Wāhanga 44
He whakakitenga i hoatu ai ki a Hōhepa Mete te Poropiti rāua ko Hirini Rikitana, ki Katarana, Ohaio, i te pito whakamutunga o te Pēpuere 1831. E hāngai ana tēnei ki te whakaritenga i whakatakotohia iho nei, i whakataua e te Hāhi kia tū ai tētahi huinga whānui o te hāhi kia whakatūria ai i te marama whai muri mai i te marama o Hune.
1–3, Me huitahi ngā Erata; 4–6, Me whakahaere kia rite ana ki ngā ture o te whenua me te atawhai i te hunga rawakore.
1 Nana, pēnei tā te reo o te Ariki ki a koutou e aku pononga, e tika ana i roto i ahau kua whakahuia ngā erata o taku hāhi, mai i te rāwhiti ki te uru, mai i te raki me te tonga, mā te reta, mā tētahi atu huarahi rānei.
2 Ā, ka pahawa ake, nā, ki te mea ka ū tō rātou whakapono, me te whakapakari i tō rātou whakapono i ahau, māku tōku Wairua e ringiringi iho ki runga ki a rātou i te rā e whakahuihui ngātahi rātou i a rātou anō.
3 Ā, ka pahawa ake, nā, ka haere atu rātou ki roto i ngā rohe huri noa, ā, ka kauhau i te rīpenetātanga ki te iwi.
4 Ā, ka whakatahuritia ngā mea tokomaha, nā konā whaimana ai koutou ki te whakarite i a koutou anō kia rite ki ngā ture o te tangata;
5 Kia kore ai ō koutou hoariri e whaimana i runga i a koutou; kia tiakina koutou i roto i ngā mea katoa; kia whakaāheitia koutou kia puritia aku ture; kia whakangaromia ngā here katoa e meatia nei e te hoariri ki te whakangaro i tōku iwi.
6 Nana, ko taku kupu tēnei ki a koutou, nā, me totoro atu koutou ki te hunga rawakore me te hunga hapa me te hoatu ki a rātou ngā mea e ora ai rātou, kia tiakina rātou kia meatia ngā mea katoa e rite ana ki taku ture kua whiwhi nei koutou. Āmine.