Wāhanga 57
He whakakitenga mā roto i a Hōhepa Mete te Poropiti, i Hīona, Takiwā o Tiakihana, Mītori, Hūrae 20, 1831. E rite ana ki tā te Ariki whakahau kia haere ai ki Mītori, ko reira whakakitea ai e Ia “tō koutou whenua tuku iho” (wāhanga 52), kua haere ngā erata i Ohaio ki te rohe whakateuru o Mītori. I āta whakaaroarohia e Hōhepa Mete te āhua o ngā Rāmana kātahi ka whakaaro ake: “Hei āhea te koraha e puāwai ake anō nei he rōhi? Hei āhea a Hīona e hangaia ake ai i tōna korōria, ā, ka tū Tōu temepara ki hea, e haere atu ai ngā iwi katoa ki reira hei ngā rā whakamutunga?” Kātahi ia ka whiwhi i tēnei whakakitenga.
1–3, Ko Inipenetana, Mītori te wāhi mō te Pā o Hīona me te temepara; 4–7, Me hoko whenua e ngā Hunga Tapu, ā, me ngā mea tuku iho ki taua wāhi; 8–16, Me whakatū whare hokohoko a Hirini Kiripeti, me tū a Wiremu W. Wherapa hei kaitā, ā, mā Oriwa Kautere hei etita mō ngā mea e whakaputaina ake ai.
1 Whakarongo, E koutou ngā erata o taku hāhi, e ai tā te Ariki tō koutou Atua, kua whakaminea ngātahitia mai e koutou anō, e rite ana ki aku whakahaunga, i tēnei whenua, koia te whenua o Mītori, koia te whenua kua whakataua iho, ā, kua whakatapua iho mō te whakahuihuitanga mai o ngā Hunga Tapu.
2 Nā reira, koinei te whenua o te kupu whakaari, ā, ko te wāhi mō te pā o Hīona.
3 Ā pēnei tā te Ariki tō koutou Atua, ki te whiwhi mātauranga. Nana, ko te wāhi e karangatia ana ko Inipenetana te pokapū; ā, e takoto iho ana te wāhi mō te temepara i te taha uru, ki runga ki tētahi pito kāore e tawhiti noa ana i te whare whakawā.
4 Nā reira, he whai mātauranga kia hokona te whenua e ngā Hunga Tapu, me ngā whenua katoa e takoto ana i te taha uru, tae noa atu pū anō ki te rārangi e rere ana i waenganui i te Hūrai me te Tauiwi;
5 Waihoki ko ngā whenua katoa e hono atu ana ki ngā rohe o ngā whenua mānia, ki te mea e āhei ana i aku apataki te hoko whenua. Nana, he whai mātauranga tēnei, kia hopu ai i a rātou hei mea tuku iho mau tonu.
6 Ā, tukua taku pononga a Hirini Kiripeti kia tū i te tūranga e whakaritea ai mōna, kia whiwhi moni, kia tū ai hei kaiwhakarite ki te hāhi, ki te hoko i ngā whenua i ngā rohe huri noa, kia rite ki ngā mea e taea ana i runga i te tika e tohutohua ana e te mātauranga.
7 Ā, tukua taku pononga a Eruera Patiri kia tū ai i te tūranga e whakaritea ai mōna, me te whakawehewehe iho i ngā mea tuku iho ki te hunga tapu, kia rite pū anō ki tāku i whakahau ai; me te hunga katoa anō hoki nāna nei i tohu hei āwhina i a ia.
8 Hei āpiti anō, he pono tāku e mea atu nei ki a koutou, tukua taku pononga a Hirini Kiripeti kia whakatōkia iho ia e ia anō ki tēnei wāhi, me te whakatū i tētahi whare hokohoko, kia hoko tinihanga kore atu i ngā ō, kia riro i a ia he moni hei hoko whenua hei painga mō te hunga tapu, hei hopu ia i ērā atu mea e pai ai ki ngā apataki kia whakatōkia iho ai rātou ki roto i ō rātou whiwhinga.
9 Waihoki, tukua anō hoki taku pononga a Hirini Kiripeti kia whai raihana—nana he mātauranga tēnei, ā, tukua te tangata e pānui ana kia mārama—nā, ka taea e ia te tuku ō atu ki te iwi, mā te hunga pū anō e pai ai ki a ia hei karaka i roto i tana mahi;
10 Ā pēnei e tuku ō atu ai ki aku hunga tapu, kia kauhau ai i taku rongopai ki te hunga e noho ana i te pōuritanga, ā, i te rohe o te ātārangi o te mate.
11 Hei āpiti anō, he pono tāku e mea atu nei ki a koutou, tukua taku pononga a Wiremu W. Wherapa kia whakatōkia iho ki taua wāhi, ā, kia whakaritea hei kaitā mō te hāhi.
12 Ā nana, ki te whiwhi te ao i ana tuhituhinga—nana he mātauranga tēnei—tukua ia ki te rapu i tāna e taea ai i runga i te tika, hei painga mō te hunga tapu.
13 Ā, tukua taku pononga a Oriwa Kautere kia āwhina i a ia, pērā i tāku i whakahau ai, i roto i ngā wāhi katoa e whakataua ai e au ki a ia, ki te kape, me te whakatika, me te kōwhiri, kia tika katoa ngā mea katoa i mua i ahau, i te mea ka whakatūturuhia e te Wairua mā roto i a ia.
14 Ā pēnei, tukua te hunga kua kōrerohia ake nei e ahau kia whakatōkia iho ki te whenua o Hīona, kia hohoro rā anō, me ō rātou whānau, kia meatia ērā mea kua kōrerotia nei e ahau.
15 Ināianei ā, mō te taha ki te whakahuihuinga—Tukua mā te pīhopa rāua tahi ko te kaiwhakarite kia meatia ngā whakaritenga mō aua whānau kua whakahaua kia haere mai ai ki tēnei whenua, ināia tonu nei, ā, whakatōkia iho rātou ki roto i ō rātou mea tuku iho.
16 Ā, ka hoatu ngā kupu tohutohu anō ki te toenga o ngā erata me ngā mema ā muri ake nei. Koia anō. Āmine.