1 Pēnei tā te Ariki tō koutou Atua, ko Ihu Karaiti pū anō, te Ahau Nui Rawa, te Arepa me te Omeka, te tīmatanga me te whakamutunga, ko taua mea i tiro atu ki runga i te whānuitanga o te ao mau tonu, me ngā anahera herapima mano o te rangi, i mua i te hanganga ake o te ao;

2 Ko taua mea e mōhio ana ki ngā mea katoa, nā te mea kei mua i ōku karu ngā mea katoa;

3 Ko au anō tērā nāna nei i kī, kātahi ka hangaia te ao, ā, ka puta mai ngā mea katoa i ahau.

4 Ko au anō tērā nāna nei i tango ake te Hīona o Enoka ki roto ki tōku ake uma; he pono tāku e mea nei, ko te hunga katoa i whakapono ai i tōku ingoa, nā te mea ko au te Karaiti, ā, kei runga i tōku ake ingoa, i runga i te maringitanga iho o ōku toto, kua inoi atu au ki te aroaro o te Matua mō rātou.

5 Engari nana, kua puritia e au te mahuetanga iho o te hunga kino i roto i ngā mekameka o te pōuritanga tae noa atu ki te whakawākanga o te rā nui, e puta mai ai hei te mutunga o te ao;

6 Ā, pēnei anō ka mea au kia puritia ai te hunga kino, e kore nei e whakarongo mai ki tōku reo engari ka whakapakeke kē i ō rātou ngākau, ā, auē, auē, auē te mate mō rātou.

7 Engari nana, he pono, he pono tāku e mea atu nei ki a koutou, nā, kei runga aku karu i a koutou. Kei tō koutou aroaro ahau, ā, kāore e taea ana e koutou te kite i ahau;

8 Engari meake ka puta mai te rā e kite ai koutou i ahau, ā, ka mōhio e ora ana ahau; nā te mea meake ka wāwahia iho te ārai o te pōuritanga, ā, kāore e taea e te tangata kāore anō kia whakamākia te noho mai hei taua rā.

9 Nā reira, whītikiria ō koutou hope kia rite ai. Nana, nō koutou te kīngitanga, e kore e taea e te hoariri.

10 He pono tāku e mea atu nei ki a koutou, he mā koutou, engari ehara i te katoa; ā, kāore au e āhuareka ana ki tētahi atu;

11 Nā te mea kua pokea ngā kikokiko katoa i tōku aroaro; ā, kei runga tonu ngā mana o te pōuritanga i te whenua, ki waenganui i ngā tamariki a te tangata, i te aroaro o ngā huihuinga o te rangi—

12 Nā konā mea ai kia mau ai te ngū, ā, ka mamae te ao mau tonu katoa, ā, e tatari ana ngā anahera mō te whakahau nui kia kokoti iho te ao, kia kohikohia ngā taru kino e tahunatia ai; ā, nana, kua whakakotahitia te hoariri.

13 Ināianei ā, kei te whakakite atu au ki a koe tētahi mea ngaro, he mea kua meatia i roto i ngā whare huna, kia pahawa ake pū anō tō koutou whakangaromanga a tōna wā, ā, kāore koutou i mōhio ki tēnei mea.

14 Engari ināianei ka kōrerohia atu e au ki a koutou, ā, kua manaakitia koutou, ehara i te mea mō ō koutou kino, ehara rānei mō ō koutou ngākau whakapono kore; nā te mea he pono kua hē ētahi o koutou i tōku aroaro, engari ka ngāwari au ki ō koutou ngoikoretanga.

15 Nō reira, kia kaha koutou ināianei ā haere ake nei; kaua e wehi, nā te mea nō koutou te kīngitanga.

16 Ā, ka hoatu e au tētahi whakahaunga ki a koutou mō tō koutou whakaoranga, nā te mea kua rongo ahau i ā koutou inoi, ā, kua amuamu mai te hunga rawakore ki tōku aroaro, ā, kua hanga au i te hunga whairawa, ā, nāku te kikokiko katoa, ā, ehara au i te mea whakapaikanohi.

17 Ā, nāku te whenua i whakahaumako, ā nana koia tōku tūrangawaewae, nā reira, ka tū anō au ki runga rā.

18 Ā, ka tāpae atu, ā, ka tapatu taku hoatu ki a koutou i ngā taonga nui ake, āe rā, he whenua whakaari pū anō, he whenua e rere ana te waiū me te mīere, e kore tētahi kanga e tau ai ki runga rā ina haere mai te Ariki;

19 Ā, māku e hoatu ki a koutou hei whenua tuku iho mō koutou, ki te whai atu i runga i ō koutou ngākau katoa.

20 Ā, ka pēnei taku kawenata ki a koutou, ka riro i a koutou hei whenua tuku iho mō koutou, hei whenua tuku iho mō ā koutou tamariki mō āke tonu atu, i te ao e tū ana, ā, ka riro anō i a koutou i te ao mau tonu, e kore anō e pahemo atu.

21 Engari, he pono tāku e mea atu nei ki a koutou, nā, me kaua ō koutou kīngi, ō koutou kaiwhakahaere rānei, nā te mea māku hei kīngi mō koutou, ā, māku koutou e tiaki.

22 Nā reira, whakarongo mai ki tōku reo, ā, whai mai i ahau, ā, ka tū koutou hei iwi herekore, ā, kāore ō koutou ture, engari ko aku ture ina haere mai ahau, nā te mea ko au te kaituku ture, he aha te mea e puritia ai tōku ringa?

23 Engari, he pono tāku e mea atu nei ki a koutou, me whakaako koutou tētahi i tētahi kia rite ki te tūranga kua whakataua nei koutou e ahau;

24 Ā, tukua tēnā tangata me tēnā tangata kia whakaarohia e ia tana teina anō nei ko ia anō, ā, me mahi i runga i te pai me te tapu i tōku aroaro.

25 Hei āpiti anō ko taku kupu tēnei ki a koutou, tukua ngā tangata katoa kia whakaarohia tana teina anō nei ko ia anō.

26 Nā, ko wai te tangata i waenganui i a koutou e whai tama tekau mā rua ana, ā, ehara ia hoki i te tangata whakapaikanohi ki a rātou, ā, ka mahi pono rātou ki a ia, ā, ka kī atu ia ki te mea kotahi: Kia whakakākahuria koe ki ngā kākahu, ā, noho mai nei; me te kī atu ki tētahi atu: Kia whakakākahuria koe ki ngā kahu taratara, ā, noho atu rā—kātahi ka titiro iho ia ki ana tama me te kī ake he tangata tika ahau?

27 Nana, ka hoatu tēnei e ahau ki a koutou hei paki huatau, ā, e rite ana ki ahau pū anō. Ko taku kupu tēnei ki a koutou, kia kotahi koutou; ā, ki te kore e kotahi koutou ehara nōku koutou.

28 Hei āpiti anō, ko taku kupu tēnei ki a koutou, nā, e whai ana te hoariri i roto i te whare huna i ō koutou oranga.

29 E rangona ana e koutou ngā pakanga i ngā whenua tawhiti, ā, e kī ake ana koutou meake ka tū ngā pakanga nunui i ngā whenua tawhiti, engari kāore koutou e mōhio ana ki ngā ngākau o ngā tāngata i tō ake whenua.

30 Kei te kōrero atu au i ēnei mea ki a koutou he mea nā ā koutou inoi; nā reira, kohia ake te mātauranga i roto i ō koutou uma, kei hurahia atu ēnei mea ki a koutou e tō rātou kino, i tētahi āhuatanga e kōrero atu ai ki ō koutou taringa i runga i tētahi reo e kaha ake ana i tērā mea e whakangāueuetia ai te whenua; engari mehemea kua rite koutou kua kore koutou e wehi.

31 Ā, kia mawhiti atu koutou i te mana o te hoariri, ā, kia whakahuihuitia koutou ki ahau hei iwi tika, he kohakore, ā, he hē kore—-

32 Nā reira, kua hoatu e au te whakahau ki a koutou mō tēnei take, kia haere atu koutou ki Ohaio; ā, ka hoatu e au ki a koutou taku ture i reira; ā, ka whakamanangia koutou i reira ki te mana tiketike;

33 Ā, nō konā, ka haere atu te mea e pai ai au ki waenganui i ngā iwi katoa, ā, ka kīa atu ki a rātou ngā mea hei mahi mā rātou; nā te mea he mahi nui tāku kua pūrangatia ake, nā te mea ka whakaorangia a Iharaira, ā, māku rātou e ārahi ki ngā wāhi e pai ai ahau, ā, kāore he mana e puritia ai tōku ringa.

34 Ināianei ā, ka hoatu e au tētahi whakahau ki te hāhi i ēnei wāhi, nā, ka whakatūria ētahi tangata i waenganui i a rātou, ā, ka whakatūria ake rātou e te reo o te hāhi;

35 Ā, ka aro atu ki te hunga rawakore me te hunga hapa, ā, ka atawhai ki a rātou kia kore rātou e mamae; ā, ka tonoa atu rātou ki te wāhi kua whakahaua nei rātou e ahau;

36 Ā, ka pēnei tā rātou mahi, kia whakahaerehia ngā āhuatanga o ngā taonga o tēnei hāhi.

37 Ā, waiho atu ngā pāmu tē taea te hoko atu, tukua kia waihotia iho, kia rētihia atu rānei e rite ana ki tā rātou e pai ai.

38 Whakaritea kia tiakina ngā mea katoa; ā, ina whakamanahia ngā tangata ki te mana tiketike, ina tonoa atu, ka kohikohia ēnei mea katoa ki te uma o te hāhi.

39 Ā, ki te whai atu koe i ngā taonga e rite ana ki tā te Matua e pai ai kia hoatu ki a koutou, ka meinga koutou ko te iwi whairawa ake i ngā iwi katoa, nā te mea ka whiwhi koutou i ngā taonga o te ao mau tonu; ā, e tika pū anō nāku ngā taonga o te ao hei tuku atu; engari kia tūpato mō te whakapehapeha, kei meinga kia rite ki ngā Nīwhai onamata.

40 Hei āpiti anō, ko taku kupu tēnei ki a koutou, kei te hoatu e au ki a koutou tētahi whakahaunga, kia mahi ai ia tangata, ia tangata, erata mai, pirihi mai, kaiako atu, mema atu anō hoki i runga i tōna kaha, ki te mahi ki ōna ake ringaringa, ki te whakarite me te whakatutuki i ngā mea kua whakahau nei ahau.

41 Ā, tukua āu kauhautanga hei reo whakatūpato, tēnā tangata me tēnā tangata ki tōna kiritata, i runga i te ngāwari me te māhaki.

42 Ā, haere atu koutou i roto i te hunga kino. Whakaorangia koutou anō. Kia mā koutou e mau nei ki ngā oko o te Ariki. Koia anō. Āmine.