Wāhanga 34
He whakakitenga mā roto i a Hōhepa Mete te Poropiti ki a Orihana Parata, ki Wheiete, Niu Ioka, Noema 4, 1830. Kua tekau mā iwa tau te pakeke o teina Parata i taua wā. I whakatahuritia ia, ā, i rumakina i te wā tuatahi i rangona ai ngā kauhautanga o tana tuakana a Pāri P. Parata i te rongopai i ngā wiki e ono i mua. I whakawhiwhia tēnei whakakitenga i te kāinga o Pita Witima Matua.
1–4, Ka meinga te hunga whakapono hei tama nā te Atua mā roto i te Whakamārietanga; 5–9, Ka whakarite te kauhautanga i te rongopai i te huarahi mō te Haerenga Tuaruatanga Mai; 10–12, Ka puta te poropititanga i runga i te mana o te Wairua Tapu.
1 E taku tama, e Orihana, me whakarongo mai kia rongo ai, ā, kia kite ai i tāku, tā te Ariki te Atua, e kī atu ai ki a koe, āe rā, tā Ihu Karaiti tō Kaihoko;
2 Te māramatanga me te oranga o te ao, he mārama e tiaho ana i roto i te pōuritanga, ā, tē mātauria e te pōuritanga;
3 Ko ia anō tērā i aroha nui ki te ao nā konā homai ai tōna ake oranga, kia meinga te hunga katoa e whakapono ai hei tama nā te Atua. Nā reira ko koe taku tama;
4 Ā, kua manaakitia koe mōu i whakapono mai;
5 Ā, ka hira ake tō manaakitanga i te mea kua karangatia koe e ahau ki te kauhau i taku rongopai—
6 Kia hikina ake tō reo me te mea nei he tētere, kia nui, kia roa hoki, ki te karanga ake ki tētahi iwi hakoke, ki tētahi iwi parori kē, e whakarite ana i te huarahi o te Ariki mō tana haerenga tuaruatanga mai.
7 Nana rā, he pono, he pono tāku e mea atu nei ki a koe, meake tata mai te wā e puta mai au i roto i tētahi kapua i runga i te mana me te korōria nui.
8 Ā, he rā nui whakaharahara te wā o taku haerenga mai, nā te mea ka tūoioi ngā iwi katoa.
9 Engari i mua i te taenga mai o taua rā nui, ka pōuritia te rā, ā, ka hurihia te āhua o te marama kia rite ki te toto; e kore hoki ngā whetū e tiaho mai, ā, ka taka ētahi, ā, he nui ngā whakangaromanga e tatari ana mō te hunga kino.
10 Nā reira, kia hīkina ake tō reo, ā, kia kaua e ārai kupu, nā te mea kua kōrerotia nei e te Ariki te Atua; nō reira poropititia, kātahi ka tukuna e te mana o te Wairua Tapu.
11 Ā, ki te ū koe ki te pono, nana, kei tō taha au tae noa ki taku haerenga mai—
12 Ā, he pono, he pono tāku e mea atu nei ki a koe, ka hohoro taku haerenga mai. Ko au tō Ariki me tōu Kaihoko. Koia anō. Āmine.