiu nui; nā te mea ka kapia te whenua e tētahi mate urutā.

32 Engari ka tū aku apataki i ngā wāhi tapu, ā, e kore e nukuhia; engari kei roto i te hunga kino, ka hīkina ake e ngā tangata ō rātou reo kia kangaia te Atua, ā, ka mate.

33 Ā, ka ai he rūnga whenua anō hoki i ngā momo wāhi, ā, he maha ngā whakangaromanga; heoi ka whakapakeke te tangata i ō rātou ngākau ki ahau, ā, ka hāpai ake rātou i te hoari, tētahi ki tētahi, ā, ka whakamate tētahi i tētahi atu.

34 Ināianei ā, i tāku, i tā te Ariki kōrerotanga atu i ēnei kupu ki aku apataki, ka raru rātou.

35 Ā, i kī atu au ki a rātou: Kaua e raru, nā te mea, ina pahawa ake ēnei mea katoa, ka mōhio koutou, nā, ka tutukihia ngā whakaari kua whakaaria mai nei ki a koutou.

36 Ā, ina whatia iho mai te tākiritanga o te māramatanga, ka pērā ki a rātou kia rite ki tētahi pakitairite e whakaatu atu nei au ki a koutou—

37 Kei te titiro koutou, ā, kei te kite koutou i ngā rākau piki, ā, kei te kite koutou i ēnā ki ō koutou karu, ā, ka kī ake koutou ina tīmata te pihi ake, ā, he ngāwari tonu ōna rau, nā, kua tae mai te raumati;

38 Koia anō ka pērā anō i taua rā ina kite rātou i ngā mea katoa, kātahi rātou ka mōhio kua tae mai te hāora.

39 Ā, ka pahawa ake, nā, ka mataara atu te tangata e wehi ana i ahau ki te rā nui e haere mai ai te Ariki, ki ngā tohu pū anō o te haerenga mai o te Tama a te Tangata.

40 Ā, ka kite rātou i ngā tohu me ngā mea whakamāharo, i te mea ka whakaatuhia atu i ngā rangi i runga, i te whenua hoki i raro.

41 Ā, ka kite rātou i te toto, me te ahi, me ngā kohu paoa.

42 Ā, i mua i te putanga mai o te rā e haere mai ai te Ariki, ka whakapōuritia te rā, ā, ka whakatotoa te marama, ā, ka taka iho ngā whetū i te rangi.

43 Ā, ka whakahuihuia ngā mōrehu ki tēnei wāhi;

44 Kātahi rātou ka mataara mai ki ahau, ā, nana, ka haere mai au; ā, ka kite rātou i ahau i roto i ngā kapua o te rangi, e whakakākahuria ana ki te mana me te korōria nui; me ngā anahera tapu katoa; ā, ka hātepea atu te tangata e kore nei e mataara mai ki ahau.

45 Engari i mua i te takanga iho i te ringa o te Ariki, ka whakatangi tētahi anahera i tana tetere, ā, ka haere mai ngā hunga tapu e moe ana kia tūtaki ki ahau i te kapua.

46 Nā reira, kua manaakitia koutou mehemea kua moe koutou i te rangimārie; nā te mea ka rite ki tā koutou kite nei i ahau, ā, e mōhio ana kei te ora au, koia anō ka haere mai koutou ki ahau, ā, ka ora ō koutou wairua, ā, ka whakatikaina rawatia ake tō koutou hokonga; ā, ka puta mai te hunga tapu i ngā tōpito e whā o te ao.

47 Hei reira taka iho ai te ringa o te Ariki ki runga i ngā iwi katoa.

48 Kātahi te Ariki ka tū i tana waewae ki runga i tēnei maunga, ā, ka pakaru iho ki waenganui, ā, ka tūoioi te whenua, ka hūrorirori, ā, ka ngāueue anō hoki ngā rangi.

49 Ā, ka puaki te Ariki i tana reo, ā, ka rongo ngā tōpito katoa o te ao; ā, ka tangi ngā iwi o te ao, ā, ka kite te hunga i katakata ai kia kite ai i tō rātou heahea.

50 Ā, ka huaki tata mai te mate ki te hunga whakatoi, ā, ka tahuna te hunga whakahāwea; ā, ka heua iho te hunga mataara ki te hē, ā, ka makaia ki roto i te ahi.

51 Kātahi ka titiro mai ngā Hūrai ki ahau me te kī ake: He aha ēnei tūnga i ōu ringaringa me ōu waewae?

52 Kātahi rātou ka mōhio ko au te Ariki; nā te mea ka kī ake au ki a rātou: Koinei ngā tūnga i taotūngia ai au i te whare o ōku hoa. Ko au anō tērā i whakairia ake ai. Ko au a Ihu te mea i rīpekatia ai. Ko au te Tama a te Atua.

53 Kātahi ka tangi rātou mō ō rātou hara; kātahi rātou ka auē mō rātou i tūkino i tō rātou kīngi.

54 Kātahi ka hokona ngā iwi Atua kore, ā, ka whai wāhi atu te hunga ture kore i te aranga tuatahi; ā, ka taea e rātou tērā te pīkau.

55 Ā, ka mauheretia a Hātana, kia kore ai ia e whai wāhi atu ki roto i ngā ngākau o ngā tamariki a te tangata.

56 Ā, hei taua rā, ina haere mai au i runga i tōku korōria, e tutuki ai te pakitairite i kōrerotia ai e au e pā ana ki ngā puhi tekau.

57 Nā te mea ko te hunga matatau kua whiwhi nei i te pono, ā, kua mau hoki ki te Wairua Tapu hei kaiārahi mō rātou, ā, kīhai hoki i tinihangatia—he pono tāku e mea atu nei ki a koutou, e kore rātou e heua iho, e makaia rānei ki roto i te ahi, engari ka noho mai hei taua rā.

58 Ā, ka tukua atu te whenua ki a rātou hei whenua tuku iho mō rātou; ā, ka whakatokomahatia rātou, ā, ka pakari haere, ā, ka tupu ake ā rātou tamariki i runga i te hara kore ki te whakaoranga.

59 Nā te mea ka noho tata mai te Ariki i waenganui i a rātou, ā, ka tau iho tana korōria ki runga ki a rātou, ā, māna hoki hei kīngi, hei kaituku ture mō rātou.

60 Ināianei ā, nana, ko taku kupu tēnei ki a koutou, e kore e hoatu ki a koutou kia nui atu tā koutou mōhio e pā ana ki tēnei upoko, kia whakapākehātia mai nei te Kawenata Hou, ā, ka whakamōhiotia ēnei mea katoa i roto rā;

61 Nā reira kei te hoatu e au ki a koutou he mana kia whakapākehātia tēnā ināianei, kia takatū koutou mō ngā mea e puta mai ai.

62 Nā, he pono tāku e mea atu nei ki a koutou, e tāria ana ngā mea nunui mō koutou;

63 E rongo ana koutou i ngā pakanga ki whenua kē; engari, nana, ko taku kupu tēnei ki a koutou, kei konei ērā, kei ō koutou kuaha pū anō, ā, kāore e roa atu ngā tau e rongo ai koutou i ngā pakanga i ō koutou ake whenua.

64 Nā reira au, te Ariki, i mea ai, puta mai koutou i ngā whenua o te rāwhiti, whakahuihui koutou i a koutou anō, e ngā erata o taku hāhi; haere atu rā koutou ki roto ki ngā whenua ki te uru, karangahia ake ōna tāngata kia rīpenetā, kia hangaia ake ngā hāhi ki ahau.

65 Ā, whakaemiemia ā koutou taonga i runga i te manawa kotahi me te whakaaro kotahi kia hokona ai tētahi wāhi mō koutou meake tukuna atu ai ki a koutou nō muri atu.

66 Ā, ka karangahia ake ko Hiruharama Hou, he whenua rangimārie, he pā whakaruruhau, he wāhi haumaru mō te hunga tapu a te Atua Runga Rawa;

67 Ā, kei reira hoki te korōria o te Ariki, ā, kei reira hoki te whakamataku o te Ariki, nā konā e kore nei te hunga whakarihariha e haere mai ai ki a ia, ā, ka karangahia ake ko Hīona.

68 Ā, ka pahawa ake i waenganui i te hunga whakarihariha, kia tahuti atu ia tangata e kore nei e hāpai ake i tana hoari ki tana kiritata ki a Hīona hei haumarutanga mōna.

69 Ā, i reira whakahuihuitia atu ngā mea mai i ngā iwi katoa i raro i te rangi; ā, koia hoki te iwi anake kāore e pakanga atu ana tētahi ki tētahi atu.

70 Ā, ka kōrerohia ake i waenganui i te hunga whakarihariha: Me kaua tātou e haere ake ki te pakanga ki a Hīona, nā te mea he whakamataku ngā tangata o Hīona; nā reira tē taea e tātou te tū atu.

71 Ā, ka pahawa ake, nā, ka whakahuihuia te hunga tika mai i ngā iwi katoa, ā, ka haere mai ki Hīona, e waiata ana i ngā waiata o te hari mau tonu.

72 Ināianei ā, ko taku kupu tēnei ki a koutou, puritia ēnei mea kei puta atu ki te ao kia tae mai te wā e tika ana i roto i ahau, kia whakatutuki i ēnei mahi i ngā karu o te iwi, i roto i ngā karu hoki o ō hoariri, kia kaua rātou e mōhio ki āu mahinga kia tutuki rā anō te mea kua whakahaua koutou e ahau;

73 Kia tae rawa te wā e mōhio ai rātou ki taua mea, nā, kia whakaarohia ake ēnei mea.

74 Nā, ka whakamataku te Ariki ina puta mai ia ki a rātou, kia mau rātou i te wehi, ā, ka tū mamao atu rātou, ā, ka wiriwiri.

75 Ā, ka mataku ngā iwi katoa he mea nā te whakamataku o te Ariki, nā tōna kaha anō hoki. Koia anō. Āmine.