1. He pono e ai ta te Ariki ki a koe e taku pononga e Hohepa, i te mea kua hiahiatia e koe tetani mea i toku ringa, kia mohio me te marama ki taku, ta te Ariki i whakaae ai ki a aku pononga, ki a Aperahama, ki a Ihaka, ki a Hakopa, pera ano hoki ki a Mohi, ki a Rawiri me Horomona, aku pononga, mo te taha ki te tikanga i maha ai a ratou wahine me nga wahine iti.

2. Nana ! ko ahau te Ariki, tou Atua, a ka whakautu ki a koe mo te taha ki tenei take:

3. No reira kia takatu tou ngakau, kia whiwhi, kia ngohengohe hoki ki nga tohutohu tera e hoatu e ahau ki a koe; no te mea ko nga tangata kua whakakitea tenei ture ki a ratou me ngohengohe ki taua ture;

4. No te mea, nana! ka whakakitea atu e ahau ki a koe, he kawenata hou mau tonu; a ki te kahore koe e u i roto i taua kawenata, ka whakahengia koe; no te mea kahore kia kotahi e kaha ki te whakakahore i tenei kawenata me te whakaaetia kia tomo atu ki toku kororia;

5. No te mea ko te hunga katoa e whiwhi ki nga manaakitanga i oku ringaringa, me whakarite te ture i whakaritea mo taua manaakitanga, me o reira tikanga i whakaritea i mua noa atu i te hanganga o te ao:

6. A mo te taha ki te kawenata hou mau tonu, he mea whakarite tera mo te raneatanga o toku kororia; a ko ia e whiwhi ana i to reira raneatanga me u ki te ture, ki te kore ka whakahengia ia, e ai ta te Ariki, ta te Atua.

7. A he pono taku e mea atu nei ki a koe, ko nga ahuatanga enei o tenei ture:—Ko nga kawenata katoa, ko nga ohaki, ko nga here, ko nga nama (obligations), nga oati, nga whakariteritenga, nga piringa atu, nga nohoanga tahitanga, me nga noho tatari, ki te kore e meatia, e hiiritia ranei he mea na te Wairua Tapu o te kupu whakaari ona kua whakawahia nei, mo tenei wa, mo ake tonu atu, a he tino tapu tera, he mea na te whakakitenga me te whakahaunga ma roto i te takawaenga o taku i whakawahi ai, o taku i tu tohu ai i runga i te whenua hei pupuri i tenei mana, (a kua whakaritea taku pononga a Hohepa he kai pupuri i tenei mana i roto i nga ra mutunga, a kahore tetahi atu, engari kotahi anake i runga i te whenua i te wa kotahi, kei runga i a ia tenei mana me nga kii o tenei Tohungatanga). kua kore e whai hua, e tapu, e kaha, i muri i te whakaarahanga ake i te mate; no te mea ko nga ohaki katoa kahore e meatia i runga i tenei tikanga, ka mutu tonu i te wa e mate ai nga tangata.

8. Nana ! ko taku whare he whare no te tika e ai ta te Ariki, ta te Atua, e hara i te whare no nga whakararuraru.

9. E manako ranei au ki tetahi patunga tapu, e ai ta te Ariki, kihai i meatia i runga i toku ingoa !

10. E manako ranei ki tetahi mea i o koutou ringaringa e hara nei i te mea whakamana naku !

11. E whakaritea ranei ki a koutou e ai ta te Ariki, ki te kahore e meatia e te ture, pera me taku me ta toku Matua i whakarite i a koutou i mua atu o te ao !

12. Ko ahau te Ariki, to koutou Atua, a ka hoatu e ahau ki a koutou tenei whakahaunga, kahore he tangata e haere ake ki te Matua ki te kahore ahau, ara ma taku kupu, koia nei taku ture e ai ta te Ariki,

13. A ko nga mea katoa i te ao, ahakoa he mea whakarite na te tangata, na nga torona, na nga kingitanga, na nga mana, na nga mea whai ingoa, ahakoa ranei he aha te mea, me he mea e hara ia i a au, i taku kupu ranei, e ai ta te Ariki, ka turakina iho, a e kore e mau tonu i muri i te matenga o nga tangata, i te wa o te whakaarahanga ake i te mate, i muri iho ranei, e ai ta te Ariki, ta to koutou Atua;

14. No te mea ko nga mea katoa e u tonu ana, naku era; a ko nga mea katoa e hara i a au, tera e whakangaueuetia, e whakangaromia.

15. No reira, me he mea ka marena tetahi tangata ki tetahi wahine mana i tenei ao, a e kore raua e marenatia e ahau, e taku kupu ranei; a ka kawenata ia (te tane) ki a ia (te wahine) mo te wa anake kei roto ia i tenei ao, me ia (te wahine) ki a ia (ki te tane), kahore he mana o ta raua kawenata me te marenatanga ina mate raua, a ka wehe atu i te ao, no reira kahore raua i te here ki tetahi ture, i a raua e ngaro atu ana i tenei ao;

16. No reira ina puta atu raua i tenei ao kahore o raua marenatanga, hoatutanga ranei kia marenatia; heoi ka meinga hei anahera ki te rangi, hei anahera kai mahi, kia mahi ki te hunga e tika ana, kia nui noa atu te kororia mau tonu.

17. No te mea kihai enei anahera i pupuri i taku ture, no reira e kore ratou e taea te mea kia nui, engari ka tu motuhake hei takakau, kahore e whakateiteitia ake ki roto i o ratou whakaoranga mo ake tonu atu, a atu i reira e hara ratou i te Atua, engari he anahera ma te Atua, mo ake, ake.

18. A tenei ano, he pono taku e mea atu nei ki a koutou, ina marena te tangata ki te wahine, a ka hanga kawenata ki a ia mo tenei ao, a mo ake tonu atu, a ine he mea e hara taua kawenata i a au, i na taku kupu ranei, koia ra taku ture, a kahore i hiiritia e te Wairua Ora o te kupu whakaari, ma roto i a ia, i taku i whakawahi ai, i whakarite ai ki tenei mana—heoi kahore he painga, e kore hoki e u ina mate atu raua i tenei ao, no te mea e hara i a au nana raua i hono, e ai ta te Ariki, e hara ano hoki i taku kupu; ina ngaro atu raua i tenei ao, e kore rawa e whiwhi i reira, no te mea ko nga anahera me nga Atua kua oti te whakarite mo reira, e kore raua e taha atu i a ratou; no reira, e kore rawa raua e whiwhi ki toku kororia, no te mea ko toku whare, he whare no te tika, e ai ta te Ariki te Atua.

19. A tenei ano he pono taku e mea atu nei ki a koutou, me he mea ka marena te tangata ki te wahine, he mea na taku kupu, koia ra taku ture, na te kawenata hou mau tonu, a e hiiritia ana raua e te Wairua Ora o te kupu whakaari, he mea nana kua oti te whakawahi, kua whakaritea hoki e ahau ki tenei mana, me nga kii o tenei Tohungatanga; a tera e korerotia ki a raua ka puta mai korua i te aranga tuatahi; a me he mea ia i muri i te aranga tuatahi, hei tetahi aranga; a ka whiwhi ki nga torona, ki nga kingitanga, nga kingitanga iti, ki nga mana, ki nga rangatiratanga, ki te tiketike rawa me te hohonutanga—a ko reira tuhituhia ai ki roto i te Pukapuka Ora o te Reme, kia kaua ia e kohuru, e whakaheke ai i te toto hara-kore, a ki te u koutou ki roto i taku kawenata, a ka kore e kohuru, e whakaheke i te toto hara-kore, ka meatia atu ki a raua i nga mea katoa i meatia e taku pononga ki runga i a raua, i tenei ao, a mo ake tonu atu, a ka mau tonu ina mate atu raua i tenei ao, a ka tukua atu raua e nga anahera, e nga Atua i whakarite nei mo reira, ki to raua whakateiteitanga me te kororia i roto i nga mea katoa, e rite ana ki te mea kua hiiritia ki runga i o raua matenga, ko taua kororia he raneatanga, me te mau tonu ki te whakatupu uri mo ake, ake.

20. Ko reira raua e meinga ai hei Atua, no te mea kahore o raua mutunga; no reira no tua whakarere raua, mo ake tonu atu, no te mea ka ora tonu raua; ko reira raua meinga ai ki runga i nga mea katoa, no te mea ka whaiti nga mea katoa ki raro i a raua. Ko reira raua Atua ai, no te mea kei a raua te mana katoa, a ko nga anahera ka ngohengohe ki a raua.

21. He pono, he pono taku e mea atu nei ki a koutou, ki te kore koutou e u ki taku ture, e kore koutou e whiwhi ki toku kororia,

22. No te mea e tika ana te kuwaha e kuiti ana te huarahi e tika ana ki te whakateiteitanga, me te raneatanga haeretanga o nga ora, a he ruarua te hunga e kitea ai i reira, no te mea kihai koutou i manako mai ki a au i roto i te ao, kahore ano hoki koutou i mohio ki a au.

23. Engari ki te manako koutou ki a au i roto i te ao, a ka mohio koutou ki a au, ka whiwhi koutou i o koutou whakateiteitanga, ko te wahi i a au, ko reira ano hoki koutou.

24. Ko te oranga tonutanga tenei kia mohio ki te Atua pono, matauranga kotahi anake, ki a Ihu Karaiti tana i tono ai. Ko ahau ia. No reira me whiwhi koutou ki taku ture.

25. He wharahi ia te kuwaha, he nui noa atu te ara e tika ana ki te matenga, a he tokomaha e haere ana ra reira, no te mea kahore ratou e manako ana mai ki a au, kahore ano hoki i te pupuri i taku ture.

26. He pono, he pono taku e mea atu nei ki a koutou, ina marena te tangata ki te wahine e rite ana ki taku kupu, a ka hiiritia raua e te Wairua Ora o te kupu whakaari, e rite ana ki taku i whakarite ai, a ki te taka te tane, te wahine ranei ki te hara, a ka takahia te kawenata hou mau tonu, nga ahua hara katoa, a me he mea e kore raua e kohuru, e whakaheke ai i te toto hara-kore, heoi ka puta mai raua i te aranga tuatahi, a ka tomo ki to raua whakateiteitanga, engari ka whakangaromia raua i roto i te kikokiko, a ka tukua atu ki nga whakamatautauranga a Hatana tae noa atu ki te ra o te hokonga, e ai ta te Ariki, ta te Atua.

27. Ko te kohukohu ki te Wairua Tapu e kore e murua i tenei ao, i tera ao ranei, koia a koutou kohurutanga, e whakaheke ai koutou i te toto hara-kore, me te whakaae ki toku matenga, i muri o ta koutou whiwhinga ki taku kawenata hou mau tonu, e ai ta te Ariki, ta te Atua; a ko ia e kore e u ki taku ture e kore rawa e ahei te tomo ki toku kororia, engari ka tau te he ki a ia, e ai ta te Ariki.

28. Ko ahau te Ariki, tou Atua, a ka hoatu e ahau ki a koe, te ture o taku Tohungatanga Tapu, i whakaritea nei e ahau, me toku Matua, i mua atu i te ao.

29. Kua whiwhi a Aperahama ki nga mea katoa i whiwhi ai ia, he mea na te whakakitenga me te whakahaunga, he mea na taku kupu, e ai ta te Ariki, a kua tomo ia ki tona whakateiteitanga, a e noho ana i runga i tona torona.

30. I whiwhi a Aperahama ki nga kupu whakaari mo ona uri me nga hua o ona hope—no ona hope koe e taku pononga e Hohepa,—tera ratou e tupu tonu i a ratou i roto i tenei ao; a mo te taha ki a Aperahama me ona uri i roto i tera ao, ka tupu tonu ratou; i roto i tenei ao, i roto i tera ao, ka tupu tonu ratou ka pera i nga whetu o te rangi te tini, ara me he mea ka taua e koe nga onepu o te tahatai, e kore e mohiotia e koe to ratou tokomaha.

31. Ko tenei kupu whakaari mou ano hoki, no te mea, no Aperahama koe, a ko te kupu whakaari i meinga ki a Aperahama; a na tenei ture e pumau tonu ai nga mahi o toku Atua, koia ra ia e whakakororia ai i a ia ake.

32. No reira, haere koe me te mahi i nga mahi o Aperahama; uru mai koe ki taku ture a ka whakaorangia koe.

33. Heoi ki te kahore koe e uru mai ki taku ture e kore rawa koe e whiwhi ki te kupu whakaari o toku Matua, i meinga e ia ki a Aperahama.

34. I whakahau te Atua ki a Aperahama, a ka hoatu e Hera a Hakara ki a Aperahama hei wahine mana. A he aha i pera ai a ia ? No te mea ko te ture tenei, a puta ake ana i a Hakara nga iwi maha. No reira he tutukitanga tenei i te kupu whakaari, haunga etahi atu mea.

35. No reira kei raro koia a Aperahama i te whakaheanga ? He pono taku e mea atu nei ki a koe, kahore, no te mea, naku na te Ariki tena i whakahau.

36. I whakahaua a Aperahama kia tapaea atu tana tama a Ihaka, ahakoa kua oti te tuhituhi, aua koe e patu. Heoi kore rawa a Aperahama i whakakahore, a whakairi atu ana ki a ia hei tika.

37. I a Aperahama he maha nga wahine iti, a whanau ana he tamariki mana i a ratou, a whakairi atu ana ki a ia hei tika, no te mea i hoatu ratou ki a ia, a u ana ia i roto i te ture, me Ihaka ano hoki, me Hakopa, kihai i meatia tetahi mea i ko atu o tera i whakahaua ki a ratou, a i te mea kihai i meatia i tetahi atu mea i tera i whakahaua ki a ratou, kua tomo ratou ki roto i o ratou whakateiteitanga, rite tonu ki nga kupu whakaari, a e noho ana i runga i nga torona, a kahore ratou i te anahera engari he Atua.

38. I whiwhi ano hoki a Rawiri ki nga wahine maha me nga wahine iti. a Horomona ano hoki me Mohi aku pononga; me era atu tokomaha o aku pononga, no te timatanga ra ano o te ao taea noatia tenei wa; a kahore he mea i hara ai ratou, ko nga mea anake kihai nei ratou i whiwhi i a au.

39. Ko nga wahine a Rawiri me nga wahine iti he mea hoatu ki a ia naku, na te ringa o Natana o taku pononga, me era atu o nga poropiti i a ratou nga kii o tenei mana; a kihai i whai hara i roto i tetahi o enei mea ki a au, engari i roto i te take o Uria me tana wahine, a no reira ia i taka ai i tona whakateiteitanga a whiwhi ana ki tona wahi; a e kore ia e whiwhi ki a ratou i tera ao, no te mea kua hoatu ratou e ahau ki tetahi atu, e ai ta te Ariki.

40. Ko ahau te Ariki tou Atua, a i hoatu e ahau ki a koe e taku pononga e Hohepa he whakaritenga, me te whakahokinga mai o nga mea katoa; inoia tau e pai ai a ka hoatu ki a koe rite tonu ki taku kupu:

41. A i te mea kua ui mai koe mo te taha ki te puremu—he pono, he pono taku e mea atu nei ki a koe, me he mea he tangata e whiwhi ki te wahine i roto i te kawenata hou mau tonu, a me he mea ka pa atu ia ki tetahi atu tangata, a kahore nei ia i whakaritea e ahau ki te whakawahinga kua puremu ia, a ka whakangaromia.

42. Me he mea te wahine kahore i roto i te kawenata hou mau tonu, a ka pa atu ia ki tetahi atu tangata e puremu ana ia;

43. A me he mea tana tane ka pa atu ki tetahi wahine, a i raro i tetahi oati, kua takahia e ia tana oati, a kua puremu,

44. A me he mea kahore te wahine i puremu engari e hara-kore ana, a kahore i takahi i tona kawenata, a mohio ana ia ki tena, a maku e whakakite atu ki a koe e taku pononga e Hohepa, ka whai mana koe he mea na te mana o toku Tohungatanga Tapu, ki te tango i a ia me te hoatu ia ki tetahi atu kahore nei i puremu, engari u ana ki te pono; no te mea ka meinga ia hei rangatira mo nga mea maha;

45. No te mea kua hoatu e ahau ki runga ki a koe nga kii me te mana o te Tohungatanga, ma reira nei e whakahokia ai nga mea katoa, me te whakamohio i a koe ki nga mea katoa i te wa e rite ana.

46. He pono, he pono taku e mea atu nei ki a koe, ko nga mea katoa e hiiritia ana e koe i runga i te whenua, e hiiritia ai ki te rangi; a ko nga mea katoa e herea nei e koe i runga i te whenua ma roto i toku ingoa, he mea na taku kupu, e ai ta te Ariki, ka meinga tera hei here mau tonu i nga rangi; a ko nga hara katoa e murua ai e koe i runga i te whenua ka murua ano i roto i nga rangi mo ake tonu atu; a ko nga hara katoa e whakamaua e koe i runga i te whenua, ka whakamaua ano i te rangi.

47. A tenei ano, he pono taku e mea atu nei, ko te hunga katoa e manaaki ai koe, ka manaakitia e ahau, a ko te hunga katoa e kanga ai koe, ka kanga e ahau, e ai ta te Ariki; no te mea ko ahau te Ariki, tou Atua.

48. A tenei ano he pono taku e mea atu nei ki a koe e taku pononga, e Hohepa, ko nga mea katoa e hoatu ai e koe i runga i te whenua, ko wai ranei tau e hoatu ai ki tetahi atu i runga i te whenua, he mea na taku kupu e rite ana ki taku ture, ka torotorotia tera ki nga manaakitanga a kahore ki nga kanga, ki taku mana hoki e ai ta te Ariki, a kahore rawa he whakaheanga i runga i te whenua, i roto ranei i te rangi;

49. No te mea ko ahau te Ariki, tou Atua, a ka noho tonu ki a koe a te mutunga ra ano o te ao, mo ake tonu atu; no te mea he pono ka hiiritia e ahau ki runga i a koe tou whakateiteitanga me te whakarite i te torona mou i roto i te kingitanga o toku Matua, ki a Aperahama tou Matua.

50. Nana, kua kite ahau i ou mamaetanga, a ka murua atu ou hara katoa; a kua kite ahau i ou whakamamaetanga i roto i te ngohengohe ki te mea kua korerotia e ahau ki a koe; no reira, haere, a maku e mea hei patunga atu mou, rite tonu ki taku manakohanga i te tapaenga a Aperahama i a Ihaka tana tama.

51. He pono taku e mea atu nei ki a koe, ka hoatu e ahau tetahi whakahaunga ki taku pononga wahine, ki a Ema Mete, tau wahine, ko ia taku i hoatu ai mau me pupuri ia e ia ano, a kaua e tango i te mea kua whakahaua koe e ahau kia hoatu ki a ia, no te mea i meatia tera e ahau, e ai ta te Ariki, hei whakamatau i a koutou katoa, pera me taku i mea ai ki a Aperahama; kia tonoa e ahau he tapaenga i ou ringaringa he mea na te kawenata me nga whakahere;

52. A meinga taku pononga wahine, a Ema Mete kia whiwhi ki nga mea katoa kua hoatu na ki taku pononga ki a Hohepa, a ko ratou e tapu ana, e hara-kore ana i mua i a au; a ko nga mea kahore i te hara-kore a e mea ana ratou he hara-kore ratou, ka whakangaromia, e ai ta te Ariki, ta te Atua.

53. No te mea ko ahau te Ariki, tou Atua, a me whakarongo koe ki toku reo; a e hoatu ana e ahau ki taku pononga, ki a Hohepa, ara ka meinga ia hei rangatira i runga i nga mea maha, no te mea kua pono ia i runga i nga mea ruarua, a atu inaianei ka whakakahangia ia e ahau.

54. A e whakahau ana ahau i taku pononga wahine, i a Ema Mete, kia u, kia piri ki taku pononga, ki a Hohepa, a aua ki tetahi atu. Otira ki te kore ia e u ki tenei whakahaunga ka whakangaromia ia e ai ta te Ariki, no te mea ko ahau te Ariki, tou Atua, a ka whakangaromia ia, ki te kore ia e u ki roto i taku ture;

55. Otira ki te kore ia e u ki roto i tenei whakahaunga, ko reira meatia ai e taku pononga, e Hohepa, nga mea katoa mona, pera me tana i korero ai; a ka manaaki ahau i a ia, ka meinga ia kia tini, a tatakirau nga mea mona i tenei ao, nga papa, nga whaea, nga teina, nga tuahine, nga whare me nga whenua, nga wahine me nga tamariki, me nga karauna o nga oranga-tonutanga i roto i nga ao mutunga-kore.

56. A tenei ano, he pono taku e mea atu nei, meinga taku pononga wahine kia muru koe i nga henga o taku pononga o Hohepa; a ko reira e murua ai ona ake heanga, i he ai ia ki a au; a ko ahau te Ariki, tou Atua, ka manaaki i a ia, ka meinga ia kia hua, a ka meinga ano hoki tona ngakau kia hari.

57. A tenei ano taku kupu, kaua taku pononga a Hohepa e tuku atu i ona taonga ki waho i ona ringaringa, kei haere mai te hoa riri ka whakangaro i a ia; no te mea e rapu ana a Hatana kia whakangaromia; no te mea ko ahau te Ariki, tou Atua, a ko ia taku pononga; a nana kei a ia ahau, pera ano i a au i a Aperahama, i tou matua, tae noa atu ki tona whakateiteitanga me tona kororia.

58. Na, mo te taha ki te ture o te Tohungatanga, he maha nga mea e pa atu ana ki reira.

59. He pono, me he mea ka karangatia te tangata e toku Matua, ka peratia i a Arona, he mea na toku ake reo, a na te reo ona nana nei ahau i tono mai, a kua whakawhiwhia ia e ahau ki nga kii o te mana o tenei Tohungatanga, me he mea ka meatia e ia tetahi mea i runga i toku ingoa, a e rite ana ki taku ture, he mea na taku kupu, e kore ia e hara, a ka whakatikaia ia e ahau.

60. No reira aua tetahi e whakahe taku pononga a Hohepa; no te mea kua whakatika ahau i a ia, no te mea ka meatia e ia te whakahere e tonoa e ahau i ona ringaringa, mo ana heanga, e ai ta te Ariki, ta to koutou Atua.

61. A tenei ano, mo te taha ki te ture o te Tohungatanga. Me he mea ka marena te tangata ki tetahi puhi a ka hiahia ki te marena ki tetahi atu, a ka whakaae te tuatahi, a ki te marena ia ki te tuarua, a he puhi raua, a kahore ano i oati ki tetahi atu tangata, e whakatikaia ana tana, kahore ia i te puremu, no te mea kua hoatu raua ki a ia; a kahore ia e kaha ki te puremu i te mea nana a kahore i te mea na tetahi atu.

62. A me he mea tekau nga puhi kua hoatu mana e tenei ture, kahore ia i te puremu, no te mea nana ratou, a kua hoatu ratou mana, no reira e tika ana ia.

63. Otira ki te mea kotahi o nga puhi, kotahi tekau ranei e pa atu ki tetahi atu tangata i muri i tana marenatanga kua puremu ia, a ka whakangaromia; no te mea kua hoatu ratou ki a ia kia hua, kia whakakapi ano i te whenua, kia rite ki taku whakahaunga kia tutuki ai te kupu whakaari i hoatu ai e toku Matua i mua i te hanganga o te ao, a mo to ratou whakateiteitanga i nga ao mau tonu, kia whakaputaina ai e ratou nga wairua a nga tangata; no te mea ma roto i tenei e mau ai te mahi a toku Matua, kia whakakororiatia ai ia.

64. A tenei ano, he pono, he pono taku e mea atu nei ki a koe, me he mea he wahine ta tetahi tangata, he kai pupuri nei ia i nga kii o tenei mana, a ka anga ia ka whakaako atu e ia ki te wahine te ture o toku Tohungatanga mo te taha ki enei mea ko reira te wahine whakapono ai, a ka mahi atu ki a ia, ki te kore ka whakangaromia, e ai ta te Airki, ta tou Atua, no te mea ka whakangaro ahau i a ia, no te me ka whakanuia e ahau toku ingoa i runga i te hunga katoa kua whiwhi, kua u i roto i taku ture.

65. No reira, e tika ana i roto i a au me he mea e kore ia e whiwhi ki tenei ture, mona mo te tane kia whiwhi ai ki nga mea katoa tera e hoatu e ahau, e te Ariki, e tou Atua ki a ia, no te mea mona kihai i mahi enei mea ki a ia, kia rite ki taku kupu; ko reira ia meinga ai hei kai takahi ture; a kua kore kaha o te ture o Hera ki a ia, nana nei i mahi ki a Aperahama kia rite ki te ture, i a au i whakahau ai i a Aperahama kia tango i a Hakara hei wahine mana.

66. A inaianei, mo te taha ki tenei ture, he pono, he pono taku e mea atu nei ki a koe, tera ano e nui atu nga mea e hurahia atu ki a koe a muri ake nei, no reira waiho i konei mo tenei wa. Nana ko ahau te Arepa me te Omeka. Amine.