1 He pono, pēnei tā te Ariki: Ka pahawa ake, nā, ko ngā wairua katoa e whakarērea nei ōna hara, ā, e haere mai ai ki ahau, me te karanga ake i runga i tōku ingoa, ā, e whakarongo hoki ki tōku reo, ā, e pupuri nei i aku whakahaunga, koia te mea e kite ai i tōku mata, ā, e mōhio hoki ai ko au anō tēnei;

2 Ka mātau anō hoki ko ahau te māramatanga pono e whakamāramaramahia ana ngā tāngata katoa e kuhu mai ai ki te ao;

3 Me tēnei anō kei roto au i te Matua, ā, kei roto te Matua i ahau, ā he kotahi māua ko te Matua–

4 Ko te Matua nā te mea nāna i homai ki ahau tōna raneatanga, ā, ko te Tama nā te mea kei roto au i te ao, ā, nāku te kikokiko i mea hei tapenakara mōku, ā, i noho i waenganui i ngā tamariki a te tangata.

5 I roto au i te ao, ā, i whiwhi i tōku Matua, ā, he mea mārama te kite atu i āna mahinga.

6 Ā, i kite a Hōani, ā, i whakaatu hoki mō te raneatanga o tōku rongopai, ka whakakitea atu te whānuitanga o tā Hōani whakaaturanga a muri ake nei.

7 Ā, nāna i whakaatu, e mea ana: I kite au i tōna korōria, nā, i te tīmatanga ia, i mua i te hanganga o te ao;

8 Nō reira, i te tīmatanga te Kupu, na te mea ko ia te Kupu, ko te karere pū anō o te whakaoranga–

9 Ko te māramatanga me te Kaihoko o te ao; te Wairua o te pono, i haere mai ai ki te ao, nā te me ai hangaia ai te ao e ia, ā, kei roto i a ia te oranga o te tangata me te māramatanga o te tangata.

10 I hangaia ai ngā ao e ia; i hangaia ai te tangata e ia; i hangaia ai ngā mea katoa e ia, mā roto hoki i a ia, nāna hoki.

11 Ā, ko au, a Hōani, e whakaatu atu ana i kite ai au i tōna korōria, e rite tonuu ana ki te korōria o te Tama Kotahi Anake a te Matua, e kikī katoa ana i te aroha me te pono, te Wairua o te pono pū anō, i haere mai ai, ā, i noho iho mai i te kikokiko, ā, i noho mai i waenganui i a mātou.

12 Ā, i kite au, a Hōani, nā, kāore ia i whiwhi i te raneatanga i te tuatahi, engari i whiwhi aroha mō te aroha;

13 Ā, kīhai ia i whiwhi i te raneatanga i te tuatahi, engari i hono tonu atu i te aroha noa ki te aroha noa, tae atu ki te wā i whiwhi ia i tētahi raneatanga;

14 Ā, pēnei karangatia ia ko te Tama a te Atua, nā te mea kīhai i whiwhi i te raneatanga i te tuatahi.

15 Kai te whakaatu atu au, a Hōani, titiro, kua puare ngā rangi, ā, i heke iho te Wairua Tapu ki runga ki a ia i te āhua o te kukupa, ā, ka noho ki runga ki a ia, ā, ka puta mai tētahi reo i te rangi e mea ana: Ko tēnei taku Tama arohaina.

16 Ā, kei te whakaatu ahau, a Hōani, nā, i whiwhi ia i te raneatanga o te korōria o te Matua;

17 Ā, i whiwhi ia i te mana katoa o te rangi me te whenua, ā, i a ia te korōria o te Matua, nā te mea i noho ai ia i roto i a ia.

18 Ā, ka pahawa ake, nā, ki te ū tonu koutou ka whiwhi i te whānuitanga o te tuhituhinga a Hōani.

19 Kei te hoatu e au ēnei kīanga ki a koutou kia mārama ai koutou, ā, kia mōhio ai koutou me pēhea te mahi koropiko, me te mōhio he aha tā koutou e koropiko nei, kia haere mai ai koutou ki te Matua i tōku ingoa, ā, ki te whiwhi i tōna raneatanga i tōna ake wā.

20 Nā te mea ki te pupuri koutou i aku whakahaunga ka whiwhi koutou i tōna raneatanga, ā, ka whakakorōriatia i roto i ahau pērā i ahau i roto i te Matua; nō reira, ko taku kupu tēnei ki a koutou, arohan

21 Ināianei ā, he pono tāku e mea atu nei ki a koutou, i te tīmatanga māua ko te Matua, ā, ko ahau te Mātāmua;

22 Ā, ka whaiwāhi te hunga katoa e whānau mai ai i roto i ahau ki taua korōria anō, ā, nō te hāhi o te Mātāmua.

23 I te tīmatanga anō hoki koutou ko te Matua; ērā mea Wairua, arā, ko te Wairua pū anō o te pono;

24 Ā, ko te pono, te mātauranga ki ngā mea i tōna ake āhua anō, me tōna ake āhua i mua, me tōna ake āhua anō a muri ake nei;

25 Ā, ko ngā mea katoa e nui ake ana, e iti iho ana rānei i tēnei, nō te wairua o taua mea kino ko ia te kairūkahu mai i te tīmatanga.

26 Nō te Atua te Wairua o te pono. Ko au te Wairua o te pono, ā, i whakaatu mai a Hōani mōku, e mea ana: I whiwhi ia ki te raneatanga o te pono, āe rā, ki te pono katoa pū anō;

27 Ā, kāore te tangata e whiwhi ki tētahi raneatanga o te pono ki te kore ia e pupuri i ana whakahaunga.

28 Ka whiwhi te tangata e pupuri nei i ana whakahaunga ki te pono me te māramatanga, kia tae rawa mai te wā e whakakorōriatia ia i roto i te pono, ā, e mōhio ana anō hoki ki ngā mea katoa.

29 I te tīmatanga anō hoki te tangata me te Atua. ko te mātauranga, ko te māramatanga rānei o te pono, kīhai i hangaia, i waihangatia rānei, kāore e taea ana rānei te pērā.

30 He mea motuhake anō te pono i taua wāhi i whakanohoia nei e te Atua, hei mahi mōna ake anō, pērā i ngā mātauranga katoa anō hoki; ki te kore kāore he oranga.

31 Nana, anei te mana kōwhiringa o te tangata, ā, anei te whakahēanga a te tangata; nā te mea kua mārama te whakakitenga atu i ngā mea nō te tīmatanga ki a rātou, ā, kāore rātou e whiwhi i te māramatanga.

32 Ā, kei raro ngā tangata katoa kāore nei e whiwhi tōna wairua ki te māramatanga, i te whakahēanga.

33 Nā te mea he wairua te tangata. he mea ora tonu ngā pūtaketake o te kikokiko, ā, ko te wairua rāua ko ngā pūtaketake o te kikokiko, tē taea te wehe he kotahi tonu, e whiwhi nei i tētahi raneatanga o te koa;

34 Ā, ina weheruatia, tē taea e te tangata te whiwhi i tētahi raneatanga o te koa.

35 Ko te tapenakara o te Atua ngā pūtaketake o te kikokiko; āe rā, ko te tangata te tapenakara o te Atua, arā, ko ngā temepara pū anō; ā, ko te temepara e whakapokea ana, ka whakangaromia taua temepara e te Atua.

36 Ko te mātauranga te korōria o te Atua, kia pēnei kē rānei te kupu, ko te māramatanga me te pono.

37 E whakarērea ana te mea kino e te māramatanga me te pono.

38 He harakore ngā wairua o te tangata i te tīmatanga; ā, i te mea kua hokona te tangata e te Atua mai i te takanga, ka hoki anō te tangata ki te āhua o tōna taitamarikitanga, he harakore i te aroaro o te Atua.

39 Ā, e haere mai ana taua mea kino, ā, e tangohia atu ana i te māramatanga me te pono, he mea nā tō rātou whakarongo kore, mai i ngā tamariki a te tangata, ā, nā ngā whakarerenga iho a ō rātou tūpuna.

40 Engari kua whakahaua koutou e ahau kia whakatupuria ake ā koutou tamariki i te māramatanga me te pono.

41 Engari he pono tāku e mea atu nei ki a koe, e taku pononga e Whererika T. Wiremu, kua hono tonu koe i raro i tēnei whakahēanga;

42 Kāore koe i whakaakona āu tamariki te māramatanga me te pono, e rite ana ki ngā whakahaunga; ā, he mana tō taua mea kino, i tēnei wā, i runga i a koe, ā, koinei te take e whiua ana koe.

43 Ināianei ā, ka hoatu e au tētahi whakahaunga ki a koe–ki te whakaputaina koe, māu tō ake whare e whakarite, nā te mea he maha tonu ngā mea kāore e tika ana i roto i tō whare.

44 He pono tāku e mea atu nei ki taku pononga a Hirini Rikitana, nā, kāore ia i pupuri i ngā whakahaunga i roto i ētahi mea e pā ana ki ana tamariki; nō reira, whakaritea tuatahitia tō whare.

45 He pono tāku e mea atu nei ki taku pononga a Hōhepa Mete Tama.,kia pēnei kē te kupu, māku koutou e kī he hoa, nā te mea ko aku hoa koutou, ā, ka whaiwāhi mai koutou i tōku taha–

46 I karangatia koutou e au he pononga he whakaaro ki te ao, ā, ko koutou ā rātou pononga he whakaaro ki ahau–

47 Ināianei ā, he pono tāku e mea atu nei ki a Hōhepa Mete Tama.–Kāore koe i pupuri i ngā whakahaunga, ā, me tika pū kia riria i te aroaro o te Ariki;

48 Me tika pū anō kia rīpenetā tō whānau, ā, kia whakarērea ētahi mea, ā, kia aro pono ake ki ā koutou kīanga, ki te kore ka tangohia atu i tō rātou wāhi.

49 Ko tāku e mea atu nei ki te kotahi, e mea atu ana ki te katoa; me inoi i ngā wā katoa kei whaimana taua mea kino i runga i a koutou, ā, kei tangohia atu koutou i tō koutou wāhi.

50 Ko taku pononga e Nuera K. Witini anō hoki, he pīhopa nō taku hāhi, e tika ana kia kohetea ia, ā, kia whakaritea tōna whānau, ā, kia kaha ake ā rātou mahi i te kāinga, ā, kia inoi i ngā wā katoa, ki te kore ka tangohia atu rātou i tō rātou wāhi.

51 Nā, ko taku kupu tēnei ki a koutou, e ōku hoa, tukua taku pononga a Hirini Rikitana kia haere i tana haerenga, ā, kia hohoro, me te whakapuaki atu i te tau pai o te Ariki, me te rongopai o te whakaoranga, pērā i tāku e hoatu nei hei kōrerotanga māna; ā, mā runga i tā koutou inoi whakapono, i te ngākau kotahi hoki e tautokongia ia e au.

52 Ā, tukua aku pononga a Hōhepa Mete Tama., rāua ko Whererika T. Wiremu kia hohoro anō hoki, ā, ka hoatu ki a rāua e rite ana ki te inoi whakapono; ā, ki te mea ka pupuri i aku kīanga e kore kōrua e whakapōauautia i tēnei ao, kaua rānei i te ao e haere mai ana.

53 Ā, he pono tāku e mea atu nei ki a koutou, nā, ko tāku e pai ai kia hohoro tā koutou whakapākehā i aku karaipiture, me te rapu i tētahi mātauranga o te hītori, o ngā whenua hoki, o ngā kīngitanga hoki, o ngāture a te tangata, ā, koinei me akatoa mō te whakaoranga o Hīona. Āmine.