Wāhanga 8
He whakakitenga mā roto i a Hōhepa Mete te Poropiti ki a Oriwa Kautere, ki Hamoni, Penihiwheinia, Aperira 1829. I te hiahia a Oriwa Kautere i waenganui i te whakapākehātanga o te Pukapuka a Moromona, i a ia e mahi ana hei kaituhi, e tuhituhi ana i tā te Poropiti pānuitanga, kia whakamanangia ia ki te takohatanga o te whakapākehātanga. I whakautua e te Ariki tāna i inoi ai i runga i tēnei whakakitenga.
1–5, Ka puta te whakakitenga i runga i te mana o te Wairua Tapu; 6–12, Ka puta mai te mātauranga me ngā mea ngaro a te Atua me te mana ki te whakapākehā i ngā tuhinga onamata i te whakapono.
1 E Oriwa Kautere, he pono, he pono, tāku e mea atu nei ki a koe, nā, e ora pono ana te Ariki, koia tōu Atua me tōu Kaihoko, waihoki he pono ka whiwhi koe i tētahi mātauranga mō ngā mea katoa e inoi ai koe ahakoa he aha tāu e inoi ai i runga i te whakapono, i runga i te ngākau pono, e whakapono ana ka whiwhi koe i tētahi mātauranga e pā ana ki ngā whaowhaonga o ngā tuhinga tawhito, he mea onamata ēnā, e mau nei aua wāhi o taku karaipiture kua kōrerotia ake nei e te whakakitenga o tōku Wairua.
2 Āe rā, nana, ka kōrero atu au i roto i tōu hinengaro, ā, i roto hoki i tōu ngākau, he mea nā te Wairua Tapu, e tau iho ai ki runga ki a koe, ā, e noho ai i roto i tōu ngākau.
3 Nā, nana, koinei te wairua o te whakakitenga; nana, koinei te wairua mā konā kawea mai ai e Mohi ngā tamariki o Iharaira i roto i te Moana Whero i runga i te whenua maroke.
4 Nō reira koinei taku takoha; tonoa ki a ia, ā, kua manaakitia koe, nā te mea ka whakaputaina koe i konā i ngā ringaringa i ōu hoariri, i te mea, me i kore i pēnei, kua whakamate rātou i a koe, ā, kua kumea iho tō wairua ki te whakangaromanga.
5 E, mahara ki ēnei kupu, ā, puritia aku whakahaunga. Kia mahara, koinei tō takohatanga.
6 Nā, ehara noa tēnei i tō takohatanga katoa; i te mea he takohatanga atu anō tāu, koia te takohatanga o Arona; nana, nāna nei koe i kōrero i ngā mea maha;
7 Nana, kāore kē atu he mana, hāunga te mana o te Atua, e mea ai kia nohotahi iho tēnei takohatanga kia koe.
8 Nō reira, kaua e rangirua, i te mea koia te takoha a te Atua; ā, māu tēnā e pupuri i ōu ringaringa, me te mahi i ngā mahinga whakamīharo; ā, kāore e taea e tētahi mana te tango atu i ōu ringaringa, nā te mea koia te mahi a te Atua.
9 Ā, nō reira, ahakoa he aha tāu e inoi mai ai ki ahau i runga i taua huarahi, māku tērā mea e tuku atu ki a koe, ā, ka whaimātauranga koe e pā ana ki taua mea.
10 Kia mahara ki te kore he whakapono tē taea e koe tētahi mea; nō reira inoia i runga i te whakapono. Kaua e tākaro ki ēnei mea; kaua e inoi mai mō ngā mea kāore e tika ana kia inoia.
11 Inoia kia mōhio koe ki ngā mea ngaro o te Atua, ā, kia taea e koe te whakapākehā me te whiwhi mātauranga i aua tuhinga onamata katoa kua hunaia ake nei, e tapu ana; ā, ka meatia ki a koe kia rite ki tō whakapono.
12 Nana, ko au tēnei kua kōrero nei i tēnei mea; ā, ko au anō ia i kōrerohia atu ai ki a koe i te tīmatanga. Āmine.