Wāhanga 97
He whakakitenga mā roto i a Hōhepa Mete te Poropiti, ki Katarana, Ohaio, Akuhata 2, 1833. E hāngai atu ana tēnei whakakitenga ake ki ngā āhuatanga o te Hunga Tapu i Hīona, Takiwā o Tiakimana, Mītori, hei whakautu i tā te Poropiti inoi atu ki te Ariki mō ētahi kōrero. I te kaha whakatoingia ngā mema o te Hāhi e noho ana ki Mītori i tēnei wā, ā, i te 23 o Hūrae, 1833, i meinga rātou kia haina tētahi whakaaetanga kia wehe atu ai rātou i te Takiwā o Tiakimana.
1–2, Ka manaakitia ngā Hunga Tapu tokomaha i Hīona (Takiwā o Tiakimana, Mītori) mō tā rātou ū; 3–5, Ka mihia a Pāri P. Parata mō ana mahi i te kura i Hīona; 6–9, Ka whakawhiwhia te hunga e pupuri nei i ō rātou kawenata e te Ariki; 10–17, Ka hangaia ake tētahi whare tapu i Hīona i reira kitea ai e te hunga ngākau urutapu te Atua; 18–21, Ko Hīona te hunga ngākau urutapu; 22–28, Ka mawhiti atu a Hīona i tā te Ariki whakawhiunga ki te ū ia ki te pono.
1 He pono tāku e mea atu nei ki a koutou e ōku hoa, kei te kōrero atu au ki a koutou ki tōku reo, ko te reo pū anō o taku Wairua, e taea ai e au te whakakite atu ki a koutou tāku e pai ai e pā ana ki ō koutou tuākana i te whenua o Hīona, he ngākau pāpaku anō te tokomaha o rātou, ā, e rapu mārire ana i te mātauranga, me te pono.
2 He pono, he pono tāku e mea atu nei ki a koutou, kua manaakitia te hunga pērā, nā te mea ka mau i a rātou; nā te mea ko ahau, ko te Ariki, e tuku aroha atu ana ki te hunga māhaki katoa, me te hunga katoa e pai ai ki ahau, kia tika tāku ina tōia mai ai rātou ki te whakawākanga.
3 Nana, ko taku kupu tēnei ki a koutou, e pā ana ki te kura i Hīona, kei te tino koa ahau, te Ariki, kia hangaia ake tētahi kura i Hīona, ki taku pononga anō hoki a Pāri P. Parata, nā te mea e piri mai ana ia i roto i ahau.
4 Ā, ki te mea ka hono tonu tana piri mai i roto i ahau ka hono tonu tana whakahaere i runga i te kura i te whenua o Hīona kia hoatu ai e au ētahi atu whakahaunga ki a ia.
5 Ā, māku ia e manaaki ki ngā manaakitanga maha, i te whakamāramatanga atu i ngā karaipiture me ngā mea ngaro hei ako i te kura, ā, i te hāhi hoki i Hīona.
6 Ā, ko te toenga atu o te kura, e pai ana ki ahau, ki te Ariki te tuku aroha; hei aha koa, kei reira tonu ētahi e tika pū ana kia kohetea, ā, ka whakamōhiotia atu ā rātou mahinga.
7 Kua huapae iho te toki i te pakiaka o ngā rākau; ā, ka heua iho ngā rākau katoa e kore nei e whakaputa i a ia he hua pai, ā, ka makaia ki roto ki te ahi. Nāku, nā te Ariki tēnei i kōrero.
8 He pono tāku e mea atu nei ki a koutou, ka whakawhiwhia e au–te hunga katoa e mōhio nei ki ō rātou ngākau, ā, e marū ana, ā, he wairua iro anō ō rātou, ā, e hiahia ana ki te pupuri i ō rātou kawenata i runga i te whakahere–āe rā, ko ngā whakaherenga katoa e whakahaua ai e au, e te Ariki.
9 Nā te mea, ka mea au, te Ariki, kia whakaputa mai i aua mea anō nei he rākau whaihua kua whakatōkia ki te whenua pai, i te taha o tētahi manga waimāori, e puta ana i ngā hua ātaahua.
10 He pono tāku e mea atu nei ki a koutou, nā, ko tāku e pai ai kia hangaia ake tētahi whare ki ahau i te whenua o Hīona, e rite ana ki te tauira kua hoatu nei e au ki a koutou.
11 Āe rā, tukua kia hohoro, mā te whakatekau a taku iwi.
12 Nana, koinei te whakatekau me te whakahere e hiahia ana au, te Ariki, i ō rātou ringaringa, kia hangaia ake ai tētahi whare ki ahau mō te whakaoranga o Hīona–
13 Hei wāhi whakawhetai mō te hunga tapu katoa, ā, hei wāhi e tohutohungia ai te hunga katoa e karangatia nei ki ngā mahi o te minitatanga i roto i ō rātou karangatanga maha me ō rātou tūranga maha;
14 Kia whakatikaina rawatia ake i runga i te māramatanga ki tā rātou minitatanga, i roto i te whakaaro, i te tikanga, me te whakaakoranga, i ngā mea katoa e pā ana ki te kīngitanga o te Atua i runga i te whenua, ko ngā kī o taua kīngitanga kua whakataua nei ki runga ki a koutou.
15 Ā, ki te mea ka hanga taku iwi i tētahi whare ki ahau i runga i te ingoa o te Ariki, ā, e kore e tuku i tētahi mea poke kia tomo ai ki roto rā, kia kaua e whakapokea, ka tau iho taku korōria ki runga rā;
16 Āe rā, kei reira taku mauri, nā te mea ka kuhu atu au ki reira, ā, ka kite te hunga ngākau urutapu katoa i te Atua.
17 Engari ki te whakapokea kua kore au e kuhu atu ki roto rā, ā, e kore hoki i reira tōku mauri; nā te mea e kore au e haere ki ngā temepara tapukore.
18 Ināianei, ā, nana, ki te mahi a Hīona i ēnei mea ka kake haere ia, ā, ka horapa i a ia anō, ā, ka meinga hei mea whai korōria, hei mea nui, ā, hei mea weriweri.
19 Ā, ka whakahōnoretia ia e ngā iwi o te ao, ā, ka kī atu: Kāore e kore ko Hīona te pā o te Atua, ā, kāore e kore kua kore rawa a Hīona e hinga iho, e kore rānei e whakanekea atu i tōna tūranga, nā te mea kei reira te Atua, ā, kei reira hoki te ringa o te Ariki;
20 Ā, kua oati ia i runga i te mana o tōna kaha kia tū ai hei whakaoranga mōna, ā, hei pourewa teitei mōna.
21 Nō reira, he pono, pēnei tā te Ariki, tukua a Hīona kia hari, nā te mea ko Hīona tēnei—te hunga ngākau urutapu; nō reira, tukua a Hīona kia hari, i te hunga whakarihariha katoa e tangi.
22 Nana rā, titiro, e hohoro mai ana te utu ki runga i te hunga atuakore anō nei he hau āwhiowhio; ā, ko wai e mawhiti atu?
23 Ka tōhipa atu te whakawhiunga a te Ariki i te pō, i te awatea hoki, ā, ka whakawehi taua pūrongo rā i ngā tāngata katoa; āe rā, e kore nei e puritia kia tae mai ai te Ariki;
24 Nā te mea kua mura te riri o te Ariki ki ō rātou mōrikarika me ā rātou mahi whakarihariha katoa.
25 Hei aha koa, ka mawhiti atu a Hīona mēnā rānei ka ū ia ki te mahi i ngā mea katoa e whakahaua nei ia e ahau.
26 Engari ki te kore ia e ū ki te mahi i ngā mea katoa nāku nei ia i whakahau, ka toro atu au e rite ana ki ana mahi katoa, ki te whiunga mamae, ki te urutā, ki te hōari, ki te ngakinga mate, ki te ahi horohoro.
27 Hei aha koa, tukua kia pānuitia i tēnei wā kotahi ki ōna tāringa, kua whakawhiwhia e au, e te Ariki tana tāpaetanga; ā, ki te kore ia e hara atu anō e kore ēnei mea e tau ai ki runga ki a ia;
28 Ā, māku ia e manaaki ki ngā manaakitanga, ā, ka whakarea ngā manaakitanga maha ki runga ki a ia, ki runga hoki i ana whakatipuranga mō āke tonu atu, e ai tā te Ariki tō koutou Atua. Āmine.