1 Ko te whakarewatanga ake o te Hāhi o Ihu Karaiti i ēnei rā o muri nei, kua hipa atu ngā tau kotahi mano e waru rau e toru tekau tau mai i te haerenga mai a tō tātou Ariki me tō tātou Kaiwhakaora a Ihu Karaiti i roto i te kikokiko, he mea whakarite, he mea whakapūmau kia hāngai ai ki ngā ture o tō tātou whenua, i runga i te hiahia me ngā whakahaunga a te Atua, i te marama tuawhā, i runga i te rā tuaono o te marama e karangatia nei ko Aperira—

2 I hoatu aua whakahaunga ki a Hōhepa Mete, Tama., i karangatia nei e te Atua, ā, i whakamanaia hoki hei āpōtoro nā Ihu Karaiti, ko ia hoki te erata tuatahi mō tēnei hāhi;

3 Ā, ki a Oriwa Kautere, i karangatia anō hoki e te Atua, he āpōtoro nā Ihu Karaiti, ko ia hoki te erata tuarua o tēnei hāhi, ā, i whakaūngia e ōna ringaringa.

4 Ā, e rite ana tēnei ki te aroha o tō tātou Ariki me tō tātou Kaiwhakaora a Ihu Karaiti, ki a ia te korōria katoa, ināianei, ā, āke tonu atu. Āmine.

5 Whai muri iho i te tino whakakitenga ki tēnei erata tuatahi, nā, kua riro i a ia tētahi murunga i ōna hara, i te whīwhiwhi ia i roto i ngā mea horihori o te ao;

6 Engari whai muri iho i te rīpenetātanga, e whakaiti pono ana i a ia anō, mā roto i te whakapono, i minita te Atua ki a ia mā runga i te toronga iho o tētahi anahera, ko tōna āhua e rite ana ki te uira, ā, ko ōna kākahu he poke kore, ā, he mā ake i ngā mea mā katoa;

7 Ā, ka hoatu whakahaunga ki a ia mā reira whakaaweawe ai i a ia;

8 Ā, i hoatu mana ki a ia nō runga, he meatanga nā ngā mea i whakaritea ai i mua, ki te whakapākehā i te Pukapuka a Moromona;

9 E mau nei tētahi tuhituhinga mō tētahi iwi taka, me te raneatanga o te rongopai a Ihu Karaiti ki ngā Tauiwi me ngā Hūrai anō hoki;

10 He mea homai i runga i te whakaweawenga, ā, kua whakakoia nei ki ētahi atu i runga i te minitatanga o ngā anahera, ā, kua whakapuakina atu ki te ao e rātou—

11 E whakatūturuhia ana ki te ao, nā, he pono ngā karaipiture tapu, ā, e whakamōhio ana te Atua ki ngā tangata me te karanga i a rātou ki tana mahi tapu i tēnei wā me tēnei whakatipuranga, e rite ana ki ngā whakatipuranga onamata;

12 Nā konā whakaatu mai ai koia tonu te Atua inānahi, ināianei, ā, āke tonu atu. Āmine.

13 Nō reira, i te mea he nui rawa ngā whakaaturanga, mā konā whakawākia ai te ao, arā, ko ngā mea katoa e tae atu ai ki tētahi mōhiotanga ki tēnei mahi a muri ake nei.

14 Ā, ko te hunga e whiwhi ai i runga i te whakapono, me te mahi tika, ka whiwhi ki tētahi karauna o te oranga tonutanga;

15 Engari ko te hunga e whakapakeke i ō rātou ngākau i runga i te whakaponokore, me te whakaparahako i a ia, ka tahuri atu hei whakahēnga mō rātou ake—

16 Nā te mea kua kōrerotia ake nei e te Ariki te Atua; ā, kua rongo mātou, kei te whakaatu mātou, ngā erata o te hāhi, i ngā kupu a te Kīngi whaikorōria i runga rawa, mōna nei hoki te korōria āke tonu atu. Āmine.

17 Nā ēnei mea e mōhio ai tātou he Atua anō i te rangi, he mea mutunga kore, ā, he mea ora tonu, mai i te āke tonu atu ki te āke tonu atu, te Atua panoni kore e rite tonu ana, te kaihanga o te rangi me te whenua, me ngā mea katoa kei roto rā;

18 Ā, nāna te tangata i hanga, te tāne me te wahine, kia rite ki tōna ake āhua, ā, kei roto i tōna āhua te āhua i hangaia ai rāua e ia;

19 Ā, i hoatu ki a rāua he whakahaunga kia aroha, kia mahi rāua ki a ia, te Atua pono e ora tonu ana anake, ā, kia waiho ko ia anake te mea e koropikotia ai e rāua.

20 Engari, mā te takahi iho i ēnei ture tapu ka meinga te tangata hei mea tūkari, ā, hei mea rēwera, ā, ka meinga hei tangata taka.

21 Nā reira, i homai e te Atua Kaha Rawa i tana Tama Kotahi Anake, e rite ana ki ngā mea kua tuhia iho i roto i aua karaipiture kua tukuna mai e ia.

22 I mamae ia i ngā whakawainga engari kīhai ia i aro atu ki aua mea.

23 I rīpekatia ia, ka mate, ā, ka ara ake anō i te rā tuatoru;

24 Ā, ka kake ake ki te rangi, kia noho iho i te ringa matau o te Matua, kia whakahaere i runga i te mana nui e rite ana ki tā te Matua e pai ai;

25 Kia whakaorangia ai ngā tāngata katoa e whakapono ana, ā, e rumakina ana i runga i tōna ingoa tapu, me te ū i runga i te whakapono tae noa atu ki te mutunga—

26 Ehara i te mea ko te hunga anake i whakapono ai whai muri iho i tana haerenga mai i roto i te kikokiko i te poutūmārōtanga o ngā wā, engari ko te hunga katoa mai i te tīmatanga, ko te hunga katoa i ora ai i mua i tana haerenga mai, i whakapono ai i ngā kupu a ngā poropiti tapu, i kōrero ai i a rātou e whakaaweawehia ana e te takohatanga a te Wairua Tapu, i tino whakaaturia nei mōna i roto i ngā mea katoa, ko te hunga ērā e whiwhi ai ki te oranga tonutanga,

27 Pērā me te hunga katoa e puta mai ai whai muri iho, e whakapono ai ki ngā takoha me ngā karangatanga a te Atua i runga i te Wairua Tapu, e whakaatu mai nei e pā ana ki te Matua rāua ko te Tama;

28 He Atua kotahi taua Matua, Tama me te Wairua Tapu, he mea mutunga kore, he mea ora tonu, kāore ōna mutunga. Āmine.

29 Ā, e mōhio ana mātou me rīpenetā ngā tāngata katoa me te whakapono ki te ingoa o Ihu Karaiti, me te koropiko ki te ingoa o te Matua, me te tākare i runga i te whakapono ki tōna ingoa tae noa ki te mutunga, ki te kore e kore rātou e whakaorangia ai i roto i te kīngitanga o te Atua.

30 Ā, e mōhio ana mātou e tika ana, e pono ana te whakawākanga mā roto i te aroha o tō tātou Ariki me tō tātou Kaiwhakaora a Ihu Karaiti;

31 Ā, e mōhio ana anō hoki mātou, nā, e tika ana, e pono ana te whakatapunga mā roto i te aroha o tō tātou Ariki me tō tātou Kaiwhakaora a Ihu Karaiti, ki te hunga katoa e aroha ana, e mahi ana ki te Atua i runga i ō rātou uaua, ō rātou whakaaro, me ō rātou kaha.

32 Engari e taea ana anō e te tangata te taka i te aroha me te wehe atu i te Atua ora;

33 Nō reira, tukuna te hāhi kia tūpato ai, kia inoi ai i ngā wā katoa, kei taka iho rātou ki roto i te whakawainga;

34 Āe rā, tukuna anōtia te hunga kua whakatapungia kia tūpato anō hoki.

35 Ā, e mōhio ana mātou e pono ana ēnei mea e rite ana ki ngā whakakitenga a Hōani, kāore e tāpiri atu ana, e tangohia atu ana rānei i te poropititanga o tana pukapuka, ngā karaipiture tapu, i ngā whakakitenga rānei o te Atua e puta mai ai a muri ake nei i runga i te takohatanga me te mana o te Wairua Tapu, te reo o te Atua, i te minitatanga rānei o ngā anahera.

36 Ā, kua kōrerotia nei e te Ariki te Atua; he hōnore, he mana, he korōria ki tōna ingoa, ināianei, ā, āke tonu atu. Āmine.

37 Hei āpiti anō, mā runga i te whakahaunga ki te hāhi e pā ana ki te āhuatanga o te rumaki—Ko te hunga katoa e whakaiti i a rātou anō i te aroaro o te Atua, me te hiahia kia rumakina, me te haere mai i runga i te ngākau marū me te wairua iro, me te whakaatu atu i mua i te hāhi kua tino rīpenetā pono rātou i ō rātou hara katoa, ā, e hiahia ana kia tango ki runga ki a rātou te ingoa o Ihu Karaiti, e hiahia katoa ana ki te mahi ki a ia tae noa ki te mutunga, me te tino whakakite atu mā ā rātou mahinga, nā, kua whiwhi rātou i te Wairua o te Karaiti ki te murunga i ō rātou hara, koia te hunga e whiwhi nei ki te rumakitanga ki roto ki tana hāhi.

38 Ko te mahi a ngā erata, pirihi, kaiako, rīkona, me ngā mema o te hāhi o te Karaiti—He erata te āpōtoro, ā, ko te rumakitanga tōna karangatanga;

39 Ā, ki te whakamana i ētahi atu erata, pirihi, kaiako, me ngā rīkona;

40 Ā, ki te whakatapu i te taro me te waina—ngā tohu o te kikokiko me te toto o te Karaiti—

41 Ā, kia whakaūngia te hunga e rumakina ana ki roto ki te hāhi, mā te whakapā i ngā ringaringa mō te rumakitanga o te ahi me te Wairua Tapu, e rite ana ki ngā karaipiture;

42 Me te whakaako, te whakamārama, te akiaki, te rumaki, me te tiaki i te hāhi;

43 Ā, ki te whakaū i te hāhi i runga i te whakapākanga o ngā ringaringa, me te hoatutanga o te Wairua Tapu;

44 Ā, ki te whakahaere i ngā hui katoa.

45 Mā ngā erata ngā hui e whakahaere i a rātou e ārahina ana e te Wairua Tapu, e rite ana ki ngā whakahaunga me ngā whkakitenga o te Atua.

46 Ko te mahi a te pirihi, he whakaako, he whakamārama, ā, he rumaki, me te whakatapu i te hakarameta,

47 Me te toro atu ki ngā kāinga o ia mema, me te akiaki i a rātou ki te inoi ā-waha, i muri hoki i te tirohanga kanohi me te aro atu ki ngā mahi katoa a te whānau.

48 Ā, māna anō e whakamana i ētahi atu pirihi, kaiako, me ngā rīkona.

49 Ā, māna anō e whakahaere hui ina kāore i reira tētahi erata;

50 Engari mehemea i reira tētahi erata, ko tāna noa he kauhau, he whakaako, he whakamārama, he akiaki, ā, he rumaki,

51 Ā, me torotoro atu ki ngā kāinga o ia mema, me te akiaki i a rātou ki te inoi ā-waha, i muri hoki i te tirohanga kanohi me te aro atu ki ngā mahi katoa a te whānau.

52 Me āwhina te pirihi i te erata i roto i ēnei mahi katoa mēnā e tika ana.

53 Ko te mahi a te kaiako he tiaki i te hāhi i ngā wā katoa, ā, kia piritahi, kia whakakaha i a rātou;

54 Ā, tirohia kia kaua he mahi kino i roto i te hāhi, kia kaua hoki he mauāhara tētahi i tētahi, he rūkahu hoki, he ngau tuarā, he kōrero kino rānei;

55 Ā, tirohia kia hui putuputu te hāhi, tirohia hoki kia meatia e ngā mema ā rātou mahi.

56 Ā, māna anō e whakahaere ngā hui mēnā e ngaro ana te erata, te pirihi rānei—

57 Ā, kia āwhinatia hoki i ngā wā katoa, i roto i āna mahi i roto i te hāhi, e ngā rīkona, mehemea e tika ana.

58 Engari kāore he mana ō ngā kaiako, ō ngā rīkona rānei ki te rumaki, ki te whakahaere i te hakarameta, ki te whakapā rānei i ngā ringaringa;

59 Heoi, ko tā rātou, he whakatūpato, he whakamārama, he akiaki, me te whakaako, me te tono mai i te katoa kia haere mai ai ki te Karaiti.

60 Me whakamana ia erata, pirihi, kaiako, rīkona rānei e rite ana ki ngā takohatanga me ngā karangatanga a te Atua ki a ia; ā, ka whakamanaia hoki ia e te mana o te Wairua Tapu, kei roto nei i te mea e whakamana ana i a ia.

61 Me tū ngā hui mō ngā erata o tēnei hāhi o te Karaiti i ia toru marama, i tēnā wā, i tēnā wā rānei, i te mea ka whakahaere, ā, ka whakarite rānei aua hui kua kōrerotia ake nei;

62 Ā, mā aua huihuinga kua kōrerotia ake nei e whakarite i ngā mahi katoa o te hāhi e tika ana hei mahi i taua wā.

63 Ka whiwhi ngā erata i ā rātou raihana i ētahi atu erata, mā runga i te reo pōti o te hāhi e noho nei rātou, mai i ngā huihuinga rānei.

64 Me tiki e ia pirihi, ia kaiako, ia rīkona rānei, kua whakamanaia e tētahi pirihi, tētahi tiwhikete i a ia i taua wā, ko taua tiwhikete, ina tukuna ki tētahi erata, e whiwhi ia ki tētahi raihana, e whakamanahia ia ki te mahi i ngā mahi o tana karangatanga, ka whiwhi ia i roto i tētahi huihuinga rānei.

65 Kaua tētahi tangata e whakamanaia ai ki tētahi tūranga i tēnei hāhi, i te wāhi kua oti nei he peka o te hāhi te whakatū ki reira, me i kore i runga i te pōti a te hāhi;

66 Engari kei ngā erata whakahaere, ngā pīhopa hāereere, ngā pirihi teitei, me ngā erata te tikanga ki te whakamana i ngā wāhi kāore he peka o te hāhi i reira kia tuku pōti ai.

67 Me whakamana e ia tumuaki o te pirihitanga teitei (erata whakahaere rānei), pīhopa, kaikaunihera teitei, pirihi teitei hoki, i runga i ngā tohutohu a tētahi runanga kaunihera teitei, i tētahi huihuinga whānui rānei.

68 Ko te mahi a ngā mema i muri i tā rātou urunga mai mā roto i te rumakitanga—E tika ana kia whai wā anō ngā erata, ngā pirihi rānei ki te whakamārama i ngā mea katoa e pā ana ki te hāhi o te Karaiti e rite ana ki tā rātou e mārama ai, i mua i tā rātou kai i te hakarameta, i mua hoki i tā rātou whakaūnga ki te whakapākanga o ngā ringaringa o ngā erata, kia meatia ngā mea katoa i runga i te tika.

69 Ā, mā ngā mema e whakakite atu i te aroaro o te hāhi, i te aroaro anō hoki o ngā erata, mā runga i tētahi hīkoi me tētahi kōrero nō tā te Atua āhua, nā, e tika ana rātou mō te kai hakarameta, kia ai he mahi, he whakapono e rite ana ki tā ngā karaipiture tapu—e hīkoi ana i runga i te tika i te aroaro o te Ariki.

70 Me kawe mai e ia ngā mema o te hāhi o te Karaiti e whai tamariki ana ki ngā erata i te aroaro o te hāhi, mā rātou e whakapā i ō rātou ringaringa ki runga ki a rātou i runga i te ingoa o Ihu Karaiti, me te manaaki i a rātou i runga i tōna ingoa.

71 Kāore e whakaaengia ana kia uru tētahi ki roto ki te hāhi o te Karaiti ki te kore ia e tae ki ngā tau e mōhio ai ia ki te pai me te kino i te aroaro o te Atua, ā, e āhei ana hoki te rīpenetā.

72 Me whakahaere te rumaki i runga i tēnei āhua ki te hunga katoa e rīpenetā ana—

73 Me heke iho te tangata kua karangatia nei e te Atua, ā, kei a ia hoki te mana i a Ihu Karaiti kia rumaki ki roto i te wai i te taha o te tangata e hiahia ana kia rumakina, kātahi ia ka kī, e karangatia ana ia ki tōna ingoa: Kua whakamanaia ahau e Ihu Karaiti, ka rumakina koe e ahau i runga i te ingoa o te Matua, o te Tama, o te Wairua Tapu. Āmine.

74 Kātahi ia ka rumaki i a ia ki roto i te wai, ā, ka puta mai anō ki waho i te wai.

75 E tika pū ana kia hui putuputu te hāhi ki te kai i te taro me te waina hei whakamaharatanga ki te Ariki a Ihu;

76 Ā, mā te erata, mā te pirihi rānei e whakatapu te hakarameta; ā, ka whakatapua e ia i runga i tēnei āhua—me tūturi iho ia me te hāhi, ā, ka karanga ake ki te Matua i runga i te karakia tino pono, e mea ana:

77 E te Atua, e te Matua ora tonu, e inoi ake ana mātou ki a koe i runga i te ingoa o tāu Tama o Ihu Karaiti, kia whakapaingia, kia whakatapua tēnei taro mō ngā wairua o te hunga katoa e kai ana, kia kainga e rātou hei whakamaharatanga ki te tīnana o tāu Tama, me te whakaatu atu ki a koe, e te Atua, e te Matua ora tonu, e whakaae ana rātou kia mau ki runga ki a rātou te ingoa o tāu Tama, ā, ka mahara tonu ki a ia, ka pupuri i āna ture i homai nei e ia ki a rātou, kia noho tonu ai tōna Wairua i a rātou. Āmine.

78 Ko te āhua e whakatapua ai te waina—ka tīkina e ia te kapa anō hoki, ā, ka kī:

79 E te Atua, e te Matua ora tonu, e inoi ake ana mātou ki a koe i runga i te ingoa o tāu Tama, o Ihu Karaiti, kia whakapaingia, kia whakatapua tēnei waina mō ngā wairua o te hunga katoa e inu ana, kia meatia e rātou hei whakamaharatanga ki ngā toto o tāu Tama i whakahekea nei mō rātou; kia whakaatu atu ai rātou ki a koe e te Atua, e te Matua ora tonu, ka mahara tonu rātou ki a ia, kia noho ai tōna Wairua i a rātou. Āmine.

80 Mehemea ka hara tētahi mema o te hāhi o te Karaiti, ki te mau rānei i roto i te hē, ka whakawākia kia rite ki tā ngā karaipiture.

81 Ko te mahi a ngā pekanga o te hāhi, nō te hāhi o te Karaiti, kia tonoa atu tētahi, ētahi rānei o ō rātou kaiako kia haere atu ai ki ngā huihuinga e whakatūria ai e ngā erata o te hāhi,

82 Kia kawea atu hoki e rātou tētahi rārangi ingoa o ngā mema katoa kua uru mai nei ki roto i te hāhi nō muri mai i te huihuinga whakamutunga; tukuna rānei e te ringa o tētahi pirihi; kia meatia e tētahi o ngā erata tētahi rārangi ingoa o te hāhi katoa i roto i tētahi pukapuka, mā ērā atu erata e tohu mā wai tēnei e mahi i tēnei wā, i tēnei wā;

83 Hei āpiti anō, mehemea kua panaia atu ētahi i te hāhi, e murua atu ai ō rātou ingoa i te pukapuka ingoa o te hāhi whānui.

84 Ko ngā mema katoa e haere atu ana i te hāhi e noho nei rātou, mehemea e haere atu ana ki tētahi hāhi kāore e mōhiotia nei rātou, e āhei ana i a rātou te hari reta e whakamana ana he mema tūturu rātou, ā, he pai tō rātou tūnga, mā tētahi erata, mā tētahi pirihi rānei e waitohu taua reta mehemea e mōhio ana te mema e whiwhi nei taua reta ki te erata, ki te pirihi rānei, me haina rānei taua reta e ngā kaiako, e ngā rīkona rānei o te hāhi.