Wāhanga 31
He whakakitenga mā roto i a Hōhepa Mete te Poropiti ki a Tāmati P. Māhi, Hepetema 1830. I heipū ake tēnei nō muri rawa mai i tētahi huihuinga whānui o te Hāhi (tirohia te kōwae upoko o te wāhanga 30). I rumakina a Tāmati P. Māhi i te tīmatanga o taua marama, ā, kua whakamanangia hei erata i roto i te Hāhi i mua i te homaitanga o tēnei whakakitenga.
1–6, Ka karangatia a Tāmati P. Māhi ki te kauhau i te rongopai, ā, ka tiakina tōna whānau; 7–13, Ka tohua ia kia manawanui, kia inoi i ngā wā katoa, me te whai atu i te Kaiwhakaāio.
1 E Tāmati, e taku tama, kua manaakitia koe he mea nā tō whakapono ki roto i taku mahi.
2 Nana, he maha ō mamaetanga nā tō whānau; hei aha koa, māku koutou ko tō whānau e manaaki, āe rā, āu mea nohinohi; ā, e tata mai ana te rā e whakapono ai rātou, ā, e mōhio ai rātou ki te pono, ā, ka piritahi ki a koe i roto i taku hāhi.
3 Hīkina ake tō ngākau, ā, kia hari, nā te mea kua tae mai te haora o tō mīhana; ā, ka wetekina tō arero, ā, māu e whakapuaki i ngā rongo whakahari o te koa nui ki tēnei whakatipuranga.
4 Māu e whakapuaki ngā mea kua whakakitea mai nei ki taku pononga, a Hōhepa Mete, Tama. Ka tīmata koe ki te kauhau i tēnei wā tonu haere ake nei, āe rā, kia kokoti ai i te māra kua mā, kua rite mō te tahunga.
5 Nō reira, kia whakapaua tōu wairua katoa ki te āki iho i tō toronaihi, ā, ka murua ōu hara, ā, ka utaina ngā paihere ki runga i tōu tuarā, nā te mea e tika ana kia riro i te kaimahi tōna utu. Nā reira ka ora tō whānau.
6 Nana, he pono tāku e mea atu nei ki a koe, me haere atu i a rātou mō tētahi wā poto noa iho ki te whakapuaki i taku kupu, ā, māku tētahi wāhi e whakarite mō rātou.
7 Āe rā, māku ngā ngākau o te iwi e whakatūwhera, ā, ka whiwhi rātou i a koe. Ā, ka whakapūmau ahau i tētahi hāhi i tō ringa;
8 Ā, māu rātou e whakakaha, ā, ka whakaritea rātou mō te wā e kohikohia ngātahitia rātou.
9 Kia manawanui koe i roto i ngā whakamamaetanga, kaua e taunu ki te hunga taunu. Whakahaerehia tō whare i runga i te māhaki, ā, kia ū.
10 Nana, ko taku kupu tēnei ki a koe, nā, ka tū koe hei rata mō te hāhi, engari kaua mō te ao, nā te mea e kore rātou e whiwhi i a koe.
11 Haere i tō ara ki ngā wāhi katoa e pai ai ahau, kātahi ka tukuna ki a koe e te Kaiwhakaāio me aha koe, ā, me haere rānei koe ki hea.
12 Kia hono tonu te inoi, kei kuhu atu ki roto i te whakawainga kātahi ka ngaro tō utu momoho.
13 Kia ū koe tae noa ki te mutunga, ā nana, kei tō taha Ahau. Ehara nō te tangata ēnei kupu, nō ngā tāngata rānei, engari nāku, nā Ihu Karaiti pū anō, tō Kaihoko, i runga i te hiahia o te Matua. Āmine.