Wāhanga 77
He whakakitenga i hoatu ai ki a Hōhepa Mete te Poropiti, ki Hairama, Ohaio, i te takiwā o Maehe 1832. E ai ki tā te hītori o Hōhepa Mete, “I runga i te hononga ki te whakapākehātanga o ngā Karaipiture, i whiwhi au i te whakamāramatanga e whai ake nei mō te Whakakitenga o Hato Hoani.”
1–4, He wairua ō ngā kararehe, ā, ka noho i te haringa mau tonu; 5–7, Kua neke atu te pakeketanga o te ao nei i te 7,000 ngā tau; 8–10, Ka whakahokia te rongopai e ngā momo anahera, ā, ka minita i runga i te whenua; 11, Ko te hīringa o te 144,000; 12–14, Ka haere mai te Karaiti i te tīmatanga o te tau whitu mano; 15, Ka whakatupuria ake ngā poropiti e rua ki te iwi Hūrai.
1 P. He aha te moana karaihe i kōrerotia nei e Hoani i te upoko tuawhā, i te whiti tuaono o te Whakakitenga?W. Koia ko te whenua, i tōna āhua tapu, mutunga kore, mau tonu hoki.
2 P. He aha tā tātou e mārama ai mō ngā kararehe e whā, i kōrerotia ai i taua whiti anō?W. He kōrero huahuatau, i meatia nei e te Kaiwhakakite, e Hoani, i tana whakamāramatanga mō te rangi, te pararaiha o te Atua, te haringa o te tangata, o ngā kararehe hoki, o ngā mea ngōki hoki, o ngā manu o te rangi hoki; me ērā mea wairua e rite ana te āhua ki ērā mea o te ao kikokiko; me ērā mea o te ao kikokiko e rite ana te āhua ki ērā mea wairua; te wairua o te tangata e rite ana te āhua ki tōna tīnana, pērā hoki te wairua o te kararehe, me ērā atu mea katoa i hangaia nei e te Atua.
3 P. E hāngai atu ana anake ngā kararehe e whā ki ngā kararehe noa iho, e hāngai atu ana rānei ērā ki ngā momo taumata tangata, ritenga rānei?W. E hāngai atu ana ki ngā kararehe e whā anake, i whakakitea atu ai ki a Hoani, hei tohu mō te korōria o ngā taumata mea ora i roto i ō rātou ake ritenga mai anō, ō rātou pūtake i hangaia ai, i roto i te haringa o ō rātou harikoa mau tonu.
4 P. He aha tā tātou e mārama ai i ngā karu me ngā parirau o ngā kararehe?W. He tohu ō ēnā karu mō te māramatanga me te mātauranga, koia, kua kī i te mātauranga; ā, he tohu mana ō ēnā parirau, kia nuku, kia mahi me ērā atu mea.
5 P. He aha tā tātou e mārama ai i ngā erata rua tekau mā whā, i kōrerotia nei e Hoani?A. Me mārama tātou ko ēnei erata i kite ai a Hoani, he erata ū tonu i roto i ngā mahi minita kua mate; nō ngā hāhi e whitu, ā, i roto rātou i te pararaiha o te Atua.
6 P. He aha tā tātou e mārama ai i te pukapuka i kite ai a Hoani, i hīria ai i te taha whakamuri ki ngā hīri e whitu?W. Me mārama tātou e mau nei te hiahia i whakakitea mai, ngā mea ngaro, me ngā mahi a te Atua; ngā mea ngaro o tana whakahaere e pā ana ki te whenua i roto i ngā tau whitu mano o tana oranga, o tana āhuatanga i te ao kikokiko rānei.
7 P. He aha tā tātou e mārama ai i ngā hīri e whitu i hīritia ai te pukapuka?W. Me mārama tātou, nā, kei roto i te hīri tuatahi ngā mea o ngā tau kotahi mano, ā, kei te tuarua ngā mea hoki o ngā tau rua mano, ā, ka pērāhia tae noa atu ki te tuawhitu.
8 P. He aha tā tātou e mārama ai mō ngā anahera tokowhā, i kōrerotia ai i te upoko tuawhitu me te whiti tuatahi o te Whakakitenga?W. Me mārama tātou, nā, he anahera tokowhā rātou i tonoa iho ai e te Atua, kua hoatu mana ki a rātou i runga i ngā wāhi e whā o te ao, ki te whakaora me te whakangaro; koinei te hunga kei a rātou te rongopai mau tonu hei hoatutanga ki ia iwi, hapū, reo, me ngā huihuinga tāngata; kua whaimana kia katia ake ngā rangi, kia hīria ake ki te ora, kia makaia iho rānei ki ngā rohe o te pōuritanga.
9 P. He aha tā tātou e mārama ai i te anahera e kake ake ana i te rāwhiti, Whakakitenga, upoko tuawhitu, whiti tuarua?W. Me mārama tātou, nā, ko te anahera e kake ake ana i te rāwhiti te mea kua hoatu mana ki a ia i te Atua ora ki runga i ngā iwi tekau mā rua o Iharaira; nā reira, kei te karanga atu ia ki ngā anahera tokowhā kua mau nei te rongopai mau tonu, e mea ana: Kaua e whakamamae i te whenua, te moana rānei, ngā rākau rānei, kia oti tā tātou hīringa i ngā pononga a tō tātou Atua ki ō rātou rae. Ā, ki te whiwhi koutou, ko Iriaha tēnei e haere mai ai ki te whakahuihui tahi mai i ngā iwi o Iharaira me te whakahoki i ngā mea katoa.
10 P. Hei āhea ngā mea i kōrerotia nei i tēnei upoko e tutuki ai?W. Ka tutukihia ērā mea i ngā tau e ono mano, i te tūwheratanga rānei o te hīri tuaono.
11 P. He aha tā tātou e mārama ai i te hīringa o te kotahi rau e whā tekau mā whā mano, mai i ngā iwi o Iharāira—tekau mā rua mano o ia iwi, o ia iwi?W. Me mārama tātou, nā, ko te hunga e hīria ai ko ngā pirihi teitei, kua whakamanaia ki te ritenga tapu o te Atua, ki te minita atu i te rongopai mau tonu; nā te mea ko rātou te hunga kua whakamanaia nei i ia iwi, hapū, reo, me ngā huihuinga tāngata, e ngā anahera i hoatu ai te mana ki a rātou ki runga i te whenua, kia kumea mai ngā mea tokomaha e hiahia nei ki te hāhi o te Mātāmua.
12 P. He aha tā tātou e mārama ai i te whakatangihanga o ngā tētere, i whakahuatia ake i te upoko tuawaru o te Whakakitenga?W. Me mārama tātou, nā, pērā i tā te Atua hanga i te ao i ngā rā e ono, ā, i oti i a ia tana mahi i te rā tuawhitu, ā, ka whakatapua, ā, ka hangaia hoki te tangata i te puehu o te whenua, koia anō, i te tīmatanga o ngā tau e whitu mano e whakatapu ai te Ariki te Atua i te whenua, ā, ka whakaoti i te whakaoranga o te tangata, me te whakawā i ngā mea maha, me te hoko i ngā mea katoa, atu i ērā mea kīhai i whakanohoia i raro i tōna mana, ina oti i a ia te hīri ake i ngā mea katoa, ki te mutunga o ngā mea katoa; ā, ko te whakatangihanga o ngā tētere o ngā anahera tokowhitu koia ko te whakaritenga me te whakaotinga o tana mahi, i te tīmatanga o ngā tau e whitu mano—ko te whakaritenga o te huarahi i mua i te wā o tana haerenga mai.
13 P. Hei āhea tutuki ai ngā mea kua oti te tuhituhi i te upoko tuaiwa o ngā Whakakitenga?W. Ka oti te tutuki whai muri iho i te whakatūwheratanga o te hīri tuawhitu, i mua i te haerenga mai a te Karaiti.
14 P. He aha tā tātou e mārama ai i te pukapuka iti i kainga ai e Hoani, kua whakahuatia ake nei i te upoko tekau o ngā Whakakitenga?W. Me mārama tātou, nā, he mīhana tēnā, ā, he tikanga tapu, kia waiho māna hei whakahuihui i ngā iwi o Iharaira; nana, ko Iriha tēnei, mōna kua oti te tuhituhi e haere mai ai ki te whakahoki i ngā mea katoa.
15 P. He aha tā tātou e mārama ai mō ngā kaiwhakaatu tokorua, i te upoko tekau mā tahi o ngā Whakakitenga?W. He poropiti tokorua rāua e mairangatia ake ai ki te iwi Hūrai i ngā rā o muri, hei te wā o te whakahokinga, me te poropiti ki ngā Hūrai whai muri iho i tā rātou huihuinga me tā rātou waihanga ake i te pā o Hiruharama i te whenua o ō rātou tūpuna.