Wāhanga 71
He whakakitenga i hoatu ai ki a Hōhepa Mete te Poropiti rāua ko Hirini Rikitana, ki Hairama, Ohaio, Tihema 1, 1831. I te hono tonu tā te Poropiti whakapākehātanga i te Paipera, ā, ko Hirini Rikitana te kaituhi tae noa ki te whiwhinga ki tēnei whakakitenga, i taua wā anō i whakatahangia mō te wā poto kia taea ai e rāua te whakatutuki i ngā tohutohu i hoatu nei. Te tikanga ia me haere atu ngā teina ki te kauhau atu kia mauru ai ngā whakaaro kino i hua ake ai ki te Hāhi he mea nā te whakaputanga ake o ngā reta i tuhia ai e Etera Puta, te mea i whakaparahakongia te rongopai.
1–4, Ka tonoa atu a Hōhepa Mete rāua ko Hirini Rikitana ki te whakapuaki i te rongopai; 5–11, Ka whakapōauautia ngā hoariri o te Hunga Tapu.
1 Nana, pēnei tā te Ariki ki a kōrua e aku pononga e Hōhepa Mete, Tama., me Hirini Rikitana, nā, kua tae mai te wā e tika ana, ā, e tika pū ana i roto i ahau kia puaki kōrua i ō kōrua māngai ki te whakapuaki atu i taku rongopai, ngā mea o te kīngitanga, e whakamāramahia atu ana ngā mea ngaro o reira mai i ngā karaipiture, e rite ana ki taua wāhi o te Wairua me te mana e hoatu ai ki a kōrua, pērā pū anō ki tāku e pai ai.
2 He pono tāku e mea atu nei ki a kōrua, e whakapuaki atu ana ki te ao i roto i ngā rohe huri noa, i roto hoki i te hāhi, mō tētahi wā tae noa atu ki te wā e whakamōhiotia atu ai ki a kōrua.
3 He pono koinei tētahi mīhana mō tētahi wā, e hoatu ai ki a kōrua.
4 Nā reira, me mahi kōrua i taku māra wāina. Karangatia atu ki ngā tāngata katoa o te whenua, ā, me whakaatu, ā, whakaritea te huarahi mō ngā whakahaunga me ngā whakakitenga e puta mai ai.
5 Nana, koinei te mātauranga; ko te tangata e pānui ai, tukua ia kia mārama ai, ā, kia whiwhi ai;
6 Nā te mea ka nui atu te hoatutanga ki te tangata e whiwhi, āe rā he mana.
7 Nā reira, whakapōauautia ōu hoariri; karangatia atu rātou kia tūtaki ki a kōrua i mua, i muri hoki i te tirohanga kanohi; ā, i te mea ka pono kōrua ka kitea tō rātou whakamā.
8 Nā reira, tukua rātou kia kawea mai ā rātou take ki te Ariki.
9 He pono, pēnei tā te Ariki ki a kōrua—kāore e wikitōria i reira tētahi patu kua hangaia nei ki te whakamate i a kōrua;
10 Ā, ki te hiki ake tētahi tangata i tana reo ki a kōrua, nā, ka whakapōauautia i tōku ake wā.
11 Nā reira, puritia aku whakahaunga; he hē kore, ā, he pono ēnā. Koia anō. Āmine.