Wāhanga 98
He whakakitenga mā roto i a Hōhepa Mete te Poropiti, ki Katarana, Ohaio, Akuhata 6, 1833. I tau mai tēnei whakakitenga nā te whakawhiunga i runga i te Hunga Tapu i Mītori. I raruētahi o ngā tāngata e noho nei ki reira nā te nui o ngā mema o te Hāhi i Mītori, nā, ka wehi rātou i te tokomaha o te Hunga Tapu, i tā rātou mana ki te taha tōrangapū, me ngā rerekētanga ahurea, me ngā rerekētanga whakapono. I te Hūrae o 1833, i whakangaromia ētahi rawa o te Hāhi, ka pania ngā mema e rua ki te tā me ngā huru manu, ā, ka tonoa atu kia wehe atu te Hunga Tapu i te Takiwā o Tiakimana. Ahakoa kāore e kore i tae atu ētahi pūrongo mō ngā raruraru i Mītori ki te Poropiti i Katarana (e iwa rau maero te tawhiti atu), kua whakamōhiotia atu anake te tino taumaha o tēnei raruraru ki a ia i tēnei wā mā runga i te whakakitenga.
1–3, Ka ai ngā whakawhiunga o te Hunga Tapu hei painga mō rātou; 4–8, Me whakahoahoa atu te Hunga Tapu ki te ture o te whenua; 9–10, Me tautoko ngā tāngata pono, matatau, me ngā tāngata pai mō te kāwanatanga; 11–15, Ka whai oranga tonutanga te hunga e whakatakotoria iho ō rātou oranga mō te kaupapa a te Ariki; 16–18, Whakakorea te pakanga, ā, whakapuakina te maungārongo; 19–22, Ka kohetea te Hunga Tapu i Katarana, ā, ka whakahaua kia rīpenetā; 23–32, Ka huraina e te Ariki Ana ture e whakahaere ana i ngā whakatoinga me ngā whakamamaetanga e meatia ana ki runga i Tōna iwi; 33–38, E tika ana te pakanga i ngā wā e whakahaua ai e te Ariki; 39–48, Me muru e te Hunga Tapu ō rātou hoariri, te hunga, ki te rīpenetā rātou, ka mawhiti atu anō i te utu o te Ariki.
1 He pono tāku e mea atu nei ki a koutou e ōku hoa, tukua ō koutou ngākau kia tau; āe rā, kia hari tonu, ā, kia tuku whakawhetai i roto i ngā mea katoa;
2 E tatari ana i runga i te manawanui ki te Ariki, nā te mea kua uru atu ā koutou inoi ki roto ki ngā tāringa o te Ariki o Hapoata, ā, kua tuhia me tēnei hīri me tēnei kawenata—kua oati te Ariki, ā, kua whakapuakina e ia ka tūtohia ērā mea.
3 Nō reira, kei te hoatu e ia tēnei whakaari ki a koutou, me tētahi kawenata tē taea te tīni, ā, ka whakatutukia aua inoi; me ngā mea katoa kua whakamamaetia nei koutou ka riro hei painga mō koutou, ā, ki te korōria o tōku ingoa, e ai tā te Ariki.
4 Ināianei ā, he pono tāku e mea atu nei ki a koutou e pā ana ki ngā ture o te whenua, ko tāku e pai ai kia ū taku iwi ki te mahi i ngā mea katoa e whakahaua ai rātou e ahau.
5 Ā, ko taua ture o te whenua koia ko te ture kāwanatanga, e tautokona ana te tikanga herekoretanga i runga i te pupuri i ngā tika me ngā tikanga, nō ngā tāngata katoa, ā, he mea tika i tōku aroaro.
6 Nō reira, kei te whakaae au, te Ariki, i a koutou me ō koutou teina o taku hāhi, i tā koutou whakahoahoatanga atu i te ture koia te ture kāwanatanga o te whenua;
7 Ā, ki te taha ki te ture o te tangata, ahakoa he aha te mea e nui atu ana, e iti iho ana rānei i tēnei, e ahu mai ana i te kino.
8 Māku, mā te Ariki te Atua koutou e herekore ai, nō reira kua herekore mārika koutou; ā, mā te ture anō koutou e herekore ai.
9 Hei aha koa, ka tangi te iwi ina whakahaere te hunga kino.
10 Nā reira, me kaha rapu mārire i ngā tāngata pono me ngā tāngata matatau, ā, me kaha koutou ki te tautoko ake i ngā tāngata pai me ngā tāngata matatau; ki te kore ahakoa he aha atu ngā mea e iti iho ana i tēnei e ahu mai ana i te kino.
11 Ā, kei te hoatu e au ki a koutou tētahi whakahaunga, kia whakarērea e kotuou ngā kino katoa me te whakapiri atu ki ngā mea pai katoa, kia ora koutou i runga i ngā kupu katoa e puta ai i te māngai o te Atua.
12 Nā te mea ka iti nei, iti nei tana hoatu akoranga ki te hunga ū; ā, māku koutou e whakamātau ki ēnei mea.
13 Ā, ko te tangata e whakatakotoria iho tana oranga mō tēnei kaupapa, mō tōku ingoa, ka rapua anōtia tana oranga, arā, ko te oranga tonutanga pū anō.
14 Nō reira, kaua e mataku i ō koutou hoariri, nā te mea kua whakapuakina e au i roto i tōku ngākau, e ai tā te Ariki, na, ka whakamātautauria koutou i roto i ngā mea katoa, mehemea ka noho mai koutou i taku kawenata, tae atu ki te mate, e kitea ai koutou hei mea tika.
15 Nā te mea ki te kore koutou e noho mai i taku kawenata, kāore koutou e tika ana i roto i ahau.
16 Nō reira, whakakorea te pakanga, ā, whakapuakina te maungārongo, ā, rapua māriretia ki te whakatahuri i ngā ngākau o ngā tamariki a te tangata ki ō rātou tūpuna, me ngā ngākau o ngā tūpuna ki ngā tamariki;
17 Hei āpiti anō, ngā ngākau o ngā Hūrae ki ngā poropiti, me ngā poropiti ki ngā Hūrae; kei haere mai au me te patu i te ao katoa ki tētahi kanga, ā, ka pau ngā kikokiko katoa i tōku aroaro.
18 Kaua e tuku kia raruraru ō koutou ngākau; nā te mea kei roto i te whare o tōku matua ngā whare nunui maha, ā, kua whakaritea e au tētahi wāhi mō koutou; ā, ko te wāhi kei reira māua ko tōku Matua, kei reira hoki koutou.
19 Nana, kāore au, te Ariki, i te āhuareka ana ki ētahi o te hunga o te hāhi i Katarana;
20 Nā te mea kāore rātou i te whakarere i ō rātou mahi kino, te whakahīhī o ō rātou ngākau, me tō rātou pūhaehae, me ā rātou mea whakarihariha katoa, me te ū ki ngā kupu whaimātauranga me te oranga tonutanga kua hoatu nei e au ki a rātou.
21 He pono tāku e mea atu nei ki a koutou, māku, mā te Ariki rātou e kohete me te mahi i tāku e pai ai, ki te kore rātou e rīpenetā me te ū ki ngā mea katoa kua kōrero atu nei au ki a rātou.
22 Hei āpiti anō tāku ki a koutou, ki te ū koutou ki te mahi i ngā mea katoa e whakahaua nei koutou e ahau, māku, mā te Ariki e whakatahuri atu i te riri katoa i te āritarita katoa i a koutou, ā, e kore koutou e taea e ngā kuaha o te ao rēwera.
23 Nā, kei te kōrero atu au ki a koutou e pā ana ki ō koutou whānau—ki te patu te tangata i a koutou, i ō koutou whānau rānei, kia kotahi taima, ā, ka manawanui tonu koutou, ki te kore e riri ki tō rātou kino, ki te kore rānei e whai ki te ngaki mate, ka utua koutou;
24 Engari ki te kore koutou e manawanui tonu, ka tatauria atu mōu hei mehua pai ki a koutou.
25 Hei āpiti anō, ki te patu tō hoariri i a koutou mō te taima tuarua, ā, ki te kore koutou e riri ki tō hoariri, me te manawanui tonu, ka tatakirau tō koutou utu.
26 Hei āpiti anō, ki te patu ia i a koutou mō te taima tuatoru, me te manawanui tonu, ka takirua tatakirau tō koutou utu;
27 Ā, ki te kore tō koutou hoariri e rīpenetā ka tū ēnei whakaaturanga e toru hei whakahē mōna, ā, e kore rawa e mukua atu.
28 Ināianei ā, he pono tāku e mea atu nei ki a koutou, ki te puta atu taua hoariri i taku utu, kia kore ai ia e kumea ai ki te whakawākanga i tōku aroaro, kātahi koutou ka whakatūpatoria ia e koutou i runga i tōku ingoa, kia kore tonu ia e whakaeke atu ki runga ki a koutou, ki runga rānei i tō whānau, arā, ngā tamariki o ā koutou tamariki tae atu ana ki ngā whakatipuranga tuatoru me te tuawhā.
29 Kātahi, ki te whakaeke atu ia ki runga ki a koutou, i ā koutou tamariki rānei, i ngā tamariki o ā koutou tamariki rānei tae atu ana ki te whakatipuranga tuatoru me te tuawhā hoki, kua tukuna e au ō koutou hoariri ki roto ki ō koutou ringaringa;
30 Kātahi, ki te tohu koutou i a ia, ka utua koutou mō tō kotuou tika; me ā koutou tamariki anō hoki me ngā tamariki o ā koutou tamariki tae atu ana ki te whakatipuranga tuatoru me te tuawhā.
31 Hei aha koa, kei ō kotuou ringaringa tō koutou hoariri; ā, ki te utua ia e rite ana ki ana mahinga kua tika tā koutou; mehemea i whai atu ia i tō oranga, ā, mehemea ko tana hiahia ki te whakamate i a koutou, kei roto tō koutou hoariri i ō koutou ringaringa, ā, kua tika tā koutou.
32 Nana, koinei te ture i hoatu nei e au ki taku pononga a Nīwhai, me ō koutou tūpuna, Hōhepa rātou ko Hākopa, ko Ihaka, ko Aperahama, me aku poropiti me aku āpōtoro onamata katoa.
33 Hei āpiti anō, koinei taku ture i hoatu nei e au ki aku mea onamata, kia kaua rātou e haere atu ai ki te pakanga ki tētahi iwi, hapū, reo, huihuinga tāngata rānei, ki te kore rātou e matua whakahaua e au, e te Ariki.
34 Ā, mehemea tētahi iwi, reo, huihuinga tāngata rānei e whakaara pakanga ake ki a rātou, me mairanga tuatahi ake i tētahi kara maungārongo ki taua huihuinga tāngata, iwi, reo rānei;
35 Ā, mehemea kīhai taua iwi i whakaae ki taua tāpaetanga maungārongo, kaua rānei mō te wā tuarua me te tuatoru, me hari mai e rātou ēnei whakaaturanga ki te aroaro o te Ariki;
36 Kātahi au, te Ariki, ka hoatu ki a rātou tētahi whakahaunga, me te whakaae atu kia haere atu rātou ki te pakanga ki taua iwi, reo, huihuinga tāngata rānei.
37 Kātahi ahau, te Ariki, e whawhai atu i ō rātou pakanga, me ngā pakanga o ā rātou tamariki, me ngā pakanga o ngā tamariki o ā rātou tamariki, tae noa ki te wā kua utua e rātou ō rātou hoariri katoa, tae atu ki te whakatipuranga tuatoru me te tuawhā.
38 Nana, he tauira tēnei ki ngā tāngata katoa, e ai tā te Ariki tō koutou Atua, e tika ai i tōku aroaro.
39 Hei āpiti anō, he pono tāku e mea atu nei ki a koutou, mehemea whai muri iho i te whakaekenga atu a tō koutou hoariri ki runga ki a koutou mō te taima tuatahi, kātahi ka huri ia ki te rīpenetā me te inoi ake ki a koutou hei murunga hara, me muru koutou i ōna hara, ā, me kaua koutou e mau tonu hei whakaaturanga whakahē ki tō kotuou hoariri—
40 Ā, kia pērātia anōtia ki te tuarua me te tuatoru o ngā wā; me muru koutou i ngā hē e hē ai tō koutou hoariri mēnā rānei ka rīpenetā ia, kia whitu tekau rā anō whakarea whitu.
41 Ā, ki te hē ia ki a koe, ā, ki te kore ia e rīpenetā i te taima tuatahi, me muru tonu koe i a ia.
42 Ā, ki te hē ia mō te taima tuarua, ā, ki te kore e rīpenetā, me muru e koe tana hē.
43 Ā, ki te hē ia mō te taima tuatoru, ki te kore e rīpenetā, me muru tonu anō koutou i a ia.
44 Engari ki te hē ia ki a koutou mō te taima tuawhā kaua koutou e muru i a ia, engari ka mau mai ēnei whakaaturanga ki tōku aroaro; ā, e kore rawa ēnei mea e mukua atu kia rīpenetā ai ia me te utu i a koutou kia takitoru tatakirau i roto i ngā mea katoa i hē ai ia ki a koutou.
45 Ā, ki te pēnei ia, me muru koutou i a ia i runga i ō koutou ngākau katoa, ā, ki te kore ia e pēnei, māku, mā te Ariki, tō koutou hoariri e utu, arā, ki te tatakirau;
46 Ka rapu anō ki runga i ana tamariki, ki runga hoki i ngā tamariki o ana tamariki o te hunga katoa e mauāhara ana ki ahau, tae atu ana ki te whakatipuranga tuatoru me te tuawhā.
47 Engari ki te rīpenetā ngā tamariki, ngā tamariki o ngā tamariki rānei, me te tahuri ki te Ariki tō rātou Atua, i runga i ō rātou ngākau katoa me te katoa hoki o tō rātou kaha, whakaaro, me tō rātou mārohirohi, me te whakahoki kia tatakiwhā ngā utu mō ō rātou hē katoa kua hē nei i a rātou, e ō rātou matua rānei, e ngā matua o ō rātou matua rānei, kātahi ka whakatahuritia atu tō koutou āritarita;
48 Ā, e kore tonu te rapunga utu e tau anō ki runga i a rātou, e ai tā te Ariki tō koutou Atua, ā, e kore hoki ō rātou hē e mauria atu anō hei whakaaturanga i te aroaro o te Ariki hei whakahēanga mō rātou. Āmine.