Wāhanga 67
He whakakitenga mā roto i a Hōhepa Mete te Poropiti, ki Hairama, Ohaio, i te tīmatatanga o Noema 1831. Ko te mea nei he huinga motuhake, me te whakaputanga ake o ngā whakakitenga kua whiwhi kē nei i te Ariki mā roto i a Hōhepa Mete, ā, ka whakaarohia, ā, ka meatia (tirohia te kowae upoko ki wāhanga 1). Kātahi anō a Wiremu W. Wherapa ka whakapūmau i te Tari Tā o te Hāhi ki Inipenetana, Mītori. I whakataungia e te huinga kia whakaputaina ake ngā whakakitenga i roto i te Book of Commandments (Pukapuka o ngā Whakahaunga) me te tā i ngā kape 10,000 (heoi, nā ngā uauatanga kīhai i kitea ka whakawhāitihia iho i muri iho kia 3,000 ngā kape). I whakaatu atu ngā teina tokomaha mō te pono o aua whakakitenga i kohikohia mai nei hei whakaputanga atu, he pērā i tā te mana o te Wairua Tapu i riringi iho ki runga ki a rātou. E ai tā te Hītori o Hōhepa Mete, nā, i puta ake ētahi kōrero e pā ana ki te reo i whakamahia i roto i aua whakakitenga whai muri iho i te whiwhinga o taua whakakitenga e mōhio ana ko wāhanga 1. Ka puta ake tēnei whakakitenga nō muri iho.
1–3, Ka rongo te Ariki i ngā inoi o ngā erata, ā, ka mataara ia ki runga i a rātou; 4–9, Ka wero atu ia ki te tangata matatau rawa atu kia mahi tuaruatia tētahi o Āna whakakitenga; 10–14, Ka whakahihikongia ngā erata pono e te Wairua, ā, ka kitea te mata o te Atua.
1 Nana, whakarongo mai, E koutou e ngā erata o taku hāhi, kua huihui tahi i a koutou anō, kua rangona ā koutou inoi, kua mōhio au ki ō koutou ngākau, ā, kua puta mai ō koutou hiahia ki tōku aroaro.
2 Nana, ā, titiro, kei runga aku karu i a koutou, ā, kei roto ngā rangi me te whenua i ōku ringaringa, ā, nōku ngā taonga mau tonu hei hoatu.
3 I whakamātau koutou ki te whakapono, nā, me whiwhi ki te manaakitanga i tāpaea atu ki a koutou; engari nana, he pono tāku e mea atu nei ki a koutou, i reira ētahi wehinga i ō koutou ngākau, ā, he pono koinei te take kīhai koutou i whiwhi.
4 Ināianei ahau, te Ariki, e hoatu ki a koutou tētahi whakaaturanga pono mō ēnei whakahaunga e takoto ana i mua i a koutou.
5 Kei runga ō koutou karu i taku pononga a Hōhepa Mete, Tama., ā, kua mōhio koutou ki tana reo, ā, kua mōhio koutou ki ōna hē; ā, kua whai atu koutou i roto i ō koutou ngākau he mātauranga kia taea ai e koutou te whakamārama ake i tua atu i tōna reo; kua mōhio anō koutou ki tēnei.
6 Nā, kimihia i te Pukapuka o ngā Whakahaunga, ko te mea iti rawa i reira, kātahi ka tohua te mea matatau rawa kei waenganui i a koutou;
7 Mehemea rānei, kei waenganui i a koutou tētahi e taea te mahi tētahi kia rite ki taua mea, kātahi ka tika tā koutou kī, nā, kāore koutou e mōhio ana ki te pono o aua mea;
8 Engari mehemea kāore e taea ana e koutou te hanga tētahi e rite ana ki taua mea, kei raro iho koutou i te whakahēnga ki te kore koutou e whakaatu ake ki te pono o aua mea.
9 Nā te mea kei te mōhio koutou kāore he kino i roto rā, ā, e ahu mai ana ngā mea tika i runga, mai i te Matua o ngā rama.
10 Hei āpiti anō, he pono tāku e mea atu nei ki a koutou, nā, he tikanga nōu tērā, ā, kei te hoatu whakaari ki a koutou ngā mea kua whakamanaia ki tana minitatanga, nā, ki te mea ka tīhore iho i a koutou anō i ngā pūhaehae me ngā wehi, me te whakaiti i a koutou anō i tōku aroaro, nā te mea ehara koutou i te whakaiti rawa, ka tīhaehaetia te ārai, ā, ka kite koutou i ahau me te mōhio ko au tērā—ehara mā te hinengaro kikokiko, hinengaro māori rānei, engari ki te mea wairua.
11 Nā te mea kāore anō tētahi tangata kia kite ake i te Atua i te kikokiko, hāunga kua whakahihikongia e te Wairua o te Atua.
12 Kāore e taea ana rānei e tētahi tangata noa te noho i te aroaro o te Atua, kāore rānei i runga i te hinengaro kikokiko.
13 Kāore e taea ana e koutou te noho iho i te aroaro o te Atua ināianei, i te minitatanga o ngā anahera rānei; nā reira, me hono tonu tā koutou i runga i te manawanui kia whakatikaina rawatia ake koutou.
14 Kaua e tukua ō koutou hinengaro kia huri whakamuri; ā, ina tika koutou, i tōku ake anō wā, ka kite, ā, ka mōhio koutou ki aua mea kua whakataua iho ki a koutou e ngā ringaringa o taku pononga a Hōhepa Mete, Tama. Āmine.