1 Whakarongo mai, E koutou, e te iwi, ā, whakapuaretia ake ō koutou ngākau, ā, kia whai taringa mai i tawhiti, e koutou te hunga e huaina ake e koutou anō ko te iwi o te Ariki, kia rongo ai i te kupu a te Ariki me tana hiahia e pā ana ki a koutou.

2 Āe rā, he pono, tāku e mea atu nei, whakarongo mai ki te kupu o te mea e mura ana tōna riri ki te hunga whakarihariha me te hunga haututū;

3 E pai nei ki te tango i tāna e pai ai, ā, ki te tiaki i te ora āna e pai ai;

4 E hangaia ake ana kia rite ki tāna e pai ai, e āhuareka ai; ā, e whakangaromia ana ina pai ia, ā, e taea ana te pei iho i te wairua ki te ao rēwera.

5 Nana, au, te Ariki, e whakapuaki ake i tōku reo, ā, ka rangona.

6 Nā reira, he pono tāku e mea atu nei, tukua kia tūpato te hunga whakarihariha, ā, tukua te hunga haututū kia wehi, ā, kia tūwiri; ā, tukua te hunga whakapono kore kia puritia ō rātou ngutu, nā te mea ka tau iho te rā pukuriri ki runga ki a rātou anō nei he āwhiowhio, ā, ka mōhio ngā kikokiko katoa ko au te Atua.

7 Ā, ko te tangata e kimi tohu ana ka kitea ngā tohu, engari ehara i te mea mō te whakaoranga.

8 He pono, tāku e mea atu nei ki a koutou, kei reira ētahi i waenganui i a koutou e kimi tohu ana, ā, he pērā ētahi nō te tīmatanga;

9 Engari, nana, kāore e puta te whakapono i ngā tohu, engari ka whaiwhai ngā tohu i te hunga e whakapono ana.

10 Āe rā, ka puta ngā tohu i te whakapono, ehara i te mea mā te hiahia o te tangata, ehara rānei i tā te tangata e pai ai, engari nā te hiahia o te Atua.

11 Āe rā, ka puta ngā tohu i te whakapono, tae atu ki ngā mahi nunui, nā te mea ki te kore he whakapono kāore e taea e te tangata te whakaāhuareka i te Atua; ā, ka riri te Atua ki a ia, kāore ia i te āhuareka mai; nā reira, kāore ia e whakakitea atu he tohu ki ngā mea pērā, i runga anake i te riri ki tō rātou whakahēanga.

12 Nā reira, kāore au, te Ariki, i te āhuareka ki te hunga kei waenganui i a koutou kua kimi atu i ngā tohu me ngā mea māharo mō te whakapono, kāore hoki hei painga mō te tangata hei whakakororia ki ahau.

13 Hei aha koa, kei te hoatu whakahaunga ahau, ā, kua tahuritia atu ngā mea tokomaha i aku whakahaunga, ā, kāore i puritia.

14 He kaipūremu i waenganui i a koutou, tāne mai, wahine mai; kua tahuri atu ētahi i a koutou, ētahi atu e noho tonu ana me koutou, nā, ka whakakitea atu a muri ake nei.

15 Tukua ngā mea pērā kia tūpato, ā, kia rīpenetā wawe, kei tau iho te whakawākanga ki runga ki a rātou me te mea nei he tāhere, ā, ka whakakitea ake tō rātou kuaretanga, ā, ka whaiwhai haere ā rātou mahinga i a rātou i roto i ngā karu o te iwi.

16 Ā, he pono tāku e mea atu nei ki a koutou, pērā me tāku i kī atu rā i mua, ko te tangata e titiro ana ki tētahi wahine i runga i te mate wahine, ki te puremu rānei tētahi i ō rātou ngākau, e kore e piri atu te Wairua, engari ka whakakoretia te whakapono, ā, ka wehi.

17 Nā reira, ahau, te Ariki, i mea ai, ko te hunga wehi, me te hunga whakapono kore, me ngā kairūkahu katoa, me te hunga e aroha ana, ā, e hanga rūkahu ana, me te hunga pūremu, me te tohunga whaiwhaiā, ā, ka whiwhi ki tō rātou wāhi i roto i taua roto e muramura ana te ahi me te whānāriki, koia te mate tuarua.

18 He pono tāku e mea atu nei, nā, e kore rātou e whai wāhi atu i te aranga tuatahi.

19 Ināianei ā nana, ko au, ko te Ariki, e mea atu nei ki a koutou, nā, kāore koutou i te tika, nā te mea kei waenganui ēnei mea i a koutou.

20 Hei aha koa, ko te tangata e ū ai i runga i te whakapono me te mea i tāku e pai ai, koia anō te mea e taea ai e ia, ā, ka whiwhi i tētahi mea tuku iho i runga i te whenua ina puta mai ai te rā panonitanga;

21 Ina whakapanonitia te ao, e rite ana pū anō ki te tauira i whakakitea atu ai ki aku āpōtoro i runga i te maunga; ko te raneatanga o ngā mea kāore anō koutou kia whiwhi.

22 Ināianei ā, he pono tāku e mea atu nei ki a koutou, nā, kia rite ki tāku i kī atu, nā, māku tāku e pai ai e whakamōhio atu ki a koutou, nana māku tēnā e whakamōhio atu ki a koutou, ehara mā te whakahaunga, nā te mea he tokomaha e kore nei e mea ki te pupuri i aku whakahaunga.

23 Engari ka hoatu e au ngā mea ngaro o te kīngitanga ki te tangata e pupuri nei i aku whakahaunga, ā, kei roto anō i a ia tētahi puna wai ora, e pupū ake ana ki te oranga tonutanga.

24 Ināianei ā, nana, koinei te hiahia a te Ariki e pā ana ki ana hunga tapu, kia whakahuihui tahi rātou i a rātou anō ki te whenua o Hīona, kaua i runga i te whāwhai, kei rangirua, mā konā puta ai te mate urutā.

25 Nana, kei te puritia e au, e te Ariki, te whenua o Hīona—i ōku ake ringaringa;

26 Hei aha koa, au, te Ariki, e hoatu ki a Hiha ngā mea nō Hiha.

27 Nā reira, e hiahia ana ahau, te Ariki kia hoko koutou i ngā whenua, kia whaikaha koutou ki runga ki te ao, kia whaikerēme koutou ki runga ki te ao, kia kaua rātou e whakaohokia ake ki te riri.

28 Nā te mea kei te whakaurua e Hātana ki roto i ō rātou ngākau kia riri ki a koutou, ā, ki te whakaheke toto.

29 Nā reira, e kore te whenua o Hīona e hopungia, engari mā te hoko, mā te toto rānei, ki te kore kāore he whenua tuku iho mō koutou.

30 Ā, mehemea mā te hoko, nana, ka manaakitia koutou;

31 Ā, mehemea mā te toto, i te mea kua whakakorea te whakaheke toto, na, kei runga ō koutou hoariri i a koutou, ā, ka whakawhiua koutou mai i tēnā pā ki tētahi atu pā, ā, mai i tētahi wharekarakia ki tētahi wharekarakia, ā, ka tū he mea ruarua noa ki te whiwhi i tētahi mea tuku iho.

32 Kei te riri ahau, te Ariki ki te hunga kino; kei te pupuri au i taku Wairua i te hunga o te ao.

33 Kua oati au i runga i tōku riri, ā, kua whakapuakina ngā pakanga ki runga i te mata o te whenua, ā, ka patu te hunga kino i te hunga kino, ā, ka tau te wehi ki runga ki ngā tāngata katoa;

34 Ā, ka uaua mā te hunga tapu kia mawhiti atu ai; hei aha koa, i a rātou ahau, te Ariki, ā, ka heke iho i te rangi mai i te aroaro o tōku Matua, ā, ka horomia te hunga kino ki te ahi tē taea te tinei.

35 Ā nana, kāore anō tēnei, engari a taihoa ake.

36 Nā reira, i te mea nāku, nā te Ariki, i whakapuaki ēnei mea katoa ki runga i te mata o te whenua, e hiahia ana au kia whakahuihuitia aku hunga tapu ki runga i te whenua o Hīona;

37 Ā, kia hopungia ake e ngā tāngata katoa te tika i ōna ake ringaringa me te whakapono i ōna hope me te hiki ake i tētahi whakaaraara ki ngā tāngata o te whenua; me te whakapuaki mā te kupu rāua tahi ko te tahuti, nā, ka tau mai te whakangaromanga ki runga i te hunga kino.

38 Nā reira, tukua aku apataki i Katarana kia whakaritea ā rātou take kikokiko, e noho nei i tēnei pāmu.

39 Tukua taku pononga a Taituha Piringi, koia te kaitiaki o reira, kia tukua atu te whenua, kia rite ai ia mō te koanga e kainamu mai nei kia haere ake ia ki te whenua o Hīona, me te hunga e noho nei i tō reira mata, hāunga te hunga māku e tiaki mōku anō, kia kaua rātou e haere tae noa ki taku whakahau i a rātou.

40 Ā, tukua ngā moni katoa e taea ana, kāore he take ki ahau mehemea he iti, he nui rānei, kia tukuna atu ki te whenua o Hīona, ki te hunga nāku i whakarite kia whiwhi.

41 Nana, au, te Ariki, e hoatu ki taku pononga a Hōhepa Mete, Tama., te mana kia mōhio ai ia mā runga i te Wairua ko wai e haere ake ki te whenua o Hīona, ā, ko wai anō o aku apataki e noho mai.

42 Tukuna taku pononga a Nuera K. Witini kia puritia tonutia tana toa, kia kī pēnei kē, te toa, mō tētahi wā poto.

43 Hei aha koa, tukua ia kia wāwāhi atu ngā moni katoa e taea ana e ia hei wāwāhi atu, kia tukuna atu ki te whenua o Hīona.

44 Nana, kei roto ēnei mea i ōna ake ringaringa, tukua ia kia mea i runga i te whaiwhakaaro.

45 He pono tāku e mea atu nei, tukua ia kia whakamanaia hei kaiwhakarite ki ngā apataki e noho mai, ā, tukua ia kia whakamanaia ai ki tēnei mana;

46 Ināianei ā kia hohoro te torotoro atu ki ngā hāhi, e kōrero atu ana i ēnei mea ki a rātou, me taku pononga a Oriwa Kautere. Nana, koinei taku hiahia, e kohi moni ana kia rite ki tāku i tohutohu ai.

47 Ko te tangata e pono ana, ā, e ū ana ka taea e ia te ao.

48 Ka whiwhi te tangata e tuku taonga atu ana ki te whenua o Hīona i tētahi mea tuku iho i tēnei ao, ā, ka whai ana mahinga i a ia, ā, he utu anō i tērā ao.

49 Āe rā, kua manaakitia te hunga mate e mate ana i roto i te Ariki, nō nāianei, ina haere mai te Ariki, ina pahemo atu ngā mea tawhito, ina whakahoungia ngā mea katoa, ka mairanga ake rātou i te mate, ā, e kore e mate a muri ake, ā, ka whiwhi mea tuku iho i te aroaro o te Ariki, i roto i te pā tapu.

50 Ā, ko te tangata e ora ana ina haere mai ai te Ariki, ā, kua ū tonu ki te whakapono, kua manaakitia ia; hei aha koa, kua whakataua mōna kia mate hei te pakeketanga o te tangata.

51 Nā reira, ka tupu ake ngā tamariki kia kaumātua rā anō rātou; ka mate ngā kaumātua; engari kāore rātou e moe i te puehu, engari ka panonitia rātou i te kimonga karu.

52 Nā reira, mō tēnei take i kauhautia ai e ngā āpōtoro te aranga o te hunga mate ki te ao.

53 Koinei ngā mea me kimi e koutou; ā, ki tā te Ariki kī, kua tata mai aua mea, ā, i tētahi wā e kainamu mai nei, i te rā pū anō o te haerenga mai o te Tama a te Tangata.

54 Ā, tae noa mai ki taua hāora ka tū ngā puhi kuare i waenganui i te hunga matatau; ā, hei taua hāora puta mai ai tētahi wehenga o te hunga tika i te hunga kino; ā, hei taua rā tonoa iho ai e au aku anahera kia huhuti ake te hunga whakarihariha, ā, ka makaia rātou ki roto i te ahi tē taea te tinei.

55 Ināianei ā nana, he pono tāku e mea atu nei ki a koutou, kāore au, te Ariki e āhuareka ana ki taku pononga a Hirini Rikitana; nāna ake ia anō i whakateitei i tōna ngākau, ā, kāore i aro ki ngā tohutohu, engari i whakapōuritia te Wairua;

56 Nā reira kāore i pai tana tuhinga ki te Ariki, ā, māna tētahi atu e hanga; ā, ki te kore e pai ki te Ariki, nana kāore ia e tū tonu i te tūranga kua whakataua atu e au mōna.

57 Hei āpiti anō, he pono tāku e mea atu nei ki a koutou, ko te hunga e hiahia ana i ō rātou ngākau, i runga i te māhaki, ki te whakatūpato i te hunga hara kia rīpenetā, tukua rātou kia whakamanaia ai ki tēnei mana.

58 Nā, he rā whakatūpato tēnei, ā, ehara i te rā kupu maha. Nā, e kore ahau, te Ariki, e whakatoingia i ngā rā whakamutunga.

59 Nana, nō runga ahau, ā, kei te takoto iho tōku mana ki raro. Kei runga au i ngā mea katoa, ā, kei roto i te katoa, puta noa i ngā mea katoa, ā, e rangahau ana i ngā mea katoa, ā, e tata mai ana te rā ina kei raro ngā mea katoa i tōku mana.

60 Nana, ko au te Arepa me te Omeka, ko Ihu Karaiti pū anō.

61 Nā reira, tukua ngā tāngata katoa kia tūpato ki tā rātou mea i tōku ingoa i ō rātou ngutu—

62 Nana rā, he pono tāku e mea atu nei, nā, he tokomaha kei raro iho i tēnei whakahēnga, e mea ai te ingoa o te Ariki, ā, e meatia noatia, kāore i whakamanaia.

63 Nā reira, tukua te hāhi kia rīpenetā i ō rātou hara, ā, nāku, nā te Ariki rātou; ki te kore ka hātepea atu rātou.

64 Kia mahara he tapu ngā mea e ahu mai ana i runga, ā, kia āta kōrerohia, ā, i runga i te akiaki o te Wairua; ā, kāore he whakahēnga i tēnei, ā, ka whiwhi koe i te Wairua mā roto i te inoi; nā reira, ki te kore tēnei ka ai tonu he whakahēnga.

65 Tukua aku pononga a Hōhepa Mete, Tama., rāua ko Hirini Rikitana, kia rapua tētahi kāinga, i a rāua e whakaakona ana mā roto i te inoi, mā te Wairua.

66 Ka mau tonu ēnei mea hei taea ai mā roto i te manawanui, kia whiwhi ngā mea pērā i tētahi kororia nui rawa ake, tētahi kororia taumaha mau tonu, ki te kore, he whakahēanga nui ake. Āmine.