1 E whakarongo, e koutou ngā erata o taku hāhi, ā, kia whai taringa mai ki ngā kupu e kōrero atu ai au ki a koutou.

2 Nana rā, he pono, he pono, tāku e mea atu nei ki a koutou, nā, kua whiwhi koutou i tētahi whakahaunga hei ture ki taku hāhi, mā roto i a ia, te mea nāku nei i whakatau mō koutou kia whiwhi i ngā whakahaunga me ngā whakakitenga i tōku ringa.

3 Ā, ka mōhio tūturu koutou ki tēnei—kāore he tangata kē atu kua whakataua mō koutou kia whiwhi whakahaunga me ngā whakakitenga tae noa ki te wā ka tangohia atu ia, ki te piritata mai ia ki ahau.

4 Engari he pono, he pono tāku e mea atu nei ki a koutou, nā, kāore he tangata kē atu e whakataua ai ki tēnei takoha hāunga mā roto i a ia; nā te mea mēnā ka tangohia atu i a ia kua kore ōna mana atu i tōna ki te whakatau atu i tētahi atu hei kaiwhakakapi mōna.

5 Ā, ka pēnei hei ture mō koutou, nā, kaua e whiwhi i ngā whakaakoranga i tētahi e puta ake ai ki mua i a koutou anō nei he whakakitenga, he whakahaunga rānei;

6 Ā, ka hoatu tēnei e au ki a koutou kia kaua koutou e tinihangatia, kia mōhio ai koutou ehara nāku rātou.

7 Nā te mea he pono tāku e mea atu nei ki a koutou, nā, me kuhu mai te tangata e whakataua ai e au ki roto i te tomokanga, ā, ka whakamanahia kia rite ki tāku i mea atu nei ki a koutou i mua, kia whakaakona aua whakakitenga kua whiwhi nei koutou, ā, ka whiwhia ērā mā roto i a ia te mea nāku i whakatau.

8 Ināianei ā, kei te hoatu e au tētahi whakahaunga ki a koutou, nā, ina whakakotahitia koutou, me tohutohu, ā, me whakakaha te whakapono o tētahi, o tētahi, kia mōhio ai koutou me pēhea koutou e mahi, ā, e whakahaere i taku hāhi, me pēhea e mahi i ngā tikanga o taku ture me aku whakahaunga kua hoatu nei e au.

9 Ā, pēnei, ka whakaakona koutou i roto i te ture o taku hāhi, ā, ka whakatapua e taua mea kua whiwhi nei koutou, ā, ka herea koutou anō kia mahi i runga i te tapu katoa i tōku aroaro—

10 Nā, ki te pēnei rawa koutou, ka tāpirihia atu te korōria ki te kīngitanga kua whiwhi nei koutou. Ki te kore koutou e pēnei, ka tangohia atu, ko taua mea pū anō kāore anō kia whiwhia e koutou.

11 Tahia atu e koutou te kino i roto i a koutou; whakatapua koutou anō i tōku aroaro;

12 Ā, ki te hiahia koutou ki ngā korōria o te kīngitanga, whakataua e koutou taku pononga a Hōhepa Mete, Tama., ā, tautokona ake ia i tōku aroaro i runga i te inoi o te whakapono.

13 Hei āpiti atu anō, ko taku kupu tēnei ki a koutou, nā, ki te hiahia koutou i ngā mea ngaro o te kīngitanga, tukua atu māna he kai, he kākahu, me ērā atu mea katoa e tika ana māna kia whakatutukihia te mahi kua whakahaua iho nei ia e ahau;

14 Ā, ki te kore koutou e pēnei ka noho tonu atu ia ki te hunga kua whiwhi nei i a ia, kia tiakina mōku ake anō tētahi iwi urutapu i tōku aroaro.

15 Ko taku kupu anō tēnei, whakarongo mai e koutou ngā erata o tōku hāhi, kua whakataua nei e au: Kāore koutou i tonoa atu kia whakaakona ai, engari kia whakaako i ngā tamariki a te tangata ki ngā mea kua purua iho ki roto i ō koutou ringaringa nā te mana o tōku Wairua;

16 Ā, e tika ana kia whakaakona koutou mai i runga rawa. Whakatapua koutou anō kātahi ka whakamanahia koutou ki te mana e taea ai te tuku atu pērā i tāku i mea ai.

17 Whakarongo mai koutou, nā te mea, nana, kua tata mai te rā nui o te Ariki.

18 Nā te mea kei te haere mai te rā e puaki mai te reo o te Ariki i te rangi; ka ngāueue ngā rangi, ā, ka tūoioi te whenua, ā, ka tangi te tētere a te Atua he mea roa, ā, he mea kaha, ā, ka kī atu ki ngā iwi katoa e moe ana: E koutou e te hunga tapu, maranga ake, e ora; e koutou te hunga hara e noho, e moe kia karanga ake anō au.

19 Nā reira whītikiria ake ō koutou hope kei kitea koutou i waenganui i te hunga kino.

20 Hīkina ake ō koutou reo kaua e puritia. Karangahia ake ngā iwi kia rīpenetā, kaumātua mai, rangatahi mai, mauhere mai, herekore mai, e mea ana: Whakatakatū i a koutou anō mō te rā nui o te Ariki;

21 Nā te mea ki te hiki ake au, he tangata i tōku reo me te karanga ake ki a koutou kia rīpenetā, kātahi ka mauāhara koutou ki ahau, ka pēhea rā tā koutou kupu ina hamumu mai ngā reo o te whatitiri mai i ngā tōpito o te ao, e kōrero ana ki ngā taringa katoa e ora ana, e mea ana—Kia rīpenetā, ā, kia takatū ai mō te rā nui o te Ariki?

22 Āe rā, hei āpiti anō, ina hikohiko mai ngā uira mai i te rāwhiti ki te uru, me te hamumu atu i ō ēnā reo ki te hunga katoa e ora ana, me te wewero ki ngā taringa e rongo ai, e mea ana i ēnei kupu—Kia rīpenetā koutou, nā te mea kua tae mai te rā nui o te Ariki?

23 Hei āpiti anō, ka hamumu te Ariki i tōna reo i te rangi, e mea ana: Whakarongo, E koutou ngā iwi o te whenua, ā, whakarongo ki ngā kupu a te Atua nāna koutou i hanga.

24 E, koutou ngā iwi o te whenua, kia pēhea te nui o taku whakamine i a koutou kia rite ki te heihei e whakamine ana i āna pīrere ki raro i ōna parirau, engari kīhai koutou i hiahia!

25 Kia pēhea te nui o taku karanga atu ki a koutou he mea nā te māngai o aku pononga, me te minitatanga o ngā anahera, mā tōku ake reo anō hoki, me te reo o ngā whatitiri, me te reo o ngā uira, me te reo o ngā tūpuhi, me te reo o ngā rū whenua, me te reo o ngā ua whatu, me te reo o ngā matekai me ngā urutā o ia āhua, o ia āhua, ā, mā te reo nui o tētahi tētere me te reo whakawā, ā, mā te reo whakaaroha i te roanga atu o te rā, ā, mā te reo korōria me te hōnore me ngā taonga o te oranga tonutanga, ā, kua whakaorangia koutou ki tētahi oranga mau tonu, engari kīhai koutou i hiahia!

26 Nana, kua tae mai te rā, ina purena te kapu o taku riri.

27 Nana, he pono tāku e mea atu nei ki a koutou, nā, koinei ngā kupu a te Ariki tō koutou Atua.

28 Nā reira, e mahi koutou, e mahi koutou i roto i taku māra wāina mō te wā whakamutunga—me karanga ake koutou ki ngā tāngata katoa o te ao mō te wā whakamutunga.

29 Ka tau iho au ki runga i te whenua i runga i te whakawākanga i tōku ake anō wā, ā, ka hokona anōtia tōku iwi, ā, ka whakahaere ngātahi me au i runga i te whenua.

30 Nā te mea ka puta mai te Manonga Tau nui kua kōrerotia nei e te māngai o aku pononga.

31 Nā te mea ka herea a Hātana, ā, ina wetekina atu ia anō ka whakahaere ia mō tētahi wā poto, kātahi ka puta mai te mutunga o te ao.

32 Ā, ka panonitia te tangata e noho tika ana i te kimonga o te karu, ā, ka pahemo atu te ao me te mea nei nā te ahi.

33 Ā, ka haere atu te hunga kino ki roto ki tētahi ahi tē taea te tinei, ā, kāore e mōhiotia ana tō rātou tukunga iho e tētahi i runga i te whenua, e kore rawa atu e mōhiotia ai, kia tae mai rātou ki tōku aroaro i runga i te whakawākanga.

34 Whakarongo koutou ki ēnei kupu. Nana, ko Ihu Karaiti ahau, te Kaiwhakaora o te ao. Puritia ake ēnei mea i roto i ō koutou ngākau, ā, kia whaiwhakaaro mō ngā mea mau tonu i ō koutou hinengaro.

35 Kia whaiwhakaaro. Puritia aku whakahaunga katoa. Koia anō. Āmine.