1 He pono tāku e mea atu nei ki a koutou e pā ana ki ō koutou teina kua whakamamaetia, ā, kua whakatoingia, ā, kua makaia atu i tō rātou whenua tuku iho—

2 Nāku, nā te Ariki, i tuku kia tau iho te whakamamaetanga ki runga ki a rātou, kua whakamamaetia rātou hei utu mō ā rātou haututū;

3 Heoi māku rātou, ā, māku anō rātou hei taua rā e haere mai ai au ki te kohikohi i aku kairangi.

4 Nō reira, e tika pū ana anō kia kohetea, ā, kia whakamātauria rātou, pērā pū i a Aperahama, te mea i whakahaua kia tāpaea atu tana tama huatahi.

5 Nā te mea ko te hunga katoa e kore nei e ū i roto i taku kohetetanga, engari ka whakakorea au, tē taea te whakatapu.

6 Nana, ko taku kupu tēnei ki a koutou, i reira ngā puku kōrero, ngā tautohetohenga, ngā pūhaehae, ā, ngā totohe, ā, ngā hiahia karihika me ngā hiahia harawene i roto i a rātou; nō reira nā ēnei mea pokea ai ō rātou taonga tuku iho.

7 I pūhoi rātou ki te whakarongo mai ki te reo o te Ariki tō rātou Atua; nō reira, he pūhoi tō rātou Ariki tō rātou Atua ki te whakarongo atu ki ā rātou inoi, ki te whakautu i a rātou i te rā o ō rātou raruraru.

8 I te rā o te rangimārie he iti noa iho tā rātou mahara mai ki ahau; engari, i te rā e raruraru nei rātou, kātahi ka mahara mai rātou ki ahau.

9 He pono tāku e mea atu nei ki a koutou, hei aha koa ō rātou hara, kua kī katoa taku ate i te aroha ki a rātou. E kore rātou e tino makaia atu e au; ā, hei te rā o te riri ka mahara au ki te whakaaro.

10 Kua oati ahau, ā, kua rere atu taku whakapuakitanga he mea nā tētahi whakahaunga o mua kua hoatu nei e au ki a koutou, pēnei ka tukuna atu e au kia taka iho te hoari o taku riri he mea mō tōku iwi; ā, pērā i tāku i kī ai, ka pahawa ake.

11 Meake ka maringihia iho taku riri mehua kore ki runga i ngā iwi katoa; ā, ka pēnei au ina kikī rawa te kapu o tō rātou kino.

12 Ā, hei taua rā ko te hunga katoa e kitea ai i runga i te pourewa mataara, kia pēnei kē te kupu, ka whakaorangia ōku katoa o Iharaira.

13 Ā, ka whakahuia te hunga katoa kua whakamararatia atu.

14 Ā, ka whakaāiotia te hunga katoa i tangi ai.

15 Ā, ka karaunatia te hunga katoa i tukuna atu ō rātou oranga mō tōku ingoa.

16 Nō reira, tukuna ō koutou ngākau kia whakaāiotia e pā ana ki a Hīona; nā te mea kei ōku ringaringa ngā kikokiko katoa; kia tau, ā, me mōhio ko au te Atua.

17 E kore a Hīona e whakanekea atu i tōna tūranga, hei aha koa kua whakamararatia atu ana tamariki.

18 Ka hoki atu te hunga e mahue mai, me te hunga ngākau urutapu, ā, ka haere mai ki ō rātou taonga tuku iho, ka hangaia e rātou me ā rātou tamariki ngā wāhi ururua o Hīona i runga i te waiata hari mutunga kore—

19 Ā, koinei mea katoa e whakatutukia ai ngā poropiti.

20 Ā, nana, kāore he wāhi anō kua whakataua atu i taua mea kua whakataua e au; e kore rānei e whakataua tētahi atu wāhi atu i taua mea kua whakataua e au, mō te mahi whakahuihui i aku hunga tapu—

21 Tae noa atu ki te rā e kitea ai kāore e whaiwāhi ana mō rātou; ka mutu, kei a au anō ētahi wāhi e whakatauhia atu ai e au mō rātou, ā, ka karangatia ērā he pou, mō ngā ārai, mō te kaha rānei o Hīona.

22 Nana, koia tāku e pai ai, nā, me huitahi te hunga katoa e karanga ake ana i tōku ingoa, me te koropiko ki ahau e rite ana ki taku rongopai mau tonu, ā, kia tū ai i ngā wāhi tapu;

23 Me te whakarite mō te whakakitenga meake puta mai, ina tangohia atu te ārai e uhi ana i taku temepara, i roto i taku tapenakara, e hunaia ana te ao, kātahi ka kitea ngātahitia ahau e te kikokiko katoa.

24 Ā, ka whakangaromia atu ngā mea poke katoa, tangata mai, kararehe mai rānei o te whenua, manu mai rānei o te rangi, ika mai rānei o te moana, ngā mea katoa e noho mai ana i runga i te mata katoa o te whenua;

25 Waihoki, ka rewa ngā pūtaketake o te whenua ki te wera whakaharahara; ā, ka meinga houtia ngā mea katoa, kia noho iho ai taku mātauranga me taku korōria i runga i te ao katoa.

26 Ā, i taua rā ka whakakorea atu te hoariri o te tangata, me te hoariri o ngā kararehe, āe rā, te hoariri o te kikokiko katoa, i mua i tōku mata.

27 Ā, i taua rā ahakoa he aha tā tētahi tangata e inoi mai ai, ka hoatu ki a ia.

28 Ā, i taua rā kāore a Hātana e whaikaha ki te whakawai i tētahi tangata.

29 Ā, kāore he pōuritanga, i te mea kāore he matenga.

30 I taua rā e kore te tamaiti nohinohi e mate kia kaumātua rā anō ia; ā, ka rite tōna oranga ki te pakeketanga o tētahi rākau;

31 Ā, e kore ia e moe ina mate ia, arā, kāore i roto i te whenua, engari ka panonitia i te kimonga karu, ā, ka whakamaua ake, ā, ka whaikorōria tana okiokinga.

32 Āe rā, he pono tāku e mea atu nei ki a koutou, i taua rā ina haere mai ai te Ariki, māna ngā mea katoa e hura—

33 Ngā mea kua pahemo atu, me ngā mea kua hunaia kīhai te tangata i mōhio, ngā mea o te whenua, ko tōna hanganga, ā, tōna take me tōna mutunga i reira—

34 Ngā mea utu nui rawa, ngā mea kei runga rawa, me te mea kei raro rawa, ngā mea kei roto i te whenua, kei runga i te whenua hoki, kei roto i te rangi hoki.

35 Ā, ko te hunga katoa e whakamamaetia mō tōku ingoa te take, me te ū i runga i te whakapono, ahakoa kua karangatia kia whakatakotoria iho ō rātou oranga mōku te take, heoi, ka whiwhi rātou ki tēnei korōria katoa.

36 Nā reira, kaua e wehi tae noa atu ki te mate; nā te mea kāore anō kia kī tō hari i tēnei ao, engari kua kī tō hari i roto i ahau.

37 Nō reira, kaua e whaiwhakaaro atu ki te tīnana, ki te oranga rānei o te tīnana; engari me whaiwhakaaro mō te wairua, me te oranga o te wairua.

38 Ā, rapua te mata o te Ariki i ngā wā katoa, kia riro ai i a koutou ō koutou wairua i runga i te manawanui, kātahi ka whiwhi ki te oranga tonutanga.

39 Ina karangatia ake te tangata ki taku rongopai mau tonu, ā, ka kawenata ki tētahi kawenata mau tonu, ka rite rātou ki te tote o te whenua, ā, hei hā mō te tangata;

40 Kua karangatia rātou hei hā o te tangata; nō reira, ki te ngaro atu i taua tote o te whenua tōna hā, nana, kāore tō reira painga hāunga rā kia makaia atu, kia takatakahia iho e ngā waewae o te tangata.

41 Nana, anei te mātauranga e pā ana ki ngā tamariki a Hīona, he tokomaha pū anō, engari kāore te katoa; kua kitea rātou e haututū ana nō reira e tika pū ana kia kohetea rātou—

42 Ka whakaitia te tangata e whakanui i a ia anō, ā, ka whakanuia te tangata e whakaiti i a ia anō.

43 Ināianei ā, kei te whakaatu atu au ki a koutou tētahi pakitairite, e mōhio ai koutou ki tāku e pai ai e pā ana ki te hokonga o Hīona.

44 Tērā tētahi ariki he whenua tōna, he mea pai rawa; kātahi ka kī atu ia ki ana pononga: Haere atu koutou ki roto ki taku māra wāina, ki runga pū anō i tēnei whenua pai rawa, kātahi ka whakatōkia ngā rākau oriwa tekau mā rua;

45 Ā, ka whakatūria he kaitiaki taiawhio noa i a rātou, ā, ka hangaia ake tētahi pourewa mataara, e titiro atu tētahi ki te whenua huri noa, hei kaitiaki i runga i te pourewa, kia kore ai ngā rākau oriwa e whatia iho ina haere mai ai te hoariri ki te whakakino, ā, kia tiki ake rātou i ngā hua o tōku māra wāina.

46 Nā, ka haere ngā pononga o te ariki ki te mahi i tāna i whakahaua ai rātou, ā, ka whakatōkia ngā rākau oriwa, ā, ka mahia tētahi whakaruru huri noa, ā, ka whakatūria he kaitiaki, kātahi ka tīmata te hanga i te pourewa.

47 Ā, i a rātou e whakatakotohia ana tō reira tūāpapa, ka tīmata tā rātou kōrerorero i waenganui i a rātou anō: He aha rā e hiahia ai taku ariki ki tēnei pourewa?

48 Ā, ka roa tā rātou whakawhitiwhiti kōrero, e mea ana i waenganui i a rātou anō: He aha rā e hiahia ai taku ariki ki tēnei pourewa, i te mea he wā rangimārie tēnei?

49 Kauaka rānei tēnei moni e hoatu ki ngā kaiwhakawhitiwhiti? Nā te mea kāore he tikanga mō ēnei mea.

50 Ā, i a rātou e taupatupatu ana tētahi me tētahi ka māngere haere rātou, ā, kīhai rātou i whakarongo ki ngā whakahaunga a tō rātou Ariki.

51 Ā, ka haere pō mai te hoariri, ā, ka tuakina te whakaruru; ā, ka maranga ake ngā pononga a te ariki, ā, ka mataku rātou, ā, ka tahuti atu; ā, ka whakangaromia ā rātou mahinga e te hoariri, ā, ka whatiwhatia iho ngā rākau oriwa.

52 Nana ināianei, ka karangatia e te ariki, arā, e te ariki o te māra wāina, ana pononga, kātahi ka kī atu ki a rātou, He aha ai! he aha te pūtake o tēnei kino nui?

53 Kua kore rānei koutou i meatia tāku i whakahau ai ki a koutou, ā—whai muri iho i tā koutou whakatō i te māra wāina, me tā koutou mahi i te whakaruru taiāwhio noa, me te whakatū kaitiaki ki runga i ngā taiapa i reira—me te hanga anō hoki i te pourewa me te whakatū i tētahi kaitiaki ki runga i te pourewa, ā, ki te mataara i taku māra wāina, kia kaua e warea e te moe kei whakaekea koutou e te hoariri?

54 Ā nana, me i pēneitia kua ngāwari te titiro atu a te kaitiaki pourewa ki te hoariri e tawhiti tonu ana; kātahi ka taea te whakarite, te kaupare atu i te hoariri kei turakina iho e rātou te whakaruru i reira, me te tiaki i taku māra wāina i ngā ringaringa o te kaiwhakangaro.

55 Ā, i kī atu te ariki o te māra wāina ki tētahi o ana pononga: Haere ki te whakahuihui i te toenga atu o aku pononga, ā, kawea atu te kaha katoa o taku whare, koia ko aku toa, aku taitamatāne, nā, ko te hunga anō hoki kāore anō kia tino kaumātua i waenganui i aku pononga, koia nei te kaha o tōku whare, hāunga te hunga anake nāku noa i whakatau kia noho mai;

56 Ā, me haere tōtika atu koutou ki te whenua o taku māra wāina, ā, me hoko taku māra wāina; nā te mea nāku; Nāku i hoko ki te moni.

57 Nō reira, haere tōtika atu koutou ki taku whenua; turakina iho ngā pakitara o aku hoariri; turakina iho tō rātou pourewa, ā, whakamararatia atu ō rātou kaitiaki.

58 Ā, ki te mea ka whakahuihui tahi rātou ki a koutou, rapua he utu mōku i ōku hoariri, kia taea ākuanei e ahau me te toenga atu o tōku whare ki te whakanoho i te whenua.

59 Kātahi ka kī atu te pononga ki tana ariki: Hei āhea ēnei mea e puta ai?

60 Kātahi ka kī atu ia ki tana pononga: Hei tāku e pai ai; haere tōtika atu koutou, ā, meatia ngā mea katoa kua whakahaua koutou e ahau;

61 Ā, ko taku hīritanga tēnei, ā, hei manaakitanga ki a koutou—he kaitiaki pono, he kaitiaki matatau i te aroaro o tōku whare, he kaiwhakahaere i tōku kīngitanga.

62 Kātahi ka haere tōtika atu tēnei pononga, ā, ka meatia ngā mea katoa i whakahaua ia e tōna ariki; ā, ka pau ngā rā maha, kua tutuki ngā mea katoa.

63 Anō, he pono tāku e mea atu nei ki a koutou, māku e whakaatu atu te mātauranga i roto nei i ahau e pā ana ki ngā hāhi katoa, ki te mea rā ka hiahia rātou kia ārahina i runga i te huarahi tika mō tō rātou whakaoranga—

64 Kia hono tonu atu te whakahuihuinga i aku hunga tapu, kia whakatupuria ake rātou ki tōku ingoa i runga i ngā wāhi tapu; nā te mea kua tae mai te wā o te kotinga, ā, e tika pū ana kia whakatutukia taku kupu.

65 Nō reira, me whakahuihui e au taku iwi, e rite ana ki te pakitairite e pā ana ki te wīti me ngā taru, kia purua iho ngā wīti ki roto ki ngā pātaka e whiwhi ai ki te oranga tonutanga, ā, kia karaunatia ki te korōria Tikitiki-o-Rangi, ina tomo atu au ki roto ki te kīngitanga o tōku Matua ki te utu i ngā tāngata katoa e rite ana ki ā rātou mahi;

66 Nā, ka paiheretia ngā taru, ā, ka meatia ngā here hei mea kaha, kia tahuna rātou ki te ahi kā tonu.

67 Nō reira, ka hoatu e au tētahi whakahaunga ki ngā hāhi katoa, kia hono tonu tā rātou whakahuihui ki ngā wāhi kua whakataua e ahau.

68 Hei aha koa, pērā i tāku i kī atu nei ki a koutou i tētahi whakahaunga o mua, kaua e tuku kia kaikā rawa tā koutou whakahuihuitanga, kia kaua rānei e tere; engari tukua kia whakaritea noatia ngā mea katoa i mua i a koutou.

69 Ā, kia tika te whakarite i ngā mea katoa i mua i a koutou, kia aro atu ki te whakahau i hoatu nei e au e pā ana ki ēnei mea—

70 E mea ana, e whakaako ana rānei, ki te hoko i ngā whenua katoa ki te moni, ngā mea e āhei ana te hoko ki te moni, i te takiwā huri noa i te whenua kua whakataua e au hei whenua mō Hīona, mō te tīmatanga o te huihuinga o aku hunga tapu;

71 Ngā whenua katoa e taea ai te hoko i te Takiwā o Tiakimana, me ngā takiwā huri noa, kātahi ka mahue te toenga ki tōku ringa.

72 Ināianei, he pono tāku e mea atu nei ki a koutou, tukua ngā hāhi katoa kia whakaemia ā rātou moni, tukua kia meatia ēnei mea i tōna ake wā, engari kia kaua e kaikā; ā, kia aro atu ki te whakariterite i ngā mea katoa i mua i a koutou.

73 Ā, tukua kia whakataua ngā tangata hōnore, ngā tangata matatau pū anō, ā, tonoa atu rātou ki te hoko i ēnei whenua.

74 Ā, ko ngā hāhi i ngā whenua whakaterāwhiti, ina whakatupuria ake rātou, ki te aro mai ki tēnei tohutohu ka taea hoki e rātou te hoko whenua me te whakahuihui tahi ki runga i aua whenua; ā, pēnei rātou ka whakapūmau i a Hīona.

75 Kua nui kē i te pātaka, āe rā, kua ranea, hei hoko i a Hīona, me te whakapūmau i ōna wāhi ururua, kia kaua tonu e makaia iho ki raro, mehemea ka pai ngā hāhi, ngā mea e karangatia rātou anō ki tōku ingoa, ki te whakarongo mai ki tōku reo.

76 Hei āpiti anō, ko taku kupu tēnei ki a koutou, te hunga kua whakamararatia atu e ō rātou hoariri, ko tāku e pai ai kia tono tonu atu rātou kia whakatikaina ngā nawe, kia hokona, e ngā ringaringa o te hunga kua whakanohoia hei kaiwhakahaere, ā, te hunga whaimana i runga i a koutou—

77 E rite ana ki ngā ture me te pukapuka tikanga whakahaere o te iwi, kua tukuna e au kia whakapūmauhia, ā, me tiaki mō ngā tika, mō te tiakanga o ngā kikokiko katoa, e rite ana ki ngā tikanga e pono ana, e tapu ana;

78 Kia mahi ai tēnā tangata me tēnā tangata i runga i te whakaakoranga me te tikanga e pā ana ki te anamata, e rite ana ki te mana kōwhiringa tika kua hoatu nei e au ki a ia, kia utua tēnā tangata mō ōna ake hara hei te rā whakawā.

79 Nō reira, kāore e tika ana kia noho herehere tētahi tangata ki tētahi atu.

80 Ā, koinei te take i whakapūmauhia ai e au te Pukapuka Tikanga Whakahaere o tēnei whenua, he mea nā ngā ringaringa o ngā tangata nāku nei i whakatupu ake mō tēnei take pū anō, ā, i hokona te whenua mā runga i te whakaheke toto.

81 Nā, me whakataurite au i ngā tamariki a Hīona ki te aha? Ka whakatauritea rātou e au ki te pakitairite o te wahine rāua ko te kaiwhakawā tinihanga, nā te mea e tika ana kia inoi ake te tangata i ngā wā katoa, ā, kia kaua e hemo, e pēnei ana te kī—

82 Tērā tētahi kaiwhakawā i tētahi pā, kāore ōna wehi ki te Atua, ki te tangata rānei.

83 Ā, i reira tētahi pouaru i taua pā, ā, ka haere atu ia ki a ia, e mea ana: Rapua te utu mōku i taku hoariri.

84 Ā, kāore ia i whakaae mō tētahi wā, engari nō muri iho ka kī ake ia ki a ia anō: Ahakoa kāore ōku wehi ki te Atua, ōku whaiwhakaaro rānei ki te tangata, heoi, nā te mea kua raru au i tēnei pouaru, ka rapua e au te utu mōna, kei pau taku hau i tana kaha haere mai ki ahau.

85 Pēnei taku whakataurite i ngā tamariki a Hīona.

86 Tukua rātou kia tono ki ngā waewae o te kaiwhakawā;

87 Ā, ki te kore ia e aro atu ki a rātou, tukua rātou kia tono atu ki ngā waewae o te kāwana;

88 Ā, ki te kore te kāwana e aro atu ki a rātou, tukua rātou kia tono ki ngā waewae o te tumuaki;

89 Ā, ki te kore te tumuaki e aro ki a rātou, kātahi te Ariki ka maranga, ā, ka puta mai i tana wāhi huna, ā, ka whiua te iwi i runga i tōna riri;

90 Ā, i runga i tana whaiere wera, me tana riri nanakia, i tōna ake wā, ka hātepea atu te hunga whakarihariha, te hunga haututū, ngā kaitiaki kino, kātahi ka whakatau tō rātou wāhi i waenganui i te hunga arero rua, me te hunga whakapono kore;

91 Kei roto pū anō i te pō ki tua, kei reira te tangihanga, me te auētanga, me te tetētanga o ngā niho.

92 Nō reira me inoi koutou, kia puare ai ō rātou tāringa ki ā koutou tangi, kia whai aroha atu au ki a rātou, kia kaua ēnei mea e tau iho ki runga ki a rātou.

93 E tika pū ana kia ai tāku i mea atu nei ki a koutou, kia waiho rā anō ngā tāngata katoa i runga i te takunga kore;

94 Kia rongo ai ngā ruānuku me ngā kaiwhakahaere, ā, ka mōhio ki ērā mea kāore anō kia whakaarohia e rātou;

95 Kia tīmata atu taku whakapahawatanga i taku mahi, taku mahi whano kē, me te mahi i taku mahi, taku mahi whano kē, e mōhio ai te tangata ki te tika me te kino, e ai tā tō koutou Atua.

96 Hei āpiti anō, ko taku kupu tēnei ki a koutou, he mea tauaro ki taku whakahaunga me tāku e pai ai kia hokona atu taku pātaka e taku pononga a Hirini Rikitana, kua whakataua nei ki taku iwi, ki roto ki ngā ringaringa o ōku hoariri.

97 Kaua e tukua ērā mea kua whakataua nei e au kia whakakinotia e aku hoariri, i runga i te whakaaetanga o te hunga e karangatia rātou anō ki taku ingoa;

98 Nā te mea he hara tino mamae, ā, tino pōuri ki ahau, ā, ki tōku iwi hoki, hei utu mō aua mea kua whakapuakina atu e au, ā, ngā mea meake taka iho ki runga ki ngā iwi.

99 Nō reira, ko tāku e pai ai kia tono atu taku iwi, ā, kia whiwhi hoki i te mana mō ērā mea kua whakataua nei e au ki a rātou, ahakoa e kore rātou e whakaaehia kia noho ki reira.

100 Hei aha koa, kāore au i te kī e kore rātou e noho i reira; nā te mea ki te whakaputa mai i a rātou he hua, ā, he mahi e tika ana mō tōku kīngitanga ka noho rātou ki reira.

101 Ka hanga rātou, ā, kua kore tētahi atu e noho ki reira; ka whakatō māra wāina rātou, ā, ka kai rātou i te hua i reira. Koia anō. Āmine.