Wāhanga 24
He whakakitenga mā roto i a Hōhepa Mete te Poropiti rāua ko Oriwa Kautere, ki Hāmoni, Penihiwheinia, Hūrae 1830. Ahakoa kua hipa atu ngā marama e whā mai i te whakatūnga o te Hāhi, kua kino te ngau o te whakahāweatanga, ā, i tika kia kimi haumarutanga ngā kaiārahi, i ētahi wā me noho wehe atu rātou i te iwi. I hoatu ēnei whakakitenga e toru e whai ake nei i tēnei wā hei whakakaha, hei whakamana, ā, hei tohutohu hoki i a rātou.
1–9, Ka karangatia a Hōhepa Mete ki te whakapākehā, ki te kauhau, me te whakamārama i ngā karaipiture; 10–12, Ka karangatia a Oriwa Kautere ki te kauhau atu i te rongopai; 13–19, Ka huraina te ture e pā ana ki ngā merekara, kanga, te ruinga atu o te puehu i ō tētahi waewae, me te haere pūtea kore atu, whītiki kore atu.
1 Nana, kua karangatia koe, ā, kua kōwhiria koe hei tuhituhi i te Pukapuka a Moromona, ki taku minitatanga hoki; ā, nāku koe i hiki ake ki waho i ōu whakamamaetanga, ā, kua tohutohua koe, nā, kua whakaputaina koe i te aroaro i ōu hoariri katoa, ā, kua whakaputaina koe i ngā mana o Hātana, i te pōuritanga anō hoki!
2 Hei aha koa, kāore e tika ana kia hara koe; hei aha koa, haere i runga i tō huarahi, ā, kaua e hara anō.
3 Whakanuia tō tūranga; ā, i muri iho i tāu ruiruinga i āu māra me te whakarite i aua mea, me haere wawe atu ki te hāhi i Kourawira, Wheiete, me Maniheta, ā, mā rātou koe e manaaki; ā, māku rātou e manaaki ki te taha wairua me te taha tīnana;
4 Engari ki te kore rātou e manako mai ki a koe, ka tukua atu e au he kanga ki runga i a rātou, kāore he manaakitanga.
5 Ā, me hono tonu tō karanga ki te Atua i runga i tōku ingoa, me te tuhituhi i ngā mea e hoatu ai ki a koe e te Kaiwhakaāio, me te whakamārama i ngā karaipiture katoa ki te hāhi.
6 Ā, ka hoatu ki a koe i taua wā pū anō e kōrero ai, e tuhituhi ai koe, ā, ka rongo rātou, ki te kore ka tukua atu e au he kanga ki runga i a rātou, kāore he manaakitanga.
7 Nā te mea me whakapau katoa e koe āu mahi ki roto i Hīona; ā, mā konei whiwhi kaha koe.
8 Kia manawanui koe i roto i ō mamaetanga, nā te mea ka pā ngā mea maha; engari kia ū koe i roto i ngā mea pērā, nā te mea, nana, kei tō taha ahau, tae noa pū anō ki te mutunga o ōu rā.
9 Ā, kāore ōu kaha i roto i ngā mahinga o tēnei oranga, nā te mea ehara tēnei i tō karangatanga. Kia aro atu koe ki tō karangatanga, ā, ka whai koe i ngā mea katoa hei whakanui i tō tūranga, ā, ki te whakamārama i ngā karaipiture katoa, ā, me hono tonu te whakapākanga o ngā ringaringa i runga i te whakaūnga o ngā hāhi.
10 Ā, ka kawe tonu atu tō teina, a Oriwa, i tōku ingoa ki mua i te ao, ki te hāhi anō hoki. Ā, e kore ia e whakaaro e rawaka ana ngā kupu e whakapuakina ai e ia i roto i taku mahi; ā nana, kei tōna taha ahau tae noa atu ki te mutunga.
11 Ka whaikorōria ia i roto i ahau, ehara i roto i a ia ake, ahakoa i roto i te ngoikoretanga, i roto rānei i te kaha, ahakoa i roto i te hereherenga, i te herekoretanga rānei;
12 Ā, i ngā wā katoa, ā, i roto i ngā wāhi katoa, ka tūwhera ia i tōna māngai me te whakapuaki atu i taku rongopai me te mea nei ko te reo o tētahi tētere, i te awatea, i te pō hoki. Ā, ka hoatu kaha au ki a ia kāore nei tōna rite i mōhiotia noatia i waenganui i te tangata.
13 Kaua e tono merekara, engari kia matua whakahau rā anō ahau i a koe, hāunga i te peinga atu i ngā rēwera, e whakaora ana i ngā tūroro, ā, ki ngā nākahi paitini, me ngā paitini whakamate;
14 Ā, koinei ngā mea e meatia ai e koe, hāunga kua tonoa koe e te hunga e hiahia ana, kia whakatutukihia ngā karaipiture; nā te mea me rite tāu meatanga ki tērā kua oti te tuhituhi.
15 Ā, i roto i ngā whare katoa e tomo ai koe, ā, ki te kore rātou e manako ki a koe i runga i tōku ingoa, ka tukua atu e koe he kanga ki runga i a rātou, kāore he manaakitanga, mā runga i te ruinga i te puehu o ōu waewae hei whakahē i a rātou, ā, mā te horoitanga anō hoki i ōu waewae i te huarahi.
16 Ā, ka pahawa ake, nā, ko te tangata e pā atu ai i ōna ringaringa ki runga ki a koe hei tūkino i a koe, māu e whakahau kia patua ia i runga i tōku ingoa; ā, nana, māku rātou e patu kia rite ki āu kupu, i taku wā e rite ai.
17 Ā, ka kangaia te tangata e kawea ai koe ki te ture.
18 Ā, kaua koe e hari pūtea, whītiki rānei, kaua rānei he tokotoko, kaua rānei e rua ngā koti, nā te mea mā te hāhi e hoatu ki a koe i te hāora pū anō e hapa ana mō te kai, mō te kākahu rānei, mō ngā hū, mō te pūtea, mō te kākahu hoki.
19 Nā te mea kua karangatia koe ki te whakapai i taku māra waina ki tētahi whakapainga nui, āe rā, mō te wā whakamutunga pū anō; āe rā, ko te hunga anō hoki nāu nei i whakamana, ā, ka meatia e rātou kia rite ai ki tēnei tauira. Āmine.